15-Oct-2019 (Tue)
 
 
 
താമരശ്ശേരി സ്വദേശി ബഹ്‌റൈനില്‍ കൊല്ലപ്പെട്ട കേസില്‍ പ്രതിക്ക് വധശിക്ഷ വിധിച്ചു
താമരശ്ശേരി: താമരശ്ശേരി സ്വദേശി ബഹ്‌റൈനില്‍ കൊല്ലപ്പെട്ട കേസില്‍ പ്രതിക്ക് ബഹ്‌റൈന്‍ ഹൈക്രിമിനല്‍ കോടതി വധശിക്ഷ വിധിച്ചു. താമരശ്ശേരി പരപ്പന്‍പൊയില്‍ ജീനാല്‍തൊടുകയില്‍ ജെ ടി അബ്ദുള്ളക്കുട്ടി മാസ്റ്ററുടെ മകന്‍ അബ്ദുല്‍ നഹാസ്(33) ആണ് 2018 ജൂലൈ മൂന്നിന് കൊല്ലപ്പെട്ടത്. ഫോണില്‍ ബന്ധപ്പെട്ടിട്ടും കിട്ടാത്തതിനെ തുടര്‍ന്ന് സുഹൃത്തുക്കള്‍ അന്വേഷിച്ച് ചെന്നപ്പോഴാണ് ഹൂറ എക്‌സിബിഷന്‍ റോഡില്‍ അല്‍ അസൂമി മജ്‌ലിസിന് സമീപമുള്ള താമസ സ്ഥലത്ത് നഹാസിനെ കൊല്ലപ്പെട്ട നിലയില്‍ കണ്ടെത്തിയത്. കൈകാലുകള്‍ ബന്ധിപ്പിച്ച നിലയിലായിരുന്നു മൃതദേഹം. തലക്ക് അടിയേറ്റതിന്റെ അടയാങ്ങളുമുണ്ടായിരുന്നു. തെളിവുകള്‍ നശിപ്പിക്കാനായി നിലത്ത് മുളക്‌പൊടി വിതറിയിരുന്നതായും എണ്ണ ഒഴിച്ചിരുന്നതായും കണ്ടെത്തിയിരുന്നു. തുടര്‍ന്ന് നടന്ന അന്വേഷണത്തില്‍ സ്ഥലത്തെ സി സി ടി വി ദൃശ്യങ്ങളില്‍ നിന്നും പ്രതിയായ സുഡാനി പൗരന്റെ ദൃശ്യം ലഭിക്കുകയും അറസ്റ്റ് നടത്തുകയുമായിരുന്നു. നാല് വര്‍ഷമായി ബഹ്‌റൈനില്‍ ജോലി ചെയ്ത് വന്ന അബ്ദുല്‍ നഹാസ് വിസയോ മതിയായ രേഖകളോ ഇല്ലാതെയായിരുന്നു കഴിഞ്ഞിരുന്നതെന്നും അന്വേഷണത്തില്‍ തെളിഞ്ഞിരുന്നു. ഹോളിവുഡ് സിനിമയില്‍ നിന്നുള്ള പ്രചോദനം ഉള്‍ക്കൊണ്ടാണ് കൊല നടത്തിയതെന്ന് കേസിന്റെ വിചാരണക്കിടെ പ്രതി പറഞ്ഞു.
