18-Feb-2019 (Mon)
 
 
 
കോഴിക്കോട് ജില്ലയില്‍ വിദ്യാഭ്യാസ സ്ഥാപനങ്ങള്‍ക്ക് ചൊവ്വാഴ്ച അവധി
കോഴിക്കോട്: ജില്ലയിലെ പൊതുവിദ്യാഭ്യാസ വകുപ്പിന് കീഴിലെ എല്ലാ സ്‌കൂളുകളിലെയും ഒന്ന് മുതല്‍ 10 വരെ ക്ലാസുകള്‍ക്ക് ജനുവരി ഒന്ന് ചൊവ്വാഴ്ച അവധി ആയിരിക്കുമെന്ന് വിദ്യാഭ്യാസ ഉപ ഡയറക്ടര്‍ ഇ കെ സുരേഷ് കുമാര്‍ അറിയിച്ചു. പകരം ജനുവരി 19 ശനിയാഴ്ച പ്രവൃത്തി ദിവസമായിരിക്കും.
 
പ്രളയത്തെ അതിജീവിക്കുന്ന നിര്‍മ്മാണരീതിക്ക് പ്രാധാന്യം നല്‍കും: മന്ത്രി ജി സുധാകരന്‍
നാദാപുരം: പാലമായാലും റോഡായാലും കെട്ടിടങ്ങളായാലും പ്രളയത്തെ അതിജീവിക്കുന്ന നിര്‍മ്മാണ രീതിക്കാണ് പ്രാധാന്യം നല്‍കുക എന്ന് പൊതുമരാമത്ത് രജിസ്‌ട്രേഷന്‍ വകുപ്പ് മന്ത്രി ജി സുധാകരന്‍ പറഞ്ഞു. കിഫ്ബി പദ്ധതിയില്‍ ഉള്‍പ്പെടുത്തി പൊതുമരാമത്ത് വകുപ്പ് നിരത്ത് വിഭാഗം മുട്ടുങ്ങല്‍ നാദാപുരം പക്രംതളം റോഡ് പരിഷ്‌കരണ പ്രവൃത്തി നാദാപുരം ബസ്സ്റ്റാന്റ് പരിസരത്ത് ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. യൂറോപ്യന്‍ രാജ്യങ്ങളിലും ഗള്‍ഫ് രാജ്യങ്ങളിലും കണ്ടിരുന്ന ലോകനിലവാരത്തിലുളള റോഡുകള്‍ നമ്മുടെ നാട്ടിലും രണ്ടര വര്‍ഷംകൊണ്ട് ഉണ്ടാക്കാന്‍ കഴിഞ്ഞിട്ടുണ്ട്. ഡിസൈന്‍ റോഡുകള്‍ക്കും പ്രാധാന്യം നല്കി. വികസന പ്രവര്‍ത്തനത്തിന് കക്ഷിരാഷ്ട്രീയം ഇല്ല. എല്ലാ ജാതി മതസ്ഥരേയും തുല്ല്യരായി കണ്ടുകൊണ്ടാണ് വികസന പ്രവര്‍ത്തനത്തിന് മുന്‍തൂക്കം നല്‍കുന്നത്. നല്ല റോഡുകളും പാലങ്ങളും ഇനിയും നമുക്ക് ആവശ്യമുണ്ടെന്നും അദ്ദേഹം പറഞ്ഞു. കോണ്‍ട്രാക്ടര്‍മാരുടെ യോഗ്യത തീരുമാനിക്കുന്ന കാര്യം പരിഗണിച്ചു വരികയാണ്. കരാറില്‍ അലംഭാവം കാണിക്കുന്ന കോണ്‍ട്രാക്ടര്‍മാരുടെ ലൈസന്‍സ് കാന്‍സല്‍ ചെയ്യാനുളള നടപടികള്‍ സ്വീകരിക്കും. ഒഞ്ചിയം, വെളളികുളങ്ങര റോഡിന്റെ പണി ജനുവരി 31 നകം പൂര്‍ത്തിയാക്കും. നാലര കോടി രൂപ ചിലവിലാണ് ഊരാളുങ്കല്‍ ലേബര്‍ കോണ്‍ട്രാക്ട് സൊസൈറ്റി മുട്ടുങ്ങല്‍ പക്രംതളം റോഡിന്റെ പരിഷ്‌കരണ പ്രവൃത്തി നടത്തുന്നത്. 18 മാസ കാലയളവിനുളളില്‍ പ്രവൃത്തി പൂര്‍ത്തീകരിക്കും. പന്ത്രണ്ട് കിലോമീറ്റര്‍ റോഡാണ് വീതികൂട്ടി നിര്‍മ്മാണ പ്രവൃത്തി ആരംഭിച്ചത്. റോഡുകളും ഫുട്പാത്തുകളുമൊക്കെ കയ്യേറി വ്യാപാര സ്ഥാപനങ്ങള്‍ സാധനങ്ങള്‍ തുടങ്ങിയവ വെക്കുന്നതിനെതിരെ നടപടി സ്വീകരിക്കും. മുടങ്ങികിടന്ന നിരവധി പദ്ധതികള്‍ പൂര്‍ത്തീകരിക്കാന്‍ രണ്ടര വര്‍ഷം കൊണ്ട് കഴിഞ്ഞെന്നും മന്ത്രി പറഞ്ഞു. ഇ കെ വിജയന്‍ എം എല്‍ എ അധ്യക്ഷത വഹിച്ചു. പാറക്കല്‍ അബ്ദുളള എം എല്‍ എ, സി കെ നാണു എം എല്‍ എ തൂണേരി ബ്ലോക്ക് പഞ്ചായത്ത് പ്രസിഡന്റ് സി എച്ച് ബാലകൃഷ്ണന്‍, പൊതുമരാമത്ത് വകുപ്പ് എക്‌സിക്യൂട്ടീവ് എഞ്ചിനിയര്‍ സിന്ധു ആര്‍, വടകര ബ്ലോക്ക് പഞ്ചായത്ത് പ്രസിഡന്റ് കോട്ടയില്‍ രാധാകൃഷ്ണന്‍, നാദാപുരം ഗ്രാമപഞ്ചായത്ത് പ്രസിഡന്റ് എം കെ സഫീറ, പുറമേരി ഗ്രാമപഞ്ചായത്ത് പ്രസിഡന്റ് കെ അച്യുതന്‍, എടച്ചേരി ഗ്രാമപഞ്ചായത്ത് പ്രസിഡന്റ് ടി കെ അരവിന്ദാക്ഷന്‍, ചോറോട് ഗ്രാമപഞ്ചായത്ത് പ്രസിഡന്റ് നളിനി കെ കെ തുടങ്ങി വിവിധ രാഷ്ട്രീയ പാര്‍ട്ടി പ്രതിനിധികള്‍ പങ്കെടുത്തു.
 
വനിതാ മതില്‍: സ്‌കൂട്ടര്‍ റാലി നടത്തി
കോഴിക്കോട്: ജനുവരി ഒന്നിന് നടക്കുന്ന വനിതാമതിലിന്റെ പ്രചരണാര്‍ത്ഥം സ്‌കൂട്ടര്‍ റാലി നടത്തി. സിവില്‍ സ്‌റ്റേഷനില്‍ നിന്ന് ആരംഭിച്ച റാലി എ ഡി എം റോഷ്‌നി നാരായണന്‍ ഫഌഗ് ഓഫ് ചെയ്തു. വനിതാ ജീവനക്കാരാണ് റാലിയില്‍ പങ്കെടുത്തത്.
