16-Jun-2019 (Sun)
 
 
 
 
ചുരത്തില്‍ കെ എസ് ആര്‍ ടി സി ബസ്സിന് മുകളില്‍ പാറക്കല്ല് പതിച്ചു
അടിവാരം: താമരശ്ശേരി ചുരത്തില്‍ കെ എസ് ആര്‍ ടി സി ബസ്സ് പാറക്കെട്ടില്‍ ഇടിച്ചതിനെ തുടര്‍ന്ന് പാറക്കല്ല് ബസ്സിന് മുകളിലേക്ക് പതിച്ചു. ചുരം ഏഴാം വളവിന് സമീപത്തായിരുന്നു അപകടം. കോഴിക്കോട് നിന്നും കല്‍പ്പറ്റയിലേക്ക് പോവുകയായിരന്ന കെ എസ് ആര്‍ ടി സി ബസ്സാണ് അപകടത്തില്‍ പെട്ടത്. നിയന്ത്രണം വിട്ട ബസ്സ് റോഡരികിലെ പാറക്കെട്ടില്‍ ഇടിച്ചതിനെ തുടര്‍ന്ന് പാറക്കെട്ട് ഇളകി വലിയ കല്ല് ബസ്സിന് മുകളിലേക്ക് പതിക്കുകയായിരുന്നു. ബസ്സിന് കേടുപാടുകള്‍ സംഭവിച്ചെങ്കിലും യാത്രക്കാര്‍ പരുക്കേല്‍ക്കാതെ രക്ഷപ്പെട്ടു. അപകടത്തെ തുടര്‍ന്ന് ചുരത്തില്‍ ഭാഗികമായി ഗതാഗതം തടസ്സപ്പെട്ടെങ്കിലും അടിവാരത്തുനിന്നും പോലീസ് എത്തി വണ്‍വെ അടിസ്ഥാനത്തില്‍ വാഹനങ്ങള്‍ കടത്തിവിട്ടു.
 
മാലിന്യ സംസ്‌കരണ യൂണിറ്റ് ഉദ്ഘാടനം ചെയ്തു
താമരശ്ശേരി: ക്ലീന്‍ താമരശ്ശേരി പദ്ധതിയുടെ ഭാഗമായി ഗ്രാമപഞ്ചായത്ത് 2018-19 വാര്‍ഷിക പദ്ധതിയില്‍ ഉള്‍പ്പെടുത്തി സമ്പൂര്‍ണ്ണ മാലിന്യ സംസ്‌ക്കരണ യൂണിറ്റ് സ്ഥാപിക്കുന്നതിന് നിര്‍മ്മിച്ച ഷെഡിന്റെ ഉല്‍ഘാടനം ഗ്രാമ പഞ്ചായത്ത് പ്രസിഡണ്ട് ഹാജറ കൊല്ലരുകണ്ടി നിര്‍വ്വഹിച്ചു. പഞ്ചായത്തിലെ ഹരിത കര്‍മ്മ സേന അംഗങ്ങള്‍ ഓരോ വാര്‍ഡില്‍ നിന്നും ശേഖരിക്കുന്ന ശുദ്ധീകരിച്ചപ്ലാസ്റ്റിക് മാലിന്യങ്ങള്‍ സംസ്‌ക്കരണ പ്ലാന്റില്‍ എത്തിക്കുകയും പ്ലാസ്റ്റിക് ഫെന്റിംഗ് മെഷിന്‍ ഉപയോഗിച്ച് പൊടിച്ചെടുത്ത് ടാറിംഗ് പ്രവര്‍ത്തികള്‍ക്ക് ഉപയോഗിക്കുന്നതിനുമാണ് പദ്ധതി തയ്യാറാക്കിയത്. 2000 സ്‌ക്വയര്‍ ഫീറ്റ് വിസ്തൃതിയില്‍ പ്ലാന്റ് നിര്‍മ്മാണത്തിനും മെഷിന്‍ സ്ഥാപിക്കുന്നതിനും 28 ലക്ഷം രൂപ വകയിരുത്തിയിട്ടുണ്ട്. പരിപാടിയില്‍ വൈസ് പ്രസിഡണ്ട് നവാസ് ഈര്‍പ്പോണ അധ്യക്ഷത വഹിച്ചു. സ്റ്റാന്റിംഗ് കമ്മിറ്റി ചെയര്‍മാന്‍ പി എസ് മുഹമ്മദലി, ജസ്സി ശ്രീനിവാസന്‍, മഞ്ചിത കുറ്റിയാക്കില്‍, കെ സരസ്വതി, പി പി അബ്ദുല്‍ ഗഫൂര്‍, രത്‌നവല്ലി, വസന്ത ചന്ദ്രന്‍ എന്നിവര്‍ സംബന്ധിച്ചു.
 