 
കേരളത്തിലെ പുതിയ റോഡുകളുടെ ഗുണനിലവാരം ദേശീയപാതയുടേതിന് തുല്യം: മന്ത്രി ജി സുധാകരന്‍
മാത്തറ: ഈ സര്‍ക്കാരിന്റെ കാലയളവില്‍ കേരളത്തില്‍ നിര്‍മ്മിച്ച റോഡുകളുടെ ഗുണനിലവാരം ദേശീയപാതയുടേതിന് തുല്യമെന്ന് രജിസ്‌ട്രേഷന്‍ പൊതുമരാമത്ത് മന്ത്രി ജി സുധാകരന്‍. അത്യാധുനിക രീതിയില്‍ ദേശീയപാതയുടെ കിലോമീറ്ററിന് ചിലവാക്കുന്ന അത്രയും ഫണ്ട് ഉപയോഗിച്ച് അതേ ഗുണനിലവാരത്തിലാണ് സംസ്ഥാനത്തെ റോഡുകള്‍ നിര്‍മ്മിക്കുന്നത്. നവീകരിച്ച അരീക്കാട്- മാത്തറ- പാലാഴി- കോവൂര്‍ റോഡിന്റെയും ഒടുമ്പ്ര കാവില്‍താഴം റോഡ് നവീകരണ പ്രവൃത്തിയുടെയും ഉദ്ഘാടനം നിര്‍വഹിച്ച് സംസാരിക്കുകയായിരുന്നു അദ്ദേഹം. ഭരണപക്ഷമെന്നോ പ്രതിപക്ഷമെന്നോ ഉള്ള വിവേചനം ഇല്ലാതെ സമഗ്ര വികസനം എന്ന കാഴ്ചപ്പാടാണ് കേരളത്തിലെ സര്‍ക്കാരിനുള്ളത്. അതുപോലെ നിയമങ്ങള്‍ക്കനുസരിച്ച് പ്രവര്‍ത്തിക്കാന്‍ ഉദ്യോഗസ്ഥര്‍ തയ്യാറാകണം. അല്ലാത്തപക്ഷം അത്തരത്തിലുള്ള ഉദ്യോഗസ്ഥര്‍ക്കെതിരെ കര്‍ശന നടപടി സ്വീകരിക്കുമെന്നും അദേഹം പറഞ്ഞു. കോഴിക്കോട് പാര്‍ലമെന്റ് മണ്ഡലത്തിലെ കുന്ദമംഗലം, കോഴിക്കോട് സൗത്ത്, ബേപ്പൂര്‍ എന്നീ നിയോജക മണ്ഡലങ്ങളില്‍ കൂടി കടന്ന് പോകുന്ന മാത്തറ- അരീക്കാട്- പാലാഴി- കോവൂര്‍ റോഡിന്റെ പ്രവൃത്തി കേന്ദ്ര റോഡ് ഫണ്ടില്‍ നിന്നും 10 കോടി രൂപ ചെലവിലാണ് പൂര്‍ത്തീകരിച്ചത്.
 
രാഹുല്‍ ഗാന്ധിയുടെ മറുപടി വന്നു; ഫ്ളക്സ് വിവാദം വഴിത്തിരിവില്‍
തിരുവമ്പാടി: തിരുവമ്പാടി നിയോജക മണ്ഡലത്തിലെ വിവിധ പദ്ധതികളുടെ ഉദ്ഘാടന ചടങ്ങിന്റെ ഫ്‌ളക്‌സില്‍ രാഹുല്‍ ഗാന്ധിയുടെ ഫോട്ടോ ഉള്‍പ്പെടുത്തിയതുമായി ബന്ധപ്പെട്ട വിവാദം വഴിത്തിരിവില്‍. പരിപാടിയിലേക്ക് ക്ഷണിച്ചതില്‍ സന്തോഷമുണ്ടെന്നും എല്ലാ പിന്തുണയും അറിയിക്കുന്നുവെന്നും രാഹുല്‍ ഗാന്ധിയുടെ മറുപടി. ഉദ്ഘാടന പരിപാടികളില്‍ മുഖ്യാതിഥിയായി വയനാട് എം പി യായ രാഹൂല്‍ ഗാന്ധിയെ ഉള്‍പ്പെടുത്തിയതിനെതിരെ യു ഡി എഫ് രംഗത്തെത്തിയിരുന്നു. രാഹുല്‍ ഗാന്ധിയെ ചെറുതാക്കി കാണിക്കാന്‍ അനുവാദമില്ലാതെ ഫോട്ടോ ഉള്‍പ്പെടുത്തിയെന്നായിരുന്നു ആരോപണം. പരിപാടിക്ക് ക്ഷണിക്കാതെയാണ് ഫ്‌ളകിസില്‍ ഫോട്ടോയം പേരും ഉള്‍പ്പെടുത്തിയതെന്നും ആരോപണം ഉയര്‍ന്നിരുന്നു. നവീകരിച്ച ചുരം റോഡിന്റെ ഉദ്ഘാടനം ഉള്‍പ്പെടെയുള്ള പരിപാടികളുടെ ഫ്‌ളക്‌സ് ബോര്‍ഡില്‍ മുഖ്യമന്ത്രിക്കും പൊതുമരാമത്ത് വകുപ്പു മന്ത്രിക്കും ശേഷമാണ് രാഹുല്‍ ഗാന്ധിയുടെ ഫോട്ടോ ഉള്‍പ്പെടുത്തിയത്. ജോര്‍ജ് എം തോമസ് എം എല്‍ എ ഇത് ഫെയ്‌സ്ബുക്കില്‍ ഷെയര്‍ ചെയ്തതോടെയാണ് വിവാദം ആളിക്കത്തിയത്.
