11-Dec-2018 (Tue)
 
 
 
പ്രളയത്തില്‍ തകര്‍ന്ന വീടുകളുടെ പുനര്‍നിര്‍മ്മാണം: ശില്‍പശാല സംഘടിപ്പിച്ചു
കോഴിക്കോട്: മഹാപ്രളയത്തില്‍ പൂര്‍ണ്ണമായി തകര്‍ന്ന വീടുകളുടെ പുനര്‍നിര്‍മ്മാണവുമായി ബന്ധപ്പെട്ട് ജില്ലാഭരണകൂടത്തിന്റെ നേതൃത്വത്തില്‍ ശില്‍പശാല സംഘടിപ്പിച്ചു. സിവില്‍ സ്റ്റേഷനിലെ ജില്ലാ ആസൂത്രണസമിതി ഹാളില്‍ നടന്ന ശില്‍പശാല ജില്ലാ കലക്ടര്‍ യു വി ജോസ് ഉദ്ഘാടനം ചെയ്തു. ജില്ലയില്‍ 500ല്‍ അധികം വീടുകളാണ് പ്രളയത്തില്‍ പൂര്‍ണ്ണമായും തകര്‍ന്നത്. പ്രളയാനന്തര ഭവന നിര്‍മ്മാണ ധനസഹായത്തിന് അനര്‍ഹര്‍ക്ക് സേവനം ലഭ്യമാക്കില്ലെന്നും ജില്ലാ കലക്ടര്‍ യു വി ജോസ് അറുയിച്ചു. സാധ്യത ലിസ്റ്റില്‍ ഉള്‍പ്പെടുത്താത്ത അര്‍ഹരുടെ വിവരങ്ങള്‍ പരിശോധിച്ച് പരിഗണിക്കുമെന്നും ജില്ലാ കലക്ടര്‍ പറഞ്ഞു. ദുരന്തത്തിന്റെ ഭാഗമായി പൂര്‍ണ്ണമായി തകര്‍ന്നതായി കണ്ടെത്തിയ വീടുകള്‍ പുതുക്കി പണിയുന്നതിനായി വിവിധ ഭവനനിര്‍മ്മാണ രീതികള്‍ ശില്‍പ്പശാലയില്‍ പരിചയപ്പെുടുത്തി. ജില്ലാ ഭരണകൂടത്തിന്റെ നേതൃത്വത്തില്‍ റവന്യൂവകുപ്പും തദ്ദേശ സ്വയംഭരണ സ്ഥാപനങ്ങളും ചേര്‍ന്നാണ് തകര്‍ന്ന വീടുകളുടെ സാധ്യത ലിസ്റ്റ് തയ്യാറാക്കിയിട്ടുള്ളത്. ഇന്ത്യന്‍ ഇന്‍സ്റ്റിറ്റ്യൂട്ട് ഓഫ് ആര്‍ക്കിടെക്ച്ചര്‍, എന്‍ ഐ ടി, ഊരാളുങ്കല്‍ ലേബര്‍ കോണ്‍ട്രാക്റ്റ് സൊസൈറ്റി, റീജിനല്‍ ടൗണ്‍ പ്ലാനിംഗ് എന്നിവര്‍ ചേര്‍ന്ന് സുരക്ഷിതവും ദുരന്തപ്രതിരോധ ശേഷിയുമുള്ള ഭവനനിര്‍മ്മാണ രീതികള്‍ പരിചയപ്പെടുത്തി. ശാസ്ത്രീയവും സുരക്ഷിതവും ചെലവ് കുറഞ്ഞതുമായ നിര്‍മാണ നിര്‍മാണ രീതിയാണ് പരിചയപ്പെടുത്തിയത്.
