18-Oct-2018 (Thu)
വ്യാഴാഴ്ച സംസ്ഥാനത്ത് ഹര്‍ത്താല്‍; ബി ജെ പി പിന്തുണ പോലീസിനെ വെട്ടിച്ച് കടന്ന പീഡന കേസ് പ്രതി അറസ്റ്റില്‍; മാതാപിതാക്കള്‍ ഉള്‍പ്പെടെ അഞ്ചുപേര്‍ റിമാണ്ടില്‍ അനര്‍ഹരായ കാര്‍ഡുടമകള്‍ പൊതുവിഭാഗത്തിലേക്ക് മാറ്റണം ബാലാവകാശ സംരക്ഷണ സമിതികളുടെ ശാക്തീകരണത്തിന് ശില്‍പ്പശാല നടത്തും പോലീസിനെ വെട്ടിച്ച് കടന്ന പീഡന കേസ് പ്രതിയെ കണ്ടെത്താനായില്ല പ്രളയക്കെടുതി: വ്യവസായ വാണിജ്യ സ്ഥാപനങ്ങളുടെ നഷ്ടകണക്കെടുക്കുന്നു റഫാല്‍ കരാര്‍ അഴിമതി; സംയുക്ത പാര്‍ലമെന്റ് കമ്മറ്റി അന്വേഷണം അവശ്യപ്പെട്ട് യൂത്ത് കോണ്‍ഗ്രസ് പോസ്റ്റ് ഓഫീസ് പിക്കറ്റിംഗ് നടത്തി അഞ്ച് ലിറ്റര്‍ ചാരായവുമായി കോടഞ്ചേരി സ്വദേശി പിടിയില്‍ പുതുപ്പാടി ഗ്രാമപഞ്ചായത്ത് ഓഫീസിലേക്ക് എല്‍ ഡി എഫ് മാര്‍ച്ച്
 
 
 
 
കരിഞ്ചോല ഉരുള്‍പൊട്ടലിന് ഇരയാവര്‍ക്ക് ധന സഹായം നല്‍കിയില്ലെന്ന വാദം അടിസ്ഥാന രഹിതം; തെളിവുകളുമായി കാരാട്ട് റസാഖ് എം എല്‍ എ
താമരശ്ശേരി: കട്ടിപ്പാറ കരിഞ്ചോലയിലുണ്ടായ ഉരുള്‍പൊട്ടലിന് ഇരയാവര്‍ക്ക് ധന സഹായം നല്‍കിയില്ലെന്ന പ്രചാരണം അടിസ്ഥാന രഹിതമാണെന്നും പുനരധിവാസ പ്രവര്‍ത്തനങ്ങളെ അട്ടിമറിക്കാനാണ് ചിലര്‍ ശ്രമിക്കുന്നതെന്നും കാരാട്ട് റസാഖ് എം എല്‍ എ വാര്‍ത്താ സമ്മേളനത്തില്‍ പറഞ്ഞു. ദുരന്തത്തില്‍ മരിച്ച ഒരാള്‍ക്ക് നാല് ലക്ഷം വീതവും വീട് നഷ്ടപ്പെട്ടവര്‍ക്ക് നാല് ലക്ഷവും ഭൂമി നഷ്ടപ്പെട്ടവര്‍ക്ക് ആറ് ലക്ഷവും ഉള്‍പ്പെടെയുള്ള ധന സഹായമാണ് സര്‍ക്കാര്‍ പ്രഖ്യാപിച്ചത്. ഇവ ദുരന്തം നടന്ന് പതിനാല് ദിവസത്തിനകം അവകാശികളുടെ അക്കൗണ്ടില്‍ എത്തുകയും അതിനുള്ള രേഖകള്‍ കട്ടിപ്പാറയില്‍ നടന്ന ചടങ്ങില്‍ വെച്ച് എല്ലാവരും ഏറ്റുവാങ്ങുകയും ചെയ്തതാണ്. മാതാപിതാക്കളും ഭാര്യയും മകളും ഉള്‍പ്പെടെ നഷ്ടപ്പെട്ട മുഹമ്മദ് റാഫിക്ക് 20 ലക്ഷം രൂപയാണ് നല്‍കിയത്. കൂടാതെ വീട് നിര്‍മാണത്തിനുള്ള ആദ്യഘടുവായി 101900 രൂപയും കൈമാറി. റാഫിയുടെ സഹോദരിയും രണ്ട് മക്കളും മരിച്ചതിനുള്ള നഷ്ടപരിഹാരമായി 12 ലക്ഷം രൂപയാണ് സഹോദരീ ഭര്‍ത്താവ് സുബീറിന് നല്‍കിയത്. മാതാപിതാക്കളും സഹോദരനും സഹോദര പുത്രനും നഷ്ടപ്പെട്ട ജംഷിദിന്റെ കുടുംബത്തിന് 16 ലക്ഷം നല്‍കി. ഇതില്‍ 8 ലക്ഷം ജംഷിദിന്റെ സഹോദരി ബുഷ്‌റയുടെ അക്കൗണ്ടിലും 8 ലക്ഷം സഹോദരന്റെ ഭാര്യ ഹന്നത്തിന്റെ അക്കൗണ്ടിലുമാണ് നല്‍കിയത്. രണ്ട് മക്കള്‍ നഷ്ടപ്പെട്ട സലീം-സറീന ദമ്പതികള്‍ക്കുള്ള 8 ലക്ഷം സറീനയുടെ അക്കൗണ്ടിലേക്കാണ് നല്‍കിയത്.
 