പ്രളയത്തില്‍ തകര്‍ന്ന താഴ്വാരം പൂവ്വച്ചോല റോഡ് പുനര്‍ നിര്‍മ്മിച്ചു
കട്ടിപ്പാറ: കട്ടിപ്പാറ ഗ്രാമപഞ്ചായത്തില്‍ പ്രളയത്തില്‍ പൂര്‍ണ്ണമായി ഒലിച്ചുപോയ താഴ്വാരം പൂവ്വച്ചോല റോഡ് പുനര്‍ നിര്‍മ്മിച്ചു. ബ്ലോക്ക് പഞ്ചായത്ത് അനുവദിച്ച 10 ലക്ഷം രൂപ മുടക്കിയാണ് റോഡ് കോണ്‍ക്രീറ്റ് ചെയ്തത്. ബ്ലോക്ക് പഞ്ചായത്ത് മെമ്പര്‍ ബീന ജോര്‍ജ്ജ് റോഡ് ഉദ്ഘാടനം ചെയ്തു. വാര്‍ഡ് മെമ്പര്‍ മേരി കുര്യന്‍, പ്രേംജി ജെയിംസ്, ജോസ് തുരുത്തിപ്പള്ളി, സബീഷ് താഴ്വാരം, രമേശന്‍, ബിനു തോമസ് എന്നിവര്‍ പ്രസംഗിച്ചു.
 
സ്‌കൂള്‍ വാര്‍ഷികവും ബിരുദദാനവും നടത്തി
കൊടുവള്ളി: കൊടുവള്ളി അല്‍ഫിത്‌റ ഇസ്ലാമിക് പ്രീസ്‌കൂള്‍ വാര്‍ഷികവും ബിരുദദാന സമ്മേളനവും ഡോ. ജമാലുദ്ധീന്‍ ഫാറൂഖി ഉദ്ഘാടനം ചെയ്തു. അനുഗ്രഹ സൊസൈറ്റി ചെയര്‍മാന്‍ ആര്‍ സി ജരീര്‍ അധ്യക്ഷത വഹിച്ചു. കൊടുവള്ളി മുനിസിപ്പല്‍ കൗണ്‍സിലര്‍ കെ ശിവദാസന്‍, കൊടുവള്ളി കമ്മ്യുണിറ്റി ഹെല്‍ത്ത് സെന്റര്‍ മെഡിക്കല്‍ ഓഫീസര്‍ ഡോ. നസ്‌റുല്‍ ഇസ്ലാം എന്നിവര്‍ അവാര്‍ഡുകള്‍ വിതരണം ചെയ്തു. എം പി മൂസ, കെ പി മൊയ്ദീന്‍, എം ടി അബ്ദുല്‍ മജീദ്, ആര്‍ സി സാദിഖ്, പി ടി എ പ്രസിഡന്റ് ഉബൈദ്, എന്‍ കെ മുഹമ്മദ്, എം കെ പോക്കര്‍ സുല്ലമി, പ്രിന്‍സിപ്പാള്‍ മുന്‍ഷിറ എന്നിവര്‍ സംസാരിച്ചു. അനുഗ്രഹ സൊസൈറ്റി കണ്‍വീനര്‍ എം പി എം അമീന്‍ സ്വാഗതവും സ്റ്റാഫ് സെക്രട്ടറി ടി പി സബീല നന്ദിയും പറഞ്ഞു.
 
വി വി ഇ എസ് യൂത്ത് വിംഗ് സംസ്ഥാന സമ്മേളനം: വിളംബര ജാഥ നടത്തി
താമരശ്ശേരി: വ്യാപാരി വ്യവസായി ഏകോപന സമിതി യൂത്ത് വിംഗ് സംസ്ഥാന സമ്മേളനത്തോടനുബന്ധിച്ച് താമരശ്ശേരിയില്‍ വിളംബര ജാഥ നടത്തി. യൂത്ത് വിംഗ് ജില്ലാ ട്രഷറര്‍ മുര്‍ത്താസ്ഫസല്‍അലി, താമരശ്ശേരി യൂണിറ്റ് പ്രസിഡന്റ് കെ കെ ഷമീര്‍, ജനറല്‍ സെക്രട്ടറി പി ടി മന്‍സൂര്‍അലി, ട്രഷറര്‍ മുഹമ്മദ്സാലി, സഹീര്‍ ഒപ്സോണ്‍, എന്‍ ആര്‍ റിബീഷ്, ടി കെ ഷാനവാസ്, മുജീബ്, ജാബിര്‍, ജബ്ബാര്‍ തുഷാര, ഇഖ്ബാല്‍ പൂക്കോട് തുടങ്ങിയവര്‍ നേതത്വം നല്‍കി.
 
