15-Oct-2019 (Tue)
 
 
 
കണ്ണോത്ത് പള്ളി വികാരിക്കെതിരെ വ്യാപാരി വ്യവസായി ഏകോപന സമിതി
കോടഞ്ചേരി: കണ്ണോത്ത് പള്ളി വികാരിയുടെ നേതൃത്വത്തില്‍ വ്യാപാരി വ്യവസായി ഏകോപന സമിതി നേതാക്കളെ അസഭ്യം പറഞ്ഞുകൊണ്ട് പ്രകടനം നടത്തിയ നടപടി ജനാധിപത്യ വിരുദ്ധമാണ് വ്യാപാരി വ്യവസായി ഏകോപന സമിതി ഭാരവാഹികള്‍ വാര്‍ത്താ സമ്മേളനത്തില്‍ പറഞ്ഞു. പള്ളിവകയായുള്ള കെട്ടിടം വാടകക്കെടുത്തതുമായി ബന്ധപ്പെട്ട് മാസങ്ങള്‍ക്ക് മുമ്പുണ്ടായ തര്‍ക്കം അവസാനിപ്പിച്ചതാണെന്നിരിക്കെ വിഷയം തെരുവിലേക്ക് വലിച്ചിഴച്ച പള്ളിവികാരിയുടെ നടപടി പ്രതിഷേധാര്‍ഹമാണെന്നും ഭാരവാഹികള്‍ പറഞ്ഞു. കണ്ണോത്ത് കത്തോലിക്കാ ചര്‍ച്ചിന്റെ ഉടമസ്ഥതയിലുള്ള കെട്ടിടം 2017 ഡിസംബറില്‍ ശാന്തിനഗര്‍ കണയംകൊട് സ്വദേശിനി ഷീബ ഹോട്ടല്‍ നടത്താന്‍ വാടകക്ക് എടുത്തിരുന്നു. പന്ത്രണ്ടായിരം രൂപയായിരുന്നു വാടക. മൂന്ന് മാസത്തിനകം തന്നെ ഹോട്ടല്‍ നഷ്ടത്തിലായി. കച്ചവടം തുരടാനാവില്ലെന്നും ഡെപ്പോസിറ്റായി നല്‍കിയ പണം തിരികെ നല്‍കണമെന്നും പള്ളി വികാരിയെ അറിയിച്ചപ്പോള്‍ 11 മാസത്തെ വാടക പിടിക്കുമെന്നായിരുന്നു മറുപടിയെന്ന് വ്യാപാരികള്‍ പറഞ്ഞു. വിഷയത്തില്‍ ഇടപെട്ട വ്യാപാരി വ്യവസായി ഏകോപന സമിതി നേതാക്കളെ പള്ളിവികാരിയുടെ നേതൃത്വത്തില്‍ അസഭ്യം പറയുകയും കയ്യേറ്റം ചെയ്യുകയും ചെയ്തു. ഇതുസംബന്ധിച്ച് താമരശ്ശേരി ബിഷപ്പിന് പരാതി നല്‍കിയിരുന്നു. പള്ളിവികാരിക്ക് തെറ്റ് സംഭവിച്ചുവെന്ന് ബിഷപ്പ് അംഗീകരിച്ചതാണ്. കഴിഞ്ഞ ദിവസം നടന്ന വ്യപാരി വ്യവസായി ഏകോപന സമിതി യൂണിറ്റ് ജനറല്‍ ബോഡി യോഗത്തില്‍ വിഷയം റിപ്പോര്‍ട്ട് ചെയ്തതിന്റെ പേരിലാണ് പള്ളി വികാരി വിശ്വാസികളെ വിളിച്ചുവരുത്തി പ്രകടനവും പൊതുയോഗവും സംഘടിപ്പിച്ചതെന്നും ഇവര്‍ ആരോപിക്കുന്നു. നേതാക്കളെയും സംഘടനയെയും അപകീര്‍ത്തിപ്പെടുത്തിയതിനെതിരെ നിയമ നടപടി സ്വീകരിക്കുമെന്നും ഭാരവാഹികള്‍ പറഞ്ഞു. ജില്ലാ വൈസ് പ്രസിഡന്റ് സി ജെ ടെന്നിസണ്‍, തിരുവമ്പാടി നിയോജക മണ്ഡലം പ്രസിഡന്റ് റഫീഖ് മാളിക, നിയോജക മണ്ഡലം ജനറല്‍ സെക്രട്ടറി പോള്‍സണ്‍ അറക്കല്‍, വൈസ് പ്രസിഡന്റ് ബി മൊയ്തീന്‍കുട്ടി എന്നിവര്‍ വാര്‍ത്താസമ്മേളനത്തില്‍ പങ്കെടുത്തു.
 
കയാക്കിംഗ് മത്സരം: ലോഗോ പ്രകാശനം ചെയ്തു
തിരുവമ്പാടി: സംസ്ഥാന വിനോദസഞ്ചാര വകുപ്പ് കോഴിക്കോട് തുഷാരഗിരിയില്‍ സംഘടിപ്പിക്കുന്ന മലബാര്‍ റിവര്‍ ഫെസ്റ്റ്- 2019 അന്തര്‍ ദേശീയ കയാക്കിംഗ് മത്സരത്തിന്റെ ലോഗോ സഹകരണ ദേവസ്വം ടൂറിസം വകുപ്പ് മന്ത്രി കടകംപളളി സുരേന്ദ്രന്‍ തിരുവമ്പാടി എം എല്‍ എ ജോര്‍ജ്ജ് എം തോമസിന് നല്‍കി പ്രകാശനം ചെയ്തു. ജൂലൈ 26, 27, 28 തീയതികളിലായാണ് മത്സരം. കഴിഞ്ഞ ആറ് തവണയും സംഘടന മികവ് കൊണ്ട് വന്‍ വിജയമായിരുന്ന മലബാര്‍ റിവര്‍ ഫെസ്റ്റിവലില്‍ ഇക്കൊല്ലം കൂടുതല്‍ വിദേശ താരങ്ങളെ ഉള്‍ക്കൊളളിച്ചായിരിക്കും മത്സരം. കേരള അഡ്വഞ്ചര്‍ ടൂറിസം പ്രൊമോഷന്‍ സൊസൈറ്റിയും കോഴിക്കോട് ഡി റ്റി പി സി യും സംയുക്തമായാണ് മത്സരം സംഘടിപ്പിക്കുന്നത്. ലോഗോ പ്രകാശന ചടങ്ങില്‍ ടൂറിസം സെക്രട്ടറി റാണി ജോര്‍ജ്ജ്, ടൂറിസം ഡയറക്ടര്‍ ബാലകിരണ്‍, കെ റ്റി ഡി സി ചെയര്‍മാന്‍ എം വിജയകുമാര്‍, തിരുവനന്തപുരം ജില്ലാ കലക്ടര്‍ കെ ഗോപാലകൃഷ്ണന്‍, കെറ്റിഡിസി എം ഡി. ആര്‍ രാഹുല്‍, കേരള അഡ്വഞ്ചര്‍ ടൂറിസം പ്രൊമോഷന്‍ സൊസൈറ്റി ചീഫ് എക്സിക്യൂട്ടീവ് ഓഫീസര്‍ മനേഷ് ഭാസ്‌കര്‍ എന്നിവര്‍ പങ്കെടുത്തു.