കോഴിമാലിന്യ വാഹനം തടഞ്ഞ് പണപ്പിരിവ് നടത്തിയ സി പി എം ബ്രാഞ്ച് സെക്രട്ടറിയെ പാര്‍ട്ടി സ്ഥാനങ്ങളില്‍ നിന്നും നീക്കി
താമരശ്ശേരി: കോഴി മാലിന്യം കടത്തുകയായിരുന്ന വാഹനം തടഞ്ഞ് പണപ്പിരിവ് നടത്തിയ സംഭവത്തില്‍ ആരോപണ വിധേയനായ സി പി എം ബ്രാഞ്ച് സെക്രട്ടറിയെ പാര്‍ട്ടി സ്ഥാനങ്ങളില്‍ നിന്നും നീക്കി. താമരശ്ശേരി ചുങ്കം ചുണ്ടക്കുന്ന് ബ്രാഞ്ച് സെക്രട്ടറിയും ഡി വൈ എഫ് ഐ നോര്‍ത്ത് മേഖല പ്രസിഡന്റുമായ സി കെ നവാസിനെയാണ് ചുമതലകളില്‍ നിന്നും നീക്കിയത്. കഴിഞ്ഞ ദിവസം ചേര്‍ന്ന താമരശ്ശേരി നോര്‍ത്ത് ലോക്കല്‍ കമ്മിറ്റി യോഗം നവാസിനെതിരെ നടപടി സ്വീകരിക്കാന്‍ തീരുമാനിച്ചിരുന്നു. തിങ്കളാഴ്ച്ച ബ്രാഞ്ച് കമ്മിറ്റി ചേര്‍ന്ന ശേഷമാണ് സ്ഥാനങ്ങളില്‍ നിന്നും നീക്കം ചെയ്യുന്നതായി പ്രഖ്യാപിച്ചത്.
 
പ്രളയം തകര്‍ത്ത കേരളത്തെ പുനര്‍നിര്‍മിക്കാന്‍ കലാകാരന്മാരുടെ സംഗീത സന്ദേശ യാത്ര
താമരശ്ശേരി: പ്രളയം തകര്‍ത്ത കേരളത്തെ പുനര്‍നിര്‍മിക്കാന്‍ കേരളം ഒറ്റക്കെട്ടായ് നടത്തുന്ന ശ്രമങ്ങളില്‍ പങ്കാളികളാകാനാണ് ഒരു കൂട്ടം കലാകാരന്മാര്‍ തെരുവുകളില്‍ പാടാനിറങ്ങിയത്. ദുരന്തം മരവിപ്പിച്ച മനസ്സുകളിലേക്ക് സംഗീതത്തിന്റെ സാന്ത്വനമേകുന്നതോടൊപ്പം കേരളത്തിന്റെ പുനസൃഷ്ടിക്കുള്ള പണം കണ്ടെത്തുകയുമാണ് ഇവരുടെ ലക്ഷ്യം. കൊയിലാണ്ടി സൂരജ് മ്യൂസിക്കല്‍ ബാന്റ് സംഘമാണ് തെരുവുകളില്‍ പാട്ടു പാടി ധനശേഖരണം നടത്തുന്നത്. പ്രളയ കാലത്ത് കലാകാരന്‍മാരും ദുരിതത്തിലാണെങ്കിലും അതിലേറെ പ്രയാസം അനുഭവിക്കുന്ന സഹജീവികളുടെ കണ്ണീരൊപ്പുകയാണ് പരിപാടുയുടെ ലക്ഷ്യമെന്ന് സംസ്ഥാന നാടക അവാര്‍ഡ് ജേതാവും സിനിമാ-നാടക രംഗങ്ങളിലെ നിറ സാന്നിധ്യവുമായ മുഹമ്മദ് പേരാമ്പ്ര പറഞ്ഞു. വ്യാപാരികളുടെയും യാത്രക്കാരുടെയും സഹകരണം തെരുവിലിറങ്ങിയ ഗായകസംഘത്തിന് ആവേശം പകരുകയാണ്. താമരശ്ശേരിയില്‍ നിന്നും പ്രയാണം ആരംഭിച്ച സംഗീത സന്ദേശ യാത്ര ഈ മാസം 22 ന് കുറ്റ്യാടിയില്‍ സമാപിക്കും.
 
