18-Feb-2019 (Mon)
 
 
 
കിഴക്കോത്ത് റോഡില്‍ തീയിട്ട സംഭവത്തില്‍ നാലുപേര്‍ അറസ്റ്റില്‍
കൊടുവള്ളി: റോഡില്‍ തീയിട്ട് പൊതു മുതല്‍ നശിപ്പിച്ച സംഭവത്തില്‍ നാലുപേര്‍ അറസ്റ്റില്‍. കിഴക്കോത്ത് മറിവീട്ടില്‍താഴം ചെറുമല മാണിക്കോത്ത് പുറായില്‍ രതീഷ്(40), കിഴക്കേടത്ത് ഷിബിന്‍(27), നെല്ലിക്കോത്ത് മിധുന്‍(27), പടിഞ്ഞാറെ പുതുക്കിടി ബനീഷ്(37) എന്നിവരാണ് അറസ്റ്റിലായത്. കിഴക്കോത്ത് മറിവീട്ടില്‍താഴം കാര്‍ഗില്‍ മുക്കില്‍ റോഡില്‍ ടയര്‍ കൂട്ടിയിട്ട് തീ കൊടുത്ത് പൊതു മുതല്‍ നശിപ്പിച്ച സംഭവത്തിലാണ് അറസ്റ്റ്. ഹര്‍ത്താലിന്റെ ഭാഗമായി രാവിലെ മുതല്‍ ഇവിടെ റോഡില്‍ ഗതാഗതം തടസ്സപ്പെടുത്തിയിരുന്നു. രണ്ട് തവണ പോലീസ് നീക്കം ചെയ്തു. തുടര്‍ന്നാണ് റോഡില്‍ തീയിട്ടത്. ഇതോടെ സ്ഥലത്തെത്തിയ കൊടുവള്ളി പോലീസ് അക്രമികളെ ഓടിച്ച് പിടികൂടുകയായിരുന്നു. താമരശ്ശേരി കോടതിയില്‍ ഹാജറാക്കിയ പ്രതികളെ 14 ദിവസത്തേക്ക് റിമാണ്ട് ചെയ്തു.
 
ഹര്‍ത്താലിനിടെ ഉണ്ടായ അക്രമത്തില്‍ താമരശ്ശേരി പോലീസ് അഞ്ച് കേസുകള്‍ രജിസ്റ്റര്‍ ചെയ്തു; 3 പേര്‍ അറസ്റ്റില്‍
താമരശ്ശേരി: ഹര്‍ത്താലിന്റെ മറവിലുണ്ടായ അക്രമ സംഭവങ്ങളുമായി ബന്ധപ്പെട്ട് താമരശ്ശേരി പോലീസ് അഞ്ച് കേസുകള്‍ രജിസ്റ്റര്‍ ചെയ്തു. ദേശീയ പാതയിലൂടെ ബൈക്കില്‍ സഞ്ചരിച്ച് വാഹനങ്ങള്‍ കല്ലെറിഞ്ഞ് തകര്‍ത്ത സംഭവത്തില്‍ രണ്ട് കേസുകളാണ് രജിസ്റ്റര്‍ ചെയ്തത്. ഇതില്‍ പ്രതികളായ രണ്ടുപേരെ നാട്ടുകാര്‍ പിടികൂടി പോലീസില്‍ ഏല്‍പ്പിച്ചിരുന്നു. ആര്‍ എസ് എസ് പ്രവര്‍ത്തകരായ താമരശ്ശേരി തേറ്റാമ്പുറം നടുവീട്ടില്‍ അര്‍ജുന്‍ കൃഷ്ണ(26), പള്ളിപ്പുറം പൊടുപ്പില്‍ കോളനിയിലെ ശ്യാം(22) എന്നിവരാണ് പിടിയിലായത്. ഇവരുടെ അറസ്റ്റ് രേഖപ്പെടുത്തിയ ശേഷം രാത്രിയോടെ താമരശ്ശേരി ജുഡീഷ്യല്‍ ഫസ്റ്റ് ക്ലാസ് മജിസ്‌ട്രേറ്റിനു മുന്നില്‍ ഹാജറാക്കി റിമാണ്ട് ചെയ്തു. വധശ്രമം ഉള്‍പ്പെടെയുള്ള വകുപ്പുകളാണ് ഇവര്‍ക്കെതിരെ ചുമത്തിയിരിക്കുന്നത്. കട്ടിപ്പാറ ചമല്‍ ചുണ്ടേന്‍കുഴിയില്‍ വയനാട് സ്വദേശികളുടെ ബൊലേറോ ജീപ്പ് അടിച്ച് തകര്‍ക്കുകയും യാത്രക്കാരെ മര്‍ദ്ധിക്കുകയും ചെയ്ത സംഭവത്തിലും പന്നൂര്‍ സ്വദേശി അബ്ദുല്‍ നാസറിന്റെ ജീപ്പ് തകര്‍ക്കുകയും മര്‍ദ്ദിക്കുകയും ചെയ്ത സംഭവത്തിലും വധ ശ്രമം ഉള്‍പ്പെടെയുള്ള വകുപ്പുകള്‍ പ്രകാരം കേസെടുത്തിട്ടുണ്ട്. ചുണ്ടേന്‍കുഴിയില്‍ റോഡില്‍ ടയര്‍ കൂട്ടിയിട്ട് തീ കൊടുത്ത് പൊതു മുതല്‍ നശിപ്പിക്കുകയും പ്രദേശത്തെത്തിയ പോലീസിനു നേരെ കല്ലെറിയുകയും ചെയ്ത സംഭവത്തിലും കേസെടുത്തു. ഇതില്‍ ചമല്‍ ചുണ്ടേന്‍കുഴി മഠത്തില്‍ പറമ്പ് ഷിബു(41) വിനെ പോലീസ് അറസ്റ്റ് ചെയ്തു. പ്രകോപനപരമായ മുദ്രാവാക്യവുമായി ബുധനാഴ്ച വൈകിട്ട് പ്രകടനം നടത്തിയതിന് കണ്ടാലറിയാവുന്ന നൂറോളം ആളുകള്‍ക്കെതിരെയും കേസെടുത്തിട്ടുണ്ട്. അക്രമ സംഭവങ്ങളിലും ദേശീയപാതയില്‍ ഗതാഗതം തടസ്സപ്പെടുത്തിയതിനും കൂടുതല്‍ കേസുകള്‍ രജിസ്റ്റര്‍ ചെയ്യുമെന്നാണ് സൂചന.
 
