18-Oct-2018 (Thu)
വ്യാഴാഴ്ച സംസ്ഥാനത്ത് ഹര്‍ത്താല്‍; ബി ജെ പി പിന്തുണ പോലീസിനെ വെട്ടിച്ച് കടന്ന പീഡന കേസ് പ്രതി അറസ്റ്റില്‍; മാതാപിതാക്കള്‍ ഉള്‍പ്പെടെ അഞ്ചുപേര്‍ റിമാണ്ടില്‍ അനര്‍ഹരായ കാര്‍ഡുടമകള്‍ പൊതുവിഭാഗത്തിലേക്ക് മാറ്റണം ബാലാവകാശ സംരക്ഷണ സമിതികളുടെ ശാക്തീകരണത്തിന് ശില്‍പ്പശാല നടത്തും പോലീസിനെ വെട്ടിച്ച് കടന്ന പീഡന കേസ് പ്രതിയെ കണ്ടെത്താനായില്ല പ്രളയക്കെടുതി: വ്യവസായ വാണിജ്യ സ്ഥാപനങ്ങളുടെ നഷ്ടകണക്കെടുക്കുന്നു റഫാല്‍ കരാര്‍ അഴിമതി; സംയുക്ത പാര്‍ലമെന്റ് കമ്മറ്റി അന്വേഷണം അവശ്യപ്പെട്ട് യൂത്ത് കോണ്‍ഗ്രസ് പോസ്റ്റ് ഓഫീസ് പിക്കറ്റിംഗ് നടത്തി അഞ്ച് ലിറ്റര്‍ ചാരായവുമായി കോടഞ്ചേരി സ്വദേശി പിടിയില്‍ പുതുപ്പാടി ഗ്രാമപഞ്ചായത്ത് ഓഫീസിലേക്ക് എല്‍ ഡി എഫ് മാര്‍ച്ച്
 
 
 
 
പ്രളയക്കെടുതി വിലയിരുത്താന്‍ ഐക്യരാഷ്ട്രസഭ പ്രതിനിധി സന്ദര്‍ശനം
കോഴിക്കോട്: പ്രളയക്കെടുതി വിലയിരുത്താന്‍ കോഴിക്കോടെത്തിയ യു എന്‍ ഡി പി പ്രതിനിധി മഹേഷ് മോഹന്‍ദാസ് ഉരുള്‍പ്പൊട്ടലുണ്ടായ കട്ടിപ്പാറ പഞ്ചായത്തിലെ കരിഞ്ചോല, പുതുപ്പാടി പഞ്ചായത്തിലെ കണ്ണപ്പന്‍കുണ്ട് തുടങ്ങിയ പ്രദേശങ്ങള്‍ സന്ദര്‍ശിച്ചു. തിങ്കാളാഴ്ച രാവിലെ കലക്ടറുടെ ചേമ്പറില്‍ എത്തിയ യു എന്‍ ഡി പി പ്രതിനിധിയുമായി ജില്ലാ കലക്ടര്‍ യു വി ജോസ് ചര്‍ച്ച നടത്തി. ജില്ലയിലെ കാലവര്‍ഷക്കെടുതികളും പ്രളയവും ഉരുള്‍പ്പൊട്ടലും മൂലമുണ്ടായ നാശനഷ്ടങ്ങളും ദുരന്ത നിവാരണത്തിന് ജില്ലയില്‍ നടത്തിയ പ്രവര്‍ത്തനങ്ങളും വിശദീകരിച്ചു. ഡപ്യൂട്ടി കളക്ടര്‍ (ദുരന്ത നിവാരണം) എന്‍ റംല, റീജ്യണല്‍ ടൗണ്‍പ്ലാനര്‍ അബ്ദുള്‍ മാലിക്, ഇന്ത്യന്‍ ഇന്‍സ്റ്റിറ്റ്യൂട്ട് ഓഫ് ആര്‍ക്കിടെക്ട് കോഴിക്കോട് ചാപ്റ്റര്‍ പ്രതിനിധി വിവേക് എന്നിവര്‍ ചര്‍ച്ചയില്‍ പങ്കെടുത്തു. തുടര്‍ന്നാണ് യു എന്‍ പ്രതിനിധി ദുരന്ത മേഖലകള്‍ സന്ദര്‍ശിച്ചത്.
 