 
താമരശ്ശേരി സഹകരണ കാര്‍ഷിക വികസന ബേങ്കില്‍ സംഘര്‍ഷം സൃഷ്ടിച്ച യു ഡി എഫ് നേതാക്കള്‍ക്കെതിരെ കേസ്
താമരശ്ശേരി: സഹകരണ കാര്‍ഷിക വികസന ബേങ്കില്‍ സംഘര്‍ഷം സൃഷ്ടിച്ച യു ഡി എഫ് നേതാക്കള്‍ക്കെതിരെ കേസ്. ജില്ലാ പഞ്ചായത്ത് അംഗം വി ഡി ജോസഫ്, ഡി സി സി ഭാരവാഹികളായ പി സി ഹഹീബ് തമ്പി, എം വിജയകുമാര്‍ എന്നിവര്‍ ഉള്‍പ്പെടെ അഞ്ചുപേര്‍ക്കെതിരെയാണ് താമരശ്ശേരി പോലീസ് കേസെടുത്തത്. വെള്ളിയാഴ്ച രാവിലെ പതിനൊന്നരയോടെയായിരുന്നു സംഭവം. ബേങ്ക് ഭരണ സമിതിയുടെ തിരഞ്ഞെടുപ്പ് ഹൈക്കോടതി റദ്ദാക്കിയെന്നും ഭരണ സമിതി പിരിച്ചു വിടണമെന്നും ആവശ്യപ്പെട്ടായിരുന്നു യു ഡി എഫ് നേതാക്കള്‍ ബേങ്കിലെത്തിയത്. ഇവര്‍ ആവശ്യപ്പെട്ട പ്രകാരം സെക്രട്ടറി ഒപ്പിട്ടു നല്‍കാതിരുന്നതോടെ വാക്കേറ്റവും ബഹളവുമായി. സെക്രട്ടറി അറിയിച്ചതിനെ തുടര്‍ന്ന് പോലീസ് എത്തിയെങ്കിലും പ്രതിഷേധക്കാര്‍ സ്ഥലം വിട്ടിരുന്നു. തുടര്‍ന്ന് സെക്രട്ടറി നല്‍കിയ പരാതിയിലാണ് കേസെടുത്തത്.
 
കൊടുവള്ളിയില്‍ ജ്വല്ലറി കുത്തിത്തുറന്ന് കവര്‍ച്ച നടത്തിയ ഇതര സംസ്ഥാന മോഷ്ടാക്കള്‍ക്ക് ആറ് വര്‍ഷം തടവും പിഴയും
താമരശ്ശേരി: ജ്വല്ലറി കുത്തിത്തുറന്ന് ലക്ഷങ്ങളുടെ കവര്‍ച്ച നടത്തിയ ഇതര സംസ്ഥാന മോഷ്ടാക്കള്‍ക്ക് ആറ് വര്‍ഷം തടവും പിഴയും. കൊടുവള്ളിയിലെ സില്‍സില ജ്വല്ലറിയില്‍ കവര്‍ച്ച നടത്തിയ സംഭവത്തിലാണ് താമരശ്ശേരി ജുഡീഷ്യല്‍ ഫസ്റ്റ് ക്ലാസ് മജിസ്‌ട്രേറ്റ് വിധി പ്രസ്ഥാവിച്ചത്. കേസിലെ ഒന്നാം പ്രതി പശ്ചിമബംഗാള്‍ സ്വദേശി അക്രൂ സമാന്‍, രണ്ടാം പ്രതി മാള്‍ഡാ സ്വദേശി സപന്‍ രജക് എന്നിവര്‍ക്ക് മൂന്ന് സെക്ഷനുകള്‍ പ്രകാരം രണ്ട് വര്‍ഷം വീച് തടവും മുപ്പതിനായിരം രൂപ പിഴയും മൂന്നാം പ്രതി പശ്ചിമബംഗാള്‍ സ്വദേശി മൊബൂദ് ഹുസ്സൈന് ഒരു വര്‍ഷം തടവും മുപ്പതിനായിരം രൂപ പിഴയുമാണ് വിധിച്ചത്. ഒന്ന്, രണ്ട് പ്രതികള്‍ ശിക്ഷ ഒരുമിച്ച് രണ്ട് വര്‍ഷം അനുഭവിച്ചാല്‍ മതി. പിഴ അടച്ചില്ലെങ്കില്‍ ആറ് മാസം കൂടുതല്‍ തടവ് അനുഭവിക്കണം. 