ഹര്‍ത്താലിനിടെ താമരശ്ശേരിയില്‍ വ്യാപക അക്രമം
താമരശ്ശേരി: ശബരിമല കര്‍മ്മസമിതിയുടെ ഹര്‍ത്താലിനിടെ താമരശ്ശേരി മേഖലയില്‍ വാഹനങ്ങള്‍ക്കും വ്യാപാര സ്ഥാപനങ്ങള്‍ക്കും നേരെ വ്യാപക അക്രമം. രോഗിയായ കൈക്കുഞ്ഞിനെയുമായി ആശുപത്രിയിലേക്ക് പോവുകയായിരുന്ന കാറ് ഉള്‍പ്പെടെ പത്തോളം വാഹനങ്ങള്‍ സമരക്കാര്‍ എറിഞ്ഞ് തകര്‍ത്തു. ദേശീയ പാതയില്‍ താമരശ്ശേരി പോസ്‌റ്റോഫീസിന് സമീപത്തും പെരുമ്പള്ളി ക്ഷേത്രത്തിന് സമീപത്തും സംഘടിച്ചാണ് വാഹനങ്ങള്‍ തടഞ്ഞത്. താമരശ്ശേരി കാരാടി സ്വദേശി ശംസുദ്ദീന്റെ പിക്കപ്പ് വാഹനത്തിന് താമരശ്ശേരി പോസ്‌റ്റോഫീസിന് സമീപത്തുവെച്ചാണ് കല്ലേറുണ്ടായത്. കട്ടിപ്പാറ ചമലില്‍ വയനാട് സ്വദേശികള്‍ സഞ്ചരിച്ച ബൊലേറോ ജീപ്പ് അടിച്ച് തകര്‍ക്കുകയും യാത്രക്കാരെ ക്രൂരമായി മര്‍ദ്ധിക്കുകയും ചെയ്തു. അയല്‍ വാസിയുടെ കൈക്കുഞ്ഞിനേയുമായി കോഴിക്കോട് മെഡിക്കല്‍ കോളേജ് ആശുപത്രിയിലേക്ക് പുറപ്പെട്ട പുതുപ്പാടി ഈങ്ങാപ്പുഴ സ്വദേശി അബ്ദുല്‍ കലാമിന്റെ കാറിന്റെ ചില്ല് ബൈക്കിലെത്തിയ സമരക്കാര്‍ എറിഞ്ഞ് തകര്‍ത്തു. അക്രമത്തില്‍ കാറിലുണ്ടായിരുന്ന രണ്ടു വയസ്സുകാരിക്ക് പരുക്കേറ്റതിനെ തുടര്‍ന്ന് താമരശ്ശേരി താലൂക്ക് ആശുപത്രിയില്‍ പ്രവേശിപ്പിച്ചു. ഇവര്‍ നല്‍കിയ വിവരത്തെ തുടര്‍ന്ന് എലോക്കരയില്‍ വെച്ച് അക്രമികളെ നാട്ടുകാര്‍ പിടികൂടി താമരശ്ശേരി പോലീസിന് കൈമാറി. ആര്‍ എസ് എസ് പ്രവര്‍ത്തകരായ താമരശ്ശേരി തേറ്റാമ്പുറം നടുവീട്ടില്‍ അര്‍ജുന്‍ കൃഷ്ണ, പള്ളിപ്പുറം പൊടുപ്പില്‍ കോളനിയിലെ ശ്യാം എന്നിവരാണ് പിടിയിലായത്. തമിഴ്‌നാട്ടില്‍ നിന്നും കോഴിക്കോട്ടേക്ക് പോവുകയായിരുന്ന ടാക്‌സി കാറിനും കൊറിയര്‍ വാഹനത്തിനും ഉള്‍പ്പെടെ നിരവധി വാഹനങ്ങള്‍ക്കാണ് ഇതേ ബൈക്കില്‍ നിന്നും കല്ലേറുണ്ടായത്. തോര്‍ത്ത് മുണ്ടില്‍ വലിയ കല്ലുകള്‍ കെട്ടി ബൈക്കില്‍ സഞ്ചരിച്ച് റോഡില്‍ കാണുന്ന വാഹനങ്ങളെല്ലാം അക്രമിക്കുകയായിരുന്നു. സംഭവങ്ങളില്‍ പോലീസ് കേസെടുത്ത് അന്വേഷണം ആരംഭിച്ചു. പിടിയിലായവര്‍ ഏതെല്ലാം വാഹനങ്ങള്‍ തകര്‍ത്തുവെന്നത് സംബന്ധിച്ചും പോലീസ് അന്വേഷിക്കുന്നുണ്ട്.
 