മുപ്പതോളം കുടുംബങ്ങള്‍ക്ക് കുടിവെള്ളമെത്തിച്ച് എസ് വൈ എസ് സാന്ത്വനം പ്രവര്‍ത്തകര്‍
ആവിലോറ: കുടിവെള്ളക്ഷാമം നേരിടുന്ന മുപ്പതോളം കുടുംബങ്ങള്‍ക്ക് ആശ്വാസം പകര്‍ന്ന് എസ് വൈ എസ് സാന്ത്വനം പ്രവര്‍ത്തകര്‍. കാരന്തൂര്‍ മര്‍ക്കസിന്റെയും നാട്ടുകാരുടെയും സഹായത്തോടെ ആവിലോറ യൂണിറ്റ് എസ് വൈ എസ്, കേരള മുസ്ലിം ജമാഅത്ത് സാന്ത്വനം ക്ലബിന്റെ ആഭിമുഖ്യത്തിലാണ് പുറന്താങ്ങിയില്‍, നുച്ചിപ്പൊയില്‍ പ്രദേശങ്ങളിലെ മുപ്പതോളം കുടുംബങ്ങള്‍ക്ക് കുടിവെള്ളം എത്തിച്ചത്. കഴിഞ്ഞ വേനലില്‍ പ്രദേശത്തെ കുടിവെള്ള പദ്ധതിയുടെ പൈപ്പ് പൊട്ടി കുടിവെള്ള വിതരണം മുടങ്ങിയതോടെയാണ് കുടിവെള്ളത്തിനായി നാട്ടുകാര്‍ നെട്ടോട്ടമോടുന്നത് എസ് വൈ എസ് പ്രവര്‍ത്തകരുടെ ശ്രദ്ധയില്‍ പെട്ടത്. തുടര്‍ന്ന് കാരന്തൂര്‍ മര്‍ക്കസുമായി ബന്ധപ്പെടുകയും മര്‍ക്കസിന്റെ നാല്‍പ്പതാം വാര്‍ഷികത്തിന്റെ ഭാഗമായുള്ള നാല്‍പ്പതിന പദ്ധതികളില്‍ ഉള്‍പ്പെടുത്തി ആവിലോറയില്‍ കുടിവെള്ള പദ്ധതി സ്ഥാപിക്കാനായി മൂന്നേമുക്കാല്‍ ലക്ഷം രൂപ അനുവദിക്കുകയുമായിരുന്നു. കൂടുതല്‍ പണം ആവശ്യമായി വന്നതോടെ പ്രവാസികള്‍ ഉള്‍പ്പെടെയുള്ള പ്രദേശവാസികളുടെയും ഗുണപോക്താക്കളുടെയും സഹായത്തോടെ പ്രവൃത്തി പൂര്‍ത്തീകരിച്ചു. കിണര്‍ സ്ഥാപിക്കാന്‍ പ്രദേശവാസിയായ തടായില്‍ അബ്ദുല്‍ ഖാദര്‍ ഹാജിയും ടാങ്ക് സ്ഥാപിക്കാന്‍ താമരശ്ശേരി കുടുക്കിലുമ്മാരം സ്വദേശി നിസാറും സ്ഥലം സൗജന്യമായി നല്‍കുകയായിരുന്നു.
 
