18-Jul-2019 (Thu)
 
 
 
മാധ്യമ പ്രവര്‍ത്തകന് യൂത്ത് ലീഗ് നേതാവിന്റെ ഭീഷണിയും അസഭ്യ വര്‍ഷവും
താമരശ്ശേരി: മാധ്യമ പ്രവര്‍ത്തകനു നേരെ യൂത്ത് ലീഗ് നേതാവിന്റെ ഭീഷണിയും അസഭ്യ വര്‍ഷവും. യൂത്ത് ലീഗ് സംസ്ഥാന സീനിയര്‍ വൈസ് പ്രസിഡന്റും ജില്ലാ പഞ്ചായത്ത് അംഗവുമായ നജീബ് കാന്തപുരമാണ് മാധ്യമ പ്രവര്‍ത്തകനായ സിദ്ദീഖ് പന്നൂരിനെ ഫോണിലൂടെ അസഭ്യം പറഞ്ഞത്. നജീബിന്റെ ഭാര്യ താഹിറ പ്രധാനാധ്യാപികയായ കാന്തപുരം ഈസ്റ്റ് എ എം എല്‍ പി സ്‌കൂളില്‍ പി ടി എ ഭാരവാഹികളോട് ആലോചിക്കാതെ പ്രധാനാധ്യാപിക പി ടി എ ജനറല്‍ ബോഡി വിളിച്ചു ചേര്‍ക്കുന്നുവെന്നും ഏകപക്ഷീയമായി തീരുമാനങ്ങള്‍ എടുക്കുന്നുവെന്നും പരാതി ഉയര്‍ന്നിരുന്നു. ഇതിന്റെ നിജസ്ഥിതി അന്വേഷിക്കാന്‍ സിദ്ദീഖ് പന്നൂര്‍ പ്രധാനാധ്യാപിക താഹിറയെ ഫോണില്‍ വിളിച്ചിച്ചു. ഫോണ്‍ എടുക്കാതിരുന്ന താഹിറ തിരിച്ച് വിളിച്ചപ്പോള്‍ പി ടി എ യോഗം സംബന്ധിച്ച് അന്വേഷിച്ചു. എ ഇ ഒ ഓഫീസിലാണെന്നും പിന്നീട് വിളിക്കാമെന്നുമായിരുന്നു മറുപടി. വൈകിട്ട് താഹിറ നാല് തവണ വിളിച്ചതിനെ തുടര്‍ന്ന് സിദ്ദീഖ് തിരിച്ചു വിളിച്ചു. റിപ്പോര്‍ട്ടറുടെ പേരും വിവരങ്ങളും ചോദിച്ച ഉടനെ ഫോണ്‍ നജീബിന് കൈമാറി. നജീബ് കാന്തപുരമാണെന്ന് പരിചയപ്പെടുത്തിയ ശേഷം എന്താണ് കാര്യമെന്ന് ചോദിച്ചു. സ്‌കൂള്‍ പി ടി എ യുമായി ബന്ധപ്പെട്ട കാര്യം അന്വേഷിക്കാനാണ് വിളിച്ചതെന്ന് പറഞ്ഞപ്പോള്‍ ഒരു സ്‌കൂളിലെ ഒരു വിഷയും അന്താരാഷ്ട്ര വാര്‍ത്തയൊന്നും അല്ലെന്നായിരുന്നു മറുപടി. ഇത്തരം വിഷയങ്ങളില്‍ അനാവശ്യമായി ഇടപെടരുതെന്നും പറഞ്ഞു. വിശദീകരണം അറിയാനാണ് വിളിച്ചതെന്ന് പറഞ്ഞപ്പോള്‍ നീ പോടാ എന്നും എന്റെ ഭാര്യയെ വിളിക്കരുതെന്നും പറഞ്ഞു. സ്‌കൂളിന്റെ പ്രധാനാധ്യാപിക എന്ന നിലക്കാണ് വിളിച്ചതെന്ന് പറഞ്ഞപ്പോള്‍ ചെലക്കാതെ പോടാ എന്നായിരുന്നു മറുപടി. ജില്ലാ പഞ്ചായത്ത് അംഗം കൂടിയായ യൂത്ത് ലീഗ് നേതാവിന്റെ സഭ്യതയില്ലാത്ത സംസാരം സോഷ്യല്‍ മീഡിയയില്‍ വയറലായതോടെ മാധ്യമ പ്രവര്‍ത്തകനെ കള്ളകേസില്‍ കുടുക്കാനും ശ്രമം നടക്കുന്നുണ്ട്.
 
പുനര്‍ജനിയിലൂടെ പുനര്‍ജനിച്ച് ജില്ലയിലെ കാര്‍ഷിക മേഖല
കോഴിക്കോട്: പുനര്‍ജനിയിലൂടെ പുനര്‍ജനിച്ച് ജില്ലയിലെ കാര്‍ഷിക മേഖല. പ്രളയം തകര്‍ത്തെറിഞ്ഞ കാര്‍ഷിക മേഖലയെ സര്‍ക്കാരും കൃഷി വകുപ്പും കര്‍ഷകരും ചേര്‍ന്ന് തിരിച്ചു പിടിച്ച് കഴിഞ്ഞു. ജില്ലയില്‍ വീടിനൊപ്പം കൃഷിഭൂമിയും നഷ്ടപ്പെട്ടവര്‍ക്ക് കേന്ദ്ര വിഹിതത്തിന് പുറമെ സംസ്ഥാന സര്‍ക്കാര്‍ കൃഷിവകുപ്പ് മുഖേന വിതരണം ചെയ്തത് പത്ത് കോടി രൂപയാണ്. കാര്‍ഷിക മേഖലയുടെ പുനര്‍ സൃഷ്ടിക്കായി സര്‍ക്കാര്‍ ആവിഷ്‌കരിച്ച പൂനര്‍ജനി പദ്ധതി കാര്‍ഷിക സമ്പത്ത് തിരിച്ച് പിടിക്കുന്നതില്‍ പ്രധാന പങ്ക് വഹിച്ചു. പദ്ധതിയുടെ ഭാഗമായി പ്രളയം മൂലം കൃഷി നാശം സംഭവിച്ച കര്‍ഷകര്‍ക്ക് വിളയിറക്കാന്‍ കൃഷിഭൂമിയൊരുക്കി നടീല്‍ വസ്തുക്കള്‍ നല്‍കി. ഇതിന് പൂറമെ പ്രളയാനന്തരം സ്വീകരിക്കേണ്ട കൃഷി മുറകളെ കുറിച്ച് കര്‍ഷകരെ ബോധവല്‍കരിക്കാനും വകുപ്പിന് സാധിച്ചു. കൃഷിഭൂമിക്കൊപ്പം കര്‍ഷകരുടെ മാനസിക അവസ്ഥയും പാകപ്പെടുത്തുക എന്ന ലക്ഷ്യത്തോടെ പുനര്‍ജനിയുടെ ഭാഗമായി ബോധവല്‍കരണ പരിപാടിയും സംഘടിപ്പിച്ചു. കൃഷിയെ തിരിച്ചുപിടിക്കാന്‍ പന്ത്രണ്ട് ബ്ലോക്ക് പഞ്ചായത്തുകള്‍ മുഖേന കര്‍ഷകര്‍ക്ക് പുനര്‍ജനി കിറ്റുകള്‍ വിതരണം ചെയ്തു. 49000 തൈകള്‍, 10940 വിത്ത് കിറ്റ്, 100 പുനര്‍ജനി വിത്ത് കിറ്റ് എന്നിവയാണ് പദ്ധതിയുടെ ഭാഗമായി വിതരണം ചെയ്തത്. 2.61 ലക്ഷം രൂപയാണ് കൃഷി വകുപ്പ് ഇതിനായി ഉപയോഗപ്പെടുത്തിയത്. 12 മെട്രിക് ടണ്‍ നെല്ല്, 57694 പച്ചക്കറി വിത്ത് പാക്കറ്റ്, 7000 പച്ചക്കറി തൈകള്‍ എന്നിവയാണ് പ്രളയാനന്തര കാര്‍ഷിക മേഖലയുടെ പുനരുജ്ജീവത്തിനായി ജില്ലയില്‍ വിതരണം ചെയ്തത്. കൂടാതെ കൃഷി വകുപ്പിന്റെ വിവിധ പദ്ധതികള്‍ക്ക് കീഴില്‍ പുനര്‍നിര്‍മ്മാണ പ്രവര്‍ത്തനങ്ങളുടെ ഭാഗമായി നാല് ലക്ഷം