വയനാട് സ്വദേശികളുടെ വാഹനം തടഞ്ഞ് അടിച്ച് തകര്‍ത്തു, നാല് പേര്‍ക്ക് പരുക്ക്
കട്ടിപ്പാറ: ഹര്‍ത്താലിന്റെ മറവില്‍ ചമല്‍ ചുണ്ടേന്‍കുഴിയില്‍ വയനാട് സ്വദേശികളുടെ വാഹനം തടഞ്ഞ് അടിച്ച് തകര്‍ക്കുകയും യാത്രക്കാരെ ക്രൂരമായി മര്‍ദ്ദിക്കുകയും ചെയ്തു. അമ്പലവയല്‍ കുന്നത്ത് ജഷീര്‍(29), സഹോദരന്‍ ജാസ്മിര്‍(34), ഇവരുടെ സുഹൃത്തുക്കളായ കുയിലമ്പള്ളി സാഗര്‍(19), കുന്നുമ്മല്‍ നാസിം(19) എന്നിവര്‍ക്കാണ് അക്രമിക്കപ്പെട്ടത്. ഇവരെ താമരശ്ശേരി താലൂക്കാശുപത്രിയില്‍ പ്രവേശിപ്പിച്ചു.
 
ഹര്‍ത്താലിന്റെ മറവില്‍ ജില്ലയില്‍ വ്യാപക അക്രമം
കോഴിക്കോട്: ശബരിമലയില്‍ യുവതികള്‍ പ്രവേശിച്ചതിനെതിരെ ശബരിമല കര്‍മ സമിതി ആഹ്വാനം ചെയ്ത ഹര്‍ത്താലിന്റെ മറവില്‍ ജില്ലയില്‍ വ്യാപക അക്രമം. വ്യാപാര സ്ഥാപനങ്ങള്‍ക്കും വാഹനങ്ങള്‍ക്കും നേരെയുണ്ടായ അക്രമങ്ങളില്‍ കോടികളുടെ നഷ്ടമാണ് സംഭവിച്ചത്. കോഴിക്കോട് മിഠായി തെരുവില്‍ കടകള്‍ തുറന്ന് പ്രവര്‍ത്തിച്ചതിന്റെ പേരില്‍ സംഘപരിവാര്‍ പ്രവര്‍ത്തകര്‍ അഴിഞ്ഞാടി.
 
