11-Dec-2018 (Tue)
 
 
 
റോഡ് തകര്‍ന്ന് ടിപ്പര്‍ ലോറി കെട്ടിടത്തിലേക്ക് മറിഞ്ഞു
താമരശ്ശേരി: റോഡ് തകര്‍ന്ന് മെറ്റല്‍ കയറ്റിയ ടിപ്പര്‍ ലോറി കെട്ടിടത്തിന് മുകളിലേക്ക് മറിഞ്ഞു. താമരശേരി ചുങ്കം കമ്മട്ടിയേരിക്കുന്ന് റോഡിലായിരുന്നു അപകടം. റോഡ് പ്രവര്‍ത്തിക്കായി മെറ്റലുമായി എത്തിയ ലോറിയാണ് കയറ്റത്തില്‍ റോഡിന്റെ ഒരു ഭാഗം ഇടിഞ്ഞതിനെ തുടര്‍ന്ന് സമീപത്തെ കെട്ടിടത്തിന് മുകളിലേക്ക് മറിഞ്ഞത്.
 
കൊയിലാണ്ടി: കൊയിലാണ്ടി നഗരസഭ കുടുംബശ്രീ മിഷന്റെ നേതൃത്വത്തില്‍ നഗരത്തിലെത്തുന്ന സ്ത്രീകള്‍ക്കും വിവിധ സ്ഥാപനങ്ങളില്‍ പഠിക്കുന്ന കുട്ടികള്‍ക്കും ഹ്രസ്വകാല താമസത്തിനായുള്ള ഷീ ഹോസ്റ്റല്‍ സംവിധാനത്തിന്റെ ഉദ്ഘാടനം നഗരസഭ ചെയര്‍മാന്‍ അഡ്വ. കെ സത്യന്‍ നിര്‍വഹിച്ചു. നഗരസഭ എന്‍ യു എല്‍ എം പദ്ധതിയുടെ സ്വയം തൊഴില്‍ ഘടകത്തില്‍ ഉള്‍പ്പെടുത്തിയാണ് കുടുംബശ്രീ സംരംഭമായ സ്‌നേഹിത ഷീ ഹോസ്റ്റല്‍ കോമത്ത്കരയില്‍ പ്രവര്‍ത്തനം ആരംഭിച്ചത്. സ്ത്രീകള്‍ക്കെതിരെയുള്ള അക്രമങ്ങള്‍ വര്‍ദ്ധിച്ചു വരുന്ന കാലഘടത്തില്‍ ഷീ ഹോസ്റ്റല്‍ പോലുള്ള പദ്ധതികള്‍ ഏറെ ഉപകാരമാകും. നഗരസഭയിലെ സ്‌നേഹിത എന്ന കുടുംബശ്രീ യൂണിറ്റിനാണ് നടത്തിപ്പ് ചുമതല. കുടുംബശ്രീ സിഡിഎസ് പ്രവര്‍ത്തനത്തിന് മേല്‍നോട്ടം വഹിക്കും. അന്‍പതോളം പേര്‍ക്ക് ഒരേസമയം താമസിക്കാനും ഭക്ഷണമുള്‍പ്പെടെയുള്ള സൗകര്യങ്ങള്‍ ഉപയോഗപ്പെടുത്താനുമുതകുന്ന തരത്തിലാണ് ഹോസ്റ്റല്‍ നിര്‍മാണം. ചടങ്ങില്‍ വൈസ് ചെയര്‍പേഴ്‌സണ്‍ വി കെ പത്മിനി, കുടുംബശ്രീ ജില്ലാ മിഷന്‍ കോര്‍ഡിനേറ്റര്‍ പി സി കവിത, സ്റ്റാന്റ്ിംഗ് കമ്മിറ്റി ചെയര്‍മാന്‍മാരായ എന്‍ കെ ഭാസ്‌കരന്‍, കെ ഷിജു മാസ്റ്റര്‍, വി സുന്ദരന്‍ മാസ്റ്റര്‍, വി.കെ അജിത, ദിവ്യ സെല്‍വരാജ്, കൗണ്‍സിലര്‍മാരായ എസ്.കെ വിനോദ്, യു രാജീവന്‍ മാസ്റ്റര്‍, വി.പി ഇബ്രാഹിം കുട്ടി, കെ വി സുരേഷ്, നഗരസഭ സെക്രട്ടറി ഷെറില്‍ ഐറിന്‍ സോളമന്‍, എം തുഷാര തുടങ്ങിയവര്‍ സംസാരിച്ചു. സിഡിഎസ് ചെയര്‍പേഴ്‌സണ്‍മാരായ എം പി ഇന്ദുലേഖ സ്വാഗതവും യുകെ റീജ നന്ദിയും പറഞ്ഞു.
