11-Dec-2018 (Tue)
 
 
 
ഈങ്ങാപ്പുഴയില്‍ സ്വകാര്യ ബസ്സ് പാലത്തില്‍ ഇടിച്ച് ദേശീയ പാതയില്‍ ഗതാഗത തടസ്സം
ഈങ്ങാപ്പുഴ: സ്വകാര്യ ബസ്സ് പാലത്തില്‍ ഇടിച്ച് ദേശീയ പാതയില്‍ ഗതാഗത തടസ്സം. തിരുവനന്തപുരത്തുനിന്നും പുല്‍പ്പള്ളിക്ക് പോവുകയായിരുന്ന ബസ്സാണ് നിയന്ത്രണം വിട്ട് പാലത്തിന്റെ കൈ വരിയില്‍ ഇടിച്ചത്. രാവിലെ ആറുമണിയോടെയായിരുന്നു അപകടം. ഇടുങ്ങിയ പാലത്തില്‍ ബസ്സ് കുടുങ്ങിയതോടെ ദേശീയ പാതയില്‍ ഗതാഗതം തടസ്സപെട്ടു.
 
ഭിന്നശേഷിക്കാരുടെ സംരക്ഷണം ഉറപ്പുവരുത്തി പുതുപ്പാടിയില്‍ ബഡ്‌സ് സ്‌കൂള്‍ ആന്റ് റീഹാബിലിറ്റേഷന്‍ സെന്റര്‍
പുതുപ്പാടി: റോഡുകളും തോടുകളും കൃഷിയും അഭിവൃദിപ്പെടുത്തല്‍ മാത്രമല്ല വികസനമെന്നും സാമൂഹ്യമായി നമ്മള്‍ പരിഗണിക്കേണ്ട മുഴുവന്‍ വിഭാഗങ്ങള്‍ക്കും പൊതുവായ സമത ഉണ്ടാക്കി കൊടുക്കുക എന്നത് വികസന പ്രവര്‍ത്തനത്തിന്റെ ഭാഗമാണെന്നും തദ്ദേശ സ്വയംഭരണ വകുപ്പ് മന്ത്രി എ സി മൊയ്തീന്‍. ശാരീരിക മാനസിക വെല്ലുവിളി നേരിടുന്നവര്‍ക്കായി കുടുംബശ്രീയുടെ സഹകരണത്തോടെ പുതുപ്പാടി ഗ്രാമപഞ്ചായത്ത് കൈതപ്പൊയില്‍ വള്ള്യാട് നിര്‍മ്മിച്ച ബഡ്‌സ് സ്‌കൂള്‍ ആന്റ് റീഹാബിലിറ്റേഷന്‍ സെന്റര്‍ ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. സ്വകാര്യ സ്ഥാപനങ്ങള്‍ മെച്ചപ്പെട്ട സേവനങ്ങളാണ് നല്‍കുന്നത്. പക്ഷേ പല കുടുംബങ്ങള്‍ക്കും താങ്ങാന്‍ കഴിയാത്ത ചെലവാണ് ഇത്തരം ആളുകളെ കൊണ്ട് ഉണ്ടാവുന്നത്. ഇവര്‍ സമൂഹത്തിനും മാതാപിതാക്കള്‍ക്കും ഭാരമായി കഴിയേണ്ടവരല്ല. നമ്മെ പോലെ സാധാരണ ജീവിതം നയിക്കാന്‍ കഴിയുന്ന ശേഷി പരിമിതമായ തോതില്‍ എങ്കിലും ഇവര്‍ക്ക് ഉണ്ടാക്കി കൊടുക്കാന്‍ നമുക്ക് കഴിയും. ഇതിനുള്ള പദ്ധതിയാണ് പുതുപ്പാടി ഗ്രാമപഞ്ചായത്ത് നടപ്പിലാക്കിയിരിക്കുന്നത്. ഭവന പദ്ധതി വരുന്നതോടെ പാവപ്പെട്ട ആളുകളെ സഹായിക്കാന്‍ കഴിയുന്ന നിര്‍മാണ സംവിധാനം വേണം. കുടുംബശ്രീയെയും തൊഴിലുറപ്പ് പദ്ധതിയെയും ബന്ധിപ്പിച്ചുകൊണ്ട് പ്ലംബിങ്ങ്, വയറിംങ്ങ് ഉള്‍പ്പെടെയുള്ള തൊഴിലുകള്‍ ചെയ്യാന്‍ ശേഷിയുള്ളവരാക്കി പരിശീലിപ്പിച്ചു വരികയാണ്. ഇത്തരം സംരംങ്ങളില്‍ കുടുംബശ്രീക്ക് വലിയ പങ്ക് വഹിക്കാനുണ്ട്. ഐ ടി മേഖലയില്‍ ഉള്‍പ്പെടെയുള്ള സംരംഭങ്ങള്‍ തുടങ്ങാന്‍ ഗ്രാമീണ മേഖലയിലെ കുടുംബിനികളെ പ്രാപ്തരാക്കുകയും പഞ്ചായത്തില്‍ തൊഴില്‍ അവസരങ്ങള്‍ ലഭ്യമാക്കുകയും ചെയ്യുന്ന രീതിയില്‍ കുടുംബശ്രീയെ പരിവര്‍ത്തിപ്പിക്കാനാണ് സര്‍ക്കാര്‍ ശ്രമിക്കുന്നത്.
 