തമിഴ്‌നാട് സ്വദേശി കുത്തേറ്റ് മരിച്ച സംഭവം: പ്രതി അറസ്റ്റില്‍
കുന്ദമംഗലം: തമിഴ്‌നാട് സ്വദേശി കുത്തേറ്റ് മരിച്ച സംഭവത്തില്‍ സുഹൃത്ത് അറസ്റ്റില്‍. കുരിക്കത്തൂര്‍ ഉള്ളാട്ട്ചാലില്‍ സുരേഷ്ബാബു(50) വിനെയാണ് കുന്ദമംഗലം പോലീസ് അറസ്റ്റ് ചെയ്തത്. തമിഴ്‌നാട് കന്യാകുമാരി സ്വദേശി കനകരാജ്(50) ആണ് കൊല്ലപ്പെട്ടത്. തിങ്കളാഴ്ച രാവിലെ ചെത്തുകടവ് അങ്ങാടിക്ക് സമീപത്തായിരുന്നു സംഭവം. കരിങ്കല്‍ തൊഴിലാളിയായ കനകരാജും സുരേഷ് ബാബുവും തമ്മില്‍ ഞായറാഴ്ച രാത്രി വഴക്കിട്ടിരുന്നു. ഇതിനു ശേഷം തിരിച്ചുപോയ സുരേഷ് ബാബു പ്രദേശത്ത് തന്നെ തങ്ങുകയും രാവിലെ കടയില്‍ സാധനം വാങ്ങാനെത്തിയ കനകരാജുമായി വീണ്ടും വാക്കേറ്റത്തില്‍ ഏര്‍പ്പെടുകയുമായിരുന്നു. ഇതിനിടെയാണ് കയ്യിലുണ്ടായ കത്തിയെടുത്ത് കനകരാജിനെ കുത്തിയത്. രക്തം ഒലിപ്പിച്ചുകൊണ്ട് ബസ് സ്‌റ്റോപ്പിനു സമീപത്തെ തട്ടുകടക്കരികിലെത്തിയ കനകരാജ് അവിടെ വീണ് മരിക്കുകയായിരുന്നു. കഴുത്തില്‍ ആഴത്തിലേറ്റ മുറിവാണ് മരണത്തിന് കാരണമായത്. അക്രമത്തിന് ശേഷം സ്ഥലം വിട്ട പ്രതിയെ പെരുവഴിക്കടവ് സ്‌കൂളിന് സമീപത്തുവെച്ച് കുന്ദമംഗലം എസ് ഐ. എസ് ബി കൈലാസ്‌നാഥിന്റെ നേതൃത്വത്തിലുള്ള പോലീസ് സംഘം അറസ്റ്റ് ചെയ്യുകയായിരുന്നു. കുത്താന്‍ ഉപയോഗിച്ച കത്തിയും പോലീസ് കണ്ടെടുത്തു. സമീപത്തെ കടയുടെ സി സി ടി വി ക്യാമറയില്‍ പതിഞ്ഞ അക്രമത്തിന്റെ ദൃശ്യങ്ങള്‍ പോലീസ് ശേഖരിച്ചിട്ടുണ്ട്. കുന്ദമംഗലം കോടതിയില്‍ ഹാജറാക്കിയ പ്രതിയെ 14 ദിവസത്തേക്ക് റിമാണ്ട് ചെയ്തു.
 