പി സി പാലം എ യു പി സ്‌കൂളില്‍ കവിയരങ്ങ് സംഘടിപ്പിച്ചു
നരിക്കുനി: പി സി പാലം എ യു പി സ്‌കൂള്‍ 80ാം വാര്‍ഷികം മഴവില്ല് 2019 ന്റെ ഭാഗമായി കവിയരങ്ങ് നടത്തി. പ്രശസ്ത കവി എടച്ചേരി രാധാകൃഷ്ണന്‍ ഉല്‍ഘാടനം ചെയ്തു. പി ടി എ പ്രസിഡണ്ട് പി എം ഷംസുദ്ദീന്‍ അദ്ധ്യക്ഷത വഹിച്ചു. വി കെ ഗോപാലന്‍, ഗീതാ ശ്രീകുമാര്‍, ഷൈജ സുനില്‍ കുമാര്‍, ശ്രീജ ചേളന്നൂര്‍, കാക്കൂര്‍ സി ബാലന്‍, ഉണ്ണികൃഷ്ണന്‍ കാക്കൂര്‍, രതീഷ് കല്യാണ്‍, രഘുനാഥ് നന്‍മണ്ട തുടങ്ങിയവര്‍ കവിതകള്‍ അവതരിപ്പിച്ചു. സുജാത, മധു ലക്ഷ്മി, ഹെഡ് ടീച്ചര്‍ കെ സി രാധാമണി, മന്‍സൂര്‍ തുടങ്ങിയവര്‍ സംസാരിച്ചു.
 
നവീകരിച്ച കാരാടി പറച്ചികോത്ത് ചാടിക്കുഴി റോഡ് ഉദ്ഘാടനം ചെയ്തു
താമരശ്ശേരി: നവീകരിച്ച കാരാടി പറച്ചികോത്ത് ചാടിക്കുഴി റോഡ് കാരാട്ട് റസാഖ് എം എല്‍ എ ഉല്‍ഘാടനം ചെയ്തു. വാര്‍ഡ് മെമ്പര്‍ ശ്രീമതി മഞ്ജിത, പൗര പ്രമുഖന്‍ സി വി അബ്ദുറഹിമാന്‍ കുട്ടി ഹാജി, ഹില്‍ ടോപ് റെസിഡന്റ്‌സ് അസോസിയേഷന്‍ ജനറല്‍ സെക്രട്ടറി അബ്ദുറഹിമാന്‍, പ്രസിഡന്റ് സൈമണ്‍ മാസ്റ്റര്‍, തണല്‍ അയല്‍സഭ ചെയര്‍മാന്‍ സിദീഖ് കാരാടി, റാഷി താമരശ്ശേരി, ശശി എന്നിവര്‍ സംബന്ധിച്ചു.
 
പുതുപ്പാടി: പുതുപ്പാടി ഗ്രാമപഞ്ചായത്തിന്റെ 2019-20 വര്‍ഷത്തേക്കുളള ബജറ്റ് അവതരിപ്പിച്ചു. 19,12,68,590 രൂപ വരവും 18,90,39,209 രൂപ ചെലവും 80,65,332 രൂപ മിച്ചവും പ്രതീക്ഷിക്കുന്ന ബഡ്ജറ്റാണ് ഗ്രാമപഞ്ചായത്ത് വൈസ് പ്രസിഡന്റ് കുട്ടിയമ്മ മാണി അവതരിപ്പിച്ചത്. ഉല്‍പാദന മേഖലയില്‍ പുതിയ പദ്ധതികള്‍ ഉള്‍പ്പെടുത്തിയാണ് ബജറ്റ് തയ്യാറാക്കിയത്. ആധുനിക രീതിയിലുളള ശ്മശാനം, സ്‌പോര്‍ട്‌സ് കോംപ്ലക്‌സ്,സ്ത്രീ സൗഹൃദ ടോയ്‌ലറ്റ് സമുച്ചയം, ബഹു വര്‍ഷ പദ്ധതിയായി കര്‍ഷകര്‍ക്ക് ഗവണ്‍മെന്റ് അനുമതിയോടുകൂടി 40 കിലോമീറ്റര്‍ ഫെന്‍സിംഗ് നിര്‍മ്മാണം എന്നിവ ബജറ്റ് വിഭാവനം ചെയ്യുന്നുണ്ട്. തൊഴിലുറപ്പ് പദ്ധതിയില്‍ ഉള്‍പ്പെടുത്തി 25 കിലോമീറ്റര്‍ റോഡ് നിര്‍മ്മാണം നടപ്പാക്കാന്‍ ഉദ്ദേശിക്കുന്ന ബജറ്റില്‍ പശ്ചാത്തല സേവന മേഖലകള്‍ക്ക് പ്രത്യേക പരിഗണന നല്‍കിയിട്ടുണ്ട്. ഭവന നിര്‍മ്മാണം, ശാരീരിക മാനസ്സിക വെല്ലുവിളി നേരിടുന്നവര്‍ക്കുളള പ്രത്യേക ക്ഷേമ പദ്ധതികള്‍ എന്നിവക്ക് കൂടുതല്‍ തുക വകയിരുത്തിയിട്ടുണ്ട്.
 