 
കോഴിക്കോട്: ജില്ലയില്‍ സെപ്തംബര്‍ മാസത്തില്‍ വിവിധ പ്രദേശങ്ങളില്‍ നിന്നായി എച്ച്1 എന്‍1 ബാധിച്ച് 32 കേസുകളും, 3 മരണങ്ങളും റിപ്പോര്‍ട്ട് ചെയ്യപ്പെട്ട സാഹചര്യത്തില്‍ ജനങ്ങള്‍ മുന്‍കരുതല്‍ സ്വീകരിക്കേണ്ടതാണെന്ന് ജില്ലാ മെഡിക്കല്‍ ഓഫീസര്‍ ഡോ. ജയശ്രീ വി അറിയിച്ചു. ഇന്‍ഫ്ളുവന്‍സ ടൈപ്പ് എ വൈറസ് മൂലമുണ്ടാകുന്ന ഒരു രോഗമാണ് എച്ച്1 എന്‍1. വായുവിലൂടെ എളുപ്പത്തില്‍ പകരുന്ന ഒരു സാംക്രമിക രോഗമാണിത്. ചുമക്കുമ്പോഴും, തുമ്മുമ്പോഴും സൂക്ഷ്മ കണങ്ങള്‍ വായുവിലൂടെ മറ്റൊരാളിലേക്ക് പകരുന്നു. കൂടാതെ രോഗി ഉപയോഗിക്കുന്ന വസ്തുക്കളിലൂടെയും 80% വരെ രോഗം പകരാനുളള സാധ്യതയുണ്ട്. സാധാരണ അന്തരീക്ഷ ഊഷ്മാവില്‍ വൈറസ് മിക്കപ്പോഴും നശിച്ചുപോകും. എന്നാല്‍ എയര്‍കണ്ടീഷന്‍ മുറികളില്‍ വൈറസ് കൂടുതല്‍ നേരം നിലനില്‍ക്കും. രോഗലക്ഷണങ്ങള്‍:- പനി, ചുമ, ശ്വാസം മുട്ടല്‍, ശരീര വേദന, തൊണ്ടവേദന, ജലദോഷം വിറയല്‍, ക്ഷീണം, പേശീവേദന തുടങ്ങിയവയാണ് രോഗലക്ഷണങ്ങള്‍. ചിലരില്‍ ഛര്‍ദ്ദിയും വയറിളക്കവും ഉണ്ടാകും. പനിക്കൊപ്പം സാധാരണയിലും കൂടുതല്‍ വേഗത്തില്‍ ഹൃദയമിടിക്കുക, നാഡീചലനം ധ്യതിയിലാവുക, രക്തസമ്മര്‍ദ്ദം ക്രമാതീതമായി കുറയുക എന്നീ ലക്ഷണങ്ങളുമുണ്ടാകാം. മുന്‍കരുതലുകള്‍:- * കൈകാലുകള്‍ വൃത്തിയായി സൂക്ഷിക്കുക. * സോപ്പും, വെളളവും ഉപയോഗിച്ച് ഇടക്കിടക്ക് കഴുകുക, * യാത്രക്ക് ശേഷം ഉടന്‍ കുളിക്കുക. * രോഗികളുമായുളള സമ്പര്‍ക്കം ഒഴിവാക്കുക. * രോഗലക്ഷണമുളളവര്‍ വീടുകളില്‍ പൂര്‍ണ്ണ വിശ്രമം എടുക്കുക. * തുമ്മുമ്പോഴും, ചുമക്കുമ്പോഴും, മൂക്കും വായയും തൂവാല ഉപയോഗിച്ച് പൊത്തിപ്പിടിക്കുക, ഉടന്‍ തന്നെ കൈ നന്നായി കഴുകുക. * വിദ്യാര്‍ത്ഥികളില്‍ രോഗലക്ഷണം കണ്ടാല്‍ സ്‌കൂളില്‍ വിടാതിരിക്കുക. സ്‌കൂളുകളില്‍ കൂടുതലായി രോഗം റിപ്പോര്‍ട്ടു ചെയ്യുകയാണെങ്കില്‍ രോഗവ്യാപനം തടയാന്‍ സ്‌കൂള്‍ അസംബ്ലി അത്യാവശ്യഘട്ടത്തില്‍ മാത്രം ചേരുക. * ധാരാളം വെളളം കുടിക്കുക/ നന്നായി ഉറങ്ങുക. * പോഷകാഹാരം കഴിക്കുക. * ഇളം ചൂടുളള പാനീയങ്ങള്‍ ഇടക്കിടെ കുടിക്കുക. * എത്രത്തോളം വിശ്രമം എടുക്കുന്നുവോ രോഗം ഭേദമാകുവാനുളള സാധ്യത അത്രയും വര്‍ദ്ധിക്കും.
 
ഗാന്ധിജയന്തി വാരാചരണം : പുതുപ്പാടിയില്‍ ദേശീയപാതയോര ശുചീകരണം
പുതുപ്പാടി: ഗാന്ധിജയന്തി വാരാചരണത്തിന്റെ ഭാഗമായി പുതുപ്പാടിയില്‍ ദേശീയപാതയോരം ശുചീകരിച്ചു. ദേശീയപാതയില്‍ പെരുമ്പള്ളി മുതല്‍ അടിവാരം ചുരം റോഡ് വരെയുള്ള 14 കിലോ മീറ്റര്‍ ദൂരത്തില്‍ ഇരു ഭാഗവും പ്ലാസ്റ്റിക് മാലിന്യങ്ങളടക്കമുള്ളവ നീക്കി ശുചീകരിക്കുകയും റോഡരികിലെ കാടുകള്‍ വെട്ടി മാറ്റുകയും ചെയ്തു. പഞ്ചായത്ത് ഭരണസമിതിയുടെ നേതൃത്വത്തില്‍ കുടുംബശ്രീ, തൊഴിലുറപ്പു പദ്ധതി തൊഴിലാളികള്‍ എന്നിവരുടെ സഹകരണത്തോടെയാണ് ശുചീകരണം നടത്തിയത്. പ്രളയത്തിലും മലവെള്ളപ്പാച്ചിലിലും വന്‍തോതിലുള്ള മാലിന്യമാണ് റോഡരികില്‍ വന്നടിഞ്ഞത്. ശുചീകരണം പെരുമ്പള്ളിയില്‍ പഞ്ചായത്ത് പ്രസിഡന്റ് അംബിക മംഗലത്ത് ഉദ്ഘാടനം ചെയ്തു. വൈസ് പ്രസിഡന്റ് കുട്ടിയമ്മമാണി അധ്യക്ഷത വഹിച്ചു. സ്റ്റാന്‍ഡിങ് കമ്മിറ്റി ചെയര്‍മാന്‍മാരായ എം ഇ ജലീല്‍, മുജീബ് മാക്കണ്ടി, ഗ്രാമ പഞ്ചായത്ത് അംഗങ്ങളായ കെ ജി ഗീത, കെ കെ നന്ദകുമാര്‍, പി കെ ഷൈജല്‍, ഷാഫി വളഞ്ഞപാറ, ആര്‍ എം അബ്ദുല്‍റസാക്ക്, മുത്തു അബ്ദുസലാം, ഉഷാകുമാരി, റീന ബഷീര്‍, ഫാത്തിമബീവി, സി ഡി എസ് ചെയര്‍പേഴ്സണ്‍ ബീന ചന്ദ്രന്‍, വൈസ് ചെയര്‍പേഴ്സണ്‍ ഷീബസജി, ശുചിത്വ മിഷന്‍ കോ-ഓര്‍ഡിനേറ്റര്‍ ലതച്തീഫ്, ജൂനിയര്‍ ഹെല്‍ത്ത് ഇന്‍സ്പെക്ടര്‍ ബഷീര്‍ എന്നിവര്‍ സംസാരിച്ചു.