 
താമരശ്ശേരി ഷോപ്പിംഗ് ഫെസ്റ്റിവലിന്റെ മെഗാ സമ്മാന വിതരണം വ്യാഴാഴ്ച
താമരശ്ശേരി: വ്യാപാരി വ്യവസായി ഏകോപന സമിതി സംഘടിപ്പിച്ച താമരശ്ശേരി ഷോപ്പിംഗ് ഫെസ്റ്റിവലിന്റെ സമാപന സമ്മേളനവും മെഗാ സമ്മാന വിതരണവും വ്യാഴാഴ്ച ഉച്ചക്ക് 2 മണിക്ക് വ്യാപാരഭവന്‍ ഓഡിറ്റോറിയത്തില്‍ നടക്കും. ഏപ്രില്‍ 1 ന് ആരംഭിച്ച ഷോപ്പിംഗ് ഫെസ്റ്റിവല്‍ സെപ്തംബര്‍ 30 നാണ് അവസാനിച്ചത്. മെഗാ സമ്മാനമായി ഇയോണ്‍ കാറും പ്രീ മെഗാബംബര്‍ സമ്മാനമായി എന്‍ഫീല്‍ഡ് ബുള്ളറ്റുമാണ് നല്‍കുന്നത്. മാസാന്ത സമ്മാനമായി 3 ഹോണ്ട ആക്ടീവ സ്‌കൂട്ടറുകളും നല്‍കുന്നുണ്ട്. ഫ്രിഡ്ജ്, ടിവി., വാഷിംഗ് മെഷീന്‍, മൊബൈല്‍ ഫോണ്‍ തുടങ്ങിയ സമ്മാനങ്ങള്‍ നേരത്തെ ഓരോ ഷോപ്പില്‍ നിന്നും നല്‍കിയിരുന്നു. വ്യവസായ-കായിക വകുപ്പ് മന്ത്രി ഇ പി ജയരാജന്‍ സമാപനസമ്മേളനത്തിന്റെ ഉദ്ഘാടനവും മെഗാസമ്മാന വിതരണവും നടത്തും. കാരാട്ട് റസാഖ് എം എല്‍ എ മുഖ്യാതിഥിയായിരിക്കും. ജനപ്രതിനിധികള്‍, രാഷ്ട്രീയ സാമൂഹ്യ, സാംസ്‌കാരിക രംഗത്തെ പ്രമുഖ വ്യക്തിത്വങ്ങള്‍, വ്യാപാരി സംഘടനാ നേതാക്കള്‍ തുടങ്ങിയവര്‍ സംബന്ധിക്കും
 
റീജിയണല്‍ വാക്സിന്‍ സ്റ്റോര്‍ ആന്റ് ട്രെയിനിങ് സെന്റര്‍ ഓഡിറ്റോറിയം ഉദ്ഘാടനം ചെയ്തു
കോഴിക്കോട്: ജില്ലയില്‍ പുതുതായി നിര്‍മ്മിച്ചറീജിയണല്‍ വാക്സിന്‍ സ്റ്റോര്‍ ആന്റ് ട്രെയിനിങ് സെന്റര്‍ ഓഡിറ്റോറിയവും ആരോഗ്യ സാമൂഹ്യ നീതി വകുപ്പ് മന്ത്രി കെ കെ ശൈലജ ടീച്ചര്‍ നിര്‍വഹിച്ചു. വയനാട്, കണ്ണൂര്‍, കാസര്‍ഗോഡ്, മലപ്പുറം ജില്ലകളിലെ സര്‍ക്കാര്‍ ആശുപത്രികളിലേക്കുള്ള വാക്സിന്‍ വിതരണം മൂന്ന് കോടി രൂപ ചെലവില്‍ നിര്‍മ്മിച്ച പുതിയ കെട്ടിടത്തില്‍ നിന്നും നടക്കും. സര്‍ക്കാര്‍ നടപ്പാക്കുന്ന പദ്ധതികള്‍ ശരിയായ രീതിയില്‍ ജനങ്ങളിലേക്ക് എത്തണമെങ്കില്‍ മികച്ച