കോരങ്ങാട് പൊതു ശ്മശാനത്തില്‍ അശാസ്ത്രീയമായി മൃതദേഹങ്ങള്‍ ദഹിപ്പിക്കുന്നതിനെതിരെ നാട്ടുകാര്‍ പ്രക്ഷോഭത്തിനൊരുങ്ങുന്നു
കോരങ്ങാട്: താമരശ്ശേരി കോരങ്ങാട് പൊതു ശ്മശാനത്തില്‍ അശാസ്ത്രീയ രീതിയില്‍ മൃതദേഹങ്ങള്‍ ദഹിപ്പിക്കുന്നതിനെതിരെ നാട്ടുകാര്‍ പ്രക്ഷോഭത്തിനൊരുങ്ങുന്നു. കോരങ്ങാട് അങ്ങാടിക്ക് സമീപത്തായി ജനവാസ കേന്ദ്രത്തില്‍ പ്രവര്‍ത്തിക്കുന്ന പൊതു ശ്മശാനത്തില്‍ ചകിരിയും പ്ലാസ്റ്റിക് കുപ്പികളും ഉപയോഗിച്ച് മൃതദേഹങ്ങള്‍ ദഹിപ്പിക്കുന്നത് പ്രദേശവാസികളെ ദുരിതത്തിലാക്കുന്നുവെന്നാണ് ആക്ഷേപം. ഇതു കാരണം ദിവസം മുഴുവന്‍ പരിസരമാകെ പുകയാല്‍ മൂടപ്പെടും. ദുര്‍ഗന്ധം അസഹ്യമാണെന്നും വീടുകളില്‍ താമസിക്കാന്‍ കഴിയാത്ത അവസ്ഥയാണെന്നും നാട്ടുകാര്‍ പറഞ്ഞു. മൃതദേഹങ്ങളുടെ അസ്ഥികള്‍ പ്രദേശത്ത് കൂട്ടിയിട്ട നിലയിലാണ്. ഇവ ചാരത്തിനൊപ്പം വളമായി ഉപയോഗിക്കുകയാണ് പതിവ്. ഇത് മൃതദേഹത്തോടുള്ള അനാദരവാണെന്നും നാട്ടുകാര്‍ പറയുന്നു.
 
