15-Dec-2018 (Sat)
 
 
 
വില്ലേജ് ഓഫീസുകള്‍ ഞായറാഴ്ചയും പ്രവര്‍ത്തിക്കും
കോഴിക്കോട്: ജില്ലയിലെ തീരദേശമലയോര മേഖലകളിലെ വില്ലേജ് ഓഫീസുകള്‍ ഞായറാഴ്ചയും പ്രവര്‍ത്തിക്കും. കോഴിക്കോട് താലൂക്കിലെ ബേപ്പൂര്‍, പന്നിയങ്കര, കസബ, കടലുണ്ടി, നഗരം, പുതിയങ്ങാടി, എലത്തൂര്‍, നീലേശ്വരം, കുമാരനെല്ലൂര്‍, കക്കാട്, കൊടിയത്തൂര്‍, താഴെക്കോട് എന്നിവയും വടകര താലൂക്കിലെ വടകര, ചോറോട്, ഒഞ്ചിയം, അഴിയൂര്‍, മരുതോങ്കര, തിനൂര്‍, വിലങ്ങാട്, കാവിലുംപാറ എന്നിവയും താമരേശ്ശരി താലൂക്കിലെ കൂടരഞ്ഞി, തിരുവമ്പാടി, കോടഞ്ചേരി, ഈങ്ങാപ്പുഴ, കട്ടിപ്പാറ, പുതുപ്പാടി, കാന്തലാട്, കിനാലൂര്‍, കൂടത്തായി, നെല്ലിപ്പൊയില്‍ എന്നിവയും കൊയിലാണ്ടി താലൂക്കിലെ മുഴുവന്‍ വില്ലേജ് ഓഫീസുകളും ഞായറാഴ്ചയും തുറന്ന് പ്രവര്‍ത്തിക്കും.
 
