17-Feb-2019 (Sun)
 
 
 
തുഷാരഗിരിയില്‍ വീണ്ടും മാവോയിറ്റുകളെത്തി
കോടഞ്ചേരി: തുഷാരഗിരി ജീരകപ്പാറയില്‍ വീണ്ടും ആയുധ ധാരികളായ മാവോയിറ്റുകളെത്തി. ചക്കുമൂട്ടില്‍ ബിജുവിന്റെ വീട്ടിലാണ് യൂണിഫോം അണിഞ്ഞ മൂന്നംഗ സംഘം എത്തിയത്. രാത്രി എട്ടരയോടെ എത്തിയ സംഘം ഭക്ഷണം ആവശ്യപ്പെടുകയും കുടുംബ വിവരങ്ങള്‍ അന്വേഷിക്കുകയും ചെയ്തു. പോലീസ് തിരയുന്ന സുന്ദരിയുടെ നേതൃത്വത്തിലുള്ള സംഘമാണ് എത്തിയത്. ഏറെ നേരം ഇവിടെ ചെലവഴിച്ച ശേഷമാണ് മാവോയിസ്റ്റുകള്‍ മടങ്ങിയത്. തുടര്‍ന്നാണ് വിവരം പുറത്തു പറഞ്ഞത്. നേരത്തെ രണ്ട് തവണ ബിജുവിന്റെ അയല്‍വാസിയായ മണ്ടപത്തില്‍ ജോസിന്റെ വീട്ടില്‍ മാവോയിസ്റ്റുകള്‍ എത്തിയിരുന്നു. തുഷാരഗിരിയില്‍ വീണ്ടും മാവോയിസ്റ്റുകളെത്തിയത് പോലീസിനെയും കുഴക്കുകയാണ്.
 
ഡെഫ്‌സെന്റര്‍ പരിശീലന കേന്ദ്രം ഉല്‍ഘാടനം ചെയ്തു
താമരശ്ശേരി: ബധിര സഹോദരങ്ങളുടെ കൂട്ടായ്മയായ റീജ്യണല്‍ ഡഫ് സെന്റര്‍ നവീകരിച്ച ഓഫീസിന്റെയും പരിശീലന കേന്ദ്രത്തിന്റെയും ഉല്‍ഘാടനം കോഴിക്കോട് ഇഖ്‌റ ഹോസ്പിറ്റല്‍ എക്‌സിക്യൂട്ടീവ് ഡയറക്ടര്‍ ഡോ. പി സി അന്‍വര്‍ നിര്‍വ്വഹിച്ചു. എസ് ഡബ്യു എസ് പ്രസിഡണ്ട് വി പി ഉസ്മാന്‍ അദ്ധ്യക്ഷത വഹിച്ചു. പ്രതിഭാ സംഗമവും അനുമോദന പരിപാടിയും കേരള പത്രപ്രവര്‍ത്തക യൂണിയന്‍ സംസ്ഥാന പ്രസിഡണ്ട് കമാല്‍ വരദൂറും മൗനാക്ഷരങ്ങള്‍ സിനിമയിലെ താരങ്ങള്‍ക്കുള്ള ഉപഹാരസമര്‍പ്പണം നടന്‍ വിനോദ് കോവൂറും നിര്‍വ്വഹിച്ചു. കമ്പ്യൂട്ടര്‍, ടൈലറിംഗ് ഇന്‍സ്റ്റിറ്റിയൂട്ട് ഉല്‍ഘാടനം ഗ്രാമ പഞ്ചായത്ത് പ്രസിഡണ്ട് ഹാജറ കൊല്ലരുകണ്ടിയും ഡഫ് ഫാമിലി മീറ്റ് ഉല്‍ഘാടനം മലബാര്‍ ഡഫ് അസോസിയേഷന്‍ സെക്രട്ടറി കെ സോമസുന്ദരനും ഹെല്‍പ് ഡസ്‌ക് ഉല്‍ഘാടനം മൗനാക്ഷരങ്ങള്‍ സിനിമയുടെ സഹ സംവിധായകന്‍ ബവീഷ് ബാലും നിര്‍വ്വഹിച്ചു. ഡഫ് സെന്റര്‍ സെക്രട്ടറി പി അബ്ദുറഹ്മാന്‍ റിപ്പോര്‍ട്ട് അവതരിപ്പിച്ചു. എസ് ഡബ്യു എസ് സെക്രട്ടറി ഉസ്മാന്‍ പി ചെമ്പ്ര സ്വാഗതം പറഞ്ഞു. പി സി അഹമ്മദ്കുട്ടി മാസ്റ്റര്‍ ആംഗ്യ ഭാഷയിലേക്ക് പരിപാഷപ്പെടുത്തി. ഉച്ചക്ക് ശേഷം നടന്ന ബധിര ശാക്തീകരണ സെമിനാറിന് പട്ടാമ്പി സ്‌പെഷ്യല്‍ സ്‌കൂള്‍ ചെയര്‍മാന്‍ ടി പി അക്ബര്‍, ആര്‍ ഡി സി പ്രസിഡണ്ട് പി മനോജ്, സന്തോഷ്‌കുമാര്‍, ഹസീന മായനാട്, അല്‍ത്താഫ് പയ്യോളി, കെ കെ അഷ്‌റഫ് എന്നിവര്‍ നേതൃത്വം നല്‍കി. മൗനാക്ഷരങ്ങള്‍ സിനിമാ സംവിധായകന്‍ ദേവദാസ് കല്ലുരുട്ടി, നിര്‍മ്മാതാവ് രമേശ് മാവൂര്‍, കാഞ്ഞിക്കാവ് കുഞ്ഞികൃഷ്ണന്‍, സി ഹുസൈന്‍, സി കെ എ ഷമീര്‍ബാവ, ഫസല്‍, നസീം കൊടുവള്ളി, സി ടി കബീര്‍, അബ്ദുല്‍ സത്താര്‍, റൈഹാനത്, പത്മിനി, മൗനാക്ഷരങ്ങള്‍ താരങ്ങളായ ശ്രീലക്ഷ്മി, ആഷിഫ് തുടങ്ങിയവര്‍ സംസാരിച്ചു. ബധിരസഹോദരങ്ങള്‍ നിര്‍മ്മിച്ച ഉല്‍പന്നങ്ങളുടെ പ്രദര്‍ശനവും ആരോഗ്യ ബോധവല്‍ക്കരവും ആംഗ്യ ഭാഷാ പ്രചരണ പരിപാടിയും നടന്നു.
 
മര്‍കസ് നോളജ് സിറ്റിയില്‍ ലോകോത്തര സൗകര്യങ്ങളോടെയുള്ള ഗ്ലോബല്‍ സ്‌കൂള്‍ ആരംഭിക്കുന്നു
കോഴിക്കോട്: ലോകോത്തര വിദ്യാഭ്യാസ സൗകര്യങ്ങളോടെയുള്ള അലിഫ് ഗ്ലോബല്‍ സ്‌കൂള്‍ ഈ അധ്യായന വര്‍ഷം മുതല്‍ കൈതപ്പൊയില്‍ മര്‍കസ് നോളജ് സിറ്റിയില്‍ പ്രവര്‍ത്തനമാരംഭിക്കുമെന്ന് ഭാരവാഹികള്‍ വാര്‍ത്താ സമ്മേളനത്തില്‍ അറിയിച്ചു. രാജ്യാന്തര രംഗത്ത് ദീര്‍ഘകാലമായി പ്രവര്‍ത്തിക്കുന്ന അലിഫ് എജ്യുകെയര്‍ ഗ്രൂപ്പിന്റെ നേതൃത്വത്തിലാണ് നോളജ് സിറ്റിയില്‍ ഗ്ലോബല്‍ സ്‌കൂള്‍ ആരംഭിക്കുന്നത്. സിദ്ധാന്തങ്ങളേക്കാള്‍ പ്രായോഗിക പാഠങ്ങള്‍ക്ക് പ്രാമുഖ്യം