 
ചുരത്തില്‍ പുതുവത്സരാഘോഷങ്ങള്‍ക്ക് കര്‍ശന നിയന്ത്രണം
അടിവാരം: താമരശ്ശേരി ചുരത്തില്‍ പുതുവത്സരാഘോഷങ്ങള്‍ക്ക് പോലീസിന്റെ കര്‍ശന നിയന്ത്രണം. പുതുവത്സരാഘോഷത്തിന്റെ ഭാഗമായി ചുരത്തില്‍ സംഘം ചേരുന്നതും പരസ്യ മദ്യപാനം നടത്തുന്നതും ഉള്‍പ്പെടെ നിയന്ത്രിക്കാനാണ് താമരശ്ശേരി പോലീസിന്റെ തീരുമാനം. ഇന്ന് വൈകിട്ട് ആറുമണി മുതല്‍ പുലര്‍ച്ചെ വരെ ചുരത്തില്‍ സന്ദര്‍ശകരെ അനുവദിക്കില്ല. പരസ്യമായ മദ്യപാനം, മദ്യപിച്ച് വാഹനം ഓടിക്കല്‍, ഗതാഗത തടസ്സം സൃഷ്ടിക്കല്‍ തുടങ്ങിയവ കണ്ടെത്തി കര്‍ശന നടപടികള്‍ സ്വീകരിക്കും. ചുരത്തിലെ വ്യാപാര സ്ഥാപനങ്ങള്‍ ഇന്ന് രാത്രി 9 മണിക്ക് മുമ്പായി അടക്കണമെന്നും പോലീസ് നിര്‍ദ്ദേശം നല്‍കിയിട്ടുണ്ട്. പുതുവത്സരാഘോഷത്തിന്റെ ഭാഗമായുള്ള സംഘര്‍ഷങ്ങളും വാഹനാപകടങ്ങളും ഒഴിവാക്കുന്നതിന്നായാണ് പോലീസ് കര്‍ശന നിയന്ത്രണങ്ങള്‍ ഏര്‍പ്പെടുത്തുന്നത്. ദേശീയപാതയില്‍ ഉള്‍പ്പെടെ വൈകിട്ട് മുതല്‍ വാഹന പരിശോധനയും മൊബൈല്‍ പട്രോളിംഗും ശക്തമാക്കും. എന്നാല്‍ ചുരത്തില്‍ ഉള്‍പ്പെടെ യാത്രക്കാര്‍ക്ക് യാതൊരു വിലക്കും ഉണ്ടായിരിക്കില്ലെന്നും താമരശ്ശേരി പോലീസ് അറിയിച്ചു.
 
വനിതാ മതില്‍: കുടുംബശ്രീ വിളംബരജാഥ നടത്തി
കോഴിക്കോട്: പെണ്‍കരുത്തറിയിച്ച് വനിതാ മതിലിന്റെ പ്രചരണാര്‍ഥം കുടുംബശ്രീ ജില്ലാ മിഷന്റെ നേതൃത്വത്തില്‍ നഗരത്തില്‍ വിളംബരജാഥ നടത്തി. ശിങ്കാരിമേളവും മുത്തുക്കുടയും വര്‍ണാഭമാക്കിയ ജാഥയില്‍ വനിതാ മതിലിന്റെ പ്രസക്തി വിളിച്ചോതുന്ന പ്ലക്കാര്‍ഡുകളുമായി അഞ്ഞൂറിലധികം പേര്‍ അണിനിരന്നു. വിളംബരജാഥ പുതിയ ബസ് സ്റ്റാന്‍ഡ് പരിസരത്ത് നിന്ന് ആരംഭിച്ച് മാവൂര്‍ റോഡ് വഴി മുതലക്കുളത്ത് സമാപിച്ചു. ജില്ലയിലെ കുടുംബശ്രീ സി ഡി എസ് ചെയര്‍പേഴ്‌സണ്‍മാര്‍, വൈസ് ചെയര്‍പേഴ്‌സണ്‍മാര്‍, എക്കൗണ്ടന്റുമാര്‍, കുടുംബശ്രീ പിന്തുണാ സംവിധാനങ്ങളായ എക്‌സാത്ത്, എംഇസി (മൈക്രോ എന്റര്‍പ്രൈസസ് കണ്‍സള്‍ട്ടന്റ്‌സ്), ഹോം ഷോപ്പ് ഉടമകള്‍, കാസ് ഓഡിറ്റ് ടീം, റിസോഴ്‌സ് പേഴ്‌സണ്‍മാര്‍, പിങ്ക് ടാസ്‌ക് ഫോഴ്‌സ്, എസ്സി അനിമേറ്റര്‍മാര്‍, തീരദേശ വളണ്ടിയര്‍മാര്‍, ജില്ലാ മിഷന്‍ ഉദ്യോഗസ്ഥര്‍, ജീവനക്കാര്‍ എന്നിവരാണ് വിളംബര ജാഥയില്‍ പങ്കെടുത്തത്.