നാലംഗ കുടുംബം ആത്മഹത്യ ചെയ്തത് അയല്‍വാസിയുടെ അപവാദ പ്രചാരണത്തില്‍ മനം നൊന്തെന്ന് ആതമഹത്യാ കുറിപ്പ്
മാനന്തവാടി: വയനാട് തലപ്പുഴയില്‍ നാലംഗ കുടുംബം ആത്മഹത്യ ചെയ്തത് അയല്‍വാസിയുടെ അപവാദ പ്രചാരണത്തില്‍ മനം നൊന്ത്. വെണ്‍മണി തിടങ്ങഴിയില്‍ തോപ്പില്‍ വിനോദ്(48), ഭാര്യ മിനി(43), മക്കളായ അനുശ്രീ(17), അഭിനവ്(12) എന്നിവരെയാണ് വീടിനു സമീപത്തെ തോട്ടത്തില്‍ തൂങ്ങി മരിച്ച നിലയില്‍ കണ്ടെത്തിയത്. മാതാപിതാക്കള്‍ക്കൊപ്പം താമസിക്കുന്ന വിനോദും കുടുംബവും പിലാക്കാവിലെ കുടുംബ വീട്ടിലായിരുന്ന മകള്‍ അനുശ്രീയേയും കൂട്ടി വെള്ളിയാഴ്ച രാത്രി വീട്ടിലേക്ക് പുറപ്പെട്ടിരുന്നു. രാത്രി ഏറെ വൈകിയും ഇവര്‍ വീട്ടില്‍ എത്താതിരുന്നതിനെ തുടര്‍ന്ന് നാട്ടുകാര്‍ നടത്തിയ തിരച്ചിലില്‍ വിനോദിന്റെ ജീപ്പ് ഉപേക്ഷിക്കപ്പെട്ട നിലയില്‍ കണ്ടെത്തിയിരുന്നു. ശനിയാഴ്ച രാവിലെയാണ് നാലുപേരെയും തോട്ടത്തിലെ മരത്തില്‍ തൂങ്ങി മരിച്ച നിലയില്‍ കണ്ടെത്തിയത്. മാനന്തവാടി ഡി വൈ എസ് പി. കെ എം ദേവസ്യയുടെ നേതൃത്വത്തിലുള്ള പോലീസ് സ്ഥലത്തെത്തി നടത്തിയ പരിശോധനയിലാണ് ആത്മഹത്യാ കുറിപ്പുകള്‍ കണ്ടെത്തിയത്. ആത്മഹത്യക്ക് കാരണം അയല്‍വാസിയുടെ അപവാദ പ്രചാരണമെന്ന് പോലീസിനും സുഹൃത്തിനും നാട്ടുകാര്‍ക്കും അയല്‍ കൂട്ടത്തിനുമായി എഴുതിയ ഏഴ് ആത്മഹത്യാ കുറിപ്പുകളിലും സൂചനയുണ്ട്. അയല്‍വാസായായ നാരായണന്‍ വിനോദിനെകുറിച്ചും മറ്റൊരു സ്ത്രീയെ കുറിച്ചും അപവാദം പ്രചരിപ്പിച്ചുവെന്നും ഇതില്‍ മനം നൊന്താണ് ആതമഹത്യ ചെയ്യുന്നതെന്നും ആത്മഹത്യാ കുറിപ്പിലുണ്ട്. താന്‍ സോദരിയെ പോലെ കരുതുന്ന സ്ത്രീയെ കുറിച്ചാണ് തന്റെ മാതാവിനോടും നാട്ടുകാരോടും അപവാദം പറഞ്ഞതെന്നും ആത്മഹത്യയില്‍ മറ്റാര്‍ക്കും പങ്കില്ലെന്നും ആത്മഹത്യാ കുറിപ്പുകളില്‍ പറയുന്നു. തന്റെ ഭര്‍ത്താവിനെ വിശ്വാസമാണെന്നും ഇനി ജീവിച്ചിരുന്നിട്ട് കാര്യമില്ലെന്നും മിനി എവുതിയ രണ്ട് കുറിപ്പുകളില്‍ പറയുന്നു. സംഭവത്തില്‍ പോലീസ് കേസെടുത്ത് അന്വേഷണം ആരംഭിച്ചു. നാരായണനെതിരെ ആത്മഹത്യാ പ്രേരണക്ക് കേസെടുക്കുമെന്നാണ് സൂചന.
 
ബ്രൂവറി വിവാദം; എക്‌സൈസ് ഓഫീസിലേക്ക് മാര്‍ച്ച്
താമരശ്ശേരി: ബ്രൂവറി വിവാദത്തില്‍ എക്‌സൈസ് വകുപ്പുമന്ത്രി രാജിവെക്കണമെന്നാവശ്യപ്പെട്ട് യൂത്ത് കോണ്‍ഗ്രസ് കൊടുവള്ളി നിയോജക മണ്ഡലം കമ്മിറ്റിയുടെ ആഭിമുഖ്യത്തില്‍ താമരശ്ശേരി എക്‌സൈസ് ഓഫീസിലേക്ക് മാര്‍ച്ച് നടത്തി. താമരശ്ശേരി കോണ്‍ഗ്രസ് ഭവന് മസീപത്തുനിന്നും ആരംഭിച്ച മാര്‍ച്ച് എക്‌സൈസ് ഓഫീസിന് സമീപം പോലീസ് തടഞ്ഞു. തുടര്‍ന്ന് നടന്ന ധര്‍ണ്ണ ഡി സി സി സെക്രട്ടറി പി സി ഹബീബ് തമ്പി ഉദ്ഘാടനം ചെയ്തു. മുജീബ് പുറായില്‍ അധ്യക്ഷത അധ്യക്ഷത വഹിച്ചു. സംസ്ഥാന സെക്രട്ടറി സി വി ജിതേഷ് മുഖ്യ പ്രഭാഷണം നടത്തി. സിജി കൊട്ടാരത്തില്‍, സി കെ ജലീല്‍, നവാസ് ഈര്‍പ്പോണ, മനോജ് കുമാര്‍, കെ പി രാഹുല്‍, ജാഫര്‍ പാലായി, ഫസല്‍ പാലങ്ങാട്, ഇ ജെ മനു, സി മുഹ്സിന്‍ പ്രസംഗിച്ചു. വി പി ഹംജാദ്, ജംഷിദ്, അനൂപ് കൊല്‍കോത്ത്, ജസീറലി, ഫസല്‍ കാരാട്ട്, വി കെ റഷീദ്, ഷമീര്‍, ഷബീര്‍ പനക്കോട്, അസ്സയിന്‍ പറക്കുന്ന്, അബിന്‍ എന്നിവര്‍ നേതൃത്വം നല്‍കി.
 
