18-Feb-2019 (Mon)
 
 
 
പട്ടയമേള ആശ്വാസമായത് ആയിരങ്ങള്‍ക്ക്: വിതരണം ചെയ്തത് 1504 പട്ടയങ്ങള്‍
കോഴിക്കോട്: സംസ്ഥാന സര്‍ക്കാര്‍ നടപ്പിലാക്കിക്കൊണ്ടിരിക്കുന്ന വിവിധ കര്‍മ്മപരിപാടികളുടെ ഭാഗമായി ജില്ലയില്‍ പട്ടയമേള നടത്തി. 1504 പട്ടയങ്ങളാണ് പരിപാടിയില്‍ വിതരണം ചെയ്തത്. ടൗണ്‍ഹാളില്‍ റവന്യൂ-ഭവനനിര്‍മ്മാണവകുപ്പ് മന്ത്രി ഇ ചന്ദ്രശേഖരന്‍ പട്ടയമേള ഉദ്ഘാടനം ചെയ്തു. കേരള ഭൂപരിഷ്‌കരണ നിയമം പ്രാബല്യത്തില്‍ വന്നിട്ട് വര്‍ഷങ്ങള്‍ കഴിഞ്ഞുവെങ്കിലും നാളിതുരെ ജന്മാവകാശം പതിച്ചുകിട്ടാത്ത ഒട്ടനവധിപേരാണ് സംസ്ഥാനത്ത് ഉള്ളത്. ഇതുമൂലം വസ്തു കൈമാറ്റം, ബാങ്ക് ലോണ്‍, വിദ്യാഭ്യാസവായ്പ, വിവാഹവായ്പ എന്നിവ ലഭിക്കുന്നതിന് സാധാരണക്കാര്‍ ബുദ്ധിമുട്ട് അനുഭവിക്കുന്ന സാഹചര്യത്തിലാണ് ജില്ലയില്‍ പട്ടയമേള നടത്തിയത്. മിച്ചഭൂമി, പുറമ്പോക്ക്, നാലുസെന്റ് കോളനികള്‍ എന്നിവിടങ്ങളില്‍ ദീര്‍ഘകാലമായി താമസിച്ചുവരുന്ന അര്‍ഹരായ വ്യക്തികള്‍ പട്ടയം ലഭിക്കാത്തവരായുണ്ട്. ഇവരുടെ ദീര്‍ഘകാലമായുള്ള കാത്തിരിപ്പാണ് മേളയിലൂടെ യാഥാര്‍ത്ഥ്യമായത്. ടൗണ്‍ഹാളിലെത്തിച്ചേര്‍ന്ന പലരും പട്ടയരേഖ നെഞ്ചോടു ചേര്‍ത്താണ് മടങ്ങിയത്. ചടങ്ങില്‍ എക്സൈസ്-തൊഴില്‍ വകുപ്പ് മന്ത്രി ടി പി രാമകൃഷ്ണന്‍ അധ്യക്ഷത വഹിച്ചു. ഗതാഗത വകുപ്പ് മന്ത്രി എ കെ ശശീന്ദ്രന്‍ പട്ടയവിതരണം നടത്തി.
 