പരിശീലമാണ് വേണ്ടതെന്നും നല്ല രീതിയില്‍ സന്തോഷത്തോടെയും ആരോഗ്യത്തോടെയും ജീവിക്കാന്‍ യഥാര്‍ത്ഥ പരിശീലനം ജനങ്ങള്‍ക്ക് നല്‍കേണ്ടതുണ്ടെന്നും മന്ത്രി പറഞ്ഞു. ലക്ഷ്യ അവാര്‍ഡ് നേടിയ കോട്ടപ്പറമ്പ് സ്ത്രീകളുടെയും കുട്ടികളുടെയും ആശുപത്രി ടീമിനെ ചടങ്ങില്‍ മന്ത്രി അനുമോദിച്ചു. മലാപ്പറമ്പ് റീജിയണല്‍ ഹെല്‍ത്ത് ആന്റ് ഫാമിലി വെല്‍ഫയര്‍ ട്രെയിനിങ് സെന്റര്‍ ഓഡിറ്റോറിയത്തില്‍ നടന്ന ചടങ്ങില്‍ എ പ്രദീപ്കുമാര്‍ എം എല്‍ എ അദ്ധ്യക്ഷത വഹിച്ചു. നിപ സോഫ്റ്റ് വെയര്‍ ഉദ്ഘാടനം ജില്ലാ കലക്ടര്‍ യു വി ജോസ് നിര്‍വഹിച്ചു. എന്‍ എച്ച് എം തയ്യാറാക്കിയ ഷോര്‍ട്ട് ഫിലിം പ്രായം സി ഡി പ്രകാശനവും നിപ മാഗസിന്‍ പ്രകാശനവും ചടങ്ങില്‍ നിര്‍വഹിച്ചു. ജില്ലാ മെഡിക്കല്‍ ഓഫീസര്‍ ഡോ. വി ജയശ്രീ കാര്യപരിപാടി വിശദീകരിച്ചു. ആരോഗ്യ വകുപ്പ് ഡയറക്ടര്‍ ഡോ. ആര്‍ എല്‍ സരിത, അഡീഷണല്‍ ഡി എം ഒ ഡോ. ആശാ ദേവി, ജില്ലാ ആര്‍ സി എച്ച് ഓഫീസര്‍ ഡോ. സരളാ നായര്‍, ഹെല്‍ത്ത് ആന്റ് ഫാമിലി വെല്‍ഫയര്‍ ട്രെയിനിങ് സെന്റര്‍ പ്രിന്‍സിപ്പാള്‍ ഡോ. സുജത, ക്യൂകോപ്പി ഫൗണ്ടര്‍ ആന്റ് സി ഇ ഒ. അരുണ്‍ പെരുളി തുടങ്ങിയവര്‍ സംസാരിച്ചു. എന്‍ എച്ച് എം ജില്ലാ പ്രോഗ്രാം മാനേജര്‍ ഡോ. എ നവീന്‍ സ്വാഗതവും ജില്ലാ മാസ്സ് മീഡിയ ഓഫീസര്‍ എം പി മണി നന്ദിയും പറഞ്ഞു.
 
കോഴിക്കോട് ജില്ലാ കലക്ടര്‍ യു വി ജോസിന് സ്ഥലം മാറ്റം
കോഴിക്കോട്: ജില്ലാ കലക്ടര്‍ യു വി ജോസിന് സ്ഥലം മാറ്റം. ബുധനാഴ്ചത്തെ മന്ത്രിസഭാ യോഗത്തിലാണ് കോഴിക്കോട് ജില്ലാ കലക്ടറായി രണ്ടര വര്‍ഷം പൂര്‍ത്തിയാക്കിയ യു വി ജോസിനെ മാറ്റാന്‍ തീരുമാനിച്ചത്. ലാന്റ് റവന്യൂ ജോയിന്റ് കമ്മീഷ്ണര്‍ ആയാണ് പുതിയ നിയമനം. പകരം സീറാം സാമ്പശിവ റാവുവിനെ കോഴിക്കോട് കലക്ടറായി നിയമിച്ചു. രണ്ടര വര്‍ഷം പൂര്‍ത്തിയായ സാഹചര്യത്തിലാണ് സ്ഥലം മാറ്റമെന്നാണ് വിശദീകരണം. എന്നാല്‍ പെട്ടന്നുള്ള സ്ഥലം മാറ്റത്തിനുപിന്നില്‍ ബാഹ്യ ഇടപെടല്‍ ഉള്ളതായാണ് സംശയം
 