പൊതു ശ്മശാനത്തില്‍ അശാസ്ത്രീയമായി മൃതദേഹം ദഹിപ്പിക്കുന്നതിനെതിരെ നാട്ടുകാരുടെ പ്രതിഷേധം
കോരങ്ങാട്: കോരങ്ങാട് പൊതു ശ്മശാനത്തില്‍ അശാസ്ത്രീയ രീതിയില്‍ മൃതദേഹം ദഹിപ്പിക്കുന്നതിനെതിരെ നാട്ടുകാര്‍ രംഗത്തെത്തിയത് സംഘര്‍ഷത്തിന് കാരണമായി. അസഹ്യമായ പുകയും ദുര്‍ഗന്ധവും കാരണം പ്രദേശവാസികള്‍ പ്രക്ഷോഭത്തിനിറങ്ങിയതിനെ തുടര്‍ന്ന് ശ്മശാനത്തിന്റെ പ്രവര്‍ത്തനം താല്‍ക്കാലികമായി നിര്‍ത്തിവെക്കാന്‍ തീരുമാനിച്ചെങ്കിലും വീണ്ടും മൃതദേഹം ദഹിപ്പിക്കാന്‍ എത്തിച്ചതാണ് സംഘര്‍ഷത്തിന് കാരണമായത്. കോരങ്ങാട് ഗവണ്‍മെന്റ് വൊക്കേഷണല്‍ ഹയര്‍ സെക്കന്ററി സ്‌കൂളിനോട് ചേര്‍ന്നുള്ള ജനവാസ കേന്ദ്രത്തില്‍ പ്രവര്‍ത്തിക്കുന്ന ശ്മശാനത്തില്‍ അശാസ്ത്രീയ രീതിയില്‍ മൃതദേഹം ദഹിപ്പിക്കുന്നത് പ്രദേശത്തെ ഇരുനൂറോളം കുടുംബങ്ങളെയും സര്‍ക്കാര്‍ സ്‌കൂളുകളിലേയും ഐ എച് ആര്‍ ഡി കോളേജിലേയും അയ്യായിരത്തോളം വിദ്യാര്‍ത്ഥികളെയും ദുരിതത്തിലാക്കുകയാണ്. നനഞ്ഞ ചികരിയും പ്ലാസ്റ്റിക് കുപ്പികളും ഉപയോഗിച്ച് മൃതദേഹം ദഹിപ്പിക്കുന്നതിനാല്‍ പ്രദേശത്താകെ രൂക്ഷമായ പുകയും അസഹ്യമായ ദുര്‍ഗന്ധവും പരക്കുന്നുവെന്നാണ് നാട്ടുകാരുടെ പരാതി. ശാസ്ത്രീയ രീതിയിലുള്ള ശ്മശാനം സ്ഥാപിക്കുന്നുവെന്ന് വിശ്വസിപ്പിച്ച പഞ്ചായത്ത് ഭരണ സമിതി പ്രദേശ വാസികളെ കബളിപ്പിക്കുകയായിരുന്നുവെന്നും നാട്ടുകാര്‍ ആരോപിക്കുന്നു. പ്രശ്‌നത്തിന് പരിഹാരം ആവശ്യപ്പെട്ട് നാട്ടുകാര്‍ ആക്ഷന്‍ കമ്മിറ്റി രൂപീകരിച്ച് പഞ്ചായത്തോഫീസ് മാര്‍ച്ച് ഉള്‍പ്പെടെയുള്ള പ്രക്ഷോഭ പരിപാടികള്‍ പ്രഖ്യാപിച്ചതിനെ തുടര്‍ന്ന് ശനിയാഴ്ച പഞ്ചായത്ത് അധികൃതര്‍ പ്രദേശവാസികളുമായി ചര്‍ച്ച നടത്തുകയും ആധുനിക സൗകര്യങ്ങള്‍ ഒരുക്കുന്നതുവരെ ശ്മശാനത്തിന്റെ പ്രവര്‍ത്തനം നിര്‍ത്തിവെക്കുമെന്ന് ഉറപ്പ് നല്‍കുകയും ചെയ്തിരുന്നു.
 