ചുരത്തിലെ ഗതാഗത നിയന്ത്രണത്തില്‍ ഇളവ്
കോഴിക്കോട്: താമരശ്ശേരി ചുരത്തില്‍ ചരക്കു ലോറികള്‍ക്കുണ്ടായിരുന്ന നിയന്ത്രണത്തില്‍ ഇളവ്. 12 ചക്ര ലോറികള്‍ക്ക് രാവിലെ 11 മുതല്‍ ഉച്ചക്ക് രണ്ടു മണി വരെ ചുരത്തില്‍ പ്രവേശനം അനുവദിക്കാനാണ് ഗതാഗത വകുപ്പു മന്ത്രി എ കെ ശശീന്ദ്രന്റെ അധ്യക്ഷതയില്‍ കോഴിക്കോട് ഗവ. ഗസ്റ്റ് ഹൗസ് കോണ്‍ഫറന്‍സ് ഹാളില്‍ ചേര്‍ന്ന യോഗത്തില്‍ തീരുമാനിച്ചത്. ചുരം രണ്ടാം വളവിന് സമീപം ചിപ്പിലിത്തോട് ഭാഗത്ത് റോഡ് ഇടിഞ്ഞതിനെ തുടര്‍ന്നാണ് ചുരത്തില്‍ വലിയ വാഹനങ്ങള്‍ക്ക് ഗതാഗത നിയന്ത്രണം ഏര്‍പ്പെടുത്തിയത്. റോഡ് താല്‍ക്കാലികമായി പുനസ്ഥാപിച്ചതോടെ വലിയ ബസ്സുകള്‍ക്കും പിന്നീട് രാത്രി 11 മുതല്‍ രാവിലെ ആറു മണി വരെ ചരക്കു ലോറികള്‍ക്കും പ്രവേശനം അനുവദിച്ചിരുന്നു. റോഡിന്റെ പുനര്‍ നിര്‍മാണം അവസാന ഘട്ടത്തിലെത്തിയ സാഹചര്യത്തിലാണ് ചരക്കു ലോറികള്‍ക്ക് കൂടുതല്‍ ഇളവ് അനുവദിച്ചത്. എന്നാല്‍ കണ്ടെയ്‌നര്‍ ലോറികള്‍ക്കുള്ള നിരോധനം തുടരും. അമിതഭാരം തടയുന്നതിന്നായി പരിശോധന ശക്തമാക്കാന്‍ മോട്ടോര്‍വാഹന വകുപ്പ് ഉദ്യോഗസ്ഥര്‍ക്കും പോലീസിനും മന്ത്രി നിര്‍ദേശം നല്‍കി. ചുരം റോഡ് പ്രവൃത്തി മാര്‍ച്ച് മാസത്തോടെ പൂര്‍ത്തിയാക്കുമെന്നും മന്ത്രി പറഞ്ഞു. ജില്ലാ കളക്ടര്‍ സാംബശിവറാവു, ആര്‍ ടി ഒ ശശികുമാര്‍, താമരേശ്ശരി ഡി വൈ എസ് പി. പി ബിജുരാജ്, ദേശീയപാതാ വിഭാഗം എക്‌സിക്യുട്ടീവ് എന്‍ജീനിയര്‍ വിനയ രാജ,് താമരേശ്ശരി തഹസില്‍ദാര്‍ സി മുഹമദ് റഫീഖ് തുടങ്ങിയവര്‍ യോഗത്തില്‍ പങ്കെടുത്തു.
 
കുറ്റിയാടി കാക്കുനിയില്‍ ബോംബ് സ്‌ഫോടനത്തില്‍ മൂന്ന് മുസ്ലിംലീഗ് പ്രവര്‍ത്തകര്‍ക്ക് പരുക്ക്
കുറ്റിയാടി: കാക്കുനിയില്‍ ബോംബ് സ്‌ഫോടനത്തില്‍ മൂന്നു പേര്‍ക്ക് പരുക്ക്. മുസ്ലിംലീഗ് പ്രവര്‍ത്തകരായ പറമ്പത്ത് സാലിം(20), പറമ്പത്ത് മുനീര്‍(24) എന്നിവര്‍ക്കും കൂടെയുണ്ടായിരുന്ന മറ്റൊരാള്‍ക്കുമാണ് പരുക്കേറ്റത്. ഇവരെ കോഴിക്കോട്ടെ സ്വകാര്യ ആശുപത്രിയില്‍ പ്രവേശിപ്പിച്ചു. കാക്കുനി അരൂര്‍ റോഡില്‍ സാലിമിന്റെ പിതാവ് അബ്ദുള്ള മുസ്ലിയാരുടെ ഉമടമസ്ഥതിയുള്ള പറമ്പിലാണ് വന്‍ ശബ്ദത്തോടെ സ്‌ഫോടനം നടന്നത്. സാലിമിന്റെ കൈപ്പത്തികള്‍ തകര്‍ന്നു. ഇരു കൈപ്പത്തികളും മുറിച്ചുമാറ്റിയതായി ആശുപത്രി അധികൃതര്‍ അറിയിച്ചു. ബോംബ് നിര്‍മിക്കുന്നതിനിടെയാണ് സ്‌ഫോടനം നടന്നതെന്നാണ് സൂചന. കുറ്റിയാടി പോലീസും ബോംബ് സ്‌ക്വാഡും സ്ഥലത്തെത്തി ആന്വേഷണം ആരംഭിച്ചു.
 