വയോധികയെ കണ്ടെത്തി പോലീസ് നായ താരമായി
തൊട്ടില്‍പ്പാലം: കുന്നിന്‍ പ്രദേശത്ത് അകപ്പെട്ട വൃദ്ധയെ 24 മണിക്കൂറിനു ശേഷം പോലീസ് നായ കണ്ടെത്തി. തൊട്ടില്‍പ്പാലം മൂന്നാംകൈ ഓടംകാട് ആദിവാസി കോളനിയില്‍ നിന്നും കാണാതായ ചിരുത(75)യെ ആണ് ബാലുശ്ശേരി ഡോഗ് സ്‌ക്വാഡിലെ 'റിമോ' കണ്ടെത്തിയത്. വീട്ടില്‍നിന്നും കാണാതായ ചിരുതയെ പരിസരങ്ങളിലും ബന്ധുവീടുകളിലുമെല്ലാം അന്യേഷിച്ചിട്ടും കണ്ടെത്താന്‍ കഴിയാതെ വന്നതോടെ ബന്ധുക്കള്‍ തൊട്ടില്‍പ്പാലം പോലീസില്‍ പരാതി നല്‍ക്കുകയായിരുന്നു. കൈയില്‍ പണമില്ലാത്തതിനാള്‍ ദൂരെയെങ്ങും പോവാന്‍ സാധ്യതയില്ലെന്ന് മനസിലാക്കിയ പോലീസ് ഡോഗ് സ്‌ക്വാഡിനെ കൊണ്ടുവന്ന് പരിശോധന നടത്താന്‍ തീരുമാനിച്ചു. ചിരുതയുടെ വസ്ത്രത്തിന്റെ മണം പിടിച്ച റിമോ കുന്നില്‍ പ്രദേശത്തെ പറമ്പിലൂടെ രണ്ട് കിലോമീറ്റര്‍ സഞ്ചരിച്ച് പുഴയോരത്തെത്തിയപ്പോള്‍ കുറ്റികാടിനോട് ചേര്‍ന്ന് കാട്ടുവള്ളിയില്‍ പിടിച്ച് നില്‍ക്കുകയായിരുന്ന ചിരുതയെ കണ്ടെതുകയായിരുന്നു. 24 മണിക്കൂറുകള്‍ക്ക് ശേഷമാണ് ചിരുതയെ കണ്ടെത്തിയത്. തൊട്ടില്‍പ്പാലം എസ് ഐ മാരായ ബിജു, വിനയന്‍, ഡോഗ് സ്‌ക്വാഡ് അംഗങ്ങളായ അനിഷ്, റജി എന്നിവരാണ് എന്നിവരാണ് പരിശോധനയ്ക്ക് നേതൃത്വം നല്‍കിയത്. പ്രാധമിക ചിക്ത്സ നല്‍കിയ ശേഷം ചിരുതയെ ബന്ധുക്കളോടൊപ്പം വിട്ടയച്ചു.
 
ഗ്രാമീണ മേഖലയിലെ തപാല്‍ ജീവനക്കാര്‍ വീണ്ടും സമരത്തിലേക്ക്
കൊടുവള്ളി: ഗ്രാമീണ മേഖലയിലെ തപാല്‍ ജീവനക്കാര്‍ വീണ്ടും സമരത്തിലേക്ക്. കമലേഷ് ചന്ദ്ര റിപ്പോര്‍ട്ട് പ്രകാരമുള്ള ആനുകൂല്യങ്ങള്‍ ജീവനക്കാര്‍ക്ക് നല്‍കുമെന്ന കേന്ദ്ര സര്‍ക്കാറിന്റെ വാഗ്ദാനം പാലിക്കാത്തതില്‍ പ്രതിഷേധിച്ചാണ് ഗ്രാമീണ ഡാക് സേവകുമാര്‍ ഈ മാസം 18 മുതല്‍ അനിശ്ചിത കാല സമരം ആരംഭിക്കുന്നത്. കഴിഞ്ഞ മെയ് 22 ന് നടത്തിയ സമരത്തില്‍ നിന്നും 10 ദിവസം പിന്നിട്ടപ്പോള്‍ ഡിപ്പാര്‍ട്ടമെന്റ് ജീവനക്കാര്‍ പിന്‍മാറിയെങ്കിലും ജി ഡി എസ് തൊഴിലാളികള്‍ സമരത്തില്‍ ഉറച്ചു നിന്നു. കമലേഷ് ചന്ദ്ര റിപ്പോര്‍ട്ട് പ്രകാരമുള്ള ആനുകൂല്യങ്ങള്‍ നല്‍കുമെന്ന കേന്ദ്ര സര്‍ക്കാറിന്റെ പ്രഖ്യാപനത്തില്‍ വിശ്വസിച്ചാണ് പതിനാറം ദിവസം സമരത്തില്‍ നിന്നും പിന്‍മാറിയത്. എന്നാല്‍ കേന്ദ്ര സര്‍ക്കാര്‍ പോസ്റ്റല്‍ ജീവനക്കാരെ കബളിപ്പിച്ചുവെന്നും തുഛമായ ആനുകൂല്യങ്ങള്‍ മാത്രമാണ് സര്‍ക്കാര്‍ അംഗീകരിച്ചതെന്നും ഇവര്‍ പറയുന്നു. ആവശ്യങ്ങള്‍ അംഗീകരിക്കും വരെ സമരം തുടരാനാണ് തീരുമാനം. പോസ്റ്റല്‍ ജീവനക്കാരുടെ രണ്ട് സംഘടനകളാണ് സമരം പ്രഖ്യാപിച്ചത്. സമരത്തില്‍ നിന്നും വിട്ടു നില്‍ക്കുന്ന എന്‍ എഫ് പി യിലെ അംഗങ്ങള്‍ ആള്‍ ഇന്ത്യ ജി ഡി എസ് എംപ്ലോയീസ് എന്ന പേരില്‍ പുതിയ കൂട്ടായ്മ രൂപീകരിച്ചാണ് സമരത്തിലേക്ക് നീങ്ങുന്നത്. കോഴിക്കോട്, വയനാട് ജില്ലകളിലെ ജി ഡി എസ് ജീവനക്കാര്‍ കൊടുവള്ളിയില്‍ യോഗം ചേര്‍ന്ന് സമര പരിപാടികള്‍ക്ക് രൂപം നല്‍കി. ജാഫര്‍ ഒറ്റപ്പാലം ഉദ്ഘാടനം ചെയ്തു. സുരേഷ് മരക്കടവ് അധ്യക്ഷത വഹിച്ചു. രാജു മുറമ്പാത്തി, ബാബുരാജ് മാങ്ങാറി, പ്രദീപ്കുമാര്‍ നടക്കാവ്, ബിന്ദു ദേവഗിരി തുടങ്ങിയവര്‍ സംസാരിച്ചു.
 