 
പുതുപ്പാടിയില്‍ കെ എസ് ആര്‍ ടി സി ബസ്സും കാറും കൂട്ടിയിടിച്ച് നിരവധി പേര്‍ക്ക് പരുക്ക്
പുതുപ്പാടി: പുതുപ്പാടി എലോക്കരയില്‍ കാറും കെ എസ് ആര്‍ ടി സി ബസ്സും കൂട്ടിയിടിച്ച് കൈ കുഞ്ഞ് ഉള്‍പ്പെടെ നിരവധി പേര്‍ക്ക് പരുക്ക്. മാവേലിക്കരയില്‍ നിന്നും സുല്‍ത്താന്‍ബത്തേരി-സീതാമൗണ്ടിലേക്ക് പോവുകയായിരുന്ന കെ എസ് ആര്‍ ടി സി സൂപ്പര്‍ഫാസ്റ്റ് ബസ്സും വയയനാട് നിന്നും കോഴിക്കോട് തേഞ്ഞിപ്പലത്തേക്ക് പോവുകയായിരുന്ന കെ എല്‍ 65 എ 2931 നമ്പര്‍ കാറുമാണ് കൂട്ടിയിടിച്ചത്. ഈങ്ങാപ്പുഴക്ക് സമീപം എലോക്കരയില്‍ ഇന്നലെ വൈകിട്ട് ആറുമണിയോടെയായിരുന്നു അപകടം. അപകടത്തില്‍ സാരമായി പരുക്കേറ്റ കാര്‍ യാത്രക്കാരായ തേഞ്ഞിപ്പലം യൂനിവേഴ്‌സിറ്റി ദേവതിയാല്‍ സ്വദേശികളായ ജോസ്(62), ഭാര്യ നിര്‍മ്മല അംബിക(59), മകന്‍ ജോണ്‍ കെ ജോസിന്റെ ഭാര്യ ലിഞ്ചു(27), ഒരു വയസ്സുകാരനായ മകന്‍ മിഖായേല്‍ എന്നിവരെ കോഴിക്കോട് മെഡിക്കല്‍ കോളേജ് ആശുപത്രിയില്‍ പ്രവേശിപ്പിച്ചു. നിസ്സാര പരുക്കേറ്റ ബസ് യാത്രക്കാര്‍ക്ക് ഈങ്ങാപ്പുഴയിലെ സ്വകാര്യ ആശുപത്രിയില്‍ പ്രാഥമിക ചികിത്സ നല്‍കി. വയനാട് തിരുനെല്ലിയിലെ ലിഞ്ചുവിന്റെ വീട്ടില്‍ നിന്നും മടങ്ങവെ ഇവര്‍ സഞ്ചരിച്ച കാറ് മറ്റൊരു വാഹനത്തെ മറി കടക്കുന്നതിനിടെ ബസ്സില്‍ ഇടിക്കുകയായിരുന്നുവെന്ന് നാട്ടുകാര്‍ പറഞ്ഞു. കാറിനുള്ളില്‍ കുടുങ്ങിയവരെ നാട്ടുകാരും യാത്രക്കാരും ചേര്‍ന്ന് കാറ് വെട്ടിപ്പൊളിച്ചാണ് താമരശ്ശേരി താലൂക്കാശുപത്രിയിലും തുടര്‍ന്ന് കോഴിക്കോട് മെഡിക്കല്‍ കോളേജ് ആശുപത്രിയിലും എത്തിച്ചത്. നിയന്ത്രണം വിട്ട കെ എസ് ആര്‍ ടി സി ബസ്സ് റോഡരികില്‍ നിര്‍ത്തിയിട്ട ബൈക്ക് ഇടിച്ച് തെറിപ്പിച്ചു. അപകടത്തെ തുടര്‍ന്ന് അരമണിക്കൂറോളം ദേശീയപാതയില്‍ ഗതാഗതം തടസ്സപ്പെട്ടു. താമരശ്ശേരി പോലീസ് സ്ഥലത്തെത്തിയാണ് ഗതാഗതം നിയന്ത്രിച്ചത്.