കോഴിമാലിന്യ വാഹനം തടഞ്ഞ് പണപ്പിരിവ്; സി പി എം ബ്രാഞ്ച് സെക്രട്ടറിക്കെതിരെ പാര്‍ട്ടിതല അന്വേഷണം
താമരശ്ശേരി: കോഴി മാലിന്യം കടത്തുകയായിരുന്ന വാഹനം തടഞ്ഞ് പണപ്പിരിവ് നടത്തിയ സി പി എം ബ്രാഞ്ച് സെക്രട്ടറിക്കെതിരെ പാര്‍ട്ടിതല അന്വേഷണം. താമരശ്ശേരി ചുങ്കം ചുണ്ടക്കുന്ന് ബ്രാഞ്ച് സെക്രട്ടറിയും ഡി വൈ എഫ് ഐ നോര്‍ത്ത് മേഖല പ്രസിഡന്റുമായ നവാസിനെതിരെയാണ് താമരശ്ശേരിയിലെ മഞ്ചു ചിക്കന്‍സ്റ്റാള്‍ ഉടമ റഫീഖ് പാര്‍ട്ടിക്ക് പരാതി നല്‍കിയത്. കോഴിക്കട മാലിന്യങ്ങളുമായി മലപ്പുറത്തേക്ക് പോവുകയായിരുന്ന വാഹനം താമരശ്ശേരി പഴയ ബസ്റ്റാന്റിന് സമീപം വെഴുപ്പൂര്‍ റോഡില്‍ തടഞ്ഞുവെച്ച് ഇരുപതിനായിരം രൂപ ആവശ്യപ്പെട്ടുവെന്നാണ് പരാതി. വെള്ളിയാഴ്ച പുലര്‍ച്ചെ ഒന്നരയോടെയായിരുന്നു സംഭവം. നവാസ് ഉള്‍പ്പെടെയുള്ള മൂന്നുപേരാണ് വാഹനം തടഞ്ഞതെന്നും പണം നല്‍കിയില്ലെങ്കില്‍ മാലിന്യം കടത്താന്‍ അനുവധിക്കില്ലെന്ന് ഭീഷണിപ്പെടുത്തിയതായും റഫീഖ് പറഞ്ഞു. അയ്യായിരം രൂപ നല്‍കാമെന്ന് സമ്മതിച്ചെങ്കിലും സംഘം വഴങ്ങിയില്ല. തുടര്‍ന്ന് സുഹൃത്തിന്റെ കയ്യില്‍നിന്നും പണം എത്തിച്ച് പതിനായിരം രൂപ നല്‍കിയെന്നുമാണ് റഫീഖ് സി പി എം ലോക്കല്‍ കമ്മറ്റിക്ക് നല്‍കിയ പരാതിയില്‍ പറയുന്നത്. എന്നാല്‍ റഫീഖിന്റെ പരാതി ലഭിച്ചിട്ടില്ലെന്നും ആരോപണം സംബന്ധിച്ച് അന്വേഷിച്ചു വരികയാണെന്നും സി പി എം നേതാക്കള്‍ പറഞ്ഞു. കുറ്റക്കാര്‍ക്കെതിരെ ശക്തമായ നടപടി സ്വീകരിക്കുമെന്നും നേതാക്കള്‍ പറഞ്ഞു. പാര്‍ട്ടിക്ക് കളങ്കം ഉണ്ടാക്കുന്ന പ്രവര്‍ത്തനം നടത്തിയവര്‍ക്കെതിരെ ശക്തമായ നടപടി സ്വീകരിക്കണമെന്ന് പാര്‍ട്ടിക്കുള്ളിലും ആവശ്യം ഉയര്‍ന്നിട്ടുണ്ട്. ഇതു സംബന്ധിച്ച് ചര്‍ച്ച ചെയ്യാന്‍ ഇന്ന് ബ്രാഞ്ച് കമ്മിറ്റി യോഗവും ലോക്കല്‍ കമ്മിറ്റി യോഗവും നടക്കുമെന്നാണ് സൂചന.
 
ജലദൗര്‍ലഭ്യം കരുതിയിരിക്കണം; മന്ത്രി മാത്യു ടി തോമസ്
കോഴിക്കോട്: സംസ്ഥാനത്ത് ജലദൗര്‍ലഭ്യം ഉണ്ടാവാതിരിക്കുന്നതിനുള്ള മുന്നൊരുക്കങ്ങളാണ് ഇപ്പോള്‍ നടത്തേണ്ടതെന്ന് ജലവിഭവ വകുപ്പ് മന്ത്രി മാത്യു ടി തോമസ്. പ്രളയം2018 കാരണങ്ങള്‍, സന്നദ്ധത, ലഘൂകരണ മാര്‍ഗങ്ങള്‍ എന്നീ വിഷയങ്ങിളില്‍ സി ഡബ്ല്യു ആര്‍ ഡി എമ്മില്‍ നടന്ന പരിശീലന പരിപാടി ഉദ്ഘാടനം ചെയ്യുകയായിരുന്നു മന്ത്രി. പ്രളയം ഉണ്ടായ സാഹചര്യത്തില്‍ സംസ്ഥാനത്ത് ഇത്തവണ ജലക്ഷാമം ഉണ്ടാകില്ലെന്ന അബദ്ധ ധാരണ വച്ചു പുലര്‍ത്തരുത്. ഹരിതകേരളം പദ്ധതി വഴി ഒരു പരിധിവരെ ജലസംരക്ഷണം സാധ്യമായിട്ടുണ്ടെന്നും ഹരിതകേരളം മുന്നോട്ട് വയ്ക്കുന്ന മാര്‍ഗനിര്‍ദേശങ്ങള്‍ പാലിക്കാന്‍ ജനങ്ങള്‍ തയ്യാറാകണമെന്നും അദ്ദേഹം പറഞ്ഞു. തുലാവര്‍ഷസമയത്ത് ജലസംരക്ഷണം ഉറപ്പാക്കാന്‍ ശ്രമിക്കണമെന്ന് മന്തി അഭിപ്രായപ്പെട്ടു.
 