2018 മെയ് 17 ന് രാത്രിയായിരുന്നു കൊടുവള്ളിയെ ഞെട്ടിച്ച കവര്‍ച്ച നടന്നത്. ദേശീയപാതയോരത്ത് പ്രവര്‍ത്തിക്കുന്ന സില്‍സില ജ്വല്ലറിയുടെ ചുമര്‍ തുരന്ന് 3 കിലോയോളം സ്വര്‍ണവും 3 കിലോയോളം വെള്ളിയും രണ്ട് ലക്ഷം രൂപയുമാണ് കൊള്ളയടിച്ചത്. 18 ന് രാവിലെ കട തുറക്കാനെത്തിയപ്പോഴാണ് മോഷണ വിവരം പുറത്തറിഞ്ഞത്. കൊടുവള്ളി പോലീസ് നടത്തിയ പഴുതടച്ച അന്വേഷണത്തില്‍ ദിവസങ്ങള്‍ക്കകം പ്രിതകളെ കുറിച്ച് സൂചന ലഭിക്കുകയും കൊടുവള്ളി ഇന്‍സ്‌പെക്ടര്‍ പി ചന്ദ്രമോഹന്‍, എസ് ഐ കെ പ്രജീഷ് എന്നിവരുടെ നേതൃത്വത്തിലുള്ള സംഘം പശ്ചിമ ബംഗാളിലേക്ക് പുറപ്പെടുകയും ചെയ്തു. മാള്‍ഡ ജില്ലയിലെ ഗംഗപ്രസാദ് സ്വദേശിയായ അക്രൂ സമാനെയാണ് ആദ്യം പിടികൂടിയത്. ഇയാളെ ചോദ്യം ചെയ്തതില്‍ നിന്നും ലഭിച്ച വിവരത്തിന്റെ അടിസ്ഥാനത്തില്‍ അന്വേഷണ സംഘം ജാര്‍ഘണ്ഡില്‍ എത്തിയെങ്കിലും പ്രതി രക്ഷപ്പെട്ടിരുന്നു. നാട്ടില്‍ തിരിച്ചെത്തിയ അന്വേഷണ സംഘം വീണ്ടും ജാര്‍ഘണ്ഡിലെത്തി രാധാനഗര്‍ പോലീസിന്റെ സഹായത്തോടെ ഉദുവ സ്വദേശിയായ സപന്‍ രജകിനെ അറസ്റ്റ് ചെയ്തു. തുടര്‍ന്ന് പശ്ചിമ ബംഗാളിലെത്തി മാള്‍ഡ ജില്ലയിലെ മൊത്ത ബാരി സ്വദേശിയായ മബൂദ് ഹുസൈനെ പിടികൂടി. ആദ്യം അറസ്റ്റിലായ അക്രൂ സമാനെ ജാമ്യത്തില്‍ ഇറക്കാനായി അഭിഭാഷകന്‍ കോടതിയെ സമീപിച്ചെങ്കിലും ജാമ്യാപേക്ഷയെ പോലീസ് എതിര്‍ക്കുകയും 2018 ആഗസ്റ്റ് 23 ന് താമരശ്ശേരി ജഡീഷ്യല്‍ ഫസ്റ്റ് ക്ലാസ് മജിസ്ട്രേറ്റ് കോടതിയില്‍ കുറ്റപത്രം സമര്‍പ്പിക്കുകയും ചെയ്തിരുന്നു. മാവോയിസ്റ്റ് മേഖലകളില്‍ നിന്നും പ്രദേശവാസികളുടെ എതിര്‍പ്പ് അവഗണിച്ച് അതി സാഹസികമായാണ് പോലീസ് കവര്‍ച്ചക്കാരെ പിടികൂടിയത്.