കട്ടിപ്പാറയില്‍ പ്രത്യേക പരിഗണന അര്‍ഹിക്കുന്നവര്‍ക്കായി കൈത്തിരി
കട്ടിപ്പാറ: ശാരീരിക-മാനസിക വെല്ലുവിളികള്‍ നേരിടുന്ന വിദ്യാര്‍ത്ഥികള്‍ക്കും കൗമാരക്കാര്‍ക്കുമായി കട്ടിപ്പാറ ഗ്രാമപഞ്ചായത്തിന്റെ കൈത്തിരി. പ്രത്യേക പരിഗണന അര്‍ഹിക്കുന്നവരുടെ ആരോഗ്യ-വിദ്യാഭ്യാസ സംരക്ഷണം ഉറപ്പു വരുത്തുന്നതിനായി കട്ടിപ്പാറ സര്‍ക്കാര്‍ ആയുര്‍വേദ ഡിസ്പെന്‍സറിയുടെ നേതൃത്വത്തില്‍ ഭാരതീയ ചികിത്സാ വകുപ്പിന്റെയും ദേശീയ ആയുഷ് മിഷന്റെയും സഹകരണത്തോടെയാണ് പദ്ധതി നടപ്പിലാക്കുന്നത്. മാസത്തില്‍ രണ്ട് തവണ പ്രത്യേക മെഡിക്കല്‍ ക്യാമ്പും മരുന്ന് വിതരണവും ഫിസിയോ തൊറാപ്പി, കൗണ്‍സിലിംഗ് ഉള്‍പ്പെടെയുള്ള പ്രവര്‍ത്തനങ്ങളും നടപ്പിലാക്കാനാണ് പദ്ധതി തയ്യാറാക്കിയത്. കട്ടിപ്പാറ പഞ്ചായത്തിലെ പൊതു വിദ്യാലയങ്ങളില്‍ ഉല്‍പ്പെടെ പ്രത്യേക പരിഗണന അര്‍ഹിക്കുന്ന നിരവധി വിദ്യാര്‍ത്ഥികള്‍ ഉണ്ടെന്ന് കണ്ടെത്തുകയും പ്രധാനാധ്യാപകരുടെ യോഗം വിളിച്ചു ചേര്‍ക്കുകയും ചെയ്തിരുന്നു. സ്‌കൂളുകളുടെ സഹകരണത്തോടെ പദ്ധതി വിജയിപ്പിച്ചെടുക്കാനാണ് ഗ്രാമപഞ്ചായത്ത് ഭരണ സമിതി ആലോചിക്കുന്നത്. പദ്ധതിയുടെ ഉദ്ഘാടനം വ്യാഴാഴ്ച രാവിലെ 10 മണിക്ക് കാരുണ്യതീരം സ്പെഷ്യല്‍ സ്‌കൂളില്‍ വ്യവസായ-കായിക വകുപ്പുമന്ത്രി ഇ പി ജയരാജന്‍ നിര്‍വഹിക്കും. കാരാട്ട് റസാഖ് എം എല്‍ എ അധ്യക്ഷത വഹിക്കും. ജില്ലാ മെഡിക്കല്‍ ഓഫീസര്‍ കെ എം മന്‍സൂര്‍ പദ്ധതി വിശദീകരിക്കും. ആയുര്‍വേദ രംഗത്ത് മികച്ച പ്രവര്‍ത്തനങ്ങള്‍ക്ക് സര്‍ക്കാറിന്റെ അംഗീകാരം നേടിയ കട്ടിപ്പാറ ആയുര്‍വേദ ഡിസ്പെന്‍സറിയിലെ മെഡിക്കല്‍ ഓഫീസര്‍ ഡോ. കെ പ്രവീണിനെ ചടങ്ങില്‍ ആദരിക്കും.