 
സംസ്ഥാനത്ത് പൊതുമരാമത്ത് ഏറ്റെടുത്തിരിക്കുന്നത് 1.05 ലക്ഷം കോടിയുടെ വികസന പ്രവര്‍ത്തനങ്ങള്‍: മന്ത്രി ജി സുധാകരന്‍
കോരപ്പുഴ: 1,05,566 കോടിയുടെ വികസന പ്രവര്‍ത്തനങ്ങളാണ് സംസ്ഥാനത്ത് പൊതുമരാമത്ത് ഏറ്റെടുത്തിരിക്കുന്നതെന്ന് പൊതുമരാമത്ത് വകുപ്പ് മന്ത്രി ജി സുധാകരന്‍ പറഞ്ഞു. കോരപ്പുഴ പാലം പുനര്‍നിര്‍മാണ പ്രവൃത്തി ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം. സംസ്ഥാനത്തിന്റെ ചരിത്രത്തിലെ ഏറ്റവും വലിയ പ്രവര്‍ത്തനങ്ങളാണ് അടിസ്ഥാന വികസന രംഗത്ത് നടക്കുന്നത്. 2020 മാര്‍ച്ചിന് മുമ്പ് കോരപ്പുഴ പാലം നിര്‍മ്മാണം പൂര്‍ത്തിയാക്കാന്‍ കഴിയുമെന്നാണ് പ്രതീക്ഷിക്കുന്നതെന്നും മന്ത്രി പറഞ്ഞു. 1930-40 കാലഘട്ടത്തില്‍ നിര്‍മിച്ച പാലം അപകടാവസ്ഥയിലായതിനെ തുടര്‍ന്നാണ് പുനര്‍നിര്‍മിക്കുന്നത്. കിഫ്ബി പദ്ധതിയില്‍ ഉള്‍പ്പെടുത്തി 27.17 കോടി ചെലവഴിച്ച് കേരള റോഡ് ഫണ്ട് ബോര്‍ഡും ദേശീയപാതാ വിഭാഗവും ചേര്‍ന്നാണ് നിര്‍മാണം. ചടങ്ങില്‍ ഗതാഗത വകുപ്പ് മന്ത്രി എ കെ ശശീന്ദ്രന്‍ അധ്യക്ഷത വഹിച്ചു. മേയര്‍ തോട്ടത്തില്‍ രവീന്ദ്രന്‍ വിശിഷ്ടാതിഥിയായി. ചേമഞ്ചേരി ഗ്രാമപഞ്ചായത്ത് പ്രസിഡന്റ് അശോകന്‍ കോട്ട്, ജില്ലാ പഞ്ചായത്ത് അംഗം ശാലിനി ബാലകൃഷ്ണന്‍, കോര്‍പറേഷന്‍ കൗണ്‍സിലര്‍ കെ കൃഷ്ണന്‍, ബ്ലോക്ക് പഞ്ചായത്ത് അംഗം പി ടി നാരായണി, വാര്‍ഡ് മെമ്പര്‍ പി ടി സോമന്‍, പൊതുമരാമത്ത് വകുപ്പ് ദേശീയപാത വിഭാഗം എക്‌സിക്യുട്ടീവ് എഞ്ചിനീയര്‍ കെ വിനയരാജ്, കെ കെ മുഹമ്മദ്, ഇ കെ അജിത്, വി കെ സി ജയപ്രകാശ്, മോഹനന്‍ വീര്‍വീട്ടില്‍, ടി പി വിജയന്‍, സി സത്യന്‍, എന്നിവര്‍ പങ്കെടുത്തു. കെ ദാസന്‍ എംഎല്‍എ സ്വാഗതവും