പാറന്നൂര്‍ ഉസ്താദ് പണ്ഡിത പ്രതിഭാ പുരസ്‌കാരം വാവാട് വാവാട് കുഞ്ഞിക്കോയ മുസ്ലിയാര്‍ക്ക് സമ്മാനിച്ചു
കോഴിക്കോട്: റിയാദ് കോഴിക്കോട് ജില്ലാ മുസ്‌ലിം ഫെഡറേഷന്‍ ഏര്‍പ്പെടുത്തിയ പാറന്നൂര്‍ പി പി ഇബ്രാഹിം മുസ്ലിയാര്‍ പണ്ഡിത പ്രതിഭാ പുരസ്‌കാരം സമസ്ത കേന്ദ്ര മുശാവറ അംഗവം വാവാട് കുഞ്ഞിക്കോയ മുസ്ലിയാര്‍ക്ക് സമസ്ത പ്രസിഡന്റ് സയ്യിദ് മുഹമ്മദ് ജിഫ്രി മുത്തുക്കോയ തങ്ങള്‍ സമര്‍പ്പിച്ചു. ഇസ്ലാമിന്റെ ചരിത്രം പരിശോധിച്ചാല്‍ കഴിവുള്ളവരെ അംഗീകരിക്കുകയും ആദരിക്കുകയും ചെയ്തതായി കാണാമെന്നും മുഹമ്മദ് നബിയുടെ കാലത്തും തന്റെ അനുചരന്‍മാരിലെ വിവിധ മേഖലകളില്‍ മികവ് തെളിയിച്ചവരെ ആദരിച്ചിട്ടുണ്ടെന്നും മുത്തുക്കോയ തങ്ങള്‍ പറഞ്ഞു. കോഴിക്കോട് ജില്ലയില്‍ സമസ്തയുടെ അത്താണിയാണ് വാവാട് ഉസ്താദെന്നും തങ്ങള്‍ അഭിപ്രായപ്പെട്ടു. സമസ്ത ഓഡിറ്റോറിയത്തില്‍ നടന്ന ചടങ്ങില്‍ എസ് കെ എസ് എസ് എഫ് ജില്ലാ പ്രസിഡന്റ് സയ്യിദ് മുബഷിര്‍ തങ്ങള്‍ ജമലുല്ലൈലി അധ്യക്ഷത വഹിച്ചു. സിംസാറുല്‍ ഹഖ് ഹുദവി മുഖ്യപ്രഭാഷണം നടത്തി. മുസ്തഫ ബാഖവി പെരുമുഖം അവാര്‍ഡ് ജേതാവിനെ പരിചയപ്പെടുത്തി. മൂസക്കുട്ടി നെല്ലിക്കാപ്പറമ്പ് പ്രശസ്തി പത്രം വായിച്ചു. എസ് കെ എസ് എസ് എഫ് ജില്ലാ സെക്രട്ടറി ഒ പി എം അഷ്‌റഫ് കുറ്റിക്കടവ് സ്വാഗതവും അബ്ദുസ്സലാം കാളാന്തിരി നന്ദിയും പറഞ്ഞു.
 