 
കഞ്ചാവ് മൊത്ത വിതരണം നടത്തുന്നയാള്‍ താമരശ്ശേരിയില്‍ പിടിയില്‍
താമരശ്ശേരി: വിദ്യാര്‍ത്ഥികള്‍ ഉള്‍പ്പെടെയുള്ളവര്‍ക്ക് കഞ്ചാവ് മൊത്ത വിതരണം നടത്തുന്നയാള്‍ താമരശ്ശേരിയില്‍ പോലീസിന്റെ പിടിയില്‍. നാദാപുരം കായപ്പനച്ചി പുതുക്കുല്‍ താഴെക്കുനി ഷൈജു(36)വിനെയാണ് താമരശ്ശേരി ഡി വൈ എസ് പി. പി ബിജുരാജിന്റെ നേതൃത്വത്തിലുള്ള പോലീസ് സംഘം അറസ്റ്റ് ചെയ്തത്. റൂറല്‍ ജില്ലാ പോലീസ് മേധാവി ജി ജയദേവ് ഐ എ എസിന് ലഭിച്ച രഹസ്യ വിവരത്തെ തുടര്‍ന്ന് നടത്തിയ നീക്കത്തിലാണ് ഷൈജു പിടിയിലായത്. മൊത്ത വിതരണത്തിനായി എത്തിച്ച 5.150 കിലോ കഞ്ചാവ് പോലീസ് പിടിച്ചെടുത്തു.
 
കാരശ്ശേരിയിലെ കാരണവന്മാരുടെ ഉല്ലാസകേന്ദ്രം; ലെജന്റ്‌സ് ക്ലബ്ബ് ഉദ്ഘാടനം ചെയ്തു
കാരശ്ശേരി: കാരശ്ശേരി ഗ്രാമപഞ്ചായത്ത് ഭരണസമിതി മൂന്നാം വാര്‍ഷികത്തിന്റെ ഭാഗമായി പഞ്ചായത്തിലെ മുതിര്‍ന്ന പൗരന്മാര്‍ക്കായി നെല്ലിക്കാപറമ്പില്‍ ആരംഭിച്ച ലെജന്റ്‌സ് ക്ലബ്ബ് തദ്ദേശസ്വയംഭരണ വകുപ്പ് മന്ത്രി എ സി മൊയ്തീന്‍ ഉദ്ഘാടനം ചെയ്തു. ജോര്‍ജ് എം തോമസ് എം എല്‍ എ അധ്യക്ഷത വഹിച്ചു. പഞ്ചായത്തിലെ 65 വയസ്സ് കഴിഞ്ഞവര്‍ക്കാണ് ക്ലബ്ബില്‍ അംഗത്വം നല്‍കുക. രാവിലെ ഒന്‍പത് മണി മുതല്‍ വൈകീട്ട് ആറ് മണി വരെയാണ് ക്ലബ്ബ് പ്രവര്‍ത്തിക്കുക. ഇവര്‍ക്കുള്ള ഭക്ഷണവും ഉല്ലാസത്തിനായി വിവിധ സൗകര്യങ്ങളും ഇവിടെ ഒരുക്കിയിട്ടുണ്ട്. ഇതിനായി വാര്‍ഡ് തലത്തില്‍ മുതിര്‍ന്ന പൗരന്മാരുടെ കമ്മിറ്റികളും രൂപീകരിക്കും. ഗ്രാമപഞ്ചായത്ത് പ്രസിഡന്റ് വി കെ വിനോദ്, വൈസ് പ്രസിഡന്റ് വി പി ജമീല, ജില്ലാ പഞ്ചായത്ത് അംഗം മുക്കം മുഹമ്മദ്, സ്ഥിരം സമിതി അധ്യക്ഷന്മാരായ സജി തോമസ്, അബ്ദുള്ള കുമാരനല്ലൂര്‍, സവാദ് ഇബ്രാഹിം, ജി അബ്ദുല്‍ അക്ബര്‍, ഡോ. മനുലാല്‍, വി കുഞ്ഞാലി, വി ജയപ്രകാശ്, ടി വിശ്വനാഥന്‍, റഹ്മത്ത് പറശ്ശേരി, കോര്‍ഡിനേറ്റര്‍ അലിഹാസന്‍, പഞ്ചായത്ത് സെക്രട്ടറി വൈ പി അഷ്‌റഫ് തുടങ്ങിയവര്‍ സംസാരിച്ചു.