കോഴിക്കോട്: വടകര താലൂക്കിലെ കായക്കൊടിയില്‍ പ്രവര്‍ത്തിക്കുന്ന എ.ആര്‍.ഡി 193, കൊയിലാണ്ടി താലൂക്കിലെ മേപ്പയ്യൂര്‍ ജനകീയ മുക്കില്‍ പ്രവര്‍ത്തിക്കുന്ന എ.ആര്‍.ഡി 93, സിറ്റി റേഷനിംഗ് ഓഫീസ് നോര്‍ത്തിന്റെ കീഴില്‍ വേങ്ങേരിയില്‍ പ്രവര്‍ത്തിക്കുന്ന 84,85,163 എന്നീ പൊതുവിതരണ കേന്ദ്രങ്ങളിലെ പരിശോധനയില്‍ ഗുരുതരമായ ക്രമക്കേടുകള്‍ കണ്ടെത്തിയതിനെ തുടര്‍ന്ന് അംഗീകാരം സസ്‌പെന്റ് ചെയ്തതായി ജില്ലാ സപ്ലൈ ഓഫീസര്‍ അറിയിച്ചു.
 
കോഴിക്കോട്: അഴിയൂര്‍ ഗ്രാമ പഞ്ചായത്തിനെ സമ്പൂര്‍ണ്ണ ശുചിത്വ പഞ്ചായത്താക്കുന്നതി നായി പൊതുസ്ഥലങ്ങളില്‍ നിക്ഷേപിക്കുന്ന കോഴി മാലിന്യ സംസ്‌കരണത്തിന് പദ്ധതി നടപ്പാക്കും. ജില്ലാ പഞ്ചായത്തിന്റെ നേതൃത്തില്‍ രൂപീകരിച്ച ഫ്രഷ് കട്ട് ഓര്‍ഗാനിക്ക് പ്രവൈറ്റ് ലിമിറ്റഡ് കമ്പനിയുമായി സഹകരിച്ചാണ് പദ്ധതി. നിലവില്‍ മാലിന്യ സംസ്‌ക്കരണ സംവിധാനം ഇല്ലാത്ത കോഴി കടകള്‍ക്ക് ലൈസന്‍സ് നല്‍കുന്നില്ല. ഇത് കാരണം പഞ്ചായത്തിന് ഉണ്ടാകുന്ന വരുമാന നഷ്ടം പരിഹരിക്കാന്‍ ഓരോ കോഴി കടയിലും പ്രത്യേക ഫ്രീസര്‍ സൂക്ഷിച്ച് മാലിന്യങ്ങള്‍ കിലോവിന് ഏഴ് രൂപ നിരക്കില്‍ ഏജന്‍സിക്ക് കൈമാറും. ഇത്തരത്തില്‍ പഞ്ചായത്തിലെ മുഴുവന്‍ കോഴി കടകളിലും മാലിന്യ സംസ്‌കരണ പദ്ധതി നടപ്പിലാക്കും. ഇത് സംബന്ധിച്ച് യോഗം ഈ മാസം 18 ന് പഞ്ചായത്തില്‍ ചേരും. രൂക്ഷമായ മാലിന്യ പ്രശ്നം ഇതുവഴി പരിഹരിക്കാന്‍ സാധിക്കുമെന്നും വ്യാപാരികള്‍ സഹകരിക്കണമെന്നും ജില്ലാ പഞ്ചായത്ത് പ്രസിഡന്റ് അറിയിച്ചു.
 