കോഴിക്കോട്: വെങ്ങളം രാമനാട്ടുകര ദേശീയ പാത ആറ് വരി ആക്കുന്നതിന്റ ഭാഗമായി പാതയോരങ്ങളിലെ മരങ്ങള്‍ മുറിച്ചു മാറ്റുന്നതും മാറ്റി നടുന്നതും സംബന്ധിച്ച് കലക്ടര്‍ യു വി ജോസിന്റെ അധ്യക്ഷതയില്‍ കലക്ടറുടെ ചേംബറില്‍ യോഗം ചേര്‍ന്നു. 2354 മരങ്ങള്‍ മുറിച്ചു മാറ്റുന്നിടത്ത് ഇരുപത്തി അയ്യായിരത്തില്‍ അധികം മരങ്ങളാണ് റോഡ്് നവീകരണവുമായി ബന്ധപ്പെട്ട് പുതിയതായി വച്ചു പിടിപ്പിക്കുക. ഇത്രയും മരങ്ങള്‍ വിവിധ ഇടങ്ങളില്‍ വീണ്ടും നട്ട് പിടിപ്പിക്കാനാണ് ലക്ഷ്യമിടുന്നത്. സര്‍ക്കാര്‍ ഭൂമികള്‍ ലഭ്യമില്ലാത്തിടത്ത് സ്വകാര്യ വക്തികളുടെ സ്ഥലങ്ങളിലും പുതിയ തൈകള്‍ വച്ചു പിടിപ്പിക്കും. അടുത്ത പരിസ്ഥിതി ദിനത്തിനകം മരങ്ങള്‍ വച്ചു പിടിപ്പിക്കാനാണ് ഉദ്ദേശിക്കുന്നത്. സംഘടനകള്‍, കൂട്ടായ്മകള്‍ എന്നിവയുടെ സേവനവും പദ്ധതിക്കായി പ്രയോജനപ്പെടുത്തും. വിശദമായ ഡി പി ആര്‍ സര്‍ക്കാരിലേക്ക് സമര്‍പ്പിക്കും. ഡെപ്യൂട്ടി കലക്ടര്‍ ഷാമിന്‍ വി സെബാസ്റ്റ്യന്‍, അസിസ്റ്റന്റ് ഫോറസ്റ്റ് കണ്‍സര്‍വേറ്റര്‍ വി സന്തോഷ് കുമാര്‍, പ്രൊഫ. ടി ശോഭീന്ദ്രന്‍ മാസ്റ്റര്‍, വകുപ്പ്തല ഉദ്യോഗസ്ഥര്‍, പരിസ്ഥിതി പ്രവര്‍ത്തകര്‍ തുടങ്ങിയവര്‍ പങ്കടുത്തു.
 