പച്ചക്കറി തൈകളും നാല് ലക്ഷം പച്ചക്കറി വിത്ത് പാക്കറ്റുകളും വിതരണം ചെയ്തു. സംസ്ഥാന ഹോര്‍ട്ടി കള്‍ച്ചര്‍ മിഷന്‍ പദ്ധതിയിലെ വിവിധ ഘടകങ്ങള്‍ക്കായി 395.6 ലക്ഷം രൂപ അധികമായി അനുവദിക്കുകയും ചെയ്തു. വെള്ളപ്പൊക്കത്തില്‍ നശിച്ച തോടുകള്‍ ആഴം കൂട്ടി കയര്‍ ഭൂവസ്ത്രം ഉപയോഗിച്ച് പാര്‍ശ്വ ഭിത്തി കെട്ടി സംരക്ഷിക്കാന്‍ തൊഴിലുറപ്പ് പദ്ധതിയില്‍ ഉള്‍പ്പെടുത്തി പദ്ധതി തയ്യാറാക്കാനും കാര്യക്ഷമമായി അവ നടപ്പിലാക്കാനും ജില്ലയില്‍ കൃഷിവകുപ്പിന് സാധിച്ചു. 2018 ആഗസ്റ്റിലെ പ്രളയത്തില്‍ ജില്ലയിലെ കാര്‍ഷിക മേഖലയില്‍ 1951.665 ലക്ഷം രൂപയുടെ നഷ്ടമാണ് ഉണ്ടായത്. 860.68 ഹെക്ടര്‍ കൃഷിഭൂമിയെ ആണ് പ്രളയം ബാധിച്ചത്. കേരളത്തിലെ പ്രളയ ദുരിതബാധിത കര്‍ഷകര്‍ക്ക് സംസ്ഥാനതല ബാങ്കേര്‍സ് സമിതിയും സര്‍ക്കാരും സംയുക്തമായി പ്രഖ്യാപിച്ച ഇളവുകളും ആനുകൂല്യങ്ങളും കാര്‍ഷികമേഖലയുടെ കുതിപ്പിന് ആക്കം കൂട്ടി. നിലവിലുളള വിള വായ്പകള്‍ തിരിച്ചടയ്ക്കുന്നതിന് ഒരു വര്‍ഷം വരെ മൊറൊട്ടോറിയവും തുടര്‍ന്ന് തിരിച്ചടവിന് 5 വര്‍ഷം വരെ അധിക കാലാവധിയും കാര്‍ഷിക വിള വായ്പയുടെ ഭാഗമായി കര്‍ഷകര്‍ക്കായി അനുവദിച്ചു. കൃഷി ആവശ്യത്തിന് നിലവിലെ തോത് അനുസരിച്ചും ഭൂമിയുടെ വിസ്തീര്‍ണ്ണം, വിളവിന്റെ സ്വഭാവം എന്നിവയ്ക്കനുസരിച്ചും മാര്‍ജിനോ അധിക ഈടോ ഇല്ലാതെ പുതിയ വായ്പ അനുവദിച്ചു. നിലവിലുളള വായ്പയ്ക്കും പുതിയ വായ്പയ്ക്കും നിശ്ചിത കാലാവധി വരെ സാധാരണ പലിശ മാത്രം ഈടാക്കി. വിളനാശം ഉണ്ടായവര്‍ക്കും അതോടൊപ്പം വളര്‍ത്തുമൃഗങ്ങള്‍, കാര്‍ഷികോപകരണങ്ങള്‍ എന്നിവ നഷ്ടപ്പെട്ടവര്‍ക്കും നിലവിലെ വായ്പകള്‍ക്ക് 12 മുതല്‍ 18 മാസം വരെ മൊറൊട്ടോറിയം അനുവദിക്കുകയും നിലവിലുളള വായ്പകള്‍ തിരിച്ചടക്കുന്നതിന് ഒരു വര്‍ഷം മുതല്‍ അഞ്ച് വര്‍ഷം വരെ അധിക കാലാവധി നല്‍കുകയും ചെയ്തു. കന്നുകാലികള്‍, കാര്‍ഷികോപകരണങ്ങള്‍, മറ്റു കാര്‍ഷിക ആവശ്യങ്ങള്‍, എന്നിവയ്ക്കായി ആവശ്യാനുസരണം പുതിയ വായ്പകള്‍ അനുവദിച്ചു. പുതിയ വായ്പകള്‍ക്ക് ഈടോ, ഗ്യാരണ്ടണ്‍ിയോ നല്‍കാതെ വായ്പകള്‍ അനുവദിക്കുകയും ചെയ്തു.
 
ലഹരി ഗുളികകളുമായി കോഴിക്കോട് സ്വദേശി അറസ്റ്റില്‍
കോഴിക്കോട്: 710 ഗ്രാം ലഹരി ഗുളികകളുമായി കോഴിക്കോട് സ്വദേശി അറസ്റ്റില്‍. കോഴിക്കോട് പരപ്പില്‍ സ്വദേശി ബര്‍ജീസ് റഹ്മാന്‍(22) ആണ് മുത്തങ്ങ എക്‌സൈസ് ചെക്ക് പോസ്റ്റില്‍ അറസ്റ്റിലായത്. വയനാട് എക്‌സൈസ് ഇന്റലിജന്‍സിന് ലഭിച്ച രഹസ്യ വിവരത്തെ തുടര്‍ന്ന് നടത്തിയ വാഹന പരിശോധനക്കിടെയാണ് ലഹരി ഗുളികകളുമായി പ്രതി പിടിയിലായത്. രാത്രി സമയ യാത്രാനിരോധനം ആരംഭിക്കുന്ന സമയത്തെ തിരക്കിനിടയില്‍ കെ എസ് ആര്‍ ടി സി ബസില്‍ കടത്താന്‍ ശ്രമിച്ച ട്രമഡോള്‍ അടങ്ങിയ 1330 ലഹരി ഗുളികകള്‍ എക്‌സൈസ് പിടിച്ചെടുത്തു.
 
അന്‍പത് ഗ്രാം കഞ്ചാവുമായി യുവാവ് എക്സൈസിന്റെ പിടിയിലായി
താമരശ്ശേരി: അന്‍പത് ഗ്രാം കഞ്ചാവുമായി യുവാവ് എക്സൈസിന്റെ പിടിയിലായി. കൂടരഞ്ഞി കാരാട്ടുപാറ കളരാത്ത് അജിത്തിനെ(21)യാണ് താമരശ്ശേരി എക്‌സൈസ് ഇന്‍സ്‌പെക്ടര്‍ പി പി വേണുവുവിന്റെ നേതൃത്വത്തിലുള്ള സംഘം അറസ്റ്റ് ചെയ്തത്. നിരവധി പരാതികള്‍ ലഭിച്ചതിനെ തുടര്‍ന്ന് ഇയാളെ എക്സൈസ് നിരീക്ഷിച്ചു വരികയായിരുന്നു. കാരാട്ടുപാറയില്‍ വെച്ച് കഞ്ചാവ് വില്‍പന നടത്തുന്നതിനിടെയാണ് അജിത്ത് എക്സൈസിന്റെ പിടിയിലായത്. 5 ഗ്രാം വീതമുള്ള ചെറിയ പൊതികളാക്കിയാണ് കഞ്ചാവ് വില്പന നടത്തിയിരുന്നത്. പ്രിവന്റീവ് ഓഫീസര്‍മാരായ അനില്‍ കുമാര്‍, സുരേഷ് ബാബു, സിവില്‍ എക്‌സൈസ് ഓഫീസര്‍മാരായ പ്രസാദ്, വിവേക്, ശ്യാം പ്രസാദ്, നൗഷീര്‍, ഡ്രൈവര്‍ കൃഷ്ണന്‍ എന്നിവരടങ്ങിയ സംഘമാണ് കഞ്ചാവ് പിടികൂടിയത്.