പൊതുമരാമത്ത് വകുപ്പ് ദേശീയപാത വിഭാഗം അസിസ്റ്റന്റ് എഞ്ചിനീയര്‍ സി ദിവാകരന്‍ നന്ദിയും പറഞ്ഞു. ഉദ്ഘാടന ചടങ്ങിന് ശേഷം പൊളിച്ചുമാറ്റുന്ന പഴയപാലം മന്ത്രിമാരായ ജി സുധാകരനും എ കെ ശശീന്ദ്രനും മേയര്‍ തോട്ടത്തില്‍ രവീന്ദ്രനും സന്ദര്‍ശിച്ചു.
 
കോഴിക്കോട്: ചക്കരോത്ത്കുളം സ്റ്റേഷനറി വകുപ്പിന്റെ കോഴിക്കോട് മേഖലാ സ്റ്റേഷനറി ഓഫീസ് മുഖ്യമന്ത്രി പിണറായി വിജയന്‍ ഉദ്ഘാടനം ചെയ്തു. സംസ്ഥാന സര്‍ക്കാര്‍ ജീവനക്കാരില്‍ ഭൂരിപക്ഷവും ആത്മാര്‍ത്ഥതയോടെയാണ് പ്രവര്‍ത്തിക്കുന്നത്. എന്നാല്‍ അപൂര്‍വ്വ ചില ജീവനക്കാരെങ്കിലും മുട്ടാപോക്ക് കാര്യങ്ങള്‍ പറഞ്ഞ് ജനങ്ങളെ ബുദ്ധിമുട്ടിക്കുന്നുണ്ടെന്നും ഒറ്റപ്പെട്ടതാണെങ്കിലും ഇത് നിസാരമായി കാണാനാകില്ലെന്നും മുഖ്യമന്ത്രി പറഞ്ഞു. ചടങ്ങില്‍ പൊതുമരാമത്ത് വകുപ്പ് മന്ത്രി ജി സുധാകരന്‍ അധ്യക്ഷത വഹിച്ചു. ഗതാഗത വകുപ്പ് മന്ത്രി എ കെ ശശീന്ദ്രന്‍ ഇ ഓഫീസ് ഉദ്ഘാടനം ചെയ്തു. മേയര്‍ തോട്ടത്തില്‍ രവീന്ദ്രന്‍ മുഖ്യാതിഥിയായിരുന്നു. എ പ്രദീപ്കുമാര്‍ എം എല്‍ എ സ്വാഗതവും അസി. സ്റ്റേഷനറി കണ്‍ട്രോളര്‍ കെ എസ് രമേഷ് കുമാര്‍ നന്ദിയും പറഞ്ഞു. സ്റ്റേഷനറി കണ്‍ട്രോളര്‍ സി ശ്യാമളവല്ലി ആമുഖ പ്രഭാഷണം നടത്തി. പൊതുമരാമത്ത് വകുപ്പ് സൂപ്രണ്ടിംങ് എഞ്ചിനീയര്‍ ജി എസ് ദിലീപ് ലാല്‍ റിപ്പോര്‍ട്ട് അവതരിപ്പിച്ചു. ജില്ലാ പോലീസ് മേധാവി എസ് കാളിരാജ് മഹേഷ്‌കുമാര്‍, പൊതുമരാമത്ത് കെട്ടിട വിഭാഗം എക്സിക്യൂട്ടീവ് എഞ്ചിനീയര്‍ പി ഗോകുല്‍ദാസ്, ഡെപ്യൂട്ടി സ്റ്റേഷനറി കണ്‍ട്രോളര്‍ കെ കെ മുരളീധരന്‍, രാഷ്ട്രീയകക്ഷി നേതാക്കളായ പി മോഹനന്‍മാസ്റ്റര്‍, കെ ലോഹ്യ, മാധവന്‍, സി സത്യചന്ദ്രന്‍ തുടങ്ങിയവര്‍ സംബന്ധിച്ചു.