കോഴിക്കോട്: ജില്ലയെ മാലിന്യമുക്തമാക്കുക എന്ന ലക്ഷ്യത്തോടെ തദ്ദേശസ്വയംഭരണ സ്ഥാപനങ്ങള്‍, ശുചിത്വ മിഷന്‍, ഹരിതകേരള മിഷന്‍ എന്നിവയുടെ പങ്കാളിത്തത്തോടെ നടപ്പാക്കുന്ന ശുചിത്വസാക്ഷരതാ കര്‍മ്മപരിപാടിക്ക് സപ്തംബര്‍ 25 ന് തുടക്കമാകും. ജില്ലാഭരണകൂടം നടപ്പാക്കിവരുന്ന സീറോവേസ്റ്റ് പദ്ധതിയുടെ ഭാഗമായുള്ള ശുചിത്വ സാക്ഷരതയുടെ ഉദ്ഘാടനം തൊഴില്‍ എക്സൈസ് വകുപ്പ് മന്ത്രി ടി പി രാമകൃഷ്ണന്‍, ഗതാഗത വകുപ്പ് മന്ത്രി എ കെ ശശീന്ദ്രന്‍ എന്നിവര്‍ ചേര്‍ന്ന് നിര്‍വ്വഹിക്കും. ടാഗോര്‍ സെന്റിനറി ഹാളില്‍ ഉച്ചക്ക് രണ്ട് മണിക്ക് നടക്കുന്ന ചടങ്ങില്‍ ശുചിത്വസാക്ഷരതാ അണിയറ ശില്‍പികളെ അനുമോദിക്കും.
 
കോഴിക്കോട്: കോഴിക്കോട് കോര്‍പ്പറേഷന്‍ ബേപ്പൂര്‍ ബി സി റോഡില്‍ 16 ലക്ഷത്തോളം രൂപ ചെലവഴിച്ച് നിര്‍മ്മിച്ച കൃഷിഭവന്റെ പുതിയ കെട്ടിടവും ഇക്കോ ഷോപ്പ് കൗണ്ടറും മേയര്‍ തോട്ടത്തില്‍ രവീന്ദ്രന്‍ ഉദ്ഘാടനം ചെയ്തു. വികസന സ്റ്റാന്റിംഗ് കമ്മറ്റി ചെയര്‍മാന്‍ പി സി രാജന്‍ അധ്യക്ഷത വഹിച്ചു. ചടങ്ങിനോടനുബന്ധിച്ച് കാര്‍ഷിക പ്രദര്‍ശനവും സെമിനാറും, സൗജന്യ മണ്ണ് പരിശോധന ക്യാമ്പും സംഘടിപ്പിച്ചു. കാര്‍ഷിക സെമിനാറിന് ഹരിത കേരളം മിഷന്‍ ജില്ലാ കോര്‍ഡിനേറ്റര്‍ പി പ്രകാശ് നേതൃത്വം നല്‍കി. മണ്ണു സംരക്ഷണം എന്ന വിഷയത്തില്‍ ഒളവണ്ണ കൃഷി ഓഫീസര്‍ അജയ് അലക്സ് ക്ലാസെടുത്തു. ചടങ്ങില്‍ സംസ്ഥാന നാളികേര വികസന കോര്‍പ്പറേഷന്‍ ചെയര്‍മാന്‍ എം നാരായണന്‍ മാസ്റ്റര്‍ കര്‍ഷകരും കൃഷിഭവന്‍ ഉദ്യോഗസ്ഥരും സ്വരൂപിച്ച പ്രളയ ദുരിതാശ്വാസ ഫണ്ട് സ്വീകരിച്ചു. എക്സിക്യൂട്ടീവ് എഞ്ചിനീയര്‍ കെ പി രമേശന്‍ റിപ്പോര്‍ട്ട് അവതരിപ്പിച്ചു.
 
