11-Dec-2018 (Tue)
 
 
 
കോഴിക്കോട്: സംസ്ഥാനത്തെ വെള്ളപ്പൊക്കദുരിത ബാധിതര്‍ക്ക് നിലവിലുള്ള വിളവായ്പകള്‍ തിരിച്ചടക്കുന്നതിന് ഒരുവര്‍ഷം വരെ മൊറട്ടോറിയവും തുടര്‍ന്ന് തിരിച്ചടവിന് 5 വര്‍ഷം വരെ അധിക കാലാവധിയും ലഭിക്കുമെന്ന് കൃഷി ഡെ. ഡയറക്ടര്‍ അറിയിച്ചു. സംസ്ഥാനതല ബാങ്കേര്‍സ് സമിതിയും സര്‍ക്കാരും സംയുക്തമായാണ് ഇളവുകള്‍ പ്രഖ്യാപിച്ചിരിക്കുന്നത്. കൃഷി ആവശ്യത്തിന് ഭൂമിയുടെ വിസ്തീര്‍ണ്ണം, വിളവിന്റെ സ്വഭാവം എന്നിവക്കനുസരിച്ച് അധിക ഈടോ മാര്‍ജിനോ ഇല്ലാതെ പുതിയ വായ്പകള്‍ ലഭിക്കും. ഇത്തരം വായ്പകള്‍ക്കും നിലവിലുള്ള വായ്പക്കും നിശ്ചിത കാലാവധി വരെ സാധാരണ പലിശ മാത്രമാണ് ഈടാക്കുക .വിളനാശം ഉണ്ടായവര്‍ക്കും വളര്‍ത്തു മൃഗങ്ങള്‍, കാര്‍ഷികോപകരണങ്ങള്‍ എന്നിവ നഷ്ടപ്പെട്ടവര്‍ക്കും നിലവിലെ വായ്പകള്‍ക്ക് ഒന്ന് മുതല്‍ ഒന്നര വര്‍ഷം വരെ മൊറോട്ടോറിയവും ആവശ്യാനുസരണം പുതിയ വായ്പയും ലഭിക്കും. തിരിച്ചടവിന് ഒന്നുമുതല്‍ അഞ്ച് വര്‍ഷം വരെയാണ് അധിക കാലാവധി. പുതിയ വായ്പകള്‍ക്ക് ഈടോ ഗ്യാരന്റിയോ ആവശ്യമില്ല. ആനുകൂല്യങ്ങള്‍ക്കുള്ള അപേക്ഷകള്‍ ഈ മാസം 31 ന് മുന്‍പും പുതിയ വായ്പക്കുള്ള അപേക്ഷകള്‍ ഡിസംബര്‍ 31ന് മുന്‍പും ബന്ധപ്പെട്ട ബാങ്ക് ശാഖകളില്‍ ലഭിക്കണം.
 
സഹപ്രവര്‍ത്തകനൊപ്പം ബൈക്കില്‍ സഞ്ചരിച്ച യുവതി ബസ്സിടിച്ച് മരിച്ചു
കോഴിക്കോട്: ബൈക്കിന് പിന്നില്‍ ബസ്സിടിച്ച് യുവതി മരിച്ചു. വയനാട് സുല്‍ത്താന്‍ബത്തേരി കുപ്പാടി ഉണ്ണിക്കല്ലിങ്ങല്‍ വിജയന്റെ മകള്‍ അമ്പിളി(26) ആണ് മരിച്ചത്. കോഴിക്കോട് തൊണ്ടയാട് വെച്ചായിരുന്നു അപകടം. കോഴിക്കോട്ടെ ത്രീജി മൊബൈല്‍ വേള്‍ഡിലെ ജീവനക്കാരിയായ അമ്പിളി ഇതേ സ്ഥാപനത്തിലെ ജീവനക്കാരനായ കാക്കഞ്ചേരി സ്വദേശി റനീഷിനൊപ്പം ബൈക്കില്‍ സഞ്ചരിക്കുമ്പോഴായിരുന്നു അപകടം. ഹോസ്റ്റലില്‍ താമസിക്കുന്ന അമ്പിളി കടയിലേക്ക് പോവാനായി തൊണ്ടയാട് നിന്നാണ് റനീഷിനൊപ്പം ബൈക്കില്‍ കയറിയത്. അല്‍പ്പം മുന്നോട്ട് നീങ്ങിയപ്പോള്‍ കോഴിക്കോട് കൂടരഞ്ഞി-റൂട്ടിലോടുന്ന കെ സി ഡീലക്‌സ് ബസ്സ് ഇവര്‍ സഞ്ചരിച്ച ബൈക്കിന് പിന്നില്‍ ഇടിക്കുകയായിരുന്നു. അമ്പിളിയുടെ തലയിലൂടെ ബസ്സ് കയറി ഇറങ്ങി തല്‍ക്ഷണം മരിക്കുകയായിരുന്നു. റനീഷ് നിസ്സാര പരുക്കുകളോടെ രക്ഷപ്പെട്ടു. കോഴിക്കോട് മെഡിക്കല്‍ കോളേജ് മോര്‍ച്ചറിയില്‍ പോസ്റ്റ് മോര്‍ട്ടം നടത്തിയ അമ്പിളിയുടെ മൃതദേഹം വൈകിട്ടോടെ വയനാട്ടിലേക്ക് കൊണ്ടുപോയി.