പീഡന കേസില്‍ കുടുക്കുമെന്ന് ഭീഷണിപ്പെടുത്തി പണം തട്ടുന്നയാള്‍ പിടിയില്‍
താമരശ്ശേരി: പീഡന കേസില്‍ കുടുക്കുമെന്ന് ഭീഷണിപ്പെടുത്തി പണം തട്ടുന്നയാളെ താമരശ്ശേരി പോലീസ് അറസ്റ്റ് ചെയ്തു. പൂനൂര്‍ തേക്കും തോട്ടം ഷമീര്‍(37) ആണ് അറസ്റ്റിലായത്. ഉണ്ണികുളം മങ്ങാട് സ്വദേശി ജാബിറിന്റെ പരാതിയിലാണ് പോലീസ് കേസെടുത്തത്. ജാബിറിന്റെ സഹപാഠിയാണ് ഓട്ടോ ഡ്രൈവറായ ഷമീര്‍. ഓട്ടോറിക്ഷ പഠിപ്പിക്കാനായി ഷമീറിനൊപ്പം പോവാറുണ്ടായിരുന്ന ജാബിറിനെ കഴിഞ്ഞ മാസം 26 ന് കോഴിക്കോട്ടേക്ക് കൂട്ടികൊണ്ടുപോയിരുന്നു. കൊടുവള്ളിയില്‍ എത്തിയപ്പോള്‍ ഷമീറിന്റെ ഭാര്യയെന്ന് പരിചയപ്പെടുത്തിയ സ്ത്രീയും പതിനെട്ടുകാരിയായ മകളും ഓട്ടോറിക്ഷയില്‍ കയറുകയും ബീച്ചില്‍പോയി തിരിച്ചു പോരുകയും ചെയ്തു. അടുത്ത ദിവസം രാവിലെ ഷമീര്‍ ജാബിറിനെ വിളിച്ച് 200 രൂപ കടം വാങ്ങി. ഉച്ചയോടെ വിളിച്ച് വീണ്ടും പണം ആവശ്യപ്പെട്ടു. വിവാഹം രജിസ്റ്റര്‍ ചെയ്യാനാണെന്ന പേരിലായിരുന്നു പണം ചോദിച്ചത്. പിറ്റേ ദിവസം ഷമീറിന്റെ ഭാര്യയെന്ന് പരിചയപ്പെടുത്തിയ സ്ത്രീ വിളിച്ച് രണ്ടായിരം രൂപയും ഷമീര്‍ നാലായിരം രൂപയും കടം ചോദിച്ചു. ഇത് നല്‍കാതിരുന്നതിനെ തുടര്‍ന്ന് പിറ്റേദിവസം ഷമീര്‍ സ്ത്രീയെയും രണ്ട് മക്കളെയും കൂട്ടി ജാബിറിന്റെ ഭാര്യാ വീട്ടിലെത്തി പീഡിപ്പിച്ചതായി പറഞ്ഞു. പിറ്റേ ദിവസം വീണ്ടും ഷമീര്‍ ജാബിറിനെ വിളിച്ചുവരുത്തി പോലീസില്‍ പരാതി നല്‍കിയതായി ഭീഷണിപ്പെടുത്തി 5000 രൂപ കൈക്കലാക്കി. പിറ്റേദിവസം രാവിലെ എസ് ഐ ആണെന്നും പറഞ്ഞ് വിളിച്ച് വിവരങ്ങള്‍ ചോദിക്കുകയും ഉടന്‍ തന്നെ ഷമീര്‍ വിളിച്ച് സി ഐ ക്ക് നല്‍കാനെന്നും പറഞ്ഞ് 5000 രൂപ വാങ്ങിയെടുക്കുകയും ചെയ്തു. ഇതോടെയാണ് ജാബിര്‍ പോലീസില്‍ പരാതി നല്‍കിയത്. കട്ടിപ്പാറ സ്വദേശിയുടെ ഭാര്യയായ സ്ത്രീയെയും രണ്ട് മക്കളെയും കൂടെ താമസിപ്പിച്ചാണ് ഷമീര്‍ കെണിയൊരുക്കുന്നത്. നിരവധി പേരെ ഷമീര്‍ ഇത്തരത്തില്‍ കെണിയില്‍ പെടുത്തിയതായി പോലീസ് പറഞ്ഞു. പരാതിപ്പെടുമെങ്കിലും മാനഹാനി ഭയന്ന് ആരും കേസുമായി മുന്നോട്ടു പോവാത്തതാണ് ഇയാള്‍ക്ക് തുണയായത്. മാന്യമായി ജീവിക്കുന്നവരെയാണ് ഷമീര്‍ കെണിയില്‍ പെടുത്തിയിരുന്നത്. താമരശ്ശേരി ജുഡീഷ്യല്‍ ഫസ്റ്റ് ക്ലാസ് മജിസ്ട്രേറ്റിനു മുന്നില്‍ ഹാജറാക്കിയ പ്രതിയെ 14 ദിവസത്തേക്ക് റിമാണ്ട് ചെയ്തു.
 
കരനെല്‍കൃഷിയില്‍ നൂറുമേനി വിളയിച്ച് സംഘകൃഷി ഗ്രൂപ്പ്
പുതുപ്പാടി: പുതുപ്പാടി ഗ്രാമപഞ്ചായത്ത് കുടുംബശ്രീ സി ഡി എസിന് കീഴില്‍ കുപ്പായക്കോട് വാര്‍ഡില്‍ പ്രവര്‍ത്തിക്കുന്ന കിസാന്‍ സംഘകൃഷി ഗ്രൂപ്പ് കരനെല്‍കൃഷി വിളവെടുപ്പ് നടത്തി. വിളവെടുപ്പ് ഉദ്ഘാടനം ഗ്രാമപഞ്ചായത്ത് പ്രസിഡന്റ് അംബിക മംഗലത്ത് നിര്‍വഹിച്ചു. പാട്ടത്തിനെടുത്ത 50 സെന്റ് സ്ഥലത്താണ് കൃഷിവകുപ്പില്‍ നിന്നും കുടുംബശ്രീ മുഖേന ലഭിച്ച വിത്ത് വിതച്ച് നൂറു മേനി വിളവെടുത്തത്.
 