പുതുവത്സരാഘോഷത്തിനിടെ ബൈക്ക് അപകടം: രണ്ടുപേര്‍ മരിച്ചു
ചേളന്നൂര്‍: പുതുവത്സരാഘോഷത്തിനിടെ ബൈക്ക് ഇലക്ട്രിക് പോസ്റ്റിലിടിച്ച് രണ്ടുപേര്‍ മരിച്ചു. ചേളന്നൂര്‍ കണ്ണങ്കര അഞ്ചാം വളവ് പൊറ്റങ്ങാടി ജയന്റെ മകന്‍ അഭിഷേക്(25), കണ്ണങ്കര വാളിപ്പുറത്ത് സുധാകരന്റെ മകന്‍ സ്‌നിജിന്‍(21) എന്നിവരാണ് മരിച്ചത്. പുലര്‍ച്ചെ രണ്ടുമണിയോടെ ചേളന്നൂരിലായിരുന്നു അപകടം. സുഹൃത്തുക്കളായ ഇവര്‍ പുതുവത്സരാഘോഷത്തിനായാണ് വീട്ടില്‍ നിന്നും ഇറങ്ങിയത്. വീട്ടിലേക്ക് മടങ്ങുന്നതിനിടെയാണ് അപകടമെന്ന് സംശയിക്കുന്നു. ഓടിക്കൂടിയ നാട്ടുകാര്‍ ഇരുവരെയും കോഴിക്കോട് മെഡിക്കല്‍ കോളേജ് ആശുപത്രിയില്‍ എത്തിച്ചെങ്കിലും മരിച്ചിരുന്നു. മോര്‍ച്ചറിയിലേക്ക് മാറ്റിയ മൃതദേഹം കാക്കൂര്‍ പോലീസ് ഇന്‍ക്വസ്റ്റ് നടത്തി പോസ്റ്റ് മോര്‍ട്ടം നടപടികള്‍ പൂര്‍ത്തിയാക്കി ബന്ധുക്കള്‍ക്ക് വിട്ടു കൊടുക്കും.
 
കോഴിക്കോട്: ജില്ലയിലെ 91 തദ്ദേശസ്വയംഭരണ സ്ഥാപനങ്ങളുടെയും 2018-19 വാര്‍ഷിക പദ്ധതികള്‍ക്ക് ജില്ലാ ആസൂത്രണസമിതിയുടെ അംഗീകാരം. മൂന്ന് മാസം മുന്‍പേ തന്നെ പദ്ധതികള്‍ക്ക് അംഗീകാരം നല്‍കാന്‍ സാധിച്ചു എന്നത് മികച്ച നേട്ടമായി. 70 ഗ്രാമപഞ്ചായത്ത്, 12 ബ്ലോക്ക് പഞ്ചായത്തുകള്‍, 7 മുനിസിപ്പാലിറ്റി, ജില്ലാ പഞ്ചായത്ത്, കോര്‍പ്പറേഷന്‍ എന്നീ തദ്ദേശ സ്വയംഭരണ സ്ഥാപനങ്ങളുടെ വാര്‍ഷിക പദ്ധതികള്‍ക്കാണ് അംഗീകാരം നല്‍കിയത്. മാര്‍ച്ച് 31 നകം അംഗീകാരം നല്‍കേണ്ട പദ്ധതികള്‍ക്കാണ് യോഗത്തില്‍ അഗീകാരം നല്‍കിയത്. ജില്ലാ പഞ്ചായത്ത് പ്രസിഡന്റ് ബാബു പറശ്ശേരി അധ്യക്ഷത വഹിച്ചു. ജില്ലാ കലക്ടര്‍ സാംബശിവ റാവു, ജില്ലാ പ്ലാനിംഗ് ഓഫീസര്‍ എം എ ശീല, ആസൂത്രണ സമിതി അംഗങ്ങള്‍, തദ്ദേശസ്വയംഭരണ സ്ഥാപനങ്ങളിലെ പ്രസിഡന്റുമാര്‍, സെക്രട്ടറിമാര്‍ തുടങ്ങിയവര്‍ പങ്കെടുത്തു.
 
 
 
 

All rights reserved | Website developed and maintained by Zyonz Technologies