കക്കാട് വില്ലേജ് ഓഫീസിന് പുതിയ കെട്ടിടം നിര്‍മ്മിക്കുന്നു
കക്കാട്: ജോര്‍ജ് എം തോമസ് എം എല്‍ എയുടെ ആസ്തി വികസന ഫണ്ടില്‍ നിന്നും 25 ലക്ഷം രൂപ ചെലവഴിച്ചു കക്കാട് വില്ലേജ് ഓഫീസിനു പുതുതായി നിര്‍മ്മിക്കുന്ന കെട്ടിടത്തിന്റെ പ്രവൃത്തി ഉത്ഘാടനം ജോര്‍ജ് എം തോമസ് എം എല്‍ എ നിര്‍വ്വഹിച്ചു. കാരശ്ശേരി പഞ്ചായത്ത് പ്രസിഡന്റ് വി കെ വിനോദ് അധ്യക്ഷത വഹിച്ചു. അസിസ്റ്റന്റ് എന്‍ജിനീയര്‍ രാഘവന്‍ റിപ്പോര്‍ട്ട് അവതരിപ്പിച്ചു. ഗ്രാമ പഞ്ചായത്ത് അംഗങ്ങളായ സുഹറ കരുവോട്ട്, ജി അബ്ദുല്‍ അക്ബര്‍, എം ടി അഷ്‌റഫ്, സവാദ് ഇബ്രാഹിം, എന്‍ കെ അന്‍വര്‍, പി പി ശിഹാബ്, കെ പി ഐഷാ ലത, രാഷ്ട്രീയ പാര്‍ട്ടികളെ പ്രതിനിധീകരിച്ച് കെ പി ഷാജി, സത്യന്‍ മുണ്ടയില്‍, കെ കോയ, കെ ഷാജി കുമാര്‍, കെ സി അബ്ദുല്‍ മജീദ്, മോയിന്‍ എന്നിവര്‍ പ്രസംഗിച്ചു. ഡെപ്യൂട്ടി തഹസില്‍ദാര്‍ ബല്‍രാജ് സ്വാഗതവും വില്ലേജ് ഓഫീസര്‍ നിസാമുദ്ധീന്‍ നന്ദിയും പറഞ്ഞു.
 
പട്ടികജാതി പട്ടിക വര്‍ഗ വിഭാഗങ്ങള്‍ക്ക് കട്ടില്‍ വിതരണം ചെയ്തു
പുതുപ്പാടി: പുതുപ്പാടി ഗ്രാമപഞ്ചായത്ത് 2018-19 വാര്‍ഷിക പദ്ധതിയിലുള്‍പ്പെടുത്തി പട്ടികജാതി പട്ടിക വര്‍ഗ വിഭാഗങ്ങള്‍ക്ക് നല്‍കുന്ന കട്ടിലിന്റെ വിതരണം ജില്ലാ കലക്ടര്‍ സാംബശിവ റാവു ഉദ്ഘാടനം ചെയ്തു. ഗ്രാമ പഞ്ചായത്ത് വൈസ് പ്രസിഡണ്ട് കുട്ടിയമ്മ മാണി അദ്ധ്യക്ഷത വഹിച്ചു. വികസന കാര്യ സ്റ്റാന്റിംഗ് കമ്മിറ്റി ചെയര്‍മാന്‍ മുജീബ് മാക്കണ്ടി, ആരോഗ്യ വിദ്യാഭ്യാസ സ്റ്റാന്റിംഗ് കമ്മിറ്റി ചെയര്‍മാന്‍ എം ഇ ജലീല്‍, ക്ഷേമകാര്യ സ്റ്റാന്റിംഗ് കമ്മിറ്റി ചെയര്‍മാന്‍ ഐബി റെജി, വാര്‍ഡ് മെമ്പര്‍മാരായ പി ആര്‍ രാകേഷ്, ആര്‍ എം അബ്ദുല്‍ റസാക്ക്, കെ ജി ഗീത, ഫാത്തിമ ബീവി, ഷാഫി വളഞ്ഞ പാറ, അംബിക മംഗലത്ത് എന്നിവര്‍ പ്രസംഗിച്ചു.
 
 
 
 

All rights reserved | Website developed and maintained by Zyonz Technologies