കാരുണ്യ സ്പര്‍ശവുമായി അഷ്റഫ് കൂട്ടായ്മ
കോഴിക്കോട്: അഖില കേരള അഷ്റഫ് കൂട്ടായ്മയുടെ നേതൃത്വത്തില്‍ ബീച്ച് ആശുപത്രിയിലേക്ക് വീല്‍ചെയറുകള്‍ നല്‍കി. മേയര്‍ തോട്ടത്തില്‍ രവീന്ദ്രന്‍ വിതരണോദ്ഘാടനം നിര്‍വഹിച്ചു. ആശുപത്രി സൂപ്രണ്ട് ഡോ. ഉമറുല്‍ ഫാറൂഖ് വീല്‍ചെയറുകള്‍ ഏറ്റുവാങ്ങി. സംസ്ഥാന പ്രസിഡന്റ് അഷ്റഫ് കളത്തിങ്ങല്‍ അധ്യക്ഷനായി. കോര്‍പ്പറേഷന്‍ കൗണ്‍സിലര്‍ ശ്രീകല, അഷ്റഫ് പൂക്കോട്, അഷ്റഫ് താണിക്കല്‍, അഷ്റഫ് വലിയാട്ട്, അഷ്റഫ് കക്കാട്, അഷ്റഫ് കുടുക്കില്‍, അഷ്റഫ് കെ പി, കളത്തില്‍ അഷ്റഫ്, ഡോ. ബിനു, ഡോ. വിപിന്‍ വര്‍ക്കി, നഴ്സിങ് സൂപ്രണ്ട് മേരി, ലോ സെക്രട്ടറി ബാബു എന്നിവര്‍ സംബന്ധിച്ചു. ജനറല്‍ സെക്രട്ടറി അഷ്റഫ് മനരിക്കല്‍ സ്വാഗതവും ഐ പി അഷ്റഫ് നന്ദിയും പറഞ്ഞു.
 
പുതുപ്പാടി സ്വദേശികള്‍ ഉള്‍പ്പെടെയുള്ള മൂന്നംഗ മോഷണ സംഘം കല്‍പ്പറ്റയില്‍ പിടിയില്‍
കല്‍പ്പറ്റ: പുതുപ്പാടി സ്വദേശികള്‍ ഉള്‍പ്പെടെയുള്ള മൂന്നംഗ മോഷണ സംഘം കല്‍പ്പറ്റയില്‍ പോലീസിന്റെ പിടിയിലായി. പുതുപ്പാടി ഈങ്ങാപ്പുഴ കുഞ്ഞുകുളം വിളഞ്ഞിപിലാക്കല്‍ ടി എന്‍ മുഹമ്മദ് ഷാഫി(23), ഈങ്ങാപ്പുഴ കാക്കവയലില്‍ താമസിച്ചിരുന്ന എന്‍ കെ റഫീഖ്(39), കായണ്ണ ചക്കിട്ടപ്പാറ ഉമ്മിണിക്കുന്നുമ്മല്‍ കെ ബി പ്രദീഷ് കുമാര്‍(30) എന്നിവരെയാണ് കല്‍പ്പറ്റ പോലീസ് അറസ്റ്റ് ചെയ്തത്. ബാലുശ്ശേരി, കുറ്റ്യാടി, കോടഞ്ചേരി, താമരശ്ശേരി, തൊട്ടില്‍പാലം സ്റ്റേഷനുകളില്‍ ഉള്‍പ്പെടെ ജില്ലയിലെ നിരവധി സ്റ്റേഷനുകളില്‍ ഇവര്‍ക്കെതിരെ മോഷണ കേസുകള്‍ നിലവിലുണ്ട്. കല്‍പ്പറ്റ പുതിയ ബസ്റ്റാന്റിന് സമീപത്തെ ആളൊഴിഞ്ഞ സ്ഥലത്തുനിന്നും മോഷണം ആസൂത്രണം ചെയ്യുന്നതിനിടെയാണ് ഇവരെ പിടികൂടിയതെന്ന് പോലീസ് പറഞ്ഞു. ചോദ്യം ചെയ്യലിലാണ് കുപ്രസിദ്ധ മോഷ്ടാക്കളാണെന്ന് തിരിച്ചറിഞ്ഞത്. തൊരപ്പന്‍ എന്നറിയപ്പെടുന്ന റഫീഖ് വയനാട്ടിലാണ് ഇപ്പോള്‍ താമസമെന്നാണ് പോലീസിന് മൊഴി നല്‍കിയത്. മാനന്തവാടി കോടതിയില്‍ ഹാജരാക്കിയ പ്രതികളെ റിമാണ്ട് ചെയ്തു.
 