 
കോഴിക്കോട്: പൊതുജനാരോഗ്യത്തില്‍ ആയുര്‍വേദത്തിന്റെ പങ്ക് ഓര്‍മപ്പെടുത്തി മൂന്നാമത് ദേശീയ ആയുര്‍വേദ ദിനാചരണം പ്ലാനിംഗ് ഓഫീസ് കോണ്‍ഫറന്‍സ് ഹാളില്‍ ജില്ലാ പഞ്ചായത്ത് പ്രസിഡന്റ് ബാബു പറശ്ശേരി ഉദ്ഘാടനം ചെയ്തു. ജില്ലാ മെഡിക്കല്‍ ഓഫീസര്‍ ഡോ കെ എം മന്‍സൂര്‍ അധ്യക്ഷത വഹിച്ചു. ജില്ലാ കലക്ടര്‍ യു വി ജോസ് മുഖ്യാതിഥിയായിരുന്നു. ഭാരതീയ ചികിത്സ വകുപ്പ്, ദേശീയ ആയുഷ് ദൗത്യം, ആയുര്‍വേദ മെഡിക്കല്‍ അസോസിയേഷന്‍ ഓഫ് ഇന്ത്യ, ആയുര്‍വേദ ഹോസ്പിറ്റല്‍ മാനേജ്‌മെന്റ് എന്നിവയുടെ സംയുക്താഭിമുഖ്യത്തില്‍ സംഘടിപ്പിച്ച പരിപാടിയുടെ ഭാഗമായി വിദ്യാര്‍ത്ഥികള്‍ക്ക് സംഘടിപ്പിച്ച രചനാ മത്സരങ്ങളിലെ വിജയികളായ ദിയ ധാക് വാന്ഡ, ശ്രീഗോവിന്ദ് പി ബി, ഡോക്ടര്‍മാര്‍ക്കായി നടത്തിയ പ്രസന്റേഷന്‍ മത്സര വിജയികളായ ഡോ പ്രവീണ്‍, ഡോ അഖില്‍ എസ് കുമാര്‍, ഡോ ശ്രുതി വിജയന്‍ എന്നിവര്‍ക്ക് ചടങ്ങില്‍ കലക്ടര്‍ ഉപഹാരങ്ങള്‍ നല്‍കി. ആയുര്‍വേദ സ്ഥാപനങ്ങള്‍ക്ക് പദ്ധതി ഇനത്തില്‍ കൂടുതല്‍ തുക അനുവദിച്ച കട്ടിപ്പാറ, കടലുണ്ടി ഗ്രാമപഞ്ചായത്ത്, ഭൗതിക സൗകര്യം ഒരുക്കിയ ആയഞ്ചേരി എന്നീ പഞ്ചായത്തുകളെ ആദരിച്ചു. കൂടാതെ ജില്ലയിലെ മുതിര്‍ന്ന ചികിത്സകരായ വൈദ്യഭൂഷണം ചന്ദ്രശേഖരന്‍ വൈദ്യര്‍, ഡോ. എ പി ഹരിദാസ്, ഡോ. എം കെ ബാലന്‍, ഡോ. സുകുമാരന്‍ ജി ജി, ഡോ. പി ബി ബാലകൃഷ്ണന്‍ എന്നിവരെയും ആദരിച്ചു. നാഷണല്‍ ആയുഷ് മിഷന്‍ പ്രോഗ്രാം മാനേജര്‍ ഡോ. സുഗേഷ് കുമാര്‍ ജി എസ്, മുക്കം മുഹമ്മദ്, ഡോ. വി ജി ഉദയകുമാര്‍, ഡോ. പ്രീത, ഡോ. സമില്‍കുമാര്‍, ഡോ. മനോജ് കാളൂര്‍, ഡോ. അഭിജിത്ത്, ഡോ. ജസ്സി പി സി, ഡോ. ഹരിദാസന്‍ തുടങ്ങിയവര്‍ സംസാരിച്ചു.