കാറില്‍ കറങ്ങി നടന്ന് കാര്‍ഷികോത്പന്നങ്ങള്‍ മോഷ്ടിക്കുന്നയാള്‍ പിടിയില്‍
തിരുവമ്പാടി: ആഡംബര കാറില്‍ കറങ്ങി നടന്ന് കാര്‍ഷിക വിളകള്‍ മോഷ്ടിക്കുന്നയാളെ തിരുവമ്പാടി പോലീസ് അറസ്റ്റ് ചെയ്തു. തിരുവമ്പാടി മരക്കാട്ടുപുറം കല്ലുമുട്ടക്കുന്ന് സുനില്‍(29) ആണ് പിടിയിലായത്. സംശയാസ്പദമായ സാഹചര്യത്തില്‍ കണ്ടെത്തിയ സുനിലിന്റെ കാറ് പരിശോധിച്ചപ്പോള്‍ ആറ് ചാക്ക് കോറ അടക്ക പോലീസ് കണ്ടത്തുകയായിരുന്നു. പരസ്പര വിരുദ്ധമായി സംസാരിച്ച ഇയാളെ വിശദമായി ചോദ്യം ചെയ്തപ്പോഴാണ് മോഷ്ടിച്ചതാണെന്ന് മൊഴി നല്‍കിയത്. അടക്ക കടത്താന്‍ ഉപയോഗിച്ച കെ എല്‍ 51 എ 1075 ടവേര കാറും പോലീസ് കസ്റ്റഡിയിലെടുത്തു.
 
കോഴിക്കോട്: മുഖ്യമന്ത്രിയുടെ ദുരിതാശ്വാസനിധിയിലേക്ക് സംഭാവന നല്‍കിയവര്‍ക്ക് രസീത് ഇനി വാട്ട്സാപ്പിലൂടെയും ലഭിക്കുന്ന സംവിധാനം തയ്യാര്‍. ഓണ്‍ലൈന്‍വഴിയും ചെക്ക്, ഡിഡി, ബാങ്ക് ട്രാന്‍സ്ഫര്‍, ആര്‍ടിജിഎസ്, എന്‍ഇഎഫ്ടി, ഐഎംപിഎസ്, നെറ്റ് ബാങ്കിങ്, ഡെബിറ്റ് കാര്‍ഡ്, ക്രെഡിറ്റ് കാര്‍ഡ്, യുപിഐ, ക്യുആര്‍കോഡ്, മൊബൈല്‍ വാലറ്റ്, വിബിഎ, മൊബൈല്‍ ബാങ്കിങ് എന്നിവ വഴിയും പണം അയച്ചവര്‍ക്കാണ് ഈ സേവനം വഴി രസീത് ലഭ്യമാവുക. രസീത് വാട്ട്‌സാപ്പ് വഴി ലഭ്യമാക്കാന്‍ 88600600 എന്ന നമ്പര്‍ നിങ്ങളുടെ ഫോണില്‍ സേവ് ചെയ്തതിനു ശേഷം ആ നമ്പറിലേക്ക് 'hi' എന്ന് മെസ്സേജ് അയക്കുക. തുടര്‍ന്ന് ലഭിക്കുന്ന നിര്‍ദ്ദേശം അനുസരിച്ചു ഇടപാട് വിവരങ്ങള്‍ കൈമാറുക. ബാങ്കുമായി വിവരങ്ങള്‍ ഒത്തുനോക്കിയതിനു ശേഷം നിങ്ങള്‍ക്ക് രസീതിന്റ സോഫ്റ്റ് കോപ്പി വാട്ട്സാപ്പില്‍ ലഭിക്കും. receipts.cmdrf.kerala.gov.in എന്ന വെബ്‌സൈറ്റിലും രസീത് ലഭ്യമാണ്. ഈ സൈറ്റില്‍ പണമടച്ച ബാങ്കിംഗ് രീതി തിരഞ്ഞെടുത്തു സംഭാവന വിവരങ്ങള്‍ നല്‍കിയാല്‍ ടിക്കറ്റു നമ്പര്‍ ലഭിക്കും. ബാങ്ക് രേഖകളുമായി ഒത്തുനോക്കി രസീതുകള്‍ പ്രിന്റു ചെയ്യാനുള്ള സന്ദേശം ഇമെയില്‍ ആയി അയച്ചു കൊടുക്കും. ഈ സന്ദേശം ലഭിച്ചാല്‍ സൈറ്റില്‍ പ്രവേശിച്ച് ടിക്കറ്റു നമ്പര്‍ നല്‍കി രസീതുകള്‍ പ്രിന്റ് ചെയ്യാവുന്നതാണ്.
 
 
 
 

All rights reserved | Website developed and maintained by Zyonz Technologies