ക്യാമറയുമായി റോഡിലിറങ്ങി എട്ടിന്റെ പണി കൊടുക്കുന്ന എം വി ഐ പടിയിറങ്ങി
കൊടുവള്ളി: ഗതാഗത നിയമം പാലിക്കാത്തവരെ പിടികൂടാന്‍ ക്യാമറയുമായി റോഡിലിറങ്ങി എട്ടിന്റെ പണി കൊടുക്കുന്ന കൊടുവള്ളി ജോയിന്റ് ആര്‍ ടി ഓഫീസിലെ മോട്ടോര്‍ വെഹിക്കിള്‍ ഇന്‍സ്‌പെക്ടര്‍ വി വി ഫ്രാന്‍സിസ് സര്‍വീസില്‍ നിന്നും വിരമിച്ചു. മണിക്കൂറുകള്‍ക്കുള്ളില്‍ നൂറുകണക്കിന് നിയമ ലംഘനങ്ങള്‍ ക്യാമറയിലാക്കി ഫ്രീക്കന്‍മാരുടെ കണ്ണിലെ കരടായി മാറിയ വി വി ഫ്രാന്‍സിസ് 17 വര്‍ഷത്തെ സേവനത്തിന് ശേഷമാണ് മോട്ടോര്‍ വാഹന വകുപ്പിന്റെ പടിയിറങ്ങിയത്. വാഹനങ്ങളുടെ എണ്ണം നാള്‍ക്കു നാള്‍ വര്‍ധിക്കുമ്പോള്‍ നിയമ ലംഘനങ്ങളും കൂടി വന്നു. ഒരു വാഹനം പിടികൂടി നിയമ നടപടി സ്വീകരിക്കുന്നതിനിടെ പത്തു വാഹനങ്ങള്‍ നിയമങ്ങള്‍ കാറ്റില്‍ പറത്തി കണ്‍മുന്നിലൂടെ കടന്നു പോവുന്നത് പതിവായതോടെയാണ് വി വി ഫ്രാന്‍സിസ് ക്യാമറയുമായി റോഡില്‍ ഇറങ്ങാന്‍ തുടങ്ങിയത്.
 
താമരശ്ശേരിയിലെ നൂറ് വോട്ടുകള്‍ ഓമശ്ശേരിലേക്ക് മാറ്റി: പരാതിയുമായി യു ഡി എഫ്
താമരശ്ശേരി: താമരശ്ശേരി ഗ്രാമപഞ്ചായത്തിലെ 40-ാം നമ്പര്‍ ബൂത്തില്‍ നിന്നും ക്രമനമ്പര്‍ 773 മുതല്‍ 872 വരെയുള്ള നൂറ് വോട്ടുകള്‍ ഓമശ്ശേരി ഗ്രാമപഞ്ചായത്തിലെ 41-ാം നമ്പര്‍ ബൂത്തിലേക്ക് മാറ്റിയ നടപടിക്കെതിരെ പ്രതിഷേധം ശക്തമാവുന്നു. നാല്‍പ്പതാം ബൂത്തില്‍ വോട്ടര്‍മാരുടെ എണ്ണം വര്‍ധിച്ചതിനെ തുടര്‍ന്ന് ക്രമ നമ്പര്‍ പ്രകാരം അടുത്ത ബൂത്തിലേക്ക് മാറ്റിയതിലെ അശാസ്ത്രീയതക്കെതിരെയാണ് പ്രിഷേധം. താമരശ്ശേരി പഞ്ചായത്തിലെ അണ്ടോണ പ്രദേശത്തുള്ള വോട്ടര്‍മാര്‍ നാല് കിലോമീറ്ററോളം സഞ്ചരിച്ച് വെളിമണ്ണയിലെ ബൂത്തിലെത്തണമെന്നും ഇത് പലര്‍ക്കും പ്രയാസങ്ങള്‍ സൃഷ്ടിക്കുമെന്നുമാണ് ആക്ഷേപം. അശാസ്ത്രീയ രീതിയില്‍ ബൂത്ത് ക്രമീകരിച്ച ഉദ്യോഗസ്ഥര്‍ക്കെതിരെ നടപടി സ്വീകരിക്കണമെന്ന് ആവശ്യപ്പെട്ട് യു ഡി എഫ് താമരശ്ശേരി പഞ്ചായത്ത് കമ്മിറ്റി തെരഞ്ഞെടപ്പ് കമ്മീഷന് പരാതി നല്‍കി. പരിഹാരം ഉണ്ടായില്ലെങ്കില്‍ ശക്തമായ പ്രക്ഷോഭ പരിപാടികള്‍ക്ക് നേതൃത്വം നല്‍കുമെന്ന് യു ഡി എഫ് അറിയിച്ചു.
 
 
 
 

All rights reserved | Website developed and maintained by Zyonz Technologies