മരിച്ചയാളെ തിരിച്ചറിഞ്ഞില്ല
കോഴിക്കോട്: ഫോട്ടോയില്‍ കാണുന്ന ആള്‍ കോഴിക്കോട് ജനറല്‍ ആശുപത്രിയില്‍ ചികിത്സയിലിരിക്കെ ഈ മാസം രണ്ടിന് മരണപ്പെട്ടതാണ്. ആശുപത്രി രേഖകളില്‍ അബു (60) എന്നാണ് നല്‍കിയിട്ടുളളത്. മൃതദേഹം ജനറല്‍ ആശുപത്രി മോര്‍ച്ചറിയില്‍ സൂക്ഷിച്ചിട്ടുണ്ട്. ഇയാളെ പറ്റി വല്ല വിവരവും ലഭിക്കുകയാണെങ്കില്‍ വെളളയില്‍ പോലീസ് സ്‌റ്റേഷനുമായി ബന്ധപ്പടണം. ഫോണ്‍ : 0495 2384799, 9497963592.
 
കട്ടിപ്പാറയില്‍ ജനവാസ കേന്ദ്രത്തില്‍ സെമിത്തേരി നിര്‍മിക്കുന്നതിന് സ്‌റ്റേ
കട്ടിപ്പാറ: ജനവാസ കേന്ദ്രത്തില്‍ സെമിത്തേരി ആരംഭിക്കാന്‍ ജില്ലാ കലക്ടര്‍ നല്‍കിയ അനുമതിക്ക് കോടതിയുടെ സ്റ്റേ. കട്ടിപ്പാറ ഹോളി ഫാമിലി ചര്‍ച്ചിന്റെ ഉടമസ്ഥതയിലുള്ള രണ്ട് ഏക്കര്‍ സ്ഥലത്ത് വോള്‍ട്ട് സെമിത്തേരി സ്ഥാപിക്കാന്‍ ജില്ലാ കലക്ടര്‍ നല്‍കിയ ലൈസന്‍സാണ് കോഴിക്കോട് സെഷന്‍സ് കോടതി സ്റ്റേ ചെയ്തത്.
 