നല്‍കുന്ന പാഠ്യപദ്ധതിയാണ് അലിഫ് ഗ്ലോബല്‍ സ്‌കൂള്‍ നടപ്പിലാക്കുന്നത്. പ്രമുഖ വിദ്യാഭ്യാസ ഗ്രൂപ്പായ എക്‌സല്‍ സോഫ്റ്റ് ആണ് സ്‌കൂളിന്റെ അക്കാദമിക് പങ്കാളിത്തം വഹിക്കുന്നത്. സി ബി എസ് ഇ, ഐ ജി സി എസ് ഇ സിലബസുകളില്‍ ആധുനിക സൗകര്യങ്ങളോടെയാണ് സ്‌കൂള്‍ പ്രവര്‍ത്തനം ആരംഭിക്കുന്നത്. വിവിധ സംസ്ഥാനങ്ങള്‍ക്ക് പുറമേ, വ്യത്യസ്ത രാജ്യങ്ങളില്‍ നിന്നുള്ള പഠിതാക്കളുടെ സാന്നിധ്യം വിദ്യാര്‍ത്ഥികള്‍ക്ക് മികച്ച അനുഭവങ്ങള്‍ സമ്മാനിക്കും. കെ ജി മുതല്‍ അഞ്ചാം ക്ലാസ് വരെയാണ് ഈ വര്‍ഷം പ്രവേശനം നല്‍കുന്നത്. കെ ജി മുതല്‍ ഹയര്‍ സെക്കണ്ടറി വിദ്യാഭ്യാസം വരെ പൂര്‍ത്തിയാക്കുന്നതോടെ തങ്ങളുടെ ഭാവി സ്വയം നിര്‍ണയിക്കാന്‍ വിദ്യാര്‍ത്ഥികളെ പ്രാപ്തരാക്കുന്ന രീതിയിലാണ് പാഠ്യപദ്ധതിയെന്ന് ഭാരവാഹികള്‍ പറഞ്ഞു. ദൈനംദിന ജീവിത രീതികള്‍ ചിട്ടപ്പെടുത്തുന്ന വാല്യൂ എജ്യുക്കേഷന്‍, മികച്ച പരിശീലനം ലഭിച്ച അധ്യാപകര്‍, വിപുലമായ ലാബ് സൗകര്യം, ദൈനംദിന പാഠ്യവിഷയങ്ങള്‍ പരിശീലിപ്പിക്കുന്നതിന് വര്‍ക്ഷോപ്പുകള്‍, ഇക്കോ ഫ്രന്റ്‌ലി നിര്‍മിതികള്‍, എല്ലാ കുട്ടികള്‍ക്കും ബ്രേക്ക് ഫാസ്റ്റ്, ലഞ്ച് സൗകര്യം, ലോകപ്രശസ്തരും പരിചയ സമ്പന്നരുമായ വിദ്യാഭ്യാസ വിചക്ഷണര്‍ നേതൃത്വം നല്‍കുന്ന അക്കാദമിക് ബോര്‍ഡ്, മള്‍ട്ടിപ്പിള്‍ ഇന്റലിജന്‍സ് ഡിവലപ്‌മെന്റ് പ്രോഗ്രാമുകള്‍, ഹയര്‍ സെക്കണ്ടറി വിദ്യാര്‍ത്ഥികള്‍ക്ക് മെഡിക്കല്‍ എഞ്ചിനീയറിംഗ് ഉള്‍പ്പെടെ വിവിധ മത്സര പരീക്ഷകള്‍ക്കുള്ള പരിശീലനം, എയര്‍ കണ്ടീഷന്റ് ക്ലാസ് മുറികളും ഹോസ്റ്റലുകളും, വിവിധ ഭാഷാ പഠനങ്ങള്‍, ആധുനിക രീതിയില്‍ സജ്ജമാക്കിയ ഹോസ്റ്റല്‍ സൗകര്യങ്ങള്‍ തുടങ്ങിയവയാണ് അലിഫിന്റെ പ്രത്യേകത. ഉപരിപഠനത്തിന് നോളജ് സിറ്റിയിലെ മറ്റു സ്ഥാപനങ്ങളില്‍ അലിഫ് വിദ്യാര്‍ത്ഥികള്‍ക്ക് മുന്‍ഗണനയുണ്ടാകും. അന്താരാഷട്ര വേദികളില്‍ വിവിധ മത്സരങ്ങള്‍ക്കുള്ള പരിശീലനവും അവസരങ്ങളും ലഭിക്കുന്ന അലിഫ് വിദ്യാര്‍ത്ഥികള്‍ക്ക് വിവിധ അന്തര്‍ദേശീയ യൂണിവേഴ്‌സിറ്റികളുമായുള്ള മര്‍കസിന്റെ അക്കാദമിക ധാരണകള്‍ കൂടുതല്‍ അവസരങ്ങള്‍ ഒരുക്കുമെന്നും മര്‍ക്കസ് നോളജ് സിറ്റി സി ഇ ഒ ഡോ. അബ്ദുസ്സലാം മുഹമ്മദ്, അലിഫ് എജ്യു കെയര്‍ ഗ്രൂപ്പ് ചെയര്‍മാന്‍ ആലിക്കുഞ്ഞി മുസ്ലിയാര്‍, ലുഖ്മാന്‍ പാഴൂര്‍, സയ്യിദ് ഫസല്‍, പത്മപ്രസാദ് ജെയിന്‍, സഞ്ചു നായര്‍ എന്നിവര്‍ വാര്‍ത്താ സമ്മേളനത്തില്‍ പറഞ്ഞു.
 
സ്‌കൂട്ടറില്‍ കാറിടിച്ച് രണ്ടുപേര്‍ക്ക് പരിക്ക്
താമരശ്ശേരി: സ്‌കൂട്ടറില്‍ കാറിടിച്ച് രണ്ടുപേര്‍ക്ക് പരിക്ക്. താമരശ്ശേരി ചുങ്കം കലറക്കാംപൊയില്‍ മുഹമ്മദിന്റെ മകന്‍ റഫീഖ്, തച്ചംപൊയില്‍ കച്ചിലക്കാലയില്‍ ഷരീഫ് എന്നിവര്‍ക്കാണ് പരിക്കേറ്റത്. തിങ്കളാഴ്ച രാത്രി 12 മണിയോടെ ചുങ്കം ജംഗ്ഷനിലായിരുന്നു അപകടം. വയനാട് ഭാഗത്തേക്ക് പോവുകയായിരുന്ന കെ എല്‍ 11 ബി എം 1543 നമ്പര്‍ കാറ് അമിത വേഗതയില്‍ തെറ്റായ ദിശയില്‍ വന്ന് സ്‌കൂട്ടറില്‍ ഇടിക്കുകയായിരുന്നു.
 
വീട് നിര്‍മിച്ചതിന്റെ പണം നല്‍കിയില്ലെന്നാരോപിച്ച് കരാറുകാരന്റെ കുത്തിയിരിപ്പു സമരം
താമരശ്ശേരി: വീട് നിര്‍മിച്ചു നല്‍കിയതിന്റെ പണം നല്‍കിയില്ലെന്നാരോപിച്ച് വീടിനുമുന്നില്‍ കരാറുകാരന്റെ കുത്തിയിരിപ്പു സമരം. കൂടത്തായി കേക്കാരിക്കാട്ടൂര്‍ മാത്യൂ നിക്കോളാസിന്റെ വീട്ടുപടിക്കലാണ് പുതുപ്പാടി കൈതപ്പൊയില്‍ ചക്കാലക്കലില്‍ ആന്റണിയും ഭാര്യയും കിത്തിയിരിപ്പ് സമരം ആരംഭിച്ചത്. മാത്യുവിന്റെ വീട് നിര്‍മിച്ച് നല്‍കിയ വകയില്‍ പന്ത്രണ്ടര ലക്ഷത്തോളം രൂപ നല്‍കാനുണ്ടെന്നാണ് ആന്റണി പറയുന്നത്. 