 
വിദേശമദ്യവുമായി പുതുപ്പാടി സ്വദേശി പിടിയില്‍
പുതുപ്പാടി: 20 കുപ്പി വിദേശമദ്യവുമായി പുതുപ്പാടി സ്വദേശി എക്‌സൈസിന്റെ പിടിയില്‍. പുതുപ്പാടി ചെമ്മരംപറ്റ ആടുപാറയില്‍ ജോസിനെ (54) യാണ് താമരശ്ശേരി എക്‌സൈസ് റെയ്ഞ്ച് ഓഫീസിലെ പ്രിവന്റീവ് ഓഫീസര്‍ ചന്ദ്രന്‍ കുഴിച്ചാലിലും സംഘവും ചേര്‍ന്ന് അറസ്റ്റ് ചെയ്തത്. കെ എല്‍ 57 ക്യു 6544 നമ്പര്‍ സ്‌കൂട്ടറും എക്‌സൈസ് പിടിച്ചെടുത്തു. സ്‌കൂട്ടറില്‍ മദ്യം കടത്തിക്കൊണ്ടു വരുമ്പോള്‍ 26 ാം മൈല്‍ ചെമ്മരംപറ്റ റോഡില്‍ വെച്ചാണ് ഇയാള്‍ പിടിയിലായത്. സിവില്‍ എക്‌സൈസ് ഓഫീസര്‍മാരായ ടി നൗഫല്‍, ഷാജു സി ജി, അശ്വന്ത് വിശ്വന്‍, ഡ്രൈവര്‍ സുബൈര്‍ എന്നിവരടങ്ങിയ സംഘമാണ് വിദേശമദ്യം പിടികൂടിയത്.