മുറിവുണങ്ങാത്ത കരിഞ്ചോലക്കൊപ്പം; മുസ്ലിംലീഗ് രാപ്പകല്‍ സമരം
താമരശ്ശേരി: മുറിവുണങ്ങാത്ത കരിഞ്ചോലക്കൊപ്പം എന്ന പ്രമേയത്തില്‍ കോഴിക്കോട് ജില്ലാ മുസ്്ലിംലീഗ് കമ്മിറ്റിയുടെ നേതൃത്വത്തില്‍ താമരശ്ശേരിയില്‍ രാപ്പകല്‍ സമരം. മുസ്ലിംലീഗ് ദേശീയ ജനറല്‍ സെക്രട്ടറി പി കെ കുഞ്ഞാലിക്കുട്ടി എം പി സമരം ഉദ്ഘാടനം ചെയ്തു. ദുരിതബാധിതരോടുള്ള സര്‍ക്കാര്‍ വിവേചനം അവസാനിപ്പിക്കണമെന്ന് അദ്ദേഹം പറഞ്ഞു. ഓഖി പോലുള്ള ദുരന്തത്തില്‍പെട്ടവരുടെ ആശ്രിതര്‍ക്ക് വലിയ തുക നഷ്ടപരിഹാരം നല്‍കിയപ്പോള്‍ കട്ടിപ്പാറ പഞ്ചായത്തിലെ കരിഞ്ചോലമലയിലടക്കമുള്ള ദുരിതബാധിതര്‍ക്ക് അര്‍ഹമായ നഷ്ടപരിഹാരം നല്‍കാത്തത് മനുഷ്യത്വ രഹിതവും ക്രൂരതയുമാണെന്നും കേന്ദ്ര സര്‍ക്കാര്‍ കേരളത്തോട് കാണിക്കുന്ന വിവേചനം പോലെയാണ് സംസ്ഥാന സര്‍ക്കാര്‍ കരിഞ്ചോലയോട് കാണിച്ചതെന്നും അദ്ദേഹം കുറ്റപ്പെടുത്തി.
 
പുതുപ്പാടി കണ്ണപ്പന്‍കുണ്ടില്‍ ഉരുള്‍ പൊട്ടിയതായി സംശയം
പുതുപ്പാടി: കണ്ണപ്പന്‍കുണ്ട് ഭാഗത്ത് ഉരുള്‍ പൊട്ടിയതായി സംശയം. പ്രദേശത്ത് കനത്ത മലവെള്ളപ്പാച്ചിലില്‍ വറ്റി വരണ്ട കണ്ണപ്പന്‍കുണ്ട് പുഴയില്‍ വെള്ളം നിറഞ്ഞു. മട്ടിക്കുന്ന് വനപ്രദേശത്ത് ഉരുള്‍ പൊട്ടിയതാവാം എന്നാണ് നിഗമനം. താമരശ്ശേരി പോലീസും മുക്കത്തു നിന്നുള്ള ഫയര്‍ഫോഴ്‌സും പ്രദേശത്തേക്ക് തിരിച്ചിട്ടുണ്ട്.
 
കോഴിക്കോട്: ഹര്‍ഷബാല്യം പദ്ധതിയുടെ ഭാഗമായി ജില്ലയെ ബാലവേല വിമുക്ത നഗരമായി മാറ്റുന്നതിനായി ജില്ലാ ചൈല്‍ഡ് പ്രൊട്ടക്ഷന്‍ യൂണിറ്റ്, ജുവനൈല്‍ വിംഗ്, ആരോഗ്യവകുപ്പ്, തൊഴിലും നൈപുണ്യവും വകുപ്പ്, ചൈല്‍ഡ്ലൈന്‍ എന്നിവയുടെ സംയുക്താഭിമുഖ്യത്തില്‍ നഗരപരിസര പ്രദേശങ്ങളിലെ വ്യവസായസ്ഥാപനങ്ങളില്‍ പരിശോധന നടത്തി. കുറ്റിക്കാട്ടൂരില്‍ പ്രവര്‍ത്തിച്ചിരുന്ന ഹോട്ട് ആന്റ് കൂള്‍ബാറില്‍ നിന്ന് ജോലിയില്‍ ഏര്‍പ്പെട്ടിരുന്ന കുട്ടിയെ കണ്ടെത്തി മോചിപ്പിച്ചു. പരിശോധനയില്‍ ജില്ലാ ചൈല്‍ഡ് പ്രൊട്ടക്ഷന്‍ ഓഫീസര്‍ (എന്‍ഐസി) സുബീഷ് തെയ്യമ്പാടി, സോഷ്യല്‍ വര്‍ക്കര്‍ അശ്വതി പി സി, അസിസ്റ്റന്റ് ലേബര്‍ ഓഫീസര്‍ രാജന്‍ എന്‍ കെ, ഹെല്‍ത്ത് ഇന്‍സ്പെക്ടര്‍ പ്രകാശന്‍ ടി കെ, ജുവനൈല്‍ വിംഗ് എസ് ഐ വിശ്വനാഥന്‍, എ എസ് ഐ രാധാകൃഷ്ണന്‍, ബാബു, രാജേഷ്, മാജി, ചൈല്‍ഡ്ലൈന്‍ ടീം മെമ്പര്‍ ഒ പി ചന്ദ്രന്‍ എന്നിവര്‍ പങ്കെടുത്തു. ബാലവേല കര്‍ശനമായും തടയുന്നതിനായി ഇത്തരത്തിലുള്ള പരിശോധനകള്‍ വ്യവസായ സ്ഥാപനങ്ങളിലും ഗാര്‍ഹിക മേഖലകളിലും, തോട്ടം മേഖലകളിലും നിരന്തരം നടത്തുന്നതാണെന്നും ജില്ലാ ചൈല്‍ഡ് പ്രൊട്ടക്ഷന്‍ ഓഫീസര്‍ ജോസഫ് റിബല്ലോ അറിയിച്ചു. ബാലവേല ശ്രദ്ധയില്‍പ്പെട്ടാല്‍ 0495-2378920, ഹെല്‍പ്പ്ലൈന്‍ നമ്പര്‍ -1098 എന്നീ നമ്പറുകളില്‍ അറിയിക്കാം.
 