 
ജപ്പാന്‍ കുടിവെള്ള പദ്ധതി: റോഡ് പ്രവൃത്തികള്‍ 31 ന് പൂര്‍ത്തിയാക്കും
കോഴിക്കോട്: വാട്ടര്‍ അതോറിറ്റി, ജപ്പാന്‍ കുടിവെള്ള പദ്ധതി പ്രവൃത്തികള്‍ കാരണം തടസപ്പെട്ട ഇടങ്ങളിലെ മൂന്ന് റോഡുകളുടെ പ്രവൃത്തി ദ്രുതഗതിയില്‍ പൂര്‍ത്തിയാക്കി ഈ മാസം 31 ന് പൊതുമരാമത്ത് വകുപ്പിന് കൈമാറാന്‍ ധാരണയായി. പണ്ടാരപറമ്പ് കുമ്മങ്ങോട്ട് താഴം, കുമ്മങ്ങോട് താഴം മച്ചകുളം, കാക്കൂര്‍ നരിക്കുനി എന്നീ റോഡുകളുടെ പ്രവൃത്തിയാണ് പുരോഗമിച്ചു വരുന്നത്. ഗതാഗത മന്ത്രി എ കെ ശശീന്ദ്രന്റെ അധ്യക്ഷതയില്‍ ഗസ്റ്റ് ഹൗസില്‍ നടന്ന യോഗത്തില്‍ വാട്ടര്‍ അതോറിറ്റി എക്‌സിക്യൂട്ടീവ് എന്‍ജിനീയര്‍ പി സംസുദ്ദീന്‍, അസിസ്റ്റന്റ് എക്‌സിക്യൂട്ടീവ് എന്‍ജിനീയര്‍ കെ നാരായണന്‍, അസിസ്റ്റന്റ് എന്‍ജിനീയര്‍മാരായ കെ ഷിയാസ്, എസ് സുപ്രിയ റാണി, പ്രൊജക്ട് മാനേജര്‍ വി ശാന്തകുമാര്‍ ശ്രീരാം, പൊതുമരാമത്ത് അസിസ്റ്റന്റ് എന്‍ജിനീയര്‍മാരായ പി ജില്‍ജിത്ത്, എം സി ബിനുകുമാര്‍, വി പി വിജയകൃഷ്ണന്‍ എന്നിവര്‍ പങ്കെടുത്തു.
 
കോഴിക്കോട്: ജില്ലയില്‍ മാനസിക രോഗികള്‍ക്ക് ശ്രദ്ധാഭവന്‍ എന്ന പേരില്‍ പുനരധിവാസ കേന്ദ്രം നിര്‍മ്മിക്കുന്നതിനായി വിശദമായ പ്രൊജക്ട് റിപ്പോര്‍ട്ട് സര്‍ക്കാരിന് സമര്‍പ്പിക്കാന്‍ ജില്ലാപഞ്ചായത്ത് ഹാളില്‍ ചേര്‍ന്ന യോഗം തീരുമാനിച്ചു. ജില്ലാപഞ്ചായത്തിന്റെ ആറ് ഏക്കര്‍ ഭൂമിയില്‍ എല്ലാവിധ അടിസ്ഥാന സൗകര്യങ്ങളോടും കൂടി കെട്ടിട സമുച്ചയം നിര്‍മ്മിക്കാനാണ് ലക്ഷ്യമിടുന്നത്. പുരുഷന്മാര്‍ക്കും സ്ത്രീകള്‍ക്കും വെവ്വേറെ സൗകര്യങ്ങളാണ് ഒരുക്കുക. പ്രളയത്തിലുണ്ടായ നാശനഷ്ടങ്ങള്‍ പരിഹരിക്കാന്‍ ഗ്രാമീണ തൊഴിലുറപ്പ് പദ്ധതിയുടെ ഭാഗമായി നിര്‍മ്മാണ മേഖലയില്‍ കൂടുതല്‍ പദ്ധതികള്‍ നടപ്പിലാക്കാനും യോഗം തീരുമാനിച്ചു. 2019-20 വാര്‍ഷിക പദ്ധതിയുടെ ഭാഗമായി നവംബര്‍ 9 ന് ജില്ലാപഞ്ചായത്ത് ഗ്രാമസഭയും 22 ന് വികസന സെമിനാറും നടത്തും. വയനാട് ജില്ലയിലെ വൈത്തിരി താലൂക്ക് ആശുപത്രിയില്‍ 200 കിഡ്‌നി രോഗികള്‍ക്ക് സ്‌നേഹസ്പര്‍ശം പദ്ധതിയുടെ ഭാഗമായി ഡയാലിസിസ് കിറ്റ് നല്‍കും. ഈ മാസം 29 ന് കിറ്റ് വയനാട് ജില്ലാപഞ്ചായത്ത് പ്രസിഡന്റിന് കൈമാറും. ദുരിതാശ്വാസ നിധിയിലേക്ക് ജില്ലാപഞ്ചയത്ത് കരാറുകാര്‍ സ്വരൂപിച്ച 1,40000 രൂപ ജില്ലാപഞ്ചായത്ത് പ്രസിഡന്റ് ബാബു പറശ്ശേരിക്ക് കൈമാറി. യോഗത്തില്‍ പി ജി ജോര്‍ജ് മാസ്റ്റര്‍, മുക്കം മുഹമ്മദ്, സജിത പി കെ, സുജാത മനക്കല്‍, ജില്ലാപഞ്ചായത്ത് സെക്രട്ടറി പി ഡി ഫിലിപ്പ്, ജില്ലാപഞ്ചായത്ത് അംഗങ്ങള്‍, വകുപ്പ് മേധാവികള്‍ തുടങ്ങിയവര്‍ പങ്കെടുത്തു.
 
ദേശീയ വിരവിമുക്ത ദിനം; ജില്ലാതല ഉദ്ഘാടനം നടത്തി
കുന്ദമംഗലം: വിരബാധയില്ലാത്ത കുട്ടികള്‍ ആരോഗ്യമുളള കുട്ടികള്‍ എന്ന സന്ദേശവുമായി ആരോഗ്യവകുപ്പ് നടപ്പിലാക്കുന്ന ദേശീയ വിര വിമുക്ത ദിനത്തിന്റെ ജില്ലാതല ഉദ്ഘാടനം കുന്ദമംഗലം ഹയര്‍സെക്കണ്ടറി സ്‌കൂളില്‍ ഗ്രാമപഞ്ചായത്ത് വൈസ് പ്രസിഡണ്ട് കെ പി കോയ നിര്‍വ്വഹിച്ചു. ഗ്രാമപഞ്ചായത്ത് സ്റ്റാന്‍ഡിംഗ് ചെയര്‍പേഴ്‌സണ്‍ ടി കെ സൗദ അധ്യക്ഷത വഹിച്ചു. യോഗത്തില്‍ അഡീഷണല്‍ ജില്ലാ മെഡിക്കല്‍ ഓഫീസര്‍ ഡോ. ആശാദേവി മുഖ്യ പ്രഭാഷണം നടത്തി. ദിനാചരണ സന്ദേശം ആര്‍ സി എച്ച് ഓഫീസര്‍ ഡോ. സരളനായര്‍ നല്‍കി. കുന്ദമംഗലം എഇഒ. രമേശ് കെ പ്രതിജ്ഞ ചൊല്ലിക്കൊടുത്തു. ഗ്രാമപഞ്ചായത്ത് ക്ഷേമകാര്യ സ്റ്റാന്റിംഗ് കമ്മിറ്റി ചെയര്‍മാന്‍ ഹിതേഷ് കുമാര്‍, ഗ്രാമപഞ്ചായത്ത് മെമ്പര്‍മാരായ ബൈജു എം വി, വിനോദ് പടനിലം, ഷൗക്കത്തലി, സുനിത, ജില്ലാ ടി ബി ഓഫീസര്‍ ഡോ. പ്രമോദ്കുമാര്‍, സ്‌കൂള്‍ പ്രിന്‍സിപ്പാള്‍ ഒ കല, ഹെഡ്മാസ്റ്റര്‍ വി പ്രേമരാജന്‍, പി ടി എ പ്രസിഡന്റ് റിജുല, ഐ സി ഡി എസ് സൂപ്പര്‍ വൈസര്‍ ദിവ്യ, ഡെപ്യൂട്ടി മാസ് മീഡിയ ഓഫീസര്‍മാരായ ബേബി നാപ്പളളി, ഹംസ ഇസ്മാലി, ഡോ. സുഗതകുമാരി, ഡോ. പി വി ചിത്ര, ടെക്‌നിക്കല്‍ അസിസ്റ്റന്റ് നാരായണന്‍ ചെരാള, ഹെല്‍ത്ത് ഇന്‍സ്‌പെക്ടര്‍ രാധാകൃഷ്ണന്‍ പി കെ എന്നിവര്‍ ആശംസകള്‍ നേര്‍ന്ന് സംസാരിച്ചു. ജില്ലാ മാസ് മീഡിയ ഓഫീസര്‍ മണി എം പി സ്വാഗതവും ഹെല്‍ത്ത് ഇന്‍സ്‌പെക്ടര്‍ സുരേഷ് ബാബു സി പി നന്ദിയും പറഞ്ഞു.
 
സ്‌കൂട്ടറില്‍ കറങ്ങി വിദ്യാര്‍ത്ഥിനികളെ കയറിപ്പിടിക്കുന്ന യുവാവ് അറസ്റ്റില്‍
കുന്ദമംഗലം: സ്‌കൂള്‍ വിദ്യാര്‍ത്ഥിനികളെ പിന്തുടര്‍ന്ന് കയറിപ്പിടിക്കുന്ന യുവാവിനെ കുന്ദമംഗലം പോലീസ് അറസ്റ്റ് ചെയ്തു. കൊടുവള്ളി വാവാട് സെന്റര്‍ വരലാട്ട് മുഹമ്മദ് ഡാനിഷ്(23) ആണ് അറസ്റ്റിലായത്. ചാത്തമംഗലം ഭാഗത്ത് നിരവധി പെണ്‍കുട്ടികളെ ഡാനിഷ് പീഡിപ്പിച്ചതായി പരാതിയുണ്ട്. ഒരു മാസം മുമ്പ് വിമുക്ത ഭടന്റെ മകളെ കയറി പിടിച്ചതിനെ തുടര്‍ന്ന് പോലീസില്‍ പരാതി നല്‍കിയിരുന്നു. കഴിഞ്ഞദിവസം മറ്റൊരു പെണ്‍കുട്ടിയും കുന്ദമംഗലം പോലീസില്‍ പരാതി നല്‍കി. സി സി ടി വി ദൃശ്യങ്ങളില്‍ നിന്നും പ്രതിയെ തിരിച്ചറിഞ്ഞ കൊടുവള്ളി പോലീസ് സ്‌റ്റേഷനിലെ ഹോംഗാര്‍ഡാണ് പോലീസിന്റെ സഹായത്തോടെ കൊടുവള്ളിയില്‍ വെച്ച് പ്രതിയെ പിടികൂടിയത്. തുടര്‍ന്ന് കിന്ദമംഗലം പോലീസിന് കൈമാറിയ പ്രതിക്കെതിരെ മറ്റൊരു പെണ്‍കുട്ടിയുടെ പരാതിയിലാണ് പോക്‌സോ നിയമപ്രകാരം കേസെടുത്തത്. കോഴിക്കോട് പോക്‌സോ കോടതിയില്‍ ഹാജറാക്കിയ പ്രതിയെ 14 ദിവസത്തേക്ക് റിമാണ്ട് ചെയ്തു. ഒരു മാസം മുമ്പ് വിമുക്ത ഭടന്റെ മകള്‍ നല്‍കിയ പരാതിയില്‍ കേസെടുത്തില്ലെന്നും നിലവിലുള്ള കേസില്‍ ഐ പി സി 354 ഉള്‍പ്പെടെയുള്ള വകുപ്പുകള്‍ ചേര്‍ത്തിയില്ലെന്നും ആക്ഷേപമുണ്ട്. ഉന്നത ഇടപെടലിന്റെ ഭാഗമായി പ്രതിക്ക് എളുപ്പത്തില്‍ ജാമ്യം ലഭ്യമാക്കാനാണ് നീക്കം നടക്കുന്നതെന്നാണ് ആക്ഷേപം.
 
കോഴിക്കോട്: ജില്ലയില്‍ റോഡരികുകളില്‍ അനധികൃതവും അപകടകരവുമായ രീതിയില്‍ സ്ഥാപിച്ചിട്ടുള്ള പരസ്യ ബോര്‍ഡുകള്‍, ബാനറുകള്‍, ഹോര്‍ഡിങ്ങുകള്‍ തുടങ്ങിയവ നീക്കം ചെയ്യുന്നതിന് ജില്ലാഭരണകൂടം നടപടി കര്‍ശനമാക്കും. അനുമതിയില്ലാതെ സ്ഥാപിച്ച പരസ്യ ബോര്‍ഡുകള്‍ മാറ്റുന്നതിന് നോട്ടീസ് നല്‍കിയവരില്‍ നിന്ന് പിഴയും ബോര്‍ഡ് നീക്കം ചെയ്യുന്നതിന് ചെലവായ തുകയും ഈടാക്കാനാണ് തീരുമാനം. പിഴ അടക്കാത്ത പക്ഷം റവന്യൂ റിക്കവറി നടപടികളുമായി മുന്നോട്ട് പോകുമെന്നും ജില്ലാകലക്ടര്‍ യു വി ജോസ് അറിയിച്ചു. തദ്ദേശഭരണ സ്ഥാപനങ്ങള്‍ക്ക് ഇത് സംബന്ധിച്ച് അറിയിപ്പ് നല്‍കിയിരുന്നു. ഈ മാസം 16 മുതല്‍ ഒരാഴ്ച കോഴിക്കോട് കോര്‍പ്പറേഷന്‍ പരിധിയില്‍ മൂന്ന് സ്‌ക്വാഡുകളായി നടത്തിയ പരിശോധനയില്‍ 4845 അനധികൃത പരസ്യ ബോര്‍ഡുകളാണ് മാറ്റിയത്. പഞ്ചായത്ത് ഡപ്യൂട്ടി ഡയറക്ടര്‍ തദ്ദേശ സ്ഥാപനങ്ങള്‍ക്ക് നിര്‍ദേശം നല്‍കിയതിനെ തുടര്‍ന്ന് 990 പരസ്യബോര്‍ഡുകള്‍ ഇത്തരത്തില്‍ നീക്കം ചെയ്തു. 31 പേര്‍ക്ക് നോട്ടീസും നല്‍കിയിട്ടുണ്ട്. ഒക്‌ടോബര്‍ 28 നകം പരസ്യ ബോര്‍ഡുകള്‍ മാറ്റുന്നതിന് പരസ്യ കമ്പനികള്‍ക്കും രാഷ്ട്രീയ പാര്‍ട്ടികള്‍ക്കും നിര്‍ദേശം നല്‍കുന്നതിനായി ഒക്‌ടോബര്‍ 27 ന് ഉച്ചയ്ക്ക് ശേഷം രാഷ്ട്രീയ പാര്‍ട്ടി പ്രതിനിധികളുടെയും പരസ്യ കമ്പനി ഏജന്‍സികളുടെയും യോഗം ജില്ലാ കലക്ടറുടെ നേതൃത്വത്തില്‍ കലക്‌ട്രേറ്റ് ചേമ്പറില്‍ വിളിച്ചു ചേര്‍ക്കും. അനധികൃതമായി സ്ഥാപിക്കപ്പെട്ട പരസ്യ ബോര്‍ഡുകള്‍ ഗതാഗത തടസത്തിനും അപകടത്തിനും ഉള്‍പ്പെടെ ഇടയാക്കുന്നതായുള്ള കോടതി ഉത്തരവിനെ തുടര്‍ന്ന് സര്‍ക്കാര്‍ ബോര്‍ഡുകളും ബാനറുകളും സ്ഥാപിക്കുന്നത് സംബന്ധിച്ച് നിര്‍ദേശങ്ങള്‍ ഉള്‍ക്കൊള്ളിച്ച് സര്‍ക്കുലര്‍ പുറത്തിറക്കിയിരുന്നു. ബോര്‍ഡുകള്‍ സ്ഥാപിക്കുന്നതിന് തദ്ദേശ സ്ഥാപനങ്ങളില്‍ നിന്ന് ചട്ടപ്രകാരം അനുമതി വാങ്ങിയിട്ടുണ്ടോ എന്ന കാര്യം പരിശോധിക്കാന്‍ സെക്രട്ടറിമാരെ ചുമതലപെടുത്തിയിട്ടുണ്ട്. മത വികാരം വ്രണപ്പെടുത്തുന്നതും കൊലപാതക ദൃശ്യങ്ങള്‍ പോലുള്ളവ ചിത്രീകരിക്കുന്ന ബോര്‍ഡുകള്‍ സ്ഥാപിക്കുന്നതിന് അനുമതി നല്‍കരുതെന്നും നിര്‍ദേശമുണ്ട്. യോഗത്തില്‍ എ ഡി എം റോഷ്‌നി നാരായണന്‍, ദുരന്തനിവാരണ ഡപ്യൂട്ടി കലക്ടര്‍ എന്‍ റംല, പോലീസ്, കോര്‍പ്പറേഷന്‍, പഞ്ചായത്ത് വകുപ്പ് ഉദ്യോഗസ്ഥരും സംബന്ധിച്ചു.
 
കോഴിക്കോട്: തൊഴിലിടങ്ങളില്‍ ഇരിപ്പിടം ഇനി തൊഴിലാളികളുടെ നിയമപരമായ അവകാശമാണെന്ന് തൊഴില്‍, എക്‌സൈസ് വകുപ്പ് മന്ത്രി ടി പി രാമകൃഷ്ണന്‍ പറഞ്ഞു. കടകളിലും വാണിജ്യ സ്ഥാപനങ്ങളിലും ജോലി ചെയ്യുന്ന സ്ത്രീകള്‍ അടക്കമുളള ലക്ഷകണക്കിന് തൊഴിലാളികളുടെ അന്തസ്സും മനുഷ്യാവകാശങ്ങളും സംരക്ഷിക്കുന്ന സുപ്രധാന നിയമഭേദഗതി തൊഴിലാളി ക്ഷേമ നടപടികളുടെ ചരിത്രത്തിലെ സുപ്രധാന നാഴികക്കല്ലാണെന്ന് മന്ത്രി പറഞ്ഞു. കേരള ഷോപ്‌സ് ആന്റ് കൊമേഴ്‌സ്യല്‍ എസ്റ്റാബ്ലിഷ്‌മെന്റ്‌സ് തൊഴിലാളി ക്ഷേമനിധി അംഗങ്ങളുടെ മക്കള്‍ക്ക് ക്യാഷ് അവാര്‍ഡും മെമന്റോയും സര്‍ട്ടിഫിക്കറ്റ് വിതരണവും ഉദ്ഘാടനം ചെയ്ത് സംസാരിക്കുകയായിരുന്നു മന്ത്രി. സ്ത്രീ സൗഹൃദ തൊഴിലിടങ്ങള്‍ സൃഷ്ടിക്കുമെന്നും ലിംഗ സമത്വം നടപ്പാക്കുമെന്നും സര്‍ക്കാറിന്റെ തൊഴില്‍ നയത്തില്‍ വ്യക്തമാക്കിയിട്ടുണ്ട്. വ്യാപാര വ്യവസായ സ്ഥാപനങ്ങളുടെ പ്രവര്‍ത്തന സ്വഭാവമനുസരിച്ച് സ്ത്രീ തൊഴിലാളികള്‍ക്ക് മതിയായ യാത്രാ സൗകര്യം ഒരുക്കുമെന്നും ആഴ്ച അവധി, വിശ്രമ ഇടവേള സൗകര്യം നിര്‍ബന്ധമാക്കുമെന്നുമുള്ള തൊഴില്‍ നയത്തിലെ പ്രഖ്യാപനങ്ങളാണ് സര്‍ക്കാര്‍ യാഥാര്‍ത്ഥ്യമാക്കുന്നത്. ഓര്‍ഡിനന്‍സ് നിലവില്‍ വന്ന സാഹചര്യത്തില്‍ ഇത് നടപ്പിലാക്കിയെന്ന് ഉറപ്പു വരുത്താന്‍ എല്ലാവരുടേയും ഇടപെടല്‍ ഉണ്ടാകണം. തൊഴിലുടമകള്‍ ഇക്കാര്യത്തില്‍ ആത്മാര്‍ത്ഥമായി സഹകരിക്കണം. കര്‍ശനമായി നിയമം നടപ്പിലാക്കാന്‍ തൊഴില്‍വകുപ്പ് ഉദ്യോഗസ്ഥര്‍ക്കും നിര്‍ദ്ദേശം നല്‍കിയിട്ടുണ്ട്. വൈകീട്ട് ഏഴു മുതല്‍ രാവിലെ ആറുവരെ സ്ത്രീകളെ ജോലി ചെയ്യിക്കരുതെന്ന നിലവിലുളള വ്യവസ്ഥ ഭേദഗതി ചെയ്തിട്ടുണ്ട്. വൈകീട്ട് ഒന്‍പത് മണി വരെ സ്ത്രീ തൊഴിലാളികളെ ജോലിക്ക് നിയോഗിക്കാം. രാത്രി ഒമ്പത് മണി മുതല്‍ പുലര്‍ച്ചെ ആറു വരെ സ്ത്രീകളുടെ അനുവാദത്തോടെ രണ്ട് സ്ത്രീകള്‍ അടക്കം അഞ്ചു പേര്‍ വീതമുളള ഗ്രൂപ്പിനെ നിയോഗിക്കാം. അത്തരം ഘട്ടങ്ങളില്‍ സ്ത്രീ തൊഴിലാളികളുടെ സുരക്ഷയും താമസ സ്ഥലത്തേക്കുളള യാത്ര സൗകര്യവും തൊഴിലുടമ ഉറപ്പാക്കിയിരിക്കണം. ആഴ്ചയില്‍ ഒരു ദിവസം കടകള്‍ അടച്ചിടണമെന്ന വ്യവസ്ഥ ഒഴിവാക്കുകയും ആഴ്ചയില്‍ ഒരു ദിവസം തൊഴിലാളികള്‍ക്ക് അവധി നല്‍കണമെന്ന വ്യവസ്ഥ ഉള്‍പ്പെടുത്തുകയും ചെയ്തു. അപ്രന്റീസുമാരും താത്കാലിക സെക്യൂരീറ്റി ജീവനക്കാരും ഉള്‍പ്പെടെ ഏത് സ്ഥാപനത്തിലേയും എല്ലാ വിഭാഗം തൊഴിലാളികളേയും കേരള കടകളും വാണിജ്യ സ്ഥാപനങ്ങളും നിയമത്തിന്റെ പരിധിയില്‍ കൊണ്ടുവരും. കോഴിക്കോട് കല്ലായ് റോഡിലെ സ്‌നേഹാഞ്ജലി കമ്മ്യൂണിറ്റി സെന്ററില്‍ നടന്ന ചടങ്ങില്‍ കോഴിക്കോട് കോര്‍പ്പറേഷന്‍ ഡെപ്യൂട്ടി മേയര്‍ മീരാദര്‍ശക് അധ്യക്ഷത വഹിച്ചു. ക്ഷേമനിധി ബോര്‍ഡ് ചെയര്‍മാന്‍ അഡ്വ. കെ അനന്തഗോപന്‍ ട്രേഡ് യൂനിയന്‍ നേതാക്കളായ പി കെ മുരുകന്‍ അഡ്വ. എം രാജന്‍, കെ ജി പങ്കജാക്ഷന്‍, യു പോക്കര്‍, ഒ കെ ധര്‍മരാജന്‍, ബിജു ആന്റണി, മുഹമ്മദ് സൂഹൈല്‍ ടി വി, ബോര്‍ഡ് ഡയറക്ടര്‍മാരായ ടി കെ ലോഹിതാക്ഷന്‍, പി സുബ്രഹ്മണ്യം ജി വസന്തകുമാര്‍, ചീഫ് എക്‌സിക്യൂട്ടീവ് ഓഫീസര്‍ ബീനാപോള്‍ വര്‍ഗീസ് എക്‌സിക്യൂട്ടീവ് ഓഫീസര്‍ പി ലത തുടങ്ങിയവര്‍ പങ്കെടുത്തു. കാസര്‍ഗോഡ്, കണ്ണൂര്‍, വയനാട്, കോഴിക്കോട്, മലപ്പുറം, പാലക്കാട്, തൃശ്ശൂര്‍, ജില്ലകളിലെ ക്ഷേമനിധി അംഗങ്ങളുടെ എസ് എസ് എല്‍ സി മുതലുളള അംഗീകൃത കോഴ്‌സുകളില്‍ ഉന്നത വിജയം നേടിയ 130 വിദ്യാര്‍ത്ഥികള്‍ക്ക് ചടങ്ങില്‍ ക്യാഷ് അവാര്‍ഡും മെമന്റോയും സര്‍ട്ടിഫിക്കറ്റുകളും വിതരണം ചെയ്തു.
 
കൊടുവള്ളിയിലെ ആശുപത്രിയില്‍ നിന്നും ആഭരണം കവര്‍ന്നയാള്‍ സി സി ടി വി യില്‍ കുടുങ്ങി
കൊടുവള്ളി: സ്വകാര്യ ആശുപത്രിയില്‍ ചികിത്സയിലായിരുന്ന കുഞ്ഞിന്റെ സ്വര്‍ണാഭരണം കവര്‍ന്നയാള്‍ സി സി ടി വി യില്‍. കൊടുവള്ളി പാലക്കുറ്റി ചോലയില്‍ മുഹമ്മദിന്റെ പത്ത് മാസം പ്രായമായ കുഞ്ഞിന്റെ കഴുത്തില്‍ നിന്നും ഒരു പവന്‍ തൂക്കം വരുന്ന മാല കവര്‍ന്നയാളാണ് സി സി ടി വി ക്യാമറയില്‍ കുടുങ്ങിയത്. ബുധനാഴ്ച പുലര്‍ച്ചെ 1.16 ന് ആണ് മോഷ്ടാട് ആശുപത്രിയില്‍ എത്തിയത്. മുക്കാല്‍ മണിക്കൂറോളം ആശുപത്രി വരാന്തയിലെ ബെഞ്ചില്‍ കിടന്ന ഇയാള്‍ 2.01 ന് ആശുപത്രിയിലെ ജനറല്‍ വാര്‍ഡിലേക്ക് പ്രവേശിക്കുന്നത് സി സി ടി വി യില്‍ കാണാം. നാല് മിനിറ്റിന് ശേഷം തിരിച്ചിറങ്ങി പുറത്തേക്ക് പോവുന്നതും ദൃശ്യങ്ങളിലുണ്ട്. സംശയിക്കപ്പെടാതിരിക്കാന്‍ തലയില്‍ വെള്ള തൊപ്പി ധരിച്ചാണ് ഇയാള്‍ ആശുപത്രിയില്‍ എത്തിയത്. എന്നാല്‍ കയ്യില്‍ കെട്ടിയ ചരടുകള്‍ അഴിച്ചിരുന്നില്ല. ജനറല്‍ വാര്‍ഡില്‍ തനിച്ചായിരുന്ന ഇവര്‍ ബുധനാഴ്ച രാവിലെയാണ് ആഭരണം നഷ്ടപ്പെട്ട വിവരം അറിയുന്നത്. മോഷ്ടാവിന്റെ ദൃശ്യങ്ങള്‍ സഹിതം മുഹമ്മദ് കൊടുവള്ളി പോലീസില്‍ പരാതി നല്‍കി.
 
ദേശീയ വിരവിമുക്ത ദിനാചരണം
പുതുപ്പാടി: ദേശീയ വിരവിമുക്ത ദിനാചരണം പുതുപ്പാടി പഞ്ചായത്ത് തല ഉദ്ഘാടനം മലപ്പുറം ഗവ. എല്‍ പി സ്‌കൂളില്‍ വച്ച് ഗ്രാമപഞ്ചായത്ത് പ്രസിഡന്റ് അംബിക മംഗലത്ത് നിര്‍വ്വഹിച്ചു. വാര്‍ഡ് മെമ്പര്‍ ജലീല്‍ കോയ തങ്ങള്‍ അദ്ധ്യക്ഷത വഹിച്ചു. മെഡിക്കല്‍ ഓഫീസര്‍ ഡോ. കെ വേണുഗോപാല്‍ വിര വിമുക്ത ദിനത്തെ കുറിച്ച് ക്ലാസ്സെടുക്കുകയും വിദ്യാര്‍ത്ഥികള്‍ക്ക് പ്രതിജ്ഞ ചൊല്ലിക്കൊടുക്കുകയും ചെയ്തു. എല്‍എച്ച്‌ഐ. കെ ജെ ജസ് മോള്‍, ഹെഡ്മിസ്ട്രസ് വസന്തകുമാരി, എന്നിവര്‍ സംസാരിച്ചു. ജെഎച്ച്‌ഐ. എം സി ബഷീര്‍, ജെ പി എച്ച് എന്‍മാരായ ജയശ്രീ എന്‍ ആര്‍, റഫീദ പി യു, പദ്മാവതി എന്നിവര്‍ നേതൃത്വം നല്‍കി. ദിനാചരണത്തിന്റെ ഭാഗമായി ഒരു വയസ്സു മുതല്‍ പത്തൊന്‍പത് വയസ്സ് വരെയുള്ള എല്ലാ കുട്ടികള്‍ക്കും ഒരു ഡോസ് ആല്‍ബന്‍ഡ സോള്‍ ഗുളിക നല്‍കി.
 
 
 
 

All rights reserved | Website developed and maintained by Zyonz Technologies