 
കൂടരഞ്ഞിയില്‍ വീടുപണിക്കിടെ സ്ലാബ് തകര്‍ന്നു വീണ് ഇതര സംസ്ഥാന തൊഴിലാളി മരിച്ചു
കൂടരഞ്ഞി: കരിങ്കുറ്റിയില്‍ നിര്‍മാണത്തിലിരുന്ന വീടിന്റെ സ്ലാബ് തകര്‍ന്നു വീണ് ഇതര സംസ്ഥാന തൊഴിലാളി മരിച്ചു. വെസ്റ്റ് ബംഗാള്‍ സ്വദേശി താജു ദാറുല്‍ ഇസ്ലാം ആണ് മരിച്ചത്. വെള്ളിയാഴ്ച ഉച്ചയോടെയായിരുന്നു അപകടം. മൃതദേഹം കോഴിക്കോട് മെഡിക്കല്‍ കോളേജ് ആശുപത്രിയില്‍. മറ്റൊരു ഇതര സംസ്ഥാന തൊഴിലാളിയെ ഗുരുതര പരിക്കുകളോടെ കോഴിക്കോട് മെഡിക്കല്‍ കോളേജില്‍ പ്രവേശിപ്പിച്ചു.
 
ഇന്ത്യക്കു വേണ്ടി ജഴ്‌സിയണിയുന്ന സന്തോഷത്തില്‍ കണ്ണപ്പന്‍കുണ്ട് സ്വദേശി സാബിത്
പുതുപ്പാടി: ഇന്ത്യക്കു വേണ്ടി ജഴ്‌സിയണിയണമെന്ന സ്വപ്നം പൂവണിഞ്ഞതിലുള്ള സന്തോഷത്തിലാണ് പുതുപ്പാടി കണ്ണപ്പന്‍കുണ്ട് സ്വദേശി മുഹമ്മദ് സാബിത്. കണ്ണപ്പന്‍കുണ്ട് നാടത്തിങ്ങല്‍ റഫീഖിന്റെ മകനായ മുഹമ്മദ് സാബിത്ത് ചെന്നൈയില്‍ നടന്ന സെലക്ഷനിലാണ് അണ്ടര്‍ 21 ദേശീയ ടീമിലേക്ക് തിരഞ്ഞെടുക്കപ്പെട്ടത്. തായ്‌ലന്റില്‍ നടക്കുന്ന അണ്ടര്‍ 21 യൂത്ത് ചാമ്പ്യന്‍ഷിപ്പില്‍ പങ്കെടുക്കാനുള്ള ഇന്ത്യന്‍ ടീമിനെ തെരഞ്ഞെടുക്കാന്‍ നടന്ന ക്യാമ്പില്‍ വിവിധ സംസ്ഥാനങ്ങളില്‍ നിന്നുള്ള 380 ഓളം താരങ്ങളാണ് മാറ്റുരച്ചത്. ഇതില്‍ മിന്നുന്ന പ്രകടനം കാഴ്ചവെച്ചാണ് സാബിത് ദേശീയ ടീമിലെത്തിയത്. ഫുട്‌ബോള്‍ കളിക്കാരനും പരിശീലകനുമായ പിതാവ് റഫീഖാണ് സാബിത്തിനെ രണ്ടാം ക്ലാസില്‍ പഠിക്കുമ്പോള്‍ കളത്തിലിറക്കിയത്.