ട്രാഫിക്ക് ബോധവല്‍ക്കരണ ബൈക്ക് റാലിയുമായി കാലിക്കറ്റ് റൈഡേഴ്സ് ഫാമിലി
കോഴിക്കോട്: ട്രാഫിക്ക് ബോധവല്‍ക്കരണത്തിന്റെ ഭാഗമായി കോഴിക്കോട് കടപ്പുറത്ത് നിന്നാരംഭിച്ച് പാലക്കാട്ട് അവസാനിക്കുന്ന ബൈക്ക് റാലിയുമായി കാലിക്കറ്റ് റൈഡേഴ്സ് ഫാമിലി. കോഴിക്കോട്് സിറ്റി ട്രാഫിക്ക് എസ് ഐ സുരേഷ് ബാബു റാലി ഫളാഗ് ഓഫ് ചെയ്തു. കേരളത്തിലെ അപകടമരണ നിരക്കിന്റെ കണക്കെടുത്താല്‍ കൂടുതല്‍ യുവാക്കളെയാണ് കാണാന്‍ സാധിക്കുക. ഒരു രാജ്യത്തിന്റെ വളര്‍ച്ചയില്‍ യുവാക്കള്‍ വഹിക്കുന്ന പങ്ക് വളരെ വലുതാണെന്നും, ആയതിനാല്‍ യുവാക്കളുടെ മരണ നിരക്ക് വര്‍ധിക്കുന്നത് ആശങ്കാജനകമാണെന്നും അദ്ദേഹം പറഞ്ഞു. ട്രാഫിക്ക് ബോധവല്‍ക്കരണത്തിനായി ഇത്തരത്തില്‍ റാലി നടത്തുന്ന കാലിക്കറ്റ് റൈഡേഴ്സ് ഫാമിലി അഭിനന്ദനം അര്‍ഹിക്കുന്നുവെന്നും, പെണ്‍കുട്ടികളും ഇതിന്റെ ഭാഗമാകുന്നത് കൂടുതല്‍ സന്തോഷം നല്‍കുന്നതാണെന്നും അദ്ദേഹം പറഞ്ഞു. 60 ഓളം റൈഡര്‍മാര്‍ റാലിയില്‍ പങ്കെടുത്തു. ഫായിസ്, അക്ഷയ്, ശംസീര്‍, ഐശ്വര്യ എന്നിവര്‍ നേതൃത്വം നല്‍കി.
 
അനധികൃത ലോറി പാര്‍ക്കിങ്ങിനെതിരെ ശക്തമായ ജനകീയ പ്രക്ഷോഭം നടത്തും: ബഹുജന കണ്‍വെന്‍ഷന്‍
കോഴിക്കോട്: സൗത്ത് ബീച്ചിലെ അനധികൃത ലോറി പാര്‍ക്കിങ്ങിനെതിരെ ശക്തമായ ജനകീയ പ്രക്ഷോഭത്തിന് രൂപം നല്‍കുമെന്ന് തെക്കേപ്പുറം വോയ്‌സിന്റെ ആഭിമുഖ്യത്തില്‍ സംഘടിപ്പിച്ച ബഹുജന സംഗമം താക്കീത് നല്‍കി. കലക്ടറും മേയറും ഉറപ്പ് നല്‍കിയിട്ട് പോലും നടപടികള്‍ ഉണ്ടാകാത്തത് ശക്തരായ മാഫിയകളുടെ ഇടപെടല്‍ മൂലമാണ്. ഇവിടെ പാര്‍ക്ക് ചെയ്യുന്ന ലോറികള്‍ ഭൂരിഭാഗവും കൊടുവള്ളി, രാമനാട്ടുകര തുടങ്ങിയ സ്ഥലങ്ങള്‍ കേന്ദ്രീകരിച്ചുള്ളതാണ്. ലോറി ബുക്കിംഗ് ഓഫീസ് കേന്ദ്രീകരിച്ചാണെന്നുള്ളതിനാല്‍ ലോറികള്‍ ഇവിടെ നിന്നും മാറുന്നത് മൂലം ബുക്കിംഗ് നഷ്ടപ്പെടുമെന്ന പ്രയാസവുമില്ല. വലിയങ്ങാടിയുടെ പൈതൃകം പറഞ്ഞ് അനധികൃത ലോറി പാര്‍ക്കിങ്ങിനെയും തൊഴില്‍ മാര്‍ഗ്ഗമാണെന്നുമുള്ള ന്യായീകരണങ്ങളും ശുഭകരമല്ല. ലോറി പാര്‍ക്കിംഗ് മൂലം ലഹരി ഉപയോഗവും, മാലിന്യ നിക്ഷേപവുമടക്കം ഗൗരവമേറിയ സാമൂഹിക പ്രശ്‌നങ്ങളാണ് പ്രദേശം നേരിടുന്നത്. പ്രക്ഷോഭങ്ങളുടെ ഭാഗമായി ഡിസംബര്‍ 20 ന് സൗത്ത് ബീച്ചില്‍ മനുഷ്യച്ചങ്ങല സംഘടിപ്പിക്കാന്‍ കണ്‍വെന്‍ഷന്‍ തീരുമാനിച്ചു. അനധികൃത ലോറി പാര്‍ക്കിങ്ങിനെതിരെ ശക്തമായ ജനകീയ പ്രക്ഷോഭങ്ങള്‍ക്ക് വിവിധ റസി. അസോസിയേഷനുകളുടെയും പ്രാദേശിക കൂട്ടായ്മകളുടെയും സഹകരണത്തോടെ തെക്കേപ്പുറം വോയിസ് നേതൃത്വം നല്‍കും. തെക്കേപ്പുറം വോയ്‌സ് കോര്‍ഡിനേറ്റര്‍ ഒ മമ്മൂദു അധ്യക്ഷത വഹിച്ചു. സി എ ആലിക്കോയ, തെക്കേപ്പുറം കോര്‍ഡിനേഷന്‍ കമ്മിറ്റി പ്രസിഡന്റ് മമ്മദ്‌കോയ, പി എം ഇഖ്ബാല്‍ എസ് കെ അബൂബക്കര്‍ കോയ, ജനമൈത്രി വോളന്റിയര്‍ അഫ്താര്‍, പി ടി ആസാദ്, പ്രശാന്ത് കളത്തിങ്ങല്‍, കുഞ്ഞാദുക്കോയ, ബാച്ചു, ബഷീര്‍ ഹന്നത്ത്, വി കെ വി റസാഖ്, സക്കീര്‍, പി ഒ ആലിക്കോയ, മുന്‍ കോര്‍പ്പറേഷന്‍ കൗണ്‌സിലര്‍ കെ പി അബ്ദുല്ലക്കോയ, പി വി അബൂബക്കര്‍, സി എ സലീം, അഹമ്മദ് ശരീഫ്, പ്രദേശത്തെ വിവിധ റസി. അസോസിയേഷന്‍ ഭാരവാഹികള്‍, പ്രാദേശിക സംഘടനാ ഭാരവാഹികള്‍ തുടങ്ങിയവര്‍ സംസാരിച്ചു.
 