 
വികസന പ്രവര്‍ത്തനങ്ങള്‍ക്ക് ജനകീയ പങ്കാളിത്തം അനിവാര്യം: മന്ത്രി കടന്നപ്പള്ളി രാമചന്ദ്രന്‍
വടകര: നാടിന്റെ വികസന പ്രവര്‍ത്തനങ്ങള്‍ക്ക് ജനകീയ പങ്കാളിത്തം അനിവാര്യമാണെന്ന് തുറമുഖം മ്യൂസിയം പുരാവസ്തു വകുപ്പ് മന്ത്രി കടന്നപ്പള്ളി രാമചന്ദ്രന്‍. വടകര കസ്റ്റംസ് റോഡിലെ തുറമുഖം ഓഫീസ് ഉദ്ഘാടനം ചെയ്ത് സംസാരിക്കുകയായിരുന്നു മന്ത്രി. തുറമുഖ ശൃംഗല കേരള തീരഭൂമികളെ വാണിജ്യ വ്യാപാര യാത്രാ രംഗത്തെ സഹായിക്കാനും പ്രയോജനപ്പെടുത്താനും കഴിയുന്ന തരത്തിലാക്കുക എന്നതാണ് സര്‍ക്കാര്‍ നയം. റോഡ് ഗതാഗതം വഴി ചരക്ക് കൊണ്ടു പോകുമ്പോഴുണ്ടാകുന്ന സമയനഷ്ടവും സാമ്പത്തിക നഷ്ടവും പരിഹരിക്കാന്‍ തുറമുഖം വഴിയുള്ള ചരക്ക് നീക്കത്തിന് കൂടുതല്‍ പ്രാധാന്യം നല്‍കും. വിവിധ ഷിപ്പിംഗ് കമ്പനികള്‍ തുറമുഖവുമായി ബന്ധപ്പെട്ട് വ്യാപാര വ്യവസായത്തിന് തുടക്കം കുറിച്ചു കഴിഞ്ഞു. വടകരയുടെ ചരിത്ര പ്രാധാന്യവും പൂര്‍വകാല വ്യാപാര ബന്ധങ്ങളും കണക്കിലെടുത്ത് വടകര തുറമുഖ വികസനത്തിന് കൂടുതല്‍ പ്രാധാന്യം നല്‍കും. തുറമുഖ മേഖലയുമായി ബന്ധപ്പെട്ട് മണല്‍ മാഫിയ പ്രവര്‍ത്തനങ്ങള്‍ തടയാന്‍ കഴിഞ്ഞു. മണല്‍വാരല്‍ തൊഴിലാളികളുടെ വേതന വര്‍ദ്ധന പരിഗണിക്കുമെന്നും മന്ത്രി പറഞ്ഞു. നവകേരള സൃഷ്ടിക്ക് കക്ഷിരാഷ്ട്രീയാതീതമായ പിന്തുണയുണ്ടാകണമെന്നും മന്ത്രി അഭ്യര്‍ത്ഥിച്ചു. ചടങ്ങില്‍ വടകര മുനിസിപ്പല്‍ ചെയര്‍മാന്‍ കെ ശ്രീധരന്‍ അധ്യക്ഷത വഹിച്ചു. പോര്‍ട്ട് ഓഫീസര്‍ ക്യാപ്റ്റന്‍ അശ്വിനി പ്രതാപ് സ്വാഗതം പറഞ്ഞു. വിവിധ രാഷ്ടീയ പാര്‍ട്ടി, ജനപ്രതിനിധികളായ പയ്യോളി മുനിസിപ്പല്‍ ചെയര്‍പേഴ്‌സണ്‍ വി ടി ഉഷ, വടകര ബ്ലോക്ക് പഞ്ചായത്ത് വൈസ് പ്രസിഡന്റ് ശ്യാമള അഴിയൂര്‍, പഞ്ചായത്ത് പ്രസിഡന്റ് ഇ ടി അയൂബ്, ടി പി ഗോപാലന്‍ മാസ്റ്റര്‍, പുറന്തോടത്ത് സുകുമാരന്‍, രാമകൃഷ്ണന്‍ സി, പി സോമശേഖരന്‍, കടത്തനാട്ട് ബാലകൃഷ്ണന്‍, ടി കെ ഷെരീഫ്, പി സത്യനാഥന്‍, മുക്കോലക്കല്‍ ഹംസ തുടങ്ങിയവര്‍ പങ്കെടുത്തു.