സി മുഹമ്മദ് ഫൈസിക്ക് ജന്മനാടിന്റെ സ്നേഹാദരം
താമരശ്ശേരി: സംസ്ഥാന ഹജ്ജ് കമ്മിറ്റി ചെയര്‍മാനായി തിരഞ്ഞെടുക്കപ്പെട്ട സി മുഹമ്മദ് ഫൈസിക്ക് പന്നൂരില്‍ സ്നേഹാദരം. നിയമസഭാ സ്പീക്കര്‍ പി ശ്രീരാമകൃഷ്ണന്‍ ചടങ്ങ് ഉദ്ഘാടനം ചെയ്യുകയും സി മുഹമ്മദ് ഫൈസിക്കുള്ള സ്നേഹോപഹാരം സമ്മാനിക്കുകയും ചെയ്തു. കാരാട്ട് റസാഖ് എം എല്‍ എ അധ്യക്ഷത വഹിച്ചു. എസ് വൈ എസ് ജില്ലാ സെക്രട്ടറി പി അഹമ്മദ് കബീര്‍ പരിചയപ്പെടുത്തല്‍ നടത്തി.
 
താമരശ്ശേരിയില്‍ വീണ്ടും മോഷണ പരമ്പര
താമരശ്ശേരി: താമരശ്ശേരി ടൗണിലും പരിസരത്തും മോഷണം തുടര്‍ക്കഥയാവുകയാണ്. ഞായറാഴ്ച പുലര്‍ച്ചെ താമരശ്ശേരി ചുങ്കത്തെ അഞ്ച് സ്ഥാപനങ്ങളില്‍ മോഷണം നടന്നു. ദേശീയ പാതയോരത്ത് കുന്നുംപുറത്ത് ഉണ്ണിയുടെ ഉടമസ്ഥതയിലുള്ള കെ ജി സ്റ്റോര്‍, സമീപത്തെ വര്‍ക്ക് ഷോപ്പ് എന്നിവിടങ്ങളിലാണ് ആദ്യം മോഷണം നടന്നത്. ഉണ്ണിയുടെ കടയില്‍ സൂക്ഷിച്ചിരുന്ന വിലപ്പെട്ട രേഖകള്‍ കടയ്ക്കു പിന്നിലെ തോട്ടില്‍ ഉപേക്ഷിച്ച നിലയില്‍ കണ്ടെത്തി. മൂന്നു മാസം മുമ്പും ഉണ്ണിയുടെ കടയില്‍ മോഷണം നടന്നിരുന്നുവെങ്കിലും ആരെയും പിടികൂടാനായിരുന്നില്ല. ഹില്‍വാലി റോഡില്‍ കച്ചേരിക്കുന്ന് ഹുസ്സൈന്റെ ഉടമസ്ഥതയിലുള്ള കെ കെ ഫ്‌ളോര്‍ മില്‍, നാസറിന്റെ ഇ കെ എച്ച് ഇന്‍ഡസ്ട്രിയല്‍സ്, സുബിന്റെ ഹൈ ടെക് അലൂമിനിയം ഫാബ്രിക്കേഷന്‍ എന്നീ സ്ഥാപനങ്ങളിലും ഞായറാഴ്ച പുലര്‍ച്ചെ മോഷണം നടന്നു. അലൂമിനിയം ഫാബ്രിക്കേഷന്റെ പൂട്ട് തകര്‍ക്കുന്നതിനിടെ പ്രദേശവാസിയായ അസീസ് വരുന്നതു കണ്ട് മോഷ്ടാവ് ഓടി രക്ഷപ്പെടുകയായിരുന്നു.
 