താമരശ്ശേരി സ്വദേശി ദുബായില്‍ ദുരൂഹ സാഹചര്യത്തില്‍ മരിച്ച നിലയില്‍
താമരശ്ശേരി: താമരശ്ശേരി സ്വദേശിയെ ദുബായില്‍ ദുരൂഹ സാഹചര്യത്തില്‍ മരിച്ച നിലയില്‍ കണ്ടെത്തി. അമ്പായത്തോട് അബ്ദുല്‍ ഗഫൂറിന്റെയും സീനത്തിന്റെയും മകനായ റിഷാലിനെ(23)യാണ് ശനിയാഴ്ച പുലര്‍ച്ചെ നാലുമണിയോടെ താമസ സ്ഥലത്ത് മരിച്ച നിലയില്‍ കണ്ടെത്തിയത്. ദുബൈ അല്‍ഖൂസ് ഗ്രാന്‍ഡ് സൂപ്പര്‍മാര്‍ക്കറ്റിലെ ജീവനക്കാരനാണ്. സംഭവത്തില്‍ ദുരൂഹതയുള്ളതായി ബന്ധുക്കള്‍ ആരോപിക്കുന്നു. ഏതാനും പേരെ ചോദ്യം ചെയ്യാനായി ദുബൈ പോലീസ് കസ്റ്റഡിയിലെടുത്തതായും സൂചനയുണ്ട്. ആശുപത്രിയിലേക്ക് മാറ്റിയ മൃതഹേഹം നാട്ടിലെത്തിക്കാനുള്ള നടപടികള്‍ ആരംഭിച്ചതായി ബന്ധുക്കള്‍ അറിയിച്ചു.
 
മഹല്ല് കമ്മിറ്റിയുടെ വ്യാജ കത്ത് ഉപയോഗിച്ച് രണ്ടാം വിവാഹം: യുവാവ് അറസ്റ്റില്‍
താമരശ്ശേരി: ഗാര്‍ഹിക പീഡന കേസിലും മഹല്ല് കമ്മിറ്റിയുടെ വ്യാജ കത്ത് ഉപയോഗിച്ച് രണ്ടാം വിവാഹം ചെയ്ത കേസിലും പ്രതിയായ യുവാവ് ആറ് വര്‍ഷങ്ങള്‍ക്ക് ശേഷം പിടിയില്‍. കട്ടിപ്പാറ പൂവന്‍മല ചിങ്ങണാംപൊയില്‍ കല്ലുപറമ്പില്‍ സവാദിനെ(41) യാണ് താമരശ്ശേരി പോലീസ് അറസ്റ്റ് ചെയ്തത്. സ്വര്‍ണാഭരണങ്ങളും പണവും കൈക്കലാക്കി വിദേശത്തേക്ക് കടന്ന ഭര്‍ത്താവ് പിന്നീട് മറ്റൊരു വിവാഹം കഴിച്ചുവെന്നും ശാരീരികമായും മാനസികമായും പീഡിപ്പിക്കുന്നുവെന്നും കാണിച്ച് 2012 ലാണ് സവാദിന്റെ ഭാര്യ സലീന താമരശ്ശേരി പോലീസില്‍ പരാതി നല്‍കിയത്. തനിക്കും മക്കള്‍ക്കും ചെലവിന് നല്‍കുന്നില്ലെന്ന് കാണിച്ച് താമരശ്ശേരി കോടതിയിലും പരാതി നല്‍കിയിരുന്നു. ഇതു പ്രകാരം പോലീസ് കേസെടുക്കുകയും ജാമ്യത്തിലിറങ്ങിയ സവാദ് പിന്നീട് ഒളിവില്‍ പോവുകയായിരുന്നു. പിന്നീട് നീലഗിരി നാടുകാണിയിലെത്തി രണ്ടാം വിവാഹം കഴിച്ചു. ചിങ്ങണാംപൊയില്‍ മഹല്ല് കമ്മിറ്റിയുടെ ലെറ്റര്‍ പാഡും സീലും ഉപയോഗിച്ചുള്ള വ്യാജ കത്ത് നല്‍കിയാണ് രണ്ടാം വിവാഹം കഴിച്ചത്. വിവരം അറിഞ്ഞ മഹല്ല് കമ്മിറ്റി ഭാരവാഹികള്‍ 2014 ല്‍ താമരശ്ശേരി പോലീസില്‍ പരാതി നല്‍കുകയും പോലീസ് കേസെടുക്കുകയും ചെയ്തിരുന്നു. ഒളിവില്‍ പോയ സവാദിനെ പിടികിട്ടാ പുള്ളിയായി പ്രഖ്യാപിച്ച് വാറണ്ട് പുറപ്പെടുവിച്ചെങ്കിലും പിടികൂടാനായിരുന്നില്ല. സവാദ് നാടുകാണിയിലെ രണ്ടാം ഭാര്യയുടെ വീട്ടില്‍ എത്തിയതായ വിവരത്തെ തുടര്‍ന്ന് താമരശ്ശേരി പോലീസ് സ്‌റ്റേഷനിലെ എ എസ് ഐ സുരേഷ് ബാബു, സി പി ഒ മാരായ രാജ്‌മോഹന്‍, അരുണ്‍ എന്നിവര്‍ നാടുകാണിയിലെത്തി പ്രതിയെ പിടികൂടുകയായിരുന്നു. താമരശ്ശേരി കോടതിയില്‍ ഹാജറാക്കിയ പ്രതിയെ 14 ദിവസത്തേക്ക് റിമാണ്ട് ചെയ്തു. തന്നെയും മക്കളെയും വീട്ടില്‍ നിന്നും ഇറക്കിവിടാനായി സ്വത്ത് സഹോദരിയുടെ പേരിലേക്ക് മാറ്റിയതായും സലീന പറയുന്നു.
 