 
നവീകരിച്ച പ്രസ്സ് ക്ലബ് ഉദ്ഘാടനവും അനുസ്മരണ സമ്മേളനവും നടത്തി
കൊടുവള്ളി: കൊടുവള്ളി പ്രസ് ക്ലബിന്റെ ആഭിമുഖ്യത്തില്‍ സ്ഥാപക പ്രസിഡന്റും എഴുത്തുകാരനുമായ എ കെ അസ്സയിന്‍ മാസ്റ്റര്‍ അനുസ്മരണ സമ്മേളനം സംഘടിപ്പിച്ചു. പരിപാടി കാരാട്ട് റസാഖ് എം എല്‍ എ ഉദ്ഘാടനം ചെയ്തു. നവീകരിച്ച പ്രസ് ക്ലബ് ഉദ്ഘാടനം അഡ്വ. പി ടി എ റഹീം എം എല്‍ എ നിര്‍വഹിച്ചു. ഗാനരചയിതാവ് പക്കര്‍ പന്നൂര്‍ അനുസ്മരണ പ്രഭാഷണം നടത്തി. മുതിര്‍ന്ന മാധ്യമ പ്രവര്‍ത്തകന്‍ ബഷീര്‍ ആരാമ്പ്രം, സംസ്ഥാന ഇന്റര്‍ ക്ലബ് ഹൈജംപ് സ്വര്‍ണമെഡല്‍ ജേതാവ് മുഹമ്മദ് ഹിഷാം, പ്ലസ് ടു ഉന്നത വിജയി കെ നാഫിയ ഫൈറൂസ് എന്നിവര്‍ക്കുള്ള ഉപഹാരങ്ങള്‍ നഗരസഭ ചെയര്‍പേഴ്‌സണ്‍ ഷരീഫ കണ്ണാടിപ്പൊയില്‍ സമ്മാനിച്ചു. പ്രസ് ക്ലബ് പ്രസിഡന്റ് കെ കെ എ ജബ്ബാര്‍ അധ്യക്ഷത വഹിച്ചു. നഗരസഭ ഡെപ്യൂട്ടി ചെയര്‍പേഴ്‌സണ്‍ എ പി മജീദ്, സ്ഥിരം സമിതി ചെയര്‍മാന്‍ കെ ബാബു, കൗണ്‍സിലര്‍മാരായ കെ ശിവദാസന്‍, ഒ പി റസാഖ്, ടി പി നാസര്‍, ഇ സി മുഹമ്മദ്, കൊടുവള്ളി എക്‌സൈസ് ഓഫീസര്‍ ഷാജു, മുന്‍ ഗ്രാമപ്പഞ്ചായത്ത് വൈസ് പ്രസിഡന്റ് പി സി വേലായുധന്‍, സി പി അബ്ദു റസാഖ്, കെ കെ ആലി, ടി കെ മുഹമ്മദ്, കെ വി അരവിന്ദാക്ഷന്‍, പി ടി മൊയ്തീന്‍കുട്ടി, പി ടി മുഹമ്മദ്, പ്രൊഫ. ഒ കെ മുഹമ്മദലി, റിട്ട. ഡെപ്യൂട്ടി കളക്ടര്‍ കെ കെ വിജയന്‍, ടി പി സി മുഹമ്മദ്, എം സി പ്രഭാകരന്‍, കെടയന്‍ മുഹമ്മദ്, സലീം നെച്ചൂളി, ടി എം മന്‍സൂര്‍ എന്നിവര്‍ സംസാരിച്ചു.സെക്രട്ടറി അഷ്‌റഫ് വാവാട് സ്വാഗതവും ട്രഷറര്‍ ബഷീര്‍ ആരാമ്പ്രം നന്ദിയും പറഞ്ഞു.
 
പൂനൂര്‍ പൂക്കോട് സ്വദേശി ദുബൈയില്‍ കുത്തേറ്റ് മരിച്ചു.
താമരശ്ശേരി: പൂനൂര്‍ സ്വദേശി ദുബൈയില്‍ കുത്തേറ്റ് മരിച്ചു. പൂക്കോട് വി കെ അബുവിന്റെ മകന്‍ അബ്ദുല്‍ റഷീദ്(42)ആണ് കൊല്ലപ്പെട്ടത്. ഞായറാഴ്ച രാത്രി പന്ത്രണ്ട് മണിയോടെയായിരുന്നു സംഭവം. ദുബൈ ജബല്‍ അലിയിലെ പാര്‍ക്കോ ഹൈപ്പര്‍ റെസ്റ്റോറന്റ് മാനേജര്‍ ആയിരുന്ന റഷീദിനെ താമസ സ്ഥലത്തിന് സമീപത്തുവെച്ച് പാക്കിസ്ഥാന്‍ സ്വദേശി കുത്തി കൊലപ്പെടുത്തുകയായിരുന്നുവെന്നാണ് ബന്ധുക്കള്‍ക്ക് വിവരം ലഭിച്ചത്. റസ്റ്റോറന്റ് ജീവനക്കാര്‍രന്റെ സുഹൃത്താണ് അക്രമിയെന്നാണ് വിവരം. ജീവനക്കാര്‍ക്കുള്ള താമസ സ്ഥലത്ത് മറ്റുള്ളവര്‍ താമസിക്കുന്നതിനെ റഷീദ് എതിര്‍ത്തിരുന്നു. ഇതില്‍ പ്രകോപിതനായാണ് അക്രമം നടത്തിയതെന്നാണ് സൂചന. തിങ്കളാഴ്ച പുലര്‍ച്ചെയാണ് വിവരം പുറത്തറിഞ്ഞത്.