 
കൊയിലാണ്ടിയില്‍ ഗ്യാസ് ടാങ്കറും ലോറിയും കൂട്ടിയിടിച്ച് രണ്ടുപേര്‍ മരിച്ചു
കൊയിലാണ്ടി: ഗ്യാസ് ടാങ്കറും ലോറിയും കൂട്ടിയിടിച്ച് രണ്ടുപേര്‍ മരിച്ചു. മലപ്പുറം തിരുനാവായ സ്വദേശി ജാഫര്‍(42), തമിഴ്‌നാട് സ്വദേശി രാജേന്ദ്രന്‍ (48) എന്നിവരാണ് മരിച്ചത്. കൊയിലാണ്ടി ടൗണില്‍ നാഷനല്‍ ഗ്ലാസ് മാര്‍ട്ടിന് മുന്‍പില്‍ വ്യാഴാഴ്ച പുലര്‍ച്ചെ ആയിരുന്നു അപകടം. രണ്ടു വാഹനത്തിന്റെയും ഡ്രൈവമാരാണ് മരിച്ചത്.
 
കോരങ്ങാട് ജി എല്‍ പി സ്‌കൂള്‍ പുതിയ കെട്ടിടം ഉദ്ഘാടനം 19 ന്
താമരശ്ശേരി: കോരങ്ങാട് ജി എല്‍ പി സ്‌കൂളിലെ പുതിയ കെട്ടിടം ജൂലൈ 19 വെള്ളിയാഴ്ച രാവിലെ 10 മണിക്ക് ഗതാഗത വകുപ്പ് മന്ത്രി എ കെ ശശീന്ദ്രന്‍ ഉദ്ഘാടനം ചെയ്യും. എസ് എസ് കെ യുടെ സാമ്പത്തിക സഹായത്താലാണ് 3 ക്ലാസ്സ് മുറികള്‍ ഉള്‍ക്കൊള്ളുന്ന പുതിയ കെട്ടിടത്തിന്റെ പണി പൂര്‍ത്തീകരിച്ചത്. കാരാട്ട് റസാഖ് എം എല്‍ എ അധ്യക്ഷത വഹിക്കും. എസ് എസ് കെ പ്രൊജക്ട് എഞ്ചിനീയര്‍ നജാ തഹ്‌സിന്‍ റിപ്പോര്‍ട്ട് അവതരിപ്പിക്കും. താമരശ്ശേരി ഗ്രാമപഞ്ചായത്ത് പ്രസിഡന്റ് ഹാജറ കൊല്ലരുകണ്ടി, വൈസ് പ്രസിഡന്റ് നവാസ് ഈര്‍പ്പോണ, വിദ്യാഭ്യാസ സ്റ്റാന്റിംഗ് കമ്മറ്റി ചെയര്‍പേഴ്‌സണ്‍ ജെസി ശ്രീനിവാസന്‍, വാര്‍ഡ് മെമ്പര്‍ എ പി മുസ്തഫ, ഹെഡ്മാസ്റ്റര്‍ അബൂബക്കര്‍ സിദ്ദിഖ്, എസ് എസ് കെ ജില്ലാ പ്രൊജക്ട് ഓഫീസര്‍ എന്‍ കെ മോഹന്‍കുമാര്‍, എസ് എം സി ചെയര്‍മാന്‍ അഷ്‌റഫ് കോരങ്ങാട്, താമരശ്ശേരി എ ഇ ഒ. എന്‍ പി മുഹമ്മദ് അബ്ബാസ്, കൊടുവള്ളി ബി പി ഒ. വി എം മെഹറലി, പി ടി എ പ്രസിഡന്റ് എ പി ഹബീബ് റഹിമാന്‍, സ്റ്റാഫ് സെക്രട്ടറി മുജീഹ് റഹ്മാന്‍ തുടങ്ങിയവര്‍ പങ്കെടുക്കും.