2015 ജനുവരിയിലാണ് വീടുപണി ഏറ്റെടുത്തത്. പ്രവൃത്തിയുടെ ഓരോ ഘട്ടത്തിലും പണം നല്‍കാമെന്നായിരുന്നു കരാര്‍. എന്നാല്‍ പണം കൃത്യമായി നല്‍കിയില്ലെന്നും കോണ്‍ക്രീറ്റിനായി പണം നല്‍കാമെന്ന് പറഞ്ഞ മാത്യു അവസാന നിമിഷം പണം നല്‍കാതെ പിന്‍മാറിയെന്നും ആന്റണി പറയുന്നു. രണ്ട് ദിവസത്തിനകം പണം നല്‍കാമെന്ന ഉറപ്പിന്‍മേല്‍ കോണ്‍ക്രീറ്റ് പൂര്‍ത്തീകരിച്ചെങ്കിലും പണം നല്‍കിയില്ല. കോടതിയെ സമീപിച്ചെങ്കിലും മാത്യൂവിനെതിരെ സാക്ഷി പറയാന്‍ ആരും തയ്യാറാവാതിരുന്നതിനാല്‍ തനിക്ക് അനുകൂലമായ വിധി ഉണ്ടായില്ലെന്നും കടക്കെണിയില്‍ കുടുങ്ങി ജീവിതം വഴി മുട്ടിയതിനാലാണ് പ്രത്യക്ഷ സമരം ആരംഭിച്ചതെന്നും ആന്റണി പറയുന്നു. രാവിലെ മുതല്‍ വൈകിട്ട് വരെയാണ് ആന്റണിയും ഭാര്യയും കുത്തിയിരിപ്പ് സമരം നടത്തുന്നത്. തെറ്റായ രീതിയിലാണ് ആന്റണി പ്രവൃത്തി നടത്തിയതെന്നും ഇതു കാരണം പല ഭാഗങ്ങളും പൊളിച്ചുമാറ്റേണ്ടി വന്നതായും മാത്യു നിക്കോളാസ് പറയുന്നു. ഏറ്റെടുത്ത പ്രവൃത്തി പൂര്‍ത്തീകരിക്കാതെയാണ് പണം ആവശ്യപ്പെടുന്നതെന്നും മാത്യു പറഞ്ഞു.
 
മാവൂര്‍ ഗവ. ഹയര്‍ സെക്കന്ററി സ്‌കൂളില്‍ സമ്പൂര്‍ണ്ണ ക്ലാസ്സ് ലൈബ്രറി ഉദ്ഘാടനം ചെയ്തു
മാവൂര്‍: മാവൂര്‍ ഗവ. ഹയര്‍ സെക്കന്ററി സ്‌കൂളില്‍ സമ്പൂര്‍ണ്ണ ക്ലാസ്സ് ലൈബ്രറി വിദ്യാഭ്യാസ വകുപ്പ് മന്ത്രി പ്രൊഫ. സി രവീന്ദ്രനാഥ് ഉദ്ഘാടനം ചെയ്തു. അഡ്വ. പി ടി എ റഹീം എം എല്‍ എ അധ്യക്ഷത വഹിച്ചു. പൂര്‍വ്വ വിദ്യാര്‍ത്ഥികള്‍, അധ്യാപകര്‍, രക്ഷിതാക്കള്‍, വിദ്യാഭ്യാസ പ്രവര്‍ത്തകര്‍ തുടങ്ങി പൊതു സമൂഹത്തിന്റെ പങ്കാളിത്തത്തോടെ ഏഴ് ലക്ഷത്തോളം രൂപ ചെലവഴിച്ചണ് പദ്ധതി നടപ്പിലാക്കിയത്.