 
വികസന പാതയില്‍ താമരശ്ശേരി ചുരം റോഡ്; മൂന്ന്, അഞ്ച് വളവുകളിലെ നവീകരണം പൂര്‍ത്തിയായി
താമരശ്ശേരി: ചുരം മൂന്ന്, അഞ്ച് വളവുകളിലെ നവീകരണം പൂര്‍ത്തിയായി. പ്രളയത്തില്‍ ഇടിഞ്ഞ്താഴ്ന്ന ഭാഗത്ത് കൂറ്റന്‍ കോണ്‍ക്രീറ്റ് മതില്‍, മൂന്ന്, അഞ്ച് വളവുകള്‍ വീതി കൂട്ടി നവീകരിക്കല്‍, തകര്‍ന്ന പാര്‍ശ്വഭിത്തികളുടെ നവീകരണം എന്നിവയാണ് പൂര്‍ത്തിയായത്. പൂര്‍ത്തിയായ പ്രവൃത്തികള്‍ 13 ന് ശനിയാഴ്ച രാവിലെ 11 മണിക്ക് രണ്ടാം വളവില്‍ മന്ത്രി ജി സുധാകരന്‍ ഉദ്ഘാടനം ചെയ്യും. 2018 ജൂണ്‍ 14നുണ്ടായ കനത്ത മഴയിലാണ് ചുരം റോഡില്‍ ഒന്നാം വളവിനും ചിപ്പിലിത്തോടിനുമിടയില്‍ റോഡ് പകുതിയോളമിടിഞ്ഞ് ഗതാഗതം പൂര്‍ണമായി നിലച്ചത്. ഇതോടെ വയനാട് ജില്ല ഒറ്റപ്പെട്ട നിലയിലായിരുന്നു. റോഡ് ഇടിഞ്ഞതിന് ഇരു ഭാഗത്ത് നിന്നും കെ എസ് ആര്‍ ടി സി സര്‍വീസ് നടത്തിയാണ് ഗതാഗതം താല്‍ക്കാലികമായി അന്ന് നിയന്ത്രിച്ചത്. പിന്നീട് ഇടിഞ്ഞതിന് സമീപത്തുകൂടി താല്‍ക്കാലിക റോഡ് നിര്‍മ്മിച്ചു വാഹനങ്ങള്‍ കടത്തി വിടുകയായിരുന്നു. ആറ് കോടി ചെലവഴിച്ചാണ് മൂന്ന്, അഞ്ച് വളവുകളിലെ പ്രവൃത്തികള്‍ പൂര്‍ത്തിയാക്കിയത്. വനംഭൂമി ഏറ്റെടുത്ത് ചുരത്തിലെ മുടിപ്പിന്‍ വളവുകള്‍ വീതി കൂട്ടി നവീകരിക്കുകയെന്ന വര്‍ഷങ്ങളായുള്ള ആനശ്യത്തിനാണ് പരിഹാരമാകുന്നത്. 18 മീറ്റര്‍ ബി എം ബി സി ടാറിങ് അടക്കം 25 മീറ്ററിലധികമാണ് രണ്ടു വളവുകളിലും വീതി വര്‍ധിച്ചത്. കൂടാതെ സംരക്ഷണഭിത്തി, പാര്‍ശ്വഭിത്തി, ഓവുചാല്‍ എന്നിവയും നിര്‍മ്മിച്ചു. വനഭൂമി, സംസ്ഥാന സര്‍ക്കാറിന്റെ ശക്തമായ ഇടപെടലിന്റെ ഭാഗമായാണ് വിട്ടുകിട്ടിയത്. മൂന്ന്, അഞ്ച്, ആറ്, ഏഴ്, എട്ട് വളവുകള്‍ വീതികൂട്ടി നവീകരിക്കുന്നതിനായി 0.92 ഹെക്ടര്‍ ഭൂമിയാണ് പൊതുമരാമത്ത് വകുപ്പിന് കൈമാറിയത്. ഭൂമി വിട്ടുകിട്ടുന്നതിന് 35.02 ലക്ഷം സംസ്ഥാന സര്‍ക്കാര്‍ കേന്ദ്രസര്‍ക്കാറിലേക്ക് അടച്ചു. ഇതോടെയാണ് ചുരം വളവുകള്‍ വീതികൂട്ടുന്ന പ്രവൃത്തികള്‍ക്ക് തുടക്കമായത്. ഡിസംബറില്‍ ആരംഭിച്ച മൂന്ന്, അഞ്ച് വളവുകളിലെ പ്രവൃത്തികള്‍ ജൂണ്‍ അവസാനവാരത്തോടെ പൂര്‍ത്തിയായി. ആറ്, ഏഴ്,എട്ട് വളവുകളിലെ നവീകരണ പ്രവൃത്തികള്‍ക്കായി 40 കോടിയുടെ പദ്ധതി നിര്‍ദ്ദേശം സര്‍ക്കാറിലേക്ക് സമര്‍പ്പിച്ചിട്ടുണ്ട്. ആറ്, ഏഴ്, എട്ട് വളവുകള്‍ കൂടി നവീകരിക്കുന്നതോടെ ചുരം റോഡിലെ യാത്രാക്ലേശം പൂര്‍ണമായി പരിഹരിക്കുവാന്‍ കഴിയുമെന്നാണ് പ്രതീക്ഷിക്കുന്നതെന്ന് ദേശീയപാതാ വിഭാഗം എക്‌സിക്യുട്ടീവ് എഞ്ചിനിയര്‍ കെ വിനയരാജ് പറഞ്ഞു.