 
കൊടുവള്ളിയില്‍ ചരക്കു ലോറി കെ എസ് ആര്‍ ടി സി ബസ്സുകളില്‍ ഇടിച്ച് മറിഞ്ഞു
കൊടുവള്ളി: കൊടുവള്ളിയില്‍ ചരക്കു ലോറി കെ എസ് ആര്‍ ടി സി ബസ്സുകളില്‍ ഇടിച്ച് മറിഞ്ഞു. വയനാട് ഭാഗത്തേക്ക് പോവുകയായിരുന്ന കെ എസ് ആര്‍ ടി സി ബസ്സിനെ മറികടക്കുന്നതിനിടെയാണ് ലോറി ഇതേ ബസ്സിലും എതിരെ വന്ന ബസ്സിലും ഇടിച്ചത്.
 
പ്രളയത്തില്‍ തകര്‍ന്ന കരിഞ്ചോലയിലെ റോഡ് പുനര്‍നിര്‍മ്മിച്ചു
കട്ടിപ്പാറ: പ്രളയ ദുരന്തത്തിന്റെ ഓര്‍മ്മകള്‍ പേറുന്ന കരിഞ്ചോലമലയില്‍ തകര്‍ന്ന റോഡ് പൂര്‍വസ്ഥിതിയിലേക്ക്. ജില്ലാ പഞ്ചായത്ത് അനുവദിച്ച 50 ലക്ഷം രൂപ ചെലവഴിച്ചാണ് വെട്ടിയൊഴിഞ്ഞതോട്ടം- കരിഞ്ചോല- പൂവന്‍മല റോഡില്‍ തകര്‍ന്ന ഭാഗങ്ങള്‍ പുനര്‍നിര്‍മ്മിച്ചത്. 2018 ജൂണ്‍ 14നുണ്ടായ ഉരുള്‍പൊട്ടലില്‍ ആര്‍ത്തലച്ചു വന്ന മലവെള്ളം 14 മനുഷ്യജീവനുകളാണ് കവര്‍ന്നത്. ഇതോടൊപ്പം മലയടിവാരത്തുള്ള റോഡും 500 മീറ്ററോളം ദൂരത്തില്‍ പൂര്‍ണമായും ഒലിച്ചുപോയി. ഇതോടെ പൂവന്‍മല ഭാഗത്തേക്കുള്ള ഗതാഗതം പൂര്‍ണമായും തടസപ്പെട്ടു. ദുരന്തമുണ്ടായ സമയം പ്രദേശം സന്ദര്‍ശിച്ചപ്പോഴാണ് ജില്ലാ പഞ്ചായത്ത് പ്രസിഡന്റ് ബാബു പറശേരി റോഡ് പുനര്‍ നിര്‍മ്മിക്കുന്നതിന് 50 ലക്ഷം അനുവദിച്ചത്. തുടര്‍ന്ന് ഗ്രാമപഞ്ചായത്ത് അസി. എഞ്ചിനിയറുടെ നേതൃത്വത്തില്‍ എസ്റ്റിമേറ്റ് തയ്യാറാക്കി ജില്ലാ പഞ്ചായത്തില്‍ സമര്‍പ്പിച്ചു. ഉരുള്‍പൊട്ടലില്‍ വലിയ പാറക്കല്ലുകള്‍ വന്നടിഞ്ഞ പ്രദേശത്ത് പുനര്‍നിര്‍മ്മാണം നടത്തുകയെന്നത് വലിയ വെല്ലുവിളിയായിരുന്നു. കരാറെടുത്ത ഊരാളുങ്കല്‍ ലേബര്‍ സൊസൈറ്റി മൂന്ന് മാസം മുമ്പ് ആരംഭിച്ച പ്രവൃത്തി 2019 ജൂലൈ ആദ്യവാരം പൂര്‍ത്തിയാക്കി. കൂറ്റന്‍ പാറക്കല്ലുകള്‍ പൊട്ടിച്ചുമാറ്റിയാണ് നിര്‍മ്മാണം നടത്തിയത്. റോഡ് ഒലിച്ചുപോയ ഭാഗത്ത് കരിങ്കല്‍ഭിത്തി കെട്ടിയുയര്‍ത്തി കോണ്‍ക്രീറ്റ് ബെല്‍റ്റ് നിര്‍മ്മിച്ച് സുരക്ഷിതമാക്കി. പിന്നീട് മണ്ണുനിറച്ച് പൂര്‍വസ്ഥിതിയിലാക്കി. രണ്ട് ഭാഗങ്ങളില്‍ കലുങ്കുകളും നിര്‍മ്മിച്ചു ഗതാഗതയോഗ്യമാക്കി. പുനര്‍നിര്‍മ്മിച്ച ഭാഗത്തെ സോളിങും ടാറിങ്ങുമടക്കമുള്ള പ്രവൃത്തി ഈ വര്‍ഷം തന്നെ പൂര്‍ത്തിയാക്കാന്‍ കഴിയുമെന്നാണ് പ്രതീക്ഷിക്കുന്നതെന്ന് ഗ്രാമപഞ്ചായത്ത് പ്രസിഡന്റ് ബേബി രവീന്ദ്രന്‍ പറഞ്ഞു. 2.9 കിലോമീറ്റര്‍ ദൂരമുള്ള വെട്ടിയൊഴിഞ്ഞതോട്ടം- കരിഞ്ചോല- പൂവന്‍മല റോഡ് പ്രധാനമന്ത്രി സഡക് യോജന പദ്ധതിയിലുള്‍പ്പെടുത്തിയായിരുന്നു നിര്‍മ്മിച്ചത്. ഇതില്‍ പൂവന്‍മല ഭാഗത്ത് കുറച്ചുഭാഗം മണ്‍പാതയാണ്. ഇത് ടാര്‍ ചെയ്ത് നവീകരിക്കുന്നതിന് കാരാട്ട് റസാക്ക് എം എല്‍ എയുടെ ആസ്തി വികസന ഫണ്ടില്‍ നിന്ന് 15 ലക്ഷം അനുവദിച്ചിട്ടുണ്ടെന്ന് പഞ്ചായത്ത് വൈസ് പ്രസിഡന്റ് നിധിഷ് കല്ലുള്ളതോട് അറിയിച്ചു.