 
കൊടുവള്ളിയില്‍ എക്‌സൈസിന്റെ പരിശോധനയില്‍ ചാരായ നിര്‍മാണ യൂണിറ്റ് കണ്ടെത്തി
കൊടുവള്ളി: കൊടുവള്ളിയില്‍ എക്‌സൈസ് നടത്തിയ പരിശോധനയില്‍ ചാരായ നിര്‍മാണ യൂണിറ്റ് കണ്ടെത്തി. സൗത്ത് കൊടുവള്ളി ആചിപ്പോയില്‍ ചന്ദ്രന്റെ തറവാട് വീട്ടിലാണ് ചാരായ നിര്‍മാണ യൂണിറ്റ് പ്രവര്‍ത്തിക്കുന്നത്. 200 ലിറ്ററോളം ചാരായവും നൂറുകണക്കിന് കുപ്പി ഉള്‍പ്പെടെയുള്ള വസ്തുക്കളും എക്‌സൈസ് കണ്ടെടുത്തു. എക്‌സൈസ് ഡെപ്യൂട്ടി കമ്മീഷ്ണര്‍ വി ആര്‍ അനില്‍കുമാറിന് ലഭിച്ച രഹസ്യ വിവരത്തെ തുടര്‍ന്ന് താമരശ്ശേരി എക്സൈസ് സര്‍ക്കിള്‍ ഇന്‍സ്പെക്ടര്‍ കെ മുരളീധരന്‍, റെയ്ഞ്ച് ഇന്‍സ്പെക്ടര്‍ പി പി വേണു, ഇന്‍സ്‌പെക്ടര്‍ സി അബു എന്നിവരുടെ നേതൃത്വത്തില്‍ നടത്തിയ പരിശോധനയിലാണ് ചാരായ നിര്‍മാണ യൂണിറ്റ് കണ്ടെത്തിയത്. സൗത്ത് കൊടുവള്ളി ആചിപ്പോയില്‍ ചന്ദ്രന്റെ ആടംഭര വീട്ടില്‍ നടത്തിയ പരിശോധനയില്‍ അഞ്ച് ലിറ്റര്‍ ചാരായം കണ്ടെത്തുകയായിരുന്നു. തുടര്‍ന്ന് ചന്ദ്രനെ കസ്റ്റഡിയിലെടുത്ത് ചോദ്യം ചെയ്തപ്പോഴാണ് ആള്‍താമസമില്ലാത്ത തറവാട് വീട് കേന്ദ്രീകരിച്ചുള്ള ചാരായ നിര്‍മാണ യൂണിറ്റ് സംബന്ധിച്ച വിവരം ലഭിച്ചത്.
 
ഞാറ്റുവേല ചന്തയും കര്‍ഷക സഭയും
താമരശ്ശേരി: കട്ടിപ്പാറ, കിഴക്കോത്ത് ഗ്രാമപഞ്ചായത്തുകളില്‍ ഞാറ്റുവേല ചന്തയും കര്‍ഷക സഭയും വെള്ളിയാഴ്ച നടക്കും. കട്ടിപ്പാറ ഗ്രാമപഞ്ചായത്ത് പരിസരത്തു വച്ച് രാവിലെ 10 മണിക്ക് നടക്കുന്ന ഞാറ്റുവേല ചന്തയില്‍ ദേശിയ സുഗന്ധവിള ഗവേഷണ കേന്ദ്രം കോഴിക്കോട്, കൃഷി വിജ്ഞാന കേന്ദ്രം പെരുവണ്ണാമൂഴി, കട്ടിപ്പാറ കാര്‍ഷിക കര്‍മ്മ സേന, അഗ്രോ സര്‍വീസ് സെന്റര്‍ തിരുവമ്പാടി, പഞ്ചായത്തിലെ കര്‍ഷകര്‍ എന്നിവരുടെ വിവിധ കാര്‍ഷിക ഉത്പന്നങ്ങള്‍, തൈകള്‍, ജൈവ കീടനാശിനികള്‍, ഉല്‍പാദനോപാധികള്‍ മുതലായവ ലഭിക്കുന്നതാണ്. കിഴക്കോത്ത് ഗ്രാമ പഞ്ചായത്ത് ഞാറ്റുവേല