 
ദേശീയപാത വികസനത്തിന് ഫെബ്രുവരിക്കകം മുഴുവന്‍ ഭൂമിയും ഏറ്റെടുക്കും: മുഖ്യമന്ത്രി
കോഴിക്കോട്: ദേശീയപാത വികസനത്തിന് ആവശ്യമായ മുഴുവന്‍ ഭൂമിയും ഫെബ്രുവരി മാസത്തിനകം ഏറ്റെടുക്കുമെന്ന് മുഖ്യമന്ത്രി പിണറായി വിജയന്‍ പറഞ്ഞു. കോഴിക്കോട് ബൈപ്പാസില്‍ രാമനാട്ടുകര മേല്‍പാലം ഉദ്ഘാടനം നിര്‍വ്വഹിച്ചു സംസാരിക്കുകയായിരുന്നു അദ്ദേഹം. കാസര്‍കോട് മുതല്‍ കൊച്ചിവരെ 80 ശതമാനവും കൊച്ചി മുതല്‍ തിരുവനന്തപുരം വരെ എഴുപത് ശതമാനവും ഭൂമി ഏറ്റെടുക്കല്‍ പൂര്‍ത്തിയായതായി മുഖ്യമന്ത്രി പറഞ്ഞു. 45 മീറ്റര്‍ വീതിയില്‍ ദേശീയപാത വികസിപ്പിക്കുന്നതില്‍ വിട്ടുവീഴ്ചയില്ലെന്നും സംസ്ഥാനത്തിന്റെ അടിസ്ഥാന സൗകര്യവികസനത്തിന് ദേശീയപാത വികസനം അതീവ പ്രാധാന്യമുളളതാണെന്നും മുഖ്യമന്ത്രി പറഞ്ഞു. ഹൈവേകളുടെയും റോഡുകളുടെയും സംരക്ഷണവും അറ്റകുറ്റ പണികളും കാര്യക്ഷമമായി നടപ്പിലാക്കുന്നതിനുള്ള സംവിധാനങ്ങളാണ് ആവിഷ്‌ക്കരിക്കുന്നത്. പൊതുഗതാഗത സംവിധാനങ്ങള്‍ മെച്ചപ്പെടുത്തി സ്വകാര്യവാഹനങ്ങളുടെ പെരുപ്പം മൂലമുണ്ടാകുന്ന ഗതാഗത കുരുക്കുകളും അപകടങ്ങളും മലിനീകരണവും ഗണ്യമായി കുറയ്ക്കാനാണ് ശ്രമിക്കുന്നത്. റോഡുകളിലെ തിക്കും തിരക്കും പരമാവധി കുറയ്ക്കാന്‍ ജലഗതാഗതം ഉള്‍പ്പെടെയുള്ള ബദല്‍ മാര്‍ഗങ്ങള്‍ യാഥാര്‍ത്ഥ്യമാക്കാനാണ് സര്‍ക്കാര്‍ ലക്ഷ്യമിട്ടിട്ടുള്ളത്. റോഡ് നിര്‍മാണത്തിന് നൂതനമായിട്ടുള്ള