ഒടിയന്‍ കണ്ട് മടങ്ങുകയായിരുന്ന യുവാക്കളുടെ ബൈക്ക് അപകടത്തില്‍പെട്ട് ഒരാള്‍ മരിച്ചു
മുക്കം: ഒടിയന്‍ സിനിമ കണ്ട് മടങ്ങുകയായിരുന്ന യുവാക്കള്‍ സഞ്ചരിച്ച ബൈക്ക് കെ എസ് ആര്‍ ടി സി ബസ്സുമായി കൂട്ടിയിടിച്ച് ഒരാള്‍ മരിച്ചു. തൃക്കളയൂര്‍ പടിപുറവര്‍ അയ്യപ്പന്റേയും സാവിത്രിയുടേയും മകന്‍ അരുണ്‍(24) ആണ് മരിച്ചത്. ഒപ്പമുണ്ടായിരുന്ന അബിന്‍ സാരമായി പരിക്കേറ്റ് മെഡിക്കല്‍ കോളേജ് ആശുപത്രിയില്‍ ചികിത്സയിലാണ്. കൊയിലാണ്ടി എടവണ്ണ സംസ്ഥാന പാതയില്‍ നെല്ലിക്കാപറമ്പില്‍ ശനിയാഴ്ച പുലര്‍ച്ചെ രണ്ടരയോടെയാണ് സംഭവം. ഒടിയന്‍ സിനിമ കണ്ട് മടങ്ങുകയായിരുന്ന ഇവര്‍ സഞ്ചരിച്ച ബൈക്ക് അരീക്കോട് ഭാഗത്ത് നിന്നും മുക്കത്തേക്ക് പോവുകയായിരുന്ന കെ എസ് ആര്‍ ടി സി ബസ്സുമായി കൂട്ടിയിടിക്കുകയായിരുന്നു.
 