 
പ്രണയം നടിച്ച് പതിനഞ്ച് കാരിയെ ലൈംഗിക പീഡനത്തിനിരയാക്കിയ യുവാവ് അറസ്റ്റില്‍
താമരശ്ശേരി: പ്രണയം നടിച്ച് പതിനഞ്ച് കാരിയെ ലൈംഗിക പീഡനത്തിനിരയാക്കിയ യുവാവ് അറസ്റ്റില്‍. പുതുപ്പാടി കുഞ്ഞുകുളം തയ്യില്‍ മുഹമ്മദ് ശാഫി(23)യെയാണ് താമരശ്ശേരി പോലീസ് അറസ്റ്റ് ചെയ്തത്. അര്‍ധ രാത്രിയില്‍ കട്ടിപ്പാറ ഭാഗത്ത് ബൈക്കില്‍ കണ്ടെത്തിയ യുവാവിനെ നാട്ടുകാര്‍ ചോദ്യം ചെയ്തപ്പോഴാണ് പീഡന വിവരം പുറത്തായത്. ഏറെ നേരം കഴിഞ്ഞ് ശാഫി ബൈക്കിനരികില്‍ എത്തിയപ്പോള്‍ നാട്ടുകാര്‍ പിടികൂടി തലമുണ്ടനം ചെയ്യുകയും കണ്‍പിരിയം ഉള്‍പ്പെടെ നീക്കം ചെയ്യുകയും ചെയ്തു. തുടര്‍ന്നാണ് താമരശ്ശേരി പോലീസില്‍ വിവരം അറിയിച്ചത്. പ്രതിയെ കസ്റ്റഡിയിലെടുത്ത പോലീസ് പെണ്‍കുട്ടിയുടെ മൊഴി രേഖപ്പെടുത്തുകയും പോക്‌സോ നിയമപ്രകാരം കേസ് രജിസ്റ്റര്‍ ചെയ്യുകയുമായിരുന്നു. വിദ്യാര്‍ത്ഥിനിയെ പ്രലോഭിപ്പിച്ച് പലപ്പോഴായി പീഡിപ്പിച്ചതായാണ് സംശയം. കോഴിക്കോട് പോക്‌സോ കോടതിയില്‍ ഹാജറാക്കിയ പ്രതിയെ 14 ദിവസത്തേക്ക് റിമാണ്ട് ചെയ്തു.
 
ബൈക്ക് യാത്രക്കാരനെ ഇടിച്ച് തെറിപ്പിച്ച് നിര്‍ത്താതെ പോയ ലോറി പോലീസ് പിടികൂടി
അടിവാരം: വൈത്തിരിയില്‍ ബൈക്ക് യാത്രക്കാരനെ ഇടിച്ച് തെറിപ്പിച്ച് നിര്‍ത്താതെ പോയ ലോറി താമരശ്ശേരി ചുരത്തില്‍ പോലീസ് പിടികൂടി. മഹാരാഷ്ട്ര രജിസ്‌ട്രേഷനിലുള്ള എം എച് 45 എ എഫ് 5559 നമ്പര്‍ ലോറിയാണ് അടിവാരം ഔട് പോസ്റ്റിലെ എസ് ഐ ഉണ്ണികൃഷ്ണന്റെ നേതൃത്വത്തില്‍ ചിപ്പിലിത്തോട് വെച്ച് പിടികൂടിയത്. അപകടത്തില്‍ സാരമായി പരുക്കേറ്റ വെള്ളിമാട്കുന്ന് സ്വദേശി മുഹമ്മദ് അസ്‌ലമിനെ കോഴിക്കോട് മെഡിക്കല്‍ കോളേജ് ആശുപത്രിയില്‍ പ്രവേശിപ്പിച്ചു. മഹാരാഷ്ട്രയില്‍ നിന്നും വിദേശമദ്യവുമായി കോഴിക്കോട്ടേക്ക് പോവുകയായിരുന്ന ലോറി വൈത്തിരി തളിപ്പുഴയില്‍ വെച്ചാണ് ബൈക്ക് യാത്രക്കാരനെ ഇടിച്ച് തെറിപ്പിച്ചത്. അപകടം വരുത്തി നര്‍ത്താതെ പോയതിനെ തുടര്‍ന്ന് നാട്ടുകാര്‍ വിവരം വൈത്തിരി പോലീസില്‍ അറിയിക്കുകയായിരുന്നു. താമരശ്ശേരി പോലീസ് പിടികൂടിയ ലോറി വൈത്തിരി പോലീസ് കസ്റ്റഡിയിലെടുത്തു.
 
 
 
 

All rights reserved | Website developed and maintained by Zyonz Technologies