കോഴിക്കോട്: അറബിക്കടലിന്റെ തെക്കുകിഴക്ക് ശ്രീലങ്കയ്ക്ക് സമീപം ശക്തമായ ന്യൂനമര്‍ദം രൂപപ്പെട്ട് ചുഴലിക്കാറ്റായി മാറാന്‍ സാധ്യതയുണ്ടെന്ന കേന്ദ്ര കാലാവസ്ഥാ മുന്നറിയിപ്പിന്റെ പശ്ചാത്തത്തില്‍ ഞായറാഴ്ച്ച വരെ ജനങ്ങള്‍ അതീവ ജാഗ്രത പാലിക്കണമെന്നും മത്സ്യത്തൊഴിലാളികള്‍ കടലില്‍ പോകരുതെന്നും ജില്ലാ കലക്ടര്‍ യു വി ജോസ് അഭ്യര്‍ഥിച്ചു. കനത്ത മഴയ്ക്കും ചുഴലിക്കാറ്റിനും സാധ്യതയുണ്ടെന്ന മുന്നറിയിപ്പിനെ തുടര്‍ന്ന് ജില്ലാതല ദുരന്ത നിവാരണ അതോറിറ്റി ജില്ലാ കലക്ടറുടെ അധ്യക്ഷതയില്‍ കലക്ടറേറ്റില്‍ യോഗം ചേര്‍ന്ന് സ്ഥിതിഗതികള്‍ അവലോകനം ചെയ്തു. അതിശക്തമായ കാറ്റുണ്ടാവാനും കടല്‍ പ്രക്ഷുബ്ധമാകാനും ഇടയുള്ളതിനാല്‍ കേന്ദ്ര കാലാവസ്ഥാ കേന്ദ്രത്തിന്റെ അറിയിപ്പു ലഭിക്കുന്നതു വരെ മത്സ്യത്തൊഴിലാളികള്‍ കടലില്‍ പോകുന്നത് ഒഴിവാക്കണം. കടലില്‍ പോയ മത്സ്യത്തൊഴിലാളികള്‍ ഉടന്‍ തീരത്തെത്തണമെന്നും കലക്ടര്‍ നിര്‍ദ്ദേശിച്ചു. മുന്നറിയിപ്പിനെ തുടര്‍ന്ന് സംസ്ഥാനത്തെ മൂന്ന് ജില്ലകളില്‍ റെഡ് അലര്‍ട്ട് പ്രഖ്യാപിച്ചിട്ടുണ്ട്. കോഴിക്കോട് ജില്ലയില്‍ ഏഴാം തീയതി വരെ യെല്ലോ അലര്‍ട്ട് ആണ്. അടിയന്തര സാഹചര്യങ്ങള്‍ നേരിടുന്നതിനുള്ള മുന്നൊരുക്കങ്ങള്‍ ജില്ലയില്‍ സ്വീകരിച്ചതായി കലക്ടര്‍ അറിയിച്ചു. കലക്ടറേറ്റിലും താലൂക്കുകളിലും 24 മണിക്കൂര്‍ പ്രവര്‍ത്തിക്കുന്ന കണ്‍ട്രോള്‍ റൂമുകള്‍ തുറന്നിട്ടുണ്ട്. മലയോര മേഖലയില്‍ ഉരുള്‍പൊട്ടലിനും മണ്ണിടിച്ചിലിനും സാധ്യതയുള്ളതിനാല്‍ ഇവിടങ്ങളില്‍ കഴിയുന്നവര്‍ ജാഗ്രത പാലിക്കണം. രാത്രികാലങ്ങളില്‍ മലയോരമേഖലയിലെ യാത്ര ഒഴിവാക്കണം. ന്യൂനമര്‍ദം ശക്തി പ്രാപിക്കുന്നതോടെ തീരപ്രദേശത്ത് അതി ശക്തമായ കാറ്റടിക്കാനും അത് വഴി അപകടങ്ങള്‍ സംഭവിക്കാനും സാധ്യതയുണ്ട്. അടിയന്തര സാഹചര്യം നേരിടുന്നതിനും പ്രതികരണ പ്രവര്‍ത്തനങ്ങള്‍ ആരംഭിക്കുവാനും എല്ലാ വകുപ്പിലേയും ഉദ്യോഗസ്ഥര്‍ സജ്ജരായിരിക്കണമെന്ന് കലക്ടര്‍ നിര്‍ദേശിച്ചു. പോലീസ്, റവന്യു, ഫയര്‍ ഫോഴ്‌സ് ഉദ്യോഗസ്ഥരുടെ സേവനം 24 മണിക്കുറും അടിയന്തര ഘട്ട കാര്യനിര്‍വഹണ കേന്ദ്രത്തില്‍ ഉറപ്പുവരുത്തും. ജില്ലാതല ദുരന്ത നിവാരണ അതോറിറ്റി യോഗത്തില്‍ ജില്ലാ പഞ്ചായത്ത് പ്രസിഡന്റ് ബാബു പറശ്ശേരി, ഡെപ്യൂട്ടി കലക്ടര്‍ കെ ഹിമ, വിവിധ വകുപ്പുകളുടെ ജില്ലാതല ഉദ്യോഗസ്ഥര്‍ തുടങ്ങിയവര്‍ പങ്കെടുത്തു. കണ്‍ട്രോള്‍ റൂം നമ്പറുകള്‍: കലക്‌ട്രേറ്റ് 04952371002 കോഴിക്കോട് 04952372966 താമരശ്ശേരി 04952223088 കൊയിലാണ്ടി 04962620235 വടകര 04962522361
 