ചന്ത എളേറ്റില്‍ കൃഷിഭവന്‍ ഓഫീസ് പരിസരത്ത് വച്ച് ഗ്രാമ പഞ്ചായത്ത് പ്രസിഡന്റ് എന്‍ സി ഉസ്സയിന്‍ മാസ്റ്റര്‍ ഉദ്ഘാടനം ചെയ്യും. പച്ചക്കറി വിത്തുകള്‍, തൈകള്‍ എന്നിവ സൗജന്യമായി വിതരണം ചെയ്യും. ഞാറ്റുവേല ചന്തയോടനുബന്ധിച്ച കര്‍ഷക സഭ കൃഷി ഭവന്‍ ഹാളില്‍ ചേരും. 2019-20 വര്‍ഷത്തെ പദ്ധതികള്‍, കര്‍ഷകര്‍ക്ക് ലഭ്യമായ ആനുകൂല്യങ്ങള്‍, പദ്ധതി ആസൂത്രണവും നടത്തിപ്പും തുടങ്ങിയ വിഷയങ്ങളില്‍ കര്‍ഷക ചര്‍ച്ച നടത്തും. തുടര്‍ന്ന് ആത്മ പരിപാടിയുടെ ഭാഗമായി പ്രത്യേക പരിഗണന വിഭാഗം കര്‍ഷകര്‍ക്ക് പച്ചക്കറി കൃഷി യിലെ നല്ല കാര്‍ഷിക മുറകള്‍ എന്ന വിഷയത്തില്‍ പരിശീലന പരിപാടിയും നടക്കും. വിവിധ തരം ചെടികള്‍ ഫല വൃക്ഷ തൈകള്‍, കുരുമുളക് തൈകള്‍, തിരുവമ്പാടി അഗ്രോ സര്‍വീസ് സെന്ററിന്റെ വിവിധ ജൈവ കീട നിയന്തണ വസ്തുക്കള്‍, സ്വര്‍ണ്ണമുഖി വാഴക്കന്നുകള്‍, ആത്മ, വി എഫ് പി സി കെ കര്‍ഷക അവാര്‍ഡ് ജേതാക്കളുടെ വിവിധ തരം ചെടികള്‍, നടീല്‍ വസ്തുക്കള്‍, കാര്‍ഷിക ഉല്‍പന്നങ്ങള്‍ എന്നിവ ചന്തയില്‍ നിന്നും വാങ്ങാന്‍ സൗകര്യമുണ്ടായിരിക്കും.
 
വിദ്യാര്‍ത്ഥികള്‍ക്ക് കാര്‍ഷിക പാഠങ്ങള്‍ പകര്‍ന്നു നല്‍കാന്‍ സമ്മിശ്ര കൃഷിയുമായി കട്ടിപ്പാറ ഹോളിഫാമിലി ഹൈസ്‌കൂള്‍
കട്ടിപ്പാറ: വിദ്യാര്‍ത്ഥികള്‍ക്ക് കാര്‍ഷിക പാഠങ്ങള്‍ പകര്‍ന്നു നല്‍കാന്‍ സമ്മിശ്ര കൃഷിയുമായി കട്ടിപ്പാറ ഹോളിഫാമിലി ഹൈസ്‌കൂള്‍. ഒരേക്കര്‍ സ്ഥലം പാട്ടത്തിനെടുത്ത് കൃഷിയോഗ്യമാക്കിയാണ് വിദ്യാര്‍ത്ഥികളെ കാര്‍ഷിക വൃത്തിയുടെ പാഠങ്ങള്‍ പഠിപ്പിക്കുന്നത്. ആദ്യ ഘട്ടത്തില്‍ ചേമ്പ്, ചേന, കപ്പ എന്നിവ നട്ടു പിടിപ്പിച്ചു. രണ്ടാം ഘട്ടത്തില്‍ കരനെല്ല് വിളയിച്ചെടുക്കാനായിരുന്നു തീരുമാനം. കട്ടിപ്പാറ ഗ്രാമപഞ്ചായത്തും കൃഷിഭവനും പിന്തുണ നല്‍കി. വിദ്യാര്‍ത്ഥികളും അധ്യാപകരും ചേര്‍ന്ന് ഉത്സവാന്തരീക്ഷത്തില്‍ വിത്തിറക്കി. പാഠപുസ്തകത്തിലെ കൃഷി അറിവുകള്‍ക്കപ്പുറമാണ് മണ്ണിലിറങ്ങിയപ്പോള്‍ വിദ്യാര്‍ത്ഥികള്‍ക്ക് ലഭിച്ചത്. സ്‌കൂളിലേക്കാവശ്യമായ പച്ചക്കറികളെല്ലാം വിളയിച്ചെടുത്ത് വിദ്യാര്‍ത്ഥികളെ കാര്‍ഷിക വൃത്തിയുടെ ഭാഗമാക്കാനാണ് ശ്രമിക്കുന്നതെന്ന് പ്രധാനാധ്യാപകന്‍ എം എ അബ്രഹാം പറഞ്ഞു. പ്രദേശത്തെ പാരമ്പര്യ കര്‍ഷകനായ ചന്തുക്കുട്ടിയാണ് വിദ്യാര്‍ത്ഥികള്‍ക്ക് കാര്‍ഷിക വൃത്തികള്‍ പരിശീലിപ്പിക്കുന്നത്. കരനെല്‍ കൃഷിയുടെ വിത്തിടല്‍ ഗ്രാമപഞ്ചായത്ത് വൈസ് പ്രസിഡന്റ് നിധീഷ് കല്ലുള്ളതോട് ഉദ്ഘാടനം ചെയ്തു. വികസന കാര്യ സ്റ്റാന്റിംഗ് കമ്മറ്റി ചെയര്‍പേഴ്‌സന്‍ മദാരി ജുബൈരിയ അധ്യക്ഷത വഹിച്ചു. കൃഷി ഓഫീസര്‍ കെ കെ മുഹമ്മദ് ഫൈസല്‍ പദ്ധതി വിശദീകരിച്ചു. പി ടി എ പ്രസിഡന്റ് വി പി ബാബു, കൃഷി അസിസ്റ്റന്റ് ബിജു, പ്രധാനാധ്യാപകന്‍ എം എ അബ്രാഹം, അനൂജ ജോസഫ് എന്നിവര്‍ സംസാരിച്ചു.
 
തിരുവമ്പാടിയില്‍ കാറിടിച്ച് ബൈക്ക് യാത്രക്കാരന്‍ മരിച്ചു
തിരുവമ്പാടി: കാറിടിച്ച് ബൈക്ക് യാത്രക്കാരന്‍ മരിച്ചു. കൂടരഞ്ഞി കരിങ്കുറ്റിയില്‍ ഇന്‍ട്രസ്റ്റീല്‍ സ്ഥാപനം നടത്തുന്ന കാട്ടുപറമ്പത് ജോണ്‍ ജോസഫ്(44) ആണ് മരിച്ചത്. തിരുവമ്പാടി വില്ലേജ് ഓഫിസിനു മുന്നില്‍ ചൊവ്വാഴ്ച വൈകിട്ട് 4 മണിയോടെയായിരുന്നു അപകടം. ബൈക്ക് ശ്രദ്ധയില്‍ പെട്ടതിനെ തുടര്‍ന്ന് പെടന്ന് നിര്‍ത്തിയ കാറ് റോഡില്‍ വട്ടം കറങ്ങുകയും ബൈക്കിനെ ഇടിച്ച് തെറിപ്പിക്കുകയും ചെയ്തു. റോഡരികില്‍ നിര്‍ത്തിയിട്ട ലോറിയിലും ഇടിച്ചാണ് കാറ് നിന്നത്. കാറിനും ലോറിക്കും ഇടയില്‍ കുടുങ്ങിയ ബൈക്കും കാറിന്റെ പിന്‍ഭാഗവും തകര്‍ന്നു. ജോഫിനെ ഉടന്‍ തന്നെ തിരുവമ്പാടിയിലെ സ്വകാര്യ ആശുപത്രിയില്‍ എത്തിച്ചെങ്കിലും രക്ഷിക്കാനായില്ല. മൃതദേഹം പോസ്റ്റ് മോര്‍ട്ടത്തിനായി കോഴിക്കോട് മെഡിക്കല്‍ കോളേജ് ആശുപത്രിയിലേക്കുമാറ്റി. ഭാര്യ: സ്മിത (ഇരിട്ടