18-Oct-2018 (Thu)
വ്യാഴാഴ്ച സംസ്ഥാനത്ത് ഹര്‍ത്താല്‍; ബി ജെ പി പിന്തുണ പോലീസിനെ വെട്ടിച്ച് കടന്ന പീഡന കേസ് പ്രതി അറസ്റ്റില്‍; മാതാപിതാക്കള്‍ ഉള്‍പ്പെടെ അഞ്ചുപേര്‍ റിമാണ്ടില്‍ അനര്‍ഹരായ കാര്‍ഡുടമകള്‍ പൊതുവിഭാഗത്തിലേക്ക് മാറ്റണം ബാലാവകാശ സംരക്ഷണ സമിതികളുടെ ശാക്തീകരണത്തിന് ശില്‍പ്പശാല നടത്തും പോലീസിനെ വെട്ടിച്ച് കടന്ന പീഡന കേസ് പ്രതിയെ കണ്ടെത്താനായില്ല പ്രളയക്കെടുതി: വ്യവസായ വാണിജ്യ സ്ഥാപനങ്ങളുടെ നഷ്ടകണക്കെടുക്കുന്നു റഫാല്‍ കരാര്‍ അഴിമതി; സംയുക്ത പാര്‍ലമെന്റ് കമ്മറ്റി അന്വേഷണം അവശ്യപ്പെട്ട് യൂത്ത് കോണ്‍ഗ്രസ് പോസ്റ്റ് ഓഫീസ് പിക്കറ്റിംഗ് നടത്തി അഞ്ച് ലിറ്റര്‍ ചാരായവുമായി കോടഞ്ചേരി സ്വദേശി പിടിയില്‍ പുതുപ്പാടി ഗ്രാമപഞ്ചായത്ത് ഓഫീസിലേക്ക് എല്‍ ഡി എഫ് മാര്‍ച്ച്
 
 
 
 
കോഴിക്കോട്: ഭിന്നശേഷിക്കാരുടെ ക്ഷേമത്തിനായി പ്രവര്‍ത്തിക്കുന്ന സന്നദ്ധ സംഘടനകളെ രജിസ്റ്റര്‍ ചെയ്യിക്കുന്നത് സംബന്ധിച്ച് ബോധവത്കരിക്കുന്നതിനായി സാമൂഹ്യനീതി വകുപ്പിന്റെ ആഭിമുഖ്യത്തില്‍ മെഡോറ ഹോട്ടലില്‍ സംഘടിപ്പിച്ച പരിപാടി ജില്ലാ കലക്ടര്‍ യു വി ജോസ് ഉദ്ഘാടനം ചെയ്തു. ചടങ്ങില്‍ സാമൂഹ്യനീതി വകുപ്പ് അസിസ്റ്റന്റ് ഡയറക്റ്റര്‍ സുബാഷ്‌കുമാര്‍ കെ വി അധ്യക്ഷത വഹിച്ചു. ലീഗല്‍ സര്‍വീസസ് അതോറിറ്റി സബ് ജഡ്ജും സെക്രട്ടറിയുമായ ജയരാജ് എം പി, ജില്ലാ സാമൂഹ്യനീതി ഓഫീസര്‍ ഷീബാ മുംതാസ്, എസ് എന്‍ എ സി ചെയര്‍മാന്‍ ഡി ജേക്കബ്, സാമൂഹ്യനീതി ഡയറക്റ്ററേറ്റിലെ സീനിയര്‍ സൂപ്രണ്ട് പി സ്റ്റീഫന്‍ എന്നിവര്‍ സംബന്ധിച്ചു. നാഷണല്‍ ട്രസ്റ്റ് ആക്റ്റ്, പദ്ധതികള്‍, രജിസ്ട്രേഡ് സംഘടനകളുടെ പ്രാധാന്യം എന്ന വിഷയത്തില്‍ മലപ്പുറം ജില്ലാ സാമൂഹ്യനീതി ഓഫീസിലെ സീനിയര്‍ സൂപ്രണ്ട് കൃഷ്ണമൂര്‍ത്തിയും നാഷണല്‍ ട്രസ്റ്റില്‍ രജിസ്റ്റര്‍ ചെയ്യേണ്ട വിധത്തെക്കുറിച്ച് കോഴിക്കോട് എല്‍ എല്‍ സി കണ്‍വീനര്‍ സിക്കന്ദറും ക്ലാസെടുത്തതു. കാസര്‍ഗോഡ്, കണ്ണൂര്‍, വയനാട്, കോഴിക്കോട് ജില്ലകളില്‍ നിന്നും സന്നദ്ധ സംഘടന പ്രതിനിധികളായി അറുപതോളം പേര്‍ ബോധവത്കരണ ക്ലാസ്സില്‍ പങ്കെടുത്തു.
 
വിഭവ സമാഹരണം; താമരശ്ശേരിയില്‍ ലഭിച്ചത് 28.36 ലക്ഷം
താമരശ്ശേരി: പ്രകൃതിക്ഷോഭത്തില്‍ ഉള്ളുലഞ്ഞിട്ടും മുഖ്യമന്ത്രിയുടെ ദുരിതാശ്വാസ നിധിയിലേക്ക് സഹായം നല്‍കാന്‍ കൈകോര്‍ത്ത് മലയോര ജനത. പ്രകൃതിക്ഷോഭത്തിലും മഴക്കെടുതിയിലും ജില്ലയില്‍ കുടുതല്‍ മരണവും നാശനഷ്ടങ്ങളും നേരിട്ട താലൂക്കാണ് താമരശേരി. ദുരന്തത്തില്‍പ്പെട്ടവര്‍ക്ക് ക്യാമ്പുകളിലും വസ്ത്രങ്ങളും വീട്ടുപകരണങ്ങളുമടക്കം വലിയസഹായങ്ങളാണ് ഇവിടുത്തെ ജനം നല്‍കിയത്. വ്യാഴാഴ്ച താമരശേരി റെസ്റ്റ്ഹൗസില്‍ തൊഴില്‍-എക്സൈസ് വകുപ്പ് മന്ത്രി ടി പി രാമകൃഷ്ണന്റെ നേതൃത്വത്തില്‍ നടന്ന മുഖ്യമന്ത്രിയുടെ ദുരിതാശ്വാസനിധിയിലേക്കുള്ള ധനസമാഹരണത്തിനും നല്ല പിന്തുണയാണ് ലഭിച്ചത്. രാവിലെ ഒമ്പത് മുതല്‍ പകല്‍ മൂന്ന് വരെ നടന്ന വിഭവസമാഹരണത്തില്‍ 28,36,163 രൂപ കിട്ടി. എല്‍കെജി വിദ്യാര്‍ഥികള്‍ മുതല്‍ പെന്‍ഷന്‍കാര്‍ വരെ സഹായവുമായെത്തി. രാഷ്ട്രീയപാര്‍ട്ടികള്‍, ജനപ്രതിനിധികള്‍, സ്‌കൂള്‍ മാനേജ്മെന്റുകള്‍, വ്യാപാരികള്‍, സൊസൈറ്റികള്‍, പള്ളികമ്മിറ്റികള്‍, സന്നദ്ധസംഘടനകള്‍, കലാകാരന്മാര്‍, സ്വകാര്യവ്യക്തികള്‍, സ്ഥാപനങ്ങള്‍ തുടങ്ങി സമൂഹത്തിന്റെ നാനാതുറകളിലുള്ളവര്‍ നവകേരള നിര്‍മ്മാണത്തിന് മുതല്‍കൂട്ടാകുന്ന ധനസമാഹരണത്തിലേക്ക് സംഭവനയുമായെത്തി.സിപിഐ എം താമരശേരി ഏരിയ കമ്മിറ്റി 10 ലക്ഷമാണ് ദുരിതാശ്വാസ നിധിയിലേക്ക് നല്‍കിയത്. കൊടുവള്ളി ബ്ലോക്ക് പഞ്ചായത്ത് പ്രസിഡന്റ് ഏലിയാമ്മ ജോര്‍ജ് 15,000 രൂപ നല്‍കി. കിഴക്കോത്ത് പന്നൂര്‍ ഗവ. ഹയര്‍ സെക്കണ്ടറി സ്‌കൂളിലെ റെഡ്ക്രോസ് വിദ്യാര്‍ഥികള്‍ സമാഹരിച്ച 90,070 രൂപ വിദ്യാര്‍ഥികളും അധ്യാപകരും കൈമാറി. കളരാന്തിരി ക്രസന്റ് സ്‌കൂളിലെ എല്‍കെജി വിദ്യാര്‍ഥിനിയായ ഫാത്തിമ നെഹ്ല താന്‍ സൂക്ഷിച്ചുവച്ച 500 രൂപയുടെ പണക്കുടുക്കയുമായാണ് എത്തിയത്. ഇതേ സ്‌കൂളിലെ വിദ്യര്‍ഥികളും അധ്യാപകരടക്കമുള്ള ജീവനക്കാരും 50,000 രൂപയുടെ ചെക്കും ദുരിതാശ്വാസ നിധിയിലേക്ക് നല്‍കി. കട്ടിപ്പാറ ഉരുള്‍പൊട്ടലില്‍ വീട് നഷ്ടപ്പെട്ട തങ്ങളുടെ സ്‌കൂളിലെ വിദ്യാര്‍ഥിക്ക് വീട് നിര്‍മ്മിച്ചു നല്‍കുന്നതിന് പുറമെ വിഭവസമാഹരണത്തിലേക്ക് 50,000 രൂപയും നല്‍കി പൂനൂര്‍ ഇശാഅത്ത് പബ്ലിക് സ്‌കൂള്‍ മാതൃകയായി. പൂനൂര്‍ ഗാഥാ കോളേജ് 75,000 രൂപയാണ് നല്‍കിയത്. കോഴിക്കോട് പാലാഴിയില്‍ നിന്ന് താമരശ്ശേരിയിലെത്തി ശാന്തി സ്പെഷ്യല്‍ അയല്‍കൂട്ടത്തിലെ ഭിന്നശേഷിക്കാരുടെ കൂട്ടായ്മ 1000 രൂപയാണ്് നല്‍കിയത്. മലബാറിലെ വിവിധ ജില്ലകളില്‍ കലാപ്രകടനങ്ങള്‍ നടത്തി കിട്ടിയ 28,732 രൂപയുമായാണ് ഒരുകൂട്ടം കലാകാരന്മാര്‍ എത്തിയത്. ഒടുങ്ങാക്കാട് മഖാം ട്രസ്റ്റ് 50,000 രൂപ നല്‍കി.കാരാട്ട് റസാക്ക് എംഎല്‍എ, ജില്ലാ കലക്ടര്‍ യു വി ജോസ്, ഡെപ്യുട്ടി കലക്ടര്‍ കെ ഹിമ, കൊടുവള്ളി ബ്ലോക്ക് പഞ്ചായത്ത് പ്രസിഡന്റ് ഏലിയാമ്മ ജോര്‍ജ്, താമരശേരി തഹസില്‍ദാര്‍ സി മുഹമ്മദ് റഫീഖ്, വിവിധ പ്രതിനിധികള്‍, ഉദ്യോഗസ്ഥര്‍ തുടങ്ങിയവര്‍ പങ്കെടുത്തു.
 
നവകേരള നിര്‍മ്മിതിക്കായി ജില്ലാപഞ്ചായത്ത് ഒരുകോടി രൂപ കൈമാറി
കോഴിക്കോട്: വിഭവസമാഹരണ യജ്ഞത്തിന്റെ ഭാഗമായി ജില്ലാപഞ്ചായത്തിന്റെ തനത് ഫണ്ടില്‍ നിന്നുള്ള ഒരുകോടി രൂപ മന്ത്രി ടിപി രാമകൃഷ്ണന് ജില്ലാപഞ്ചായത്ത് പ്രസിഡന്റ് ബാബു പറശ്ശേരി കൈമാറി. കലക്ട്രേറ്റ് കോണ്‍ഫറന്‍സ് ഹാളില്‍ നടന്ന ചടങ്ങില്‍ മേയര്‍ തോട്ടത്തില്‍ രവീന്ദ്രന്‍, സ്പെഷ്യല്‍ ഓഫീസറായ പൊതു വിദ്യാഭ്യാസ ഡയറക്ടര്‍ കെ.വി മോഹന്‍കുമാര്‍, ജില്ലാകലക്ടര്‍ യു.വി ജോസ്, ജില്ലാപഞ്ചായത്ത് വൈസ് പ്രസിഡന്റ് റീന മുണ്ടേങ്ങാട്, സെക്രട്ടറി പിഡി ഫിലിപ് തുടങ്ങിയവര്‍ സംബന്ധിച്ചു.
 
താമരശ്ശേരിയില്‍ ദുരിതാശ്വാസ നിധി ശേഖരണത്തിനെത്തിയ മന്ത്രിക്കു നേരെ യൂത്ത്‌ലീഗ് പ്രതിഷേധം
താമരശ്ശേരി: ദുരിതാശ്വാസ നിധി ശേഖരിക്കാനെത്തിയ മന്ത്രിക്കു നേരെ യൂത്ത്‌ലീഗ് പ്രവര്‍ത്തകരുടെ പ്രതിഷേധം. മന്ത്രി ടി പി രാമകൃഷ്ണന്റെ നേതൃത്വത്തില്‍ താമരശ്ശേരി റെസ്റ്റ് ഹൗസില്‍ ദുരിതാശ്വാസ നിധി ശേഖരണം നടക്കുന്നതിനിടെയാണ് യൂത്ത് ലീഗ് പ്രവര്‍ത്തകര്‍ പ്രകടനവുമായെത്തിയയത്. കരിഞ്ചോല ഉരുള്‍പൊട്ടലിനിരയായവര്‍ക്ക് മതിയായ നഷ്ടപരിഹാരം നല്‍കിയില്ലെന്നാരോപിച്ചായിരുന്നു പ്രതിഷേധം. റെസ്റ്റ് ഹൗസ് കവാടത്തില്‍ പ്രകടനക്കാരെ പോലീസ് തടഞ്ഞത് നേരിയ സംഘര്‍ഷത്തിനിടയായി.
 
ലോക ബാങ്ക്, എഡിബി സംഘം പ്രളയ ബാധിത പ്രദേശങ്ങള്‍ സന്ദര്‍ശിച്ചു
കോഴിക്കോട്: ലോകബാങ്കിന്റേയും ഏഷ്യന്‍ ഡവലപ്മെന്റ് ബാങ്കിന്റെയും പ്രതിനിധികള്‍ കോഴിക്കോട് ജില്ലയില്‍ കാലവര്‍ഷത്തില്‍ ഉരുള്‍പൊട്ടലിലും വെളളപ്പൊക്കത്തിലും കനത്ത നാശനഷ്ടമുണ്ടായ പ്രദേശങ്ങള്‍ സന്ദര്‍ശിച്ചു. ഹേമംഗ് കരേലിയ, വെങ്കട റാവു ബയണ, എസ് വൈദീശ്വരന്‍, അനൂപ് കാരന്ത്, സതീഷ് സാഗര്‍ ശര്‍മ, ഉറി റയിക്ക്, മഹേഷ് പട്ടേല്‍, ശ്രിനീവാസ റാവു പൊടിപ്പിറെഡ്ഡി എന്നിവരാണ് കോഴിക്കോട് വയനാട്, മലപ്പുറം ജില്ലകളിലെ പ്രളയബാധിത പ്രദേശങ്ങള്‍ സന്ദര്‍ശിക്കുന്ന സംഘത്തിലുളളത്. ചൊവ്വാഴ്ച രാവിലെ മാവൂര്‍ റോഡിലെ രാവീസ് ഹോട്ടലില്‍ ജില്ലാ കലക്ടര്‍ യു.വി ജോസുമായി സംഘം ചര്‍ച്ച നടത്തി. വിവിധ മേഖലകളില്‍ ജില്ലയിലുണ്ടായ നാശനഷ്ടങ്ങളുടെ വിവരങ്ങള്‍ വിവിധ വകുപ്പുകളുടെ ജില്ലാ മേധാവികള്‍ ലോക ബാങ്ക് പ്രതിനിധികള്‍ക്കു മുന്നില്‍ അവതരിപ്പിച്ചു. ബാങ്ക് പ്രതിനിധികളുമായി നടത്തിയ ചര്‍ച്ച ഫലപ്രദമായിരുന്നുവെന്ന് ചര്‍ച്ചയെ തുടര്‍ന്ന് ജില്ലാ കലക്ടര്‍ യു.വി ജോസ് അറിയിച്ചു.
 
തൊണ്ടവേദനക്കായി ചികിത്സക്കെത്തിയ യുവാവിന് പ്രമേഹത്തിനുള്ള മരുന്ന് നല്‍കിയതായി പരാതി
താമരശ്ശേരി: പനിയും തൊണ്ടവേദനയുമായി ചികിത്സക്കെത്തിയ യുവാവിന് പ്രമേഹത്തിനുള്ള ഗുളിക നല്‍കിയതായി പരാതി. താമരശ്ശേരി ചുടലമുക്ക് സ്വദേശി അജ്മലിനാണ് താമരശ്ശേരി താലൂക്കാശുപത്രിയില്‍ നിന്നും ശക്തമായ പ്രമേഹ രോഗമുള്ളവര്‍ക്ക് നല്‍കുന്ന മെറ്റ്‌ഫോര്‍മിന്‍ 500 എന്ന ഗുളിക നല്‍കിയത്. കഴിഞ്ഞ ദിവസമാണ് അജ്മല്‍ ചികിത്സ തേടിയത്. ഡോക്ടറുടെ കുറിപ്പില്‍ വേദനക്കുള്ള മെഫ്താല്‍ എന്ന ഗുളികയാണ് എഴുതിയതെന്നും ഫാര്‍മസിയില്‍ നിന്നും കുറിപ്പ് ശരിയായി പരിശോധിക്കാതെ ഗുളിക നല്‍കുകയായിരുന്നുവെന്നും അജ്മല്‍ പറഞ്ഞു. സംശയം തോന്നി മെഡിക്കല്‍ ഷോപ്പില്‍ അന്വേഷിച്ചപ്പോഴാണ് പ്രമേഹത്തിനുള്ള ഗുളികയാണെന്ന് വ്യക്തമായത്. ചെറിയ അക്ഷരത്തില്‍ കുറിപ്പ് എഴുതിയതാണ് മരുന്ന് മാറാന്‍ കാരണമെന്നാണത്രെ ഫാര്‍മസിയില്‍ നിന്നും അറിയിച്ചത്. ഫാര്‍മസിസ്റ്റിന്റെ അശ്രദ്ധയാണ് മരുന്ന് മാറാന്‍ കാരണമെന്ന് ഡോക്ടറും മറുപടി നല്‍കി. മരുന്ന് കഴിച്ചിരുന്നുവെങ്കില്‍ ഗുരുതരമായ ആരോഗ്യ പ്രശ്‌നങ്ങള്‍ സംഭവിക്കുമായിരുന്നുവെന്നും ആശുപത്രി അധികൃതരുടെ അനാസ്ഥക്കെതിരെ ആരോഗ്യ വകുപ്പ് മന്ത്രിക്കും ജില്ലാ മെഡിക്കല്‍ ഓഫീസര്‍ക്കും പരാതി നല്‍കുമെന്നും അജ്മല്‍ പറഞ്ഞു.
 
ദുരിതാശ്വാസ ലിസ്റ്റില്‍ നിന്നും അര്‍ഹരെ ഒഴിവാക്കിയെന്നാരോപിച്ച് കൊടിയത്തൂര്‍ വില്ലേജ് ഓഫീസറെ ഉപരോധിച്ചു
കൊടിയത്തൂര്‍: പ്രളയത്തിനിരയായവരെ ദുരിതാശ്വാസ ലിസ്റ്റില്‍ നിന്നും ഒഴിവാക്കിയെന്നാരോപിച്ച് കൊടിയത്തൂര്‍ വില്ലേജ് ഓഫീസറെ ഗ്രാമപഞ്ചായത്ത് പ്രസിഡന്റ് സി ടി സി അബ്ദുല്ലയുടെ നേതൃത്വത്തില്‍ ജനപ്രതിനിധികളും സി.പി.എം പ്രവര്‍ത്തകരും ഉപരോധിച്ചു. പഞ്ചായത്ത് സമര്‍പ്പിച്ച ലിസ്റ്റില്‍ നിന്നും നൂറിലേറെ ആളുകളെ ഒഴിവാക്കിയെന്നാരോപിച്ചായിരുന്നു ഉപരോധം. 400 പേരുടെ ലിസ്റ്റ് പഞ്ചായത്ത് വില്ലേജ് അധികൃതര്‍ക്ക് സമര്‍പ്പിച്ചെങ്കിലും മുന്നൂറോളം ആളുകളെ മാത്രമാണ് ഉള്‍പ്പെടുത്തിയതെന്നും നിരവധി പേരുകള്‍ ലിസ്റ്റില്‍ രണ്ട് തവണ ഉള്‍പ്പെട്ടതായും പഞ്ചായത്ത് പ്രസിഡന്റ് പറഞ്ഞു.
 
താമരശ്ശേരി താലൂക്കാശുപത്രിയില്‍ ചികിത്സ തേടിയെത്തുന്നവര്‍ തീരാ ദുരിതത്തില്‍
താമരശ്ശേരി: ആര്‍ദ്രം പദ്ധതിയില്‍ ഉള്‍പ്പെടുത്തിയ താമരശ്ശേരി താലൂക്കാശുപത്രിയില്‍ ചികിത്സ തേടിയെത്തുന്നവര്‍ക്ക് ദുരിതം മാത്രം. മലയോര മേഖലയുടെ സിരാ കേന്ദ്രമായ താമരശ്ശേരിയിലെ സര്‍ക്കാര്‍ ആശുപത്രിയില്‍ ആയിരത്തിലേറെ ആളുകളാണ് പതിവായി ചികിത്സ തേടിയെത്തുന്നത്. പനിയും മറ്റു രോഗങ്ങളുമായി എത്തുന്ന പ്രായമാവര്‍ ഉള്‍പ്പെടെയുള്ളവര്‍ക്ക് മണിക്കൂറുകളോളം കാത്തുനിന്നാല്‍ മാത്രമേ ഡോക്ടറെ കാണാനുള്ള ഒ പി ശീട്ട് ലഭിക്കുകയുള്ളൂ. തുടര്‍ന്ന് ഡോക്ടറെ കാണാനുള്ള ഊഴത്തിനായും മണിക്കൂറുകള്‍ കാത്തുനില്‍ക്കണം. മരുന്ന് ലഭിക്കാനാണ് അതിലേറെ പ്രയാസം. ആയിരത്തിലേറെ രോഗികള്‍ക്ക് മരുന്നു നല്‍കാന്‍ പലപ്പോഴും ഒന്നോ രണ്ടോ ഫാര്‍മസിസ്റ്റുമാരാണ് ജോലിയിലുണ്ടാവുക.
 
നിരവധി കഞ്ചാവ് കേസുകളില്‍ പ്രതിയായ യുവാവ് താമരശ്ശേരിയില്‍ എക്‌സൈസ് പിടിയില്‍
താമരശ്ശേരി: നിരവധി കഞ്ചാവ് കേസുകളില്‍ പ്രതിയായ യുവാവ് കഞ്ചാവുമായി വീണ്ടും എക്‌സൈസിന്റെ പിടിയിലായി. നരിക്കുനി കാരക്കുന്നത്ത് താമസിക്കുന്ന ഉണ്ണികുളം വള്ളിയോത്ത് കണ്ണാറക്കുഴിയില്‍ അബ്ദുല്ലത്തീഫ്(45) ആണ് താമരശ്ശേരി എക്‌സൈസ് ഇന്‍സ്‌പെക്ടര്‍ പി പി വേണുവിന്റെ നേതൃത്വത്തിലുള്ള സംഘത്തിന്റെ പിടിയിലായത്. രഹസ്യ വിവരത്തെ തുടര്‍ന്ന് എക്‌സൈസ് സംഘം തലയാട് ഭാഗത്തുവെച്ച് അബ്ദുല്ലത്തീഫ് സഞ്ചരിച്ച കെ എല്‍ 56 പി 7707 നമ്പര്‍ കാറിന് കൈ കാണിച്ചെങ്കിലും നിര്‍ത്താതെ പോയി. തുടര്‍ന്ന് എക്‌സൈസ് സംഘം കിലോ മീറ്ററുകളോളം പിന്തുടര്‍ന്നാണ് കിനാലൂര്‍ പൂവമ്പായി ഭാഗത്തുവെച്ച് കാറ് പിടികൂടിയത്. 50 പൊതികളിലായി സൂക്ഷിച്ച 250 ഗ്രാം കഞ്ചാവും കാറും എക്‌സൈസ് പിടിച്ചെടുത്തു.
 
പുതുപ്പാടി കൈതപ്പൊയിലില്‍ അനധികൃത മണലൂറ്റ് പിടികൂടി
പുതുപ്പാടി: പുതുപ്പാടി കൈതപ്പൊയിലില്‍ അനധികൃത മണലൂറ്റ് കേന്ദ്രത്തില്‍ റവന്യൂ വകുപ്പിന്റെ പരിശോധന. രഹസ്യ വിവരത്തെ തുടര്‍ന്ന് താമരശ്ശേരി തഹസില്‍ദാര്‍ സി മുഹമ്മദ് റഫീഖിന്റെ നിര്‍ദ്ദേശപ്രകാരം ഡോപ്യൂട്ടി തഹസില്‍ദാര്‍ അബ്ദുറഹിമാന്റെ നേതൃത്വത്തിലാണ് കൈതപ്പൊയില്‍ രണ്ടാം കയ്യിലെ മണലൂറ്റ് പിടികൂടിയത്. പുഴയില്‍ നിന്നും വാരിയിട്ട ഒമ്പത് ലോഡ് മണല്‍ പോലീസിന്റെ സഹായത്തോടെ റവന്യൂ ഉദ്യോഗസ്ഥര്‍ പിടിച്ചെടുത്തു. ഇവ പിന്നീട് അടിവാരം പോലീസ് ഔട് പോസ്റ്റിലേക്ക് മാറ്റി. ഉരുള്‍ പൊട്ടലും മലവെള്ളപ്പാച്ചിലും കാരണം വന്‍ തോതില്‍ മണല്‍ ഒഴുകിയെത്തിയതാണ് മണല്‍ മാഫിയ മുതലെടുക്കുന്നത്. പുതുപ്പാടി മേഖലയില്‍ നേരത്തെയും റവന്യൂ വകുപ്പ് പരിശോധന നടത്തി മണല്‍ പിടികൂടിയിരുന്നു. വരും ദിവസങ്ങളിലും പരിശോധന തുടരുമെന്ന് തഹസില്‍ദാര്‍ അറിയിച്ചു.
 
 
 
 

All rights reserved | Website developed and maintained by Zyonz Technologies