കോള്‍ഡ് റീസൈക്കിളിങ് ടെക്നോളജി, നാച്വറല്‍ റബ്ബറൈസ്ഡ് ബിറ്റുമിന്‍, പ്ലാസ്റ്റിക് മിക്സ്ഡ് ബിറ്റുമിന്‍ തുടങ്ങിയ ആധുനിക സങ്കേതങ്ങള്‍ ഇപ്പോള്‍ത്തന്നെ ഉപയോഗപ്പെടുത്തി വരുന്നുണ്ട്. പ്രളയാനന്തരകേരളത്തിന്റെ പുനര്‍നിര്‍മാണത്തിന്റെ ചെലവു കുറയ്ക്കുന്നതിനും ഈട് നില്‍പ്പ് ഉറപ്പാക്കുന്നതിനും ഇത്തരം നിര്‍മാണങ്ങള്‍ ഉപകരിക്കുമെന്നാണ് സര്‍ക്കാര്‍ പ്രതീക്ഷിക്കുന്നത്. പൊതുമരാമത്ത് രജിസ്ട്രേഷന്‍ വകുപ്പ് മന്ത്രി ജി സുധാകരന്‍ അധ്യക്ഷത വഹിച്ചു. തൊഴില്‍ എക്സൈസ് വകുപ്പ് മന്ത്രി ടി പി രാമകൃഷ്ണന്‍, ഗതാഗത വകുപ്പ് മന്ത്രി എ കെ ശശീന്ദ്രന്‍ എന്നിവര്‍ വിശിഷ്ടാതിഥികള്‍ ആയിരുന്നു. പി ഡബ്ല്യൂ ഡി ചീഫ് എന്‍ജിനീയര്‍ അശോക് കുമാര്‍ റിപ്പോര്‍ട്ട് അവതരിപ്പിച്ചു. കോഴിക്കോട് ജില്ലാ പഞ്ചായത്ത് പ്രസിഡന്റ് ബാബു പറശ്ശേരി മുഖ്യ പ്രഭാഷണം നടത്തി. രാമാട്ടുകര നഗരസഭ ചെയര്‍മാന്‍ വാഴയില്‍ ബാലകൃഷ്ണന്‍, വൈസ് ചെയര്‍പേഴ്സണ്‍ സജ്‌ന പി കെ, കോര്‍പ്പറേഷന്‍ കൗണ്‍സിലര്‍മാരായ പുല്‍പ്പറമ്പില്‍ രാജന്‍, പി പി പുഷ്പമണി, കെ എം ബഷീര്‍, കെ പുഷ്പ, കെ ലോഹ്യ ഹമീദ് ടി എസ് തുടങ്ങിയവര്‍ സംസാരിച്ചു. വി കെ സി മമ്മദ്കോയ എം എല്‍ എ സ്വാഗതവും നാഷണല്‍ ഹൈവേ നോര്‍ത്ത് സര്‍ക്കിള്‍ സൂപ്രണ്ടിങ് എന്‍ജിനീയര്‍ ടി എസ് സിന്ധു നന്ദിയും പറഞ്ഞു.
 
താമരശ്ശേരിയില്‍ ഹോം മെയ്ഡ് ഉത്പന്നങ്ങളുടെ പ്രദര്‍ശനം.