 
പ്രതിപക്ഷത്തിന് പോലും പരാതി ഉന്നയിക്കാനില്ലാത്ത വികസനമാണ് നടക്കുന്നത്: മന്ത്രി ജി സുധാകരന്‍
പുല്ലൂരാംപാറ: പ്രതിപക്ഷത്തിന് പോലും പരാതി ഉന്നയിക്കാന്‍ പറ്റാത്ത വിധത്തിലുള്ള വികസന പ്രവര്‍ത്തനങ്ങളാണ് പൊതുമരാമത്ത് വകുപ്പ് സംസ്ഥാനത്ത് നടത്തികൊണ്ടിരിക്കുന്നതെന്ന് പൊതുമരാമത്ത് വകുപ്പ് മന്ത്രി ജി സുധാകരന്‍ പറഞ്ഞു. തിരുവമ്പാടി മണ്ഡലത്തിലെ പുല്ലൂരാംപാറ പള്ളിപ്പടി പാലം ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. കഴിഞ്ഞ സര്‍ക്കാരിന്റെ കാലത്ത് പൊതുമരാമത്ത് വകുപ്പിലുണ്ടായിരുന്ന അഴിമതി തീര്‍ത്തും അവസാനിപ്പിക്കാന്‍ ഇപ്പോള്‍ സര്‍ക്കാറിന് കഴിഞ്ഞിട്ടുണ്ടെന്നും സര്‍ക്കാര്‍ വന്നതിന് ശേഷം 371.72 കോടിയുടെ വികസന പ്രവര്‍ത്തനങ്ങളാണ് തിരുവമ്പാടി മണ്ഡലത്തില്‍ അനുവദിച്ചതെന്നും അദ്ദേഹം പറഞ്ഞു. കാലപ്പഴക്കത്താല്‍ അപകടാവസ്ഥയിലായ പഴയ ഇരുമ്പുപാലം പൊളിച്ചുമാറ്റിയാണ് തിരുവമ്പാടി കോടഞ്ചേരി പഞ്ചായത്തുകളെ ബന്ധിപ്പിച്ച് ഇരുവഞ്ഞിപ്പുഴയില്‍ പുതിയ പാലം നിര്‍മ്മിച്ചത്. മൂന്ന് സ്പാനുകളിലായി 58.04 മീറ്റര്‍ നീളത്തിലും 11.05 മീറ്റര്‍ വീതിയിലുമാണ് 4.25 കോടിയുടെ സാങ്കേതികാനുമതിയോടെ പാലം നിര്‍മ്മിച്ചിട്ടുള്ളത്. ചടങ്ങില്‍ ജോര്‍ജ് എം തോമസ് എം എല്‍ എ അധ്യക്ഷത വഹിച്ചു. പൊതുമരാമത്ത് വകുപ്പ് എക്‌സിക്യുട്ടീവ് എഞ്ചിനീയര്‍ എ പി എം മുഹമ്മദ് അഷ്‌റഫ് റിപ്പോര്‍ട്ട് അവതരിപ്പിച്ചു. പഞ്ചായത്ത് പ്രസിഡന്റുമാരായ പി ടി അഗസ്റ്റിന്‍, ലിസി ചാക്കോച്ചന്‍, ജില്ലാ പഞ്ചായത്ത് അംഗം അന്നമ്മ മാത്യു, ബ്ലോക്ക് പഞ്ചായത്ത് അംഗം ആന്‍സി സെബാസ്റ്റ്യന്‍, ഗ്രാമപഞ്ചായത്ത് അംഗങ്ങളായ അന്നക്കുട്ടി ദേവസ്യ, ജോമോള്‍, കുര്യാച്ചന്‍ തെങ്ങുംമൂട്ടില്‍ പുല്ലൂരാംപാറ സെന്റ് ജോസഫ്‌സ് ചര്‍ച്ച് വികാരി ജോണ്‍ കളരിപ്പറമ്പില്‍, തിരുവമ്പാടി സഹകരണ ബാങ്ക് പ്രസിഡന്റ് ജോളി ജോസഫ്, വിവിധ രാഷ്ട്രീയ പാര്‍ടി പ്രതിനിധികള്‍ എന്നിവര്‍ പങ്കെടുത്തു. പൊതുമരാമത്ത് വകുപ്പ് സൂപ്രണ്ടിങ് എഞ്ചിനീയര്‍ പി കെ മിനി സ്വാഗതവും അസി. എക്‌സിക്യുട്ടീവ് എഞ്ചിനീയര്‍ എന്‍ വി ഷിനി നന്ദിയും പറഞ്ഞു.