തിരുവമ്പാടി കെ എസ് ആര്‍ ടി സി ഓപ്പറേറ്റിങ് സെന്റര്‍ കെട്ടിടത്തിന് തറക്കല്ലിട്ടു
തിരുവമ്പാടി: തിരുവമ്പാടി കെ എസ് ആര്‍ ടി സി ഓപ്പറേറ്റിങ് സെന്ററിന്റെ നിര്‍മ്മാണപ്രവര്‍ത്തനങ്ങള്‍ക്ക് തുടക്കം. കെട്ടിടത്തിന്റെ ശിലാസ്ഥാപനം ഗതാഗതവകുപ്പ് മന്ത്രി എ കെ ശശീന്ദ്രന്‍ നിര്‍വഹിച്ചു. തിരുവമ്പാടി കറ്റിയാട്ട് പഞ്ചായത്ത് ഏറ്റെടുത്തു നല്‍കിയ 1.75 ഏക്കര്‍ സ്ഥലത്താണ് കെട്ടിടം നിര്‍മിക്കുന്നത്. ജോര്‍ജ് എം തോമസ് എം എല്‍ എ അധ്യക്ഷത വഹിച്ചു. ബ്ലോക്ക് പഞ്ചായത്ത് പ്രസിഡന്റ് ഏലിയാമ്മ ജോര്‍ജ്, ജില്ലാ പഞ്ചായത്തംഗം സി കെ കാസിം, ഗ്രാമപഞ്ചായത്ത് പ്രസിഡന്റ് പി ടി അഗസ്റ്റിന്‍, ബോസ് ജേക്കബ്ബ്, ജോളി ജോസഫ്, കെ എ അബ്ദുറഹിമാന്‍, ജോയി തൊമരക്കാട്ടില്‍ എന്നിവര്‍ സംസാരിച്ചു. കെ എസ് ആര്‍ ടി സിയെ നഷ്ടത്തില്‍ നിന്നും കരകയറ്റാന്‍ യൂണിയനുകളുടെ തുറന്ന സമീപനവും സഹകരണവും അനിവാര്യമാണെന്ന് മന്ത്രി അഭിപ്രായപ്പെട്ടു. രാവിലെയും വൈകുന്നേരവും കൂടുതല്‍ സര്‍വീസുകള്‍ നടത്തി ജനങ്ങളുടെ യാത്രാക്ലേശം കുറക്കുന്നതിനും ഡ്യൂട്ടി പരിഷ്‌കരണം മൂലം നിന്നുപോയ സര്‍വീസുകള്‍ പുനരാരംഭിക്കുന്നതിനും യൂണിയന്‍ നേതാക്കളുമായി ചര്‍ച്ച നടത്തി വരികയാണെന്ന് മന്ത്രി പറഞ്ഞു.
 
ഹജജ് കമ്മിറ്റി ചെയര്‍മാന്‍ സി മുഹമ്മദ് ഫൈസിക്ക് പൗരസ്വീകരണം ഞായറാഴ്ച്ച
കൊടുവള്ളി: കേരള ഹജജ് കമ്മിറ്റി ചെയര്‍മാനായി തെരഞ്ഞെടുക്കപ്പെട്ട കാരന്തൂര്‍ മര്‍ക്കസ് ജനറല്‍ മാനേജറും കേരള മുസ്ലിം ജമാഅത്ത് സംസ്ഥാന സെക്രട്ടറിയുമായ സി മുഹമ്മദ് ഫൈസിക്ക് ഞായറാഴ്ച്ച ജന്മനാടായ പന്നൂരില്‍ പൗരസ്വീകരണം നല്‍കുമെന്ന് സ്വാഗത സംഘം ഭാരവാഹികള്‍ വാര്‍ത്താ സമ്മേളനത്തില്‍ അറിയിച്ചു. വൈകിട്ട് ഏഴ് മണിക്ക് പന്നൂര്‍ അങ്ങാടിയില്‍ നടക്കുന്ന ചടങ്ങ് നിയമസഭാ സ്പീക്കര്‍ പി ശ്രീരാമകൃഷ്ണന്‍ ഉദ്ഘാടനം ചെയ്യും. എം കെ രാഘവന്‍ എം പി, എം എല്‍ എമാരായ കാരാട്ട് റസാഖ് , അഡ്വ. പി ടി എ റഹീം, പുരുഷന്‍ കടലുണ്ടി, പി വി അന്‍വര്‍, ഗ്രാമ പഞ്ചാത്ത് പ്രസിഡന്റ് എന്‍ സി ഹുസൈന്‍ മാസ്റ്റര്‍ തുടങ്ങിയ രാഷ്ട്രീയ സാമുഹിക സംസ്‌കാരിക മേഖലകളിലെ പ്രമുഖര്‍ ചടങ്ങില്‍ സംബന്ധിക്കും.
 