കോഴിക്കോട്: ഗാന്ധി ജയന്തി വാരാചരണത്തോടനുബന്ധിച്ച് ജില്ലാ ഭരണകൂടവും ഇന്‍ഫര്‍മേഷന്‍ പബ്ലിക് റിലേഷന്‍ വകുപ്പും ഗാന്ധി ജയന്തി വാരാഘോഷം ജില്ലാതല സംഘാടക സമിതിയുമായി സഹകരിച്ച് ശില്‍പശാല നടത്തി. പ്രളയാനന്തര കേരളം പുനര്‍നിര്‍മ്മാണം അതിജീവനം എന്ന വിഷയത്തില്‍ കോഴിക്കോട് ടൗണ്‍ ഹാളില്‍ നടത്തിയ ശില്‍പശാല ജില്ലാ കലക്ടര്‍ യു വി ജോസ് ഉദ്ഘാടനം ചെയ്തു. പ്രകൃതിയെ പരിഗണിക്കാത്ത വികസനമാണ് പ്രളയക്കെടുതിക്ക് കാരണമെന്ന് ജില്ലാ കലക്ടര്‍ യു വി ജോസ് പറഞ്ഞു. മനുഷ്യരുടെ അനാവശ്യ ചൂഷണങ്ങളാണ് ഇത്തരം ഒരു ദുരന്തത്തിനുകാരണം. പ്രളയത്തില്‍ നിന്ന് അനുഭവം ഉള്‍ക്കൊണ്ട് ഇനിയെങ്കിലും ആളുകളുടെ സമീപനം മാറേണ്ടതുണ്ടെന്ന് ജില്ലാ കലക്ടര്‍ പറഞ്ഞു. ദുരന്തം അനുഭവം എന്ന സെഷനില്‍ കട്ടിപ്പാറ ഗ്രാമപഞ്ചായത്ത്് പ്രസിഡന്റ് ബേബി രവീന്ദ്രന്‍, ദൃശ്യമാധ്യമപ്രവര്‍ത്തകനായ കെ മധു, ഒളവണ്ണ പഞ്ചായത്ത്് പ്രസിഡന്റ് കെ തങ്കമണി തുടങ്ങിയവര്‍ അനുഭവങ്ങള്‍ പങ്കുവെച്ചു. ദുരന്തം പ്രതിരോധമെന്ന സെഷനില്‍ കോഴിക്കോട്്് ബ്ലോക്ക്്് പഞ്ചായത്ത്് പ്രസിഡന്റ്്് എന്‍ മനോജ്്് കുമാര്‍ , കോഴിക്കോട്്് കോര്‍പ്പറേഷന്‍ ഹെല്‍ത്ത ഓഫീസര്‍ ആര്‍ എസ് ഗോപകുമാര്‍, കോഴിക്കോട് പ്രസ് ക്ലബ് പ്രസിഡന്റ് കെ പ്രേമനാഥ് തുടങ്ങിയവര്‍ സംസാരിച്ചു .അവസാന സെക്ഷനായ ദുരന്തം പുനര്‍ നിര്‍മാണത്തില്‍ ആവനി ഇന്‍സ്റ്റിറ്റിയൂട്ട്്് ഓഫ്്് ഡിസൈന്‍ ചെയര്‍മാന്‍ ആര്‍ക്കിടെക്റ്റ്്് ടോണി ജോസഫ്്, കേരള ശാസ്ത്ര സാഹിത്യ പരിഷത്ത്് പ്രതിനിധി കെ ടി രാധാകൃഷ്ണന്‍, ലെന്‍സ്‌ഫെഡ് റെന്‍സ്‌ഫെഡ് പ്രതിനിധികളായ കെ സലീം, വിജയകുമാര്‍ എന്നിവര്‍ വിഷയാവതരണം നടത്തി. ജില്ലാ ടൗണ്‍ പ്ലാനര്‍ കെ വി അബ്ദുല്‍ മാലിക് അദ്ധ്യക്ഷനായി. ഇന്‍ഫര്‍മേഷന്‍ ആന്‍ഡ് പബ്ലിക് റിലേഷന്‍ മേഖല ഡെപ്യൂട്ടി ഡയറക്ടര്‍ ഇവി സുഗതന്‍ സ്വാഗതവും ജില്ലാ ഇന്‍ഫര്‍മേഷന്‍ ഓഫീസര്‍ എം മധുസൂദനന്‍ നന്ദിയും പറഞ്ഞു.
 
 
 
 

All rights reserved | Website developed and maintained by Zyonz Technologies