 
നിര്‍ധന കുടുംബത്തിന് വീടൊരുക്കി പീപ്പിള്‍സ് ഫൗണ്ടേഷന്‍
തെയ്യപ്പാറ: കാലവര്‍ഷക്കെടുതിയില്‍ ദുരിതത്തിലായ തെയ്യപ്പാറയിലെ നിര്‍ധന കുടുംബത്തിന് പീപ്പിള്‍സ് ഫൗണ്ടേഷന്‍ വീടൊരുക്കി. പ്രളയാനന്തര ഭവന പദ്ധതിയുടെ ഭാഗമായി പണിത വീടിന്റെ സമര്‍പ്പണം ജമാഅത്തെ ഇസ്‌ലാമി ജില്ലാ പ്രസിഡണ്ട് വി വി ബഷീര്‍ നിര്‍വഹിച്ചു. എം എ യൂസുഫ് ഹാജി അധ്യക്ഷത വഹിച്ചു. വാര്‍ഡ് മെമ്പര്‍ സജ്‌ന രാമന്‍കുട്ടി പരിപാടി ഉദ്ഘാടനം ചെയ്തു. വാര്‍ഡ് വികസന സമിതി കണ്‍വീനര്‍ ഇബ്രാഹിം തട്ടൂര്‍, ചന്ദ്രന്‍ കല്ലുരുട്ടി, തങ്കച്ചന്‍, അബൂബക്കര്‍ മൗലവി എന്നിവര്‍ സംസാരിച്ചു. ആര്‍ കെ അബ്ദുല്‍ മജീദ് സ്വാഗതവും അബ്ദു റഹിമാന്‍ നന്ദിയും പറഞ്ഞു.
 
മുക്കത്ത് തെരുവ് നായയ്ക്ക് പേവിഷബാധ സ്ഥിരീകരിച്ചു: കടിയേറ്റവര്‍ ഭീതിയില്‍; ഇന്നും നിരവധി പേര്‍ക്ക് കടിയേറ്റു
മുക്കം: കഴിഞ്ഞ ശനിയാഴ്ച മുക്കം കെ ഡി സി ബാങ്കിന് സമീപം ചത്ത നിലയില്‍ കണ്ടെത്തിയ നായയ്ക്ക് പേവിഷബാധ സ്ഥിരീകരിച്ചു. നായയെ പൂക്കാട് വെറ്റിനറി ആശുപത്രിയിലെത്തിച്ച് നടത്തിയ പരിശോധനയിലാണ് പേവിഷബാധ സ്ഥിരീകരിച്ചത്. ജൂണ്‍ 30 ന് ഈ നായ 17 പേരെ കടിച്ച് പരിക്കേല്‍പ്പിച്ചിരുന്നു. അന്ന് കടിയേറ്റവര്‍ക്ക് രണ്ടു തവണ കുത്തിവെപ്പ് നടത്തിയിരുന്നെന്നും ഇവര്‍ ഒരു തവണ കൂടി കുത്തിവയ്‌പ്പെടുക്കണമെന്നും നഗരസഭാ സെക്രട്ടറി അറിയിച്ചു. അതിനിടെ ഇന്നും തെരുവ് നായയുടെ അക്രമത്തില്‍ നിരവധി പേര്‍ക്ക് പരിക്കേറ്റു. മുത്തേരിയില്‍ രണ്ട് പേര്‍ക്ക് നായയുടെ കടിയേറ്റു. രാവിലെ ഒമ്പത് മണിയോടെ സ്‌കൂളില്‍ പോവുകയായിരുന്ന അഭയ് എന്ന വിദ്യാര്‍ത്ഥിക്കും സരോജിനി എന്ന സ്ത്രീക്കുമാണ് കടിയേറ്റത്. ഇവരെ മുക്കം ഹെല്‍ത്ത് സെന്ററില്‍ എത്തിച്ചു പ്രാഥമിക ചികിത്സ നല്‍കിയതിനു ശേഷം കോഴിക്കോട് മെഡിക്കല്‍ കോളേജ് ആശുപത്രിയില്‍ പ്രവേശിപ്പിച്ചു. ബാക്കി കടിയേറ്റവരും കോഴിക്കോട് മെഡിക്കല്‍ കോളേജില്‍ ചികിത്സ നേടിയതായാണ് വിവരം. അതേ സമയം വ്യാഴാഴ്ച തെരുവ് നായയുടെ കടിയേറ്റ 4 പേര്‍ വലിയ ഭീതിയിലാണിപ്പോള്‍. കാരശ്ശേരി ബാങ്കിന് മുന്‍വശം, മുക്കം കടവ് പാലത്തിന് സമീപം, കാര മൂല എന്നിവിടങ്ങളില്‍ വെച്ചാണ് 4 പേര്‍ക്ക് കടിയേറ്റത്. ഈ സാഹചര്യത്തില്‍ മുക്കം നഗരസഭാ പരിധിയിലെ വിവിധയിടങ്ങളില്‍ പൊതുജനങ്ങള്‍ക്ക് ഭീഷണി സൃഷ്ടിക്കുന്ന തെരുവ് നായ് ശല്യത്തിനെതിരെ നടപടി സ്വീകരിക്കണമെന്ന് ആവശ്യപ്പെട്ട് എന്റെ മുക്കം ചാരിറ്റബിള്‍ സൊസൈറ്റി മുക്കം നഗരസഭാ സെക്രട്ടറിക്ക് നിവേദനം നല്‍കി. എന്റെ മുക്കം പ്രസിഡന്റ് സലീം പൊയിലില്‍, ജനറല്‍ സെക്രട്ടറി എന്‍ ശശികുമാര്‍, ട്രഷറര്‍ എം കെ മമ്മദ് ഉപദേശക സമിതി മെമ്പര്‍മാരായ ബക്കര്‍ കളര്‍ബലൂണ്‍, തുടങ്ങിയവരുടെ നേതൃത്വത്തിലാണ് നിവേദനം നല്‍കിയത്.
 
അമിത വേഗത ചോദ്യം ചെയ്തതിന് ടൂറിസ്റ്റ് വാന്‍ ഡ്രൈവറും സംഘവും മര്‍ദ്ദിച്ച് ചികിത്സയിലായിരുന്ന യുവാവ് മരിച്ചു
വടകര: അമിത വേഗത ചോദ്യം ചെയ്തതിന് ടൂറിസ്റ്റ് വാന്‍ ഡ്രൈവറും സംഘവും ക്രൂരമായി മര്‍ദ്ദിച്ച് ചികിത്സയിലായിരുന്ന യുവാവ് മരിച്ചു. ചോറോട് പെരുമന കൂടത്തില്‍ സി കെ വിനോദ് ആണ് മരിച്ചത്. സുഹൃത്തിനൊപ്പം മാഹി ഗവ. ആശുപത്രിക്ക് സമീപം ദേശീയപാതയിലൂടെ നടന്നുപോകുമ്പോള്‍ തിങ്കളാഴ്ച രാത്രിയാണ് വിനോദ് അക്രമത്തിനിരയായത്. വാന്‍ അമിത വേഗതയിലായിരുന്നതിനെചൊല്ലി വാക്ക് തര്‍ക്കമുണ്ടാവുകയും ഇതിന്റെ പേരില്‍ ടൂറിസ്റ്റ് വാന്‍ ഡ്രൈവറും സംഘവും വിനോദിനെയും സുഹൃത്തിനെയും സാരമായി മര്‍ദ്ദിക്കുകയുമായിരുന്നു. വിനോദ് റോഡില്‍ തലയിടിച്ച് വീണു. സാരമായി പരിക്കേറ്റ വിനോദിനെ മാഹി ആശുപത്രിയിലും പിന്നീട് തലശ്ശേരി ആശുപത്രിയിലും എത്തിച്ചു. സ്ഥിതി ഗുരുതരമായതിനാല്‍ കോഴിക്കോട് മെഡിക്കല്‍ കോളജ് ആശുപത്രിയിലേക്ക് മാറ്റുകയായിരുന്നു. അക്രമത്തില്‍ സുഹൃത്തിനും പരിക്കേറ്റിരുന്നു. അത്യാസന്ന നിലയില്‍ വെന്റിലേറ്ററിലായിരുന്ന വിനോദ് വെള്ളിയാഴ്ച രാവിലെ മരിച്ചു. മടപ്പള്ളി ആശാരിക്കോട്ട പരേതരായ ചന്തുവിന്റെയും പാറുവിന്റെയും മകനാണ് വിനോദ്. ഭാര്യ: പ്രബിത. സഹോദരങ്ങള്‍: അശോകന്‍, മനോജന്‍, ശോഭ, ശൈല.