താമരശ്ശേരി: ചെറുകിട സംരഭകര്‍ക്കും ഉപഭോക്താക്കങ്ങള്‍ക്കും അവസരങ്ങള്‍ ഒരുക്കി താമരശ്ശേരിയില്‍ ഹോം മെയ്ഡ് ഉത്പന്നങ്ങളുടെ പ്രദര്‍ശനം. ഡിസംബര്‍ 29, 30 തിയ്യതികളില്‍ രാവിലെ 10 മുതല്‍ രാത്രി 10 വരെ കാരാടി വയനാട് റീജന്‍സി ഓഡിറ്റോറിയത്തിലാണ് പ്രദര്‍ശനം ഒരുക്കുന്നത്. CALI-KART SHOPPING EXPO എന്ന പേരില്‍ നടക്കുന്ന പ്രദര്‍ശനത്തില്‍ വിത്യസ്ഥമായ 30 സ്റ്റാളുകളാണ് ഒരുക്കുന്നത്. വിവിധ ഇനം നാടന്‍ ഭക്ഷണങ്ങള്‍, കേക്കുകള്‍, വസ്ത്രങ്ങള്‍, ക്രാഫ്റ്റ് ഇനങ്ങള്‍ തുടങ്ങിയവയാണ് പ്രധാനമായും പ്രദര്‍ശിപ്പിക്കുന്നത്. ആവശ്യക്കാര്‍ക്ക് വിലക്കുവാങ്ങാനും ഓര്‍ഡര്‍ ചെയ്യാനും അവസരം ഉണ്ടാവും. ലൈവ് മെഹന്തി, ലൈവ് മ്യൂസിക് എന്നിവക്ക് പുറമെ ഓരോ മണിക്കൂറിലും പ്രത്യേക സമ്മാനങ്ങളും ബംബര്‍ സമ്മാനങ്ങളുമാണ് ഉപഭോക്താക്കളെ കാത്തിരിക്കുന്നത്. പ്രവേശനം തികച്ചും സൗജന്യമാണ്. കൂടുതല്‍ വിവരങ്ങള്‍ക്ക്: 6235050055
 
കൊയിലാണ്ടി നഗരസഭ സുകൃതം ജീവിതം മെഗാ മെഡിക്കല്‍ ക്യാമ്പ് ആരംഭിച്ചു
കൊയിലാണ്ടി: കൊയിലാണ്ടി നഗരസഭയുടെയും താലൂക്ക് ആസ്ഥാന ആശുപത്രിയുടെയും നേതൃത്വത്തില്‍ സുകൃതം ജീവിതം മെഗാ മെഡിക്കല്‍ ക്യാമ്പ് ആരംഭിച്ചു. ഗതാഗത വകുപ്പ് മന്ത്രി എ കെ ശശീന്ദ്രന്‍ ക്യാമ്പ് ഉദ്ഘാടനം നിര്‍വഹിച്ചു. സര്‍ക്കാര്‍ അധികാരത്തില്‍ വന്നതിന് ശേഷം ആരോഗ്യ രംഗത്ത് വന്‍ മാറ്റങ്ങളാണ് ഉണ്ടായതെന്നും ഡോക്ടര്‍മാര്‍ക്ക് രോഗികളോടുള്ള സമീപനത്തിലും മാറ്റം വന്നതായും മന്ത്രി പറഞ്ഞു. മൂന്ന് ദിവസങ്ങളിലായി കൊയിലാണ്ടി ഇ എം എസ് ടൗണ്‍ ഹാളിലാണ് മെഗാ മെഡിക്കല്‍ ക്യാമ്പും എക്‌സിബിഷനും സംഘടിപ്പിക്കുന്നത്. ക്യാമ്പിലെ പ്രദര്‍ശന ഉദ്ഘാടനം കെ ദാസന്‍ എം എല്‍ എ നിര്‍വ്വഹിച്ചു. നഗരസഭ ചെയര്‍മാന്‍ അഡ്വ. കെ സത്യന്‍ അധ്യക്ഷത വഹിച്ചു. കോഴിക്കോട് മെഡിക്കല്‍ കോളേജ് പ്രിന്‍സിപ്പല്‍ ഡോ. വി ആര്‍ രാജേന്ദ്രന്‍ മുഖ്യഥിതിയായി.
 
 
 
 

All rights reserved | Website developed and maintained by Zyonz Technologies