 
പൊതുമരാമത്ത് റോഡുകള്‍ വെട്ടിപ്പൊളിക്കുന്ന അവസ്ഥക്ക് മാറ്റം വരുന്നു: ജി സുധാകരന്‍
താമരശ്ശേരി: പൊതുമരാമത്ത് റോഡുകളുടെ പ്രവൃത്തി പൂര്‍ത്തിയാക്കിയ ഉടനെ മറ്റു വകുപ്പുകള്‍ റോഡ് വെട്ടിപ്പൊളിച്ച് സര്‍ക്കാര്‍ ഖജനാവിന് വലിയ നഷ്ടം വരുത്തുന്ന സാഹചര്യം മാറുകയാണെന്ന് പൊതുമരാമത്ത് വകുപ്പുമന്ത്രി ജി സുധാകരന്‍ പറഞ്ഞു. കൈതപ്പൊയില്‍-കോടഞ്ചേരി-അഗസ്ത്യന്‍മുഴി റോഡിന്റെ നവീകരണ പ്രവൃത്തി തിരുവമ്പാടിയില്‍ ഉദ്ഘാടനം ചെയ്ത് സംസാരിക്കുകയായിരുന്നു അദ്ധേഹം. റോഡ് പരിപാലനത്തിനാണ് ഓരോ പ്രദേശത്തും സെക്ഷന്‍ ഓഫീസുകളില്‍ ഉദ്യോഗസ്ഥരെ നിയമിച്ചത്. എന്നാല്‍ പരിപാലനം കാര്യമായി നടക്കാറില്ല. ഈ അവസ്ഥക്ക് മാറ്റം വരികയാണ്. റോഡുകളുടെ ഇരു വശങ്ങളിലും റോഡിന് കുറുകെയും വലിയ കുഴലുകള്‍ സ്ഥാപിക്കുകയും ആവശ്യമുള്ള പൈപ്പുകളും കേബിളുകളും ഇതിലൂടെ കടത്തിവിടുകയും ചെയ്യുന്ന രീതിയാണ് നടപ്പിലാക്കുന്നത്. കൈതപ്പൊയില്‍ അഗസ്ത്യന്‍മുഴി റോഡിലും ഇത് പ്രാവര്‍ത്തികമാക്കും. വയനാട് ചുരം റോഡിന് ബദലായി നിര്‍ദ്ധേശിക്കപ്പെട്ട ആനക്കാംപൊയില്‍ കള്ളാടി മേപ്പാടി തുരങ്കപാത സര്‍ക്കാര്‍ അംഗീകരിച്ചതായും കൊങ്കണ്‍ റെയില്‍വെ കോര്‍പ്പറേഷന്‍ ഇതിന്നായി വിശദമായ രൂപരേഖ തയ്യാറാക്കിയതായും മന്ത്രി പറഞ്ഞു. കൊങ്കണ്‍ റെയില്‍വെ കോര്‍പ്പറേഷന്‍ തയ്യാറാക്കിയ റിപ്പോര്‍ട്ട് പ്രകാരം 5.5 കിലോമീറ്റര്‍ തുരങ്കം ഉള്‍പ്പെടെ നിര്‍മിക്കാന്‍ 680 കോടി രൂപയാണ് വേണ്ടത്. ഇത്ര വലിയ പദ്ധതി ഇതേ വരെ സംസ്ഥാന സര്‍ക്കാര്‍ നടപ്പാക്കിയിട്ടില്ല. ദേശീയ പാത അല്ലാത്തതിനാല്‍ കേന്ദ്ര സര്‍ക്കാറിന്റെ സഹായവും ലഭിക്കില്ല. ഇക്കാര്യം കേന്ദ്ര ഉപരിതല ഗതാഗത വകുപ്പ് മന്ത്രിയുമായി സംസാരിക്കും. തിരുവമ്പാടി മണ്ഡലത്തില്‍ മലയോര ഹൈവേക്ക് 144 കോടി വകയിരുത്തിയിട്ടുണ്ടെന്നും റോഡ് വീതി കൂട്ടുന്നതിന് ആവശ്യമായ സ്ഥലം വിട്ടുകിട്ടിയാല്‍ തുടര്‍ നടപടികള്‍ ആരംഭിക്കുമെന്നും മന്ത്രി പറഞ്ഞു.