 
പൂളക്കോട് വില്ലേജ് ഓഫീസ് സ്റ്റാഫ് ക്വാട്ടേഴ്‌സ് മന്ത്രി ഇ ചന്ദ്രശേഖരന്‍ ഉദ്ഘാടനം ചെയ്തു
ചാത്തമംഗലം: ചാത്തമംഗലം ഗ്രാമപഞ്ചായത്തിലെ പൂളക്കോട് വില്ലേജ് ഓഫീസ് സ്റ്റാഫ് ക്വാട്ടേഴ്‌സ് റവന്യൂ വകുപ്പ് മന്ത്രി ഇ ചന്ദ്രശേഖരന്‍ ഉദ്ഘാടനം ചെയ്തു. രണ്ടു വര്‍ഷം കൊണ്ട് 146 വില്ലേജ് ഓഫീസുകള്‍ സ്മാര്‍ട്ട് വില്ലേജ് ഓഫീസുകളാക്കിയെന്ന് മന്ത്രി പറഞ്ഞു. സ്മാര്‍ട്ട് വില്ലേജ് ഓഫീസുകളാക്കുന്നതിന് മൂന്ന് ഘട്ടങ്ങളിലായി 1.16 കോടി രൂപയാണ് അനുവദിച്ചത്. ഈ സര്‍ക്കാര്‍ അധികാരത്തില്‍ വരുമ്പോള്‍ വില്ലേജ് ഓഫീസുകള്‍ പലതും ദയനീയ സാഹചര്യത്തിലായിരുന്നു. കുടിവെള്ളവും ടോയ്‌ലറ്റുമില്ലാത്തതായിരുന്നു പല ഓഫീസുകളും. ഇത് മനസിലാക്കിയ സര്‍ക്കാര്‍ മൂന്ന് മേഖലകളിലായി വില്ലേജ് ഓഫീസര്‍മാരുടെ യോഗം വിളിക്കുകയും പ്രശ്‌നപരിഹാരത്തിനുള്ള നടപടികള്‍ സ്വീകരിക്കുകയും ചെയ്തു. ആദ്യ ഒരു വര്‍ഷത്തിനുള്ളില്‍ ഓഫീസുകളിലെ പ്രശ്‌നങ്ങള്‍ പഠിച്ച് രണ്ടു വര്‍ഷത്തിനുള്ളിലാണ് പദ്ധതികള്‍ നടപ്പാക്കിയത്. തുടര്‍ന്ന് 267 വില്ലേജ് ഓഫീസുകള്‍ക്ക് അധികമായി മുറി നിര്‍മ്മിച്ചു. 230 വീതം ഓഫീസുകള്‍ക്ക് അറ്റകുറ്റപണികളും ചുറ്റുമതിലുമുണ്ടാക്കാനുള്ള നടപടികളും സ്വീകരിച്ചു. 1664 വില്ലേജ് ഓഫീസുകളില്‍ ആയിരത്തോളം ഓഫീസുകളിലെ അടിയന്തിര ആവശ്യങ്ങള്‍ മൂന്ന് വര്‍ഷത്തിനിടയില്‍ പരിഹരിക്കാന്‍ കഴിഞ്ഞു. ബാക്കിയുള്ളവയിലെ ആവശ്യങ്ങള്‍ ഉടന്‍ തന്നെ നടപ്പാക്കുമെന്നും മന്ത്രി പറഞ്ഞു.
 
 
 
 

All rights reserved | Website developed and maintained by Zyonz Technologies