മുക്കത്ത് നാലംഗ പോക്കറ്റടി സംഘം പിടിയില്‍
മുക്കം: സംസ്ഥാന വ്യാപകമായി പോക്കറ്റടി നടത്തി വരുന്ന നാലംഗ സംഘം മുക്കത്ത് പോലീസിന്റെ പിടിയിലായി. കൊച്ചി സ്വദേശിയും മലപ്പുറം കരുവാരക്കുണ്ടില്‍ സ്ഥിരതാമസക്കാരനുമായ വെളളയില്‍ ഭായ് എന്നറിയപ്പെടുന്ന ഹസ്സന്‍ (61), തിരുവമ്പാടി സ്വദേശി മരക്കാട്ടുചാലില്‍ ആഷിഖ്(26), വയനാട് പുല്‍പ്പള്ളി സ്വദേശി വാക്കയില്‍ ബിനോയ്(43), താമരശ്ശേരി അമ്പായത്തോട് സ്വദേശി ഷെമീര്‍ (40) എന്നിവരാണ് പിടിയിലായത്. മലപ്പുറം, വയനാട്, കണ്ണൂര്‍, കോഴിക്കോട്, കാസര്‍ഗോഡ് ജില്ലകളിലായി നിരവധി പോക്കറ്റടി കേസുകളില്‍ പ്രതികളാണ് സംഘമെന്ന് പോലീസ് അറിയിച്ചു. താമരശ്ശേരി ഡി വൈ എസ് പി. പി ബിജുരാജിന് ലഭിച്ച രഹസ്യവിവരത്തെ തുടര്‍ന്ന് മുക്കം എസ് ഐ. കെ പി അഭിലാഷും സംഘവും നടത്തിയ പരിശോധനയിലാണ് പോക്കറ്റടി സംഘം പിടിയിലായത്. ഇവര്‍ താമസിക്കുന്ന സ്വകാര്യ ലോഡ്ജിന് സമീപം പോലീസ് കാവലിരിക്കുകയും പ്രതികളെ പിടികൂടുകയുമായിരുന്നു. സംസ്ഥാനത്തിന്റെ വിവിധ പ്രദേശങ്ങളില്‍ സഞ്ചരിച്ച് രാവിലേയും വൈകുന്നേരങ്ങളിലും തിരക്കുളള ബസ്സുകളില്‍ കയറി പോക്കറ്റടി നടത്തുന്നതാണ് ഇവരുടെ രീതിയെന്ന് മുക്കം എസ് ഐ. കെ പി അഭിലാഷ് പറഞ്ഞു. പണം നഷ്ട്ടപ്പെട്ട ആളുകള്‍ പരാതിപ്പെടാത്തതാണ് ഇവര്‍ പിടിക്കപ്പെടാതിരുന്നതിന് കാരണമെന്നും പോലീസ് പറഞ്ഞു. താമരശ്ശേരി ഡി വൈ എസ് പി യുടെ ക്രൈം സ്‌ക്വാഡ് അംഗങ്ങളായ ഷിബില്‍ ജോസഫ്, ഷെഫീഖ് നീലിയാനിക്കല്‍, മുക്കം പോലീസ് സ്റ്റേഷനിലെ എ എസ് ഐ. ജെയമോദ്, സീനിയര്‍ സി പി ഒ. സലിം മുട്ടത്ത്, ശ്രീജേഷ്, ശ്രീകാന്ത്, ജിതിന്‍ലാല്‍, രജനി എന്നിവരടങ്ങിയ സംഘമാണം പരിശോധന നടത്തിയത്. താമരശ്ശേരി കോടതിയിയില്‍ ഹാജറാക്കിയ പ്രതികളെ 14 ദിവസത്തേക്ക് റിമാന്റ്് ചെയ്തു.
 
 
 
 

All rights reserved | Website developed and maintained by Zyonz Technologies