 
മദ്യപ സംഘം ബാര്‍ അടിച്ച് തകര്‍ത്തു
താമരശ്ശേരി: മദ്യപ സംഘം ബാര്‍ അടിച്ച് തകര്‍ത്തു. താമരശ്ശേരി ചുങ്കത്ത് ദേശീയ പാതയോരത്ത് പ്രവര്‍ത്തിക്കുന്ന ഹസ്തിനപുരി ബാറിനു നേരെയാണ് എട്ടംഗ സംഘം അക്രമം നടത്തിയത്. ശനിയാഴ്ച രാത്രി പതിനൊന്നേ മുക്കാലോടെയായിരുന്നു സംഭവം. യാതൊരു പ്രകോപനവുമില്ലാതെയാണ് അക്രമം നടത്തിയതെന്ന് ബാറിലെ ജീവനക്കാര്‍ പറഞ്ഞു. റിസപ്ഷനിലെ കമ്പ്യൂട്ടറുകള്‍, പ്രിന്ററുകള്‍, ഫര്‍ണീച്ചറുകള്‍ എന്നിവയും മുന്‍ഭാഗത്തെയും കാബിനുകളുടെയും ചില്ലുകളും തകര്‍ക്കപ്പെട്ടു. നാല് ലക്ഷത്തോളം രൂപയുടെ നഷ്ടം കണക്കാക്കുന്നു. താമരശ്ശേരി എസ് ഐ സായൂജ് കുമാറിന്റെ നേതൃത്വത്തില്‍ സ്ഥലത്തെത്തിയ പോലീസ് നാലുപേരെ അറസ്റ്റ് ചെയ്തു. അമ്പായത്തോട് സ്വദേശികളായ പിലാക്കണ്ടി ബിപിന്‍ലാല്‍(29), കാറ്റാടിക്കുന്ന് സുജിത്ത്(26), ചെമ്പ്രക്കാട്ട് പുറായില്‍ ബിജീഷ്(27), ആനപ്പാറപൊയില്‍ പ്രവീണ്‍(32) എന്നിവരാണ് അറസ്റ്റിലായത്. താമരശ്ശേരി ജുഡീഷ്യല്‍ ഫസ്റ്റ് ക്ലാസ് മജിസ്‌ട്രേറ്റിന് മുന്നില്‍ ഹാജറാക്കിയ പ്രതികളെ 14 ദിവസത്തേക്ക് റിമാണ്ട് ചെയ്തു. സംഘത്തിലുണ്ടായിരുന്ന നാലുപേരെ കൂടി പിടികിട്ടാനുണ്ടെന്നും ഇവര്‍ക്കായി അന്വേഷണം ആരംഭിച്ചതായും പോലീസ് പറഞ്ഞു.
 
 
 
 

All rights reserved | Website developed and maintained by Zyonz Technologies