 
ജൂണിനകം ഹയര്‍ സെക്കന്ററി വരെയുള്ള ക്ലാസുകള്‍ ഹൈടെക്കാക്കും: മന്ത്രി സി രവീന്ദ്രനാഥ്
കൊടിയത്തൂര്‍: 2019 ജൂണ്‍ ഒന്നിന് മുന്‍പ് സംസ്ഥാനത്ത് ഹയര്‍ സെക്കന്ററി വരെയുള്ള മുഴുവന്‍ ക്ലാസുകളും ഹൈടെക്കാക്കുമെന്ന് വിദ്യാഭ്യാസ മന്ത്രി സി രവീന്ദ്രനാഥ് പറഞ്ഞു. സൗത്ത് കൊടിയത്തൂര്‍ എ യു പി സ്‌കൂള്‍ വജ്ര ജൂബിലി ആഘോഷം ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. സര്‍ക്കാര്‍ പാഠ്യപദ്ധതി പരിഷ്‌ക്കാരവുമായി മുന്നോട്ട് പോവുകയാണ്. അന്താരാഷ്ട്ര നിലവാരത്തിലേക്ക് വിദ്യാര്‍ഥികളെ വളര്‍ത്തുകയാണ് പരിഷ്‌ക്കരണം കൊണ്ട് ലക്ഷ്യമിടുന്നത്. ഇതുവരെയുള്ള പാഠ്യപദ്ധതി കുട്ടികളുടെ കഴിവിനെ പരിമിതപ്പെടുത്തുന്നതായിരുന്നു. ജനകീയ വിദ്യാഭ്യാസമാണ് സര്‍ക്കാര്‍ ലക്ഷ്യമെന്നും പഠനോത്സവങ്ങള്‍ അതിന്റെ ഭാഗമാണന്നും മന്ത്രി പറഞ്ഞു. ജോര്‍ജ് എം തോമസ് എം എല്‍ എ അധ്യക്ഷത വഹിച്ചു. ഗ്രാമ പഞ്ചായത്ത് പ്രസിഡന്റ് സി ടി സി അബ്ദുല്ല, കെ പി ചന്ദ്രന്‍, സാബിറ തറമ്മല്‍, ഡി ഇ ഒമാരായ എന്‍ മുരളി, വി വസീഫ്, എ ഇ ഒ. ജി കെ ഷീല, എന്‍ അബ്ദു റഹിമാന്‍, കെ അജയകുമാര്‍, ഇ രമേശ് ബാബു, റസാഖ് കൊടിയത്തൂര്‍, സി പി ചെറിയമുഹമ്മദ്, കെ ടി മന്‍സൂര്‍, പി സി മുജീബ് റഹ്മാന്‍, സി ടി കുഞ്ഞോയി, എ ഫാത്തിമ തുടങ്ങിയവര്‍ സംസാരിച്ചു. തുടര്‍ന്ന് വിവിധ കലാപരിപാടികളും അരങ്ങേറി.
 
തെരുവ് നായയുടെ കടിയേറ്റ് ഒന്‍പതുപേര്‍ക്ക് പരുക്ക്
താമരശ്ശേരി: തെരുവ് നായയുടെ കടിയേറ്റ് കുട്ടികള്‍ ഉള്‍പ്പെടെ ഒന്‍പതുപേര്‍ക്ക് പരുക്ക്. വെള്ളിയാഴ്ച വൈകിട്ട് ആറരയോടെ തച്ചംപൊയില്‍, അവേലം, വാപ്പനാംപൊയില്‍, ചാലക്കര കെടവൂര്‍ പ്രദേശങ്ങളിലാണ് തെരുവ് നായ ഭീതി പരത്തിയത്. പൂനൂര്‍ അവേലം പള്ളിത്താഴത്ത് ഹബീബ്(26), കെടവൂര്‍ പൂതര്‍പൊയില്‍ സുഭാഷിന്റെ ഭാര്യ സുജല, മകള്‍ ദേവനന്ദന(10), നടുക്കണ്ടിയില്‍ രാധാകൃഷ്ണന്‍(62), തച്ചംപൊയില്‍ ചാലക്കര സ്വദേശികളായ സുബൈദ(40), അഫ്‌നാന്‍(12), വിശാഖ്(3), കോരങ്ങാട് വാപ്പനാംപൊയില്‍ സ്വദേശികളായ കാര്‍ത്തി(51), ഷിനു എന്നിവര്‍ക്കാണ് പരുക്കേറ്റത്. ഇവരെ താമരശ്ശേരി താലൂക്ക് ആശുപത്രിയില്‍ പ്രാഥമികി ചികിത്സ നല്‍കിയ ശേഷം വിദഗ്ദ ചികിത്സക്കായി കോഴിക്കോട് മെഡിക്കല്‍ കോളേജ് ആശുപത്രിയില്‍ പ്രവേശിപ്പിച്ചു. റോഡിലൂടെ നടന്നു പോവുന്നവരെയും വീട്ടുമുറ്റത്ത് നില്‍ക്കുന്നവരെയുമാണ് നായ അക്രമിച്ചത്. മാതാവ് സുജലക്കൊപ്പം നടന്നു പോകുമ്പോഴാണ് ദേവനന്ദനയെ നായ കടിച്ചത്. മകളെ രക്ഷിക്കാനുള്ള ശ്രമത്തിനിടെ സുജലക്കും പരുക്കേല്‍ക്കുകയായിരുന്നു. രാധാകൃഷ്ണന്റെ വീട്ടിലെ പശുക്കുട്ടിയെയും വിവിധ പ്രദേശങ്ങളിലെ പൂച്ചകളെയും തെരുവ് നായ കടിച്ച് പരുക്കേല്‍പ്പിച്ചു. കോരങ്ങാട് വാപ്പനാംപൊയിലില്‍ തിരച്ചിലിനൊടുവില്‍ കണ്ടെത്തിയ തെരുവ് നായയെ നാട്ടുകാര്‍ അടിച്ചു കൊന്നു.
 
ദേശീയപാത നാലുവരിപ്പാതയാക്കുന്നതിന് തടസ്സം കേന്ദ്ര സര്‍ക്കാര്‍ തന്നെ: മന്ത്രി ജി സുധാകരന്‍
താമരശ്ശേരി: ദേശീയപാത നാലുവരിപ്പാതയാക്കണമെന്ന് പറയുന്ന കേന്ദ്ര സര്‍ക്കാര്‍ തന്നെ ഇത്തരം പദ്ധതികള്‍ നടപ്പിലാക്കുന്നതിന് തടസ്സം നില്‍ക്കുകയാണെന്ന് പൊതുമരാമത്ത് വകുപ്പുമന്ത്രി ജി സുധാകരന്‍. വയനാട് ചുരത്തെയും തുഷാരഗിരിയെയും ബന്ധിപ്പിച്ച് നിര്‍മിച്ച ചിപ്പിലിത്തോട് തുഷാരഗിരി പാത ഉദ്ഘാടനം ചെയ്ത് സംസാരിക്കുകയായിരുന്നു അദ്ധേഹം. ദേശീയ പാത നാലുവരിയാക്കാന്‍ സംസ്ഥാന സര്‍ക്കാര്‍ തയ്യാറാണ്. എന്നാല്‍ ഒന്നര വര്‍ഷമായി ഇതിനുള്ള നടപടികള്‍ പൂര്‍ത്തീകരിക്കാന്‍ കേന്ദ്രം തയ്യാറാവുന്നില്ല. അടിസ്ഥാന സൗകര്യ വികസനത്തില്‍ കേരളം ആധുനിക സംസ്ഥാനമായി മാറികൊണ്ടിരിക്കുകയാണ്. വികസനം പ്രധാന ഭരണലക്ഷ്യമായി കാണുന്ന സര്‍ക്കാറാണ് അധികാരത്തിലുള്ളത്.
 
 
 
 

All rights reserved | Website developed and maintained by Zyonz Technologies