 
കണ്ണപ്പന്‍കുണ്ട് ഉരുള്‍പൊട്ടലില്‍ വീട് നഷ്ടപ്പെട്ടവരുടെ വീട്ടുവാടക ഐ എം എ നല്‍കും
പുതുപ്പാടി: കണ്ണപ്പന്‍കുണ്ട് ഉരുള്‍പൊട്ടലില്‍ പൂര്‍ണ്ണമായും വീടു നഷ്ടപ്പെട്ട അറ് കുടുംബങ്ങളുടെ വീട്ടുവാടക ഇന്ത്യന്‍ മെഡിക്കല്‍ അസോസിയേഷന്‍ (ഐ എം എ) താമരശ്ശേരി ബ്രാഞ്ച് നല്‍കും. വീടുകളുടെ വാടക പ്രമാണപത്രം കൈമാറല്‍ വള്ളിയാട് നടന്ന ചടങ്ങില്‍ വച്ച് തദ്ദേശസ്വയംഭരണ വകുപ്പ് മന്ത്രി എ സി മൊയ്തീന്‍ നിര്‍വ്വഹിച്ചു. ജോര്‍ജ്ജ് എം തോമസ് എംഎല്‍എ അദ്ധ്യക്ഷത വഹിച്ചു. ഗ്രാമ പഞ്ചായത്ത് പ്രസിഡന്റ് അംബിക മംഗലത്ത്, ജില്ലാ പഞ്ചായത്ത് മെമ്പര്‍ വി ഡി ജോസഫ്, ജനപ്രതിനിധികള്‍, വിവിധ രാഷ്ട്രിയ കക്ഷി നേതാക്കള്‍ തുടങ്ങിയവര്‍ ചടങ്ങില്‍ സംബന്ധിച്ചു. ഐ എം എ സംസ്ഥാന ജോയിന്റ് സെക്രട്ടറി ഡോ കെ വേണുഗോപാല്‍, താമരശ്ശേരി ബ്രാഞ്ച് സെക്രട്ടറി പ്രഭാകര അഡൂര്‍, ട്രഷറര്‍ എം കെ രാജേന്ദ്രന്‍ എന്നിവര്‍ ചേര്‍ന്നാണ് പ്രമാണപത്രം മന്ത്രിക്ക് കൈമാറിയത്. മയിലള്ളാംപാറയിലേയും മണല്‍വയലിലേയും ദുരിതാശ്വാസ ക്യാമ്പുകള്‍ ഐ എം എ സംസ്ഥാന നേതാക്കള്‍ സന്ദര്‍ശിച്ച് സഹായം വാഗ്ദാനം ചെയ്തിരുന്നു. അതിനെ തുടര്‍ന്നാണ് പൂര്‍ണ്ണമായും വീടു നഷ്ടപ്പെട്ട് വാടകയ്ക്ക് താമസിച്ചു വരികയായിരുന്ന ആറ് കുടുംബങ്ങളുടെ വീട്ടുവാടക നല്‍കുന്നത് ഐ എം എ ഏറ്റെടുത്തത്. ക്യാമ്പുകളില്‍ ഡോക്ടര്‍മാരുടെ സേവനവും ഐ എം എ നടത്തിയിരുന്നു. മുജീബ് തുടരാപ്പുഴ, ഹഫ്‌സത്ത് പുലിവലത്തില്‍, സുരേഷ് ബാബു പുല്ലുമല, ചാണ്ടി പാറടിയില്‍, ബൈജു പുലിതൂക്കില്‍, ശാരദ നാരായണന്‍ പരപ്പന്‍പാറ എന്നിവര്‍ക്കുള്ള വാടക പ്രമാണ പത്രങ്ങളാണ് ചടങ്ങില്‍ വച്ച് മന്ത്രിക്ക് കൈമാറിയത്.
 
 
 
 

All rights reserved | Website developed and maintained by Zyonz Technologies