സ്ത്രീകളെ ഫോണില്‍ വിളിച്ച് അശ്ലീലം പറയുന്ന യുവാവ് പോലീസിന്റെ വലയിലായി
ബാലുശ്ശേരി: സ്ത്രീകളെ ഫോണില്‍ വിളിച്ച് അശ്ലീലം പറയുന്ന യുവാവിനെ ബാലുശ്ശേരി പോലീസ് അറസ്റ്റ് ചെയ്തു. മഞ്ചേരി എളങ്കൂര്‍ വെണ്ണക്കാട് അബ്ദുല്‍ മുനീറാണ് പോലീസിന്റെ വലയില്‍ വീണത്. നന്മണ്ട, കാക്കൂര്‍ പ്രദേശങ്ങളിലെ എഴുപതോളം സ്ത്രീകളാണ് അജ്ഞാതന്റെ ഫോണ്‍ വിളിക്കെതിരെ ബാലുശ്ശേരി പോലീസില്‍ പരാതി നല്‍കിയത്. രാവെന്നോ പകലെന്നോ വിത്യാസമില്ലാതെയായിരുന്നു ഇയാള്‍ സ്ത്രീകളെ വിളിച്ച് അശ്ലീലം പറഞ്ഞിരുന്നത്. സ്ത്രീകളുടെ പ്രായവും പ്രശ്‌നമായിരുന്നില്ല. ശല്യം അസഹ്യമായപ്പോഴാണ് പലരും പരാതിയുമായി പോലീസിനെ സമീപിച്ചത്. ഒരാഴ്ചയോളം നടത്തിയ അന്വേഷണത്തിനൊടുവിലാണ് കോഴിക്കോട്ടെ ലോഡ്ജില്‍ വെച്ച് അബ്ദുല്‍ മുനീറിനെ പിടികൂടിയത്. കളഞ്ഞുകിട്ടിയ സിം കാര്‍ഡാണ് ഇതിന്നായി ഉപയോഗിച്ചിരുന്നതെന്ന് പ്രതി മൊഴി നല്‍കി. സ്ത്രീകളുടെ നമ്പര്‍ സംഘടിപ്പിക്കാന്‍ മറ്റാരുടെയെങ്കിലും സഹായം ലഭിച്ചോ എന്നും പോലീസ് പരിശോദിക്കുന്നുണ്ട്. എസ് ഐ. കെ സുമിത്കുമാര്‍, എ എസ് ഐ. കെ അബ്ദുല്‍ഖാദര്‍, സിവില്‍ പോലീസ് ഓഫിസര്‍മാരായ ജിലുസെബാസ്റ്റ്യന്‍, രമേശന്‍ എന്നിവരടങ്ങിയ സംഘമാണ് തന്ത്രപരമായ നീക്കത്തിലെ പ്രതിയെ പിടികൂടിയത്. പേരാമ്പ്ര കോടതിയില്‍ ഹാജറാക്കിയ പ്രതിയെ 14 ദിവസ്‌തേക്ക് റിമാണ്ട് ചെയ്തു.
 
മരണ മൊഴി പുറത്ത്; ജീവിതം തുടരാന്‍ താല്‍പര്യമില്ലാത്തതിനാല്‍ ആത്മഹത്യ ചെയ്തു
തിരുവനന്തപുരം: സെക്രട്ടേറിയേറ്റിനു മുന്നിലെ ബി ജെ പി സമരപ്പന്തലില്‍ ആര്‍ എസ് എസ് പ്രവര്‍ത്തകന്‍ തീ കൊളുത്തി ആത്മഹത്യ ചെയ്തത് ജീവിതം മുന്നോട്ടുകൊണ്ടുപോവാന്‍ താല്‍പര്യം ഇല്ലാത്തതിനാലാണെന്ന് മരണ മൊഴി. തിരുവനന്തപുരം മുട്ടട സ്വദേശി വേണുഗോപാലന്‍ നായര്‍ മജിസ്‌ട്രേറ്റിനും പോലീസിനും ഡോക്ടര്‍ക്കും നല്‍കിയ മൊഴിയിലാണ് ഇക്കാര്യം സൂചിപ്പിക്കുന്നത്. ശബരിമല സ്ത്രീ പ്രവേശനത്തില്‍ മനം നൊന്താണ് ആത്മഹത്യയെന്നാരോപിച്ച് ബി ജെ പി നാളെ സംസ്ഥാന ഹര്‍ത്താല്‍ പ്രഖ്യാപിച്ചതിനു പിന്നാലെയാണ് വേണുഗോപാലന്‍ നായരുടെ മരണ മൊഴി പുറത്തായത്. മരണത്തിന് ശബരിമലയുമായി ബന്ധമില്ലെന്ന് വേണുഗോപാലന്‍ നായരുടെ കുടുംബവും വ്യക്തമാക്കി. ഇതോടെ ഹര്‍ത്താല്‍ പ്രഖ്യാപിച്ച ബി ജെ പി നേതൃത്വം വെട്ടിലായി
 
 
 
 

All rights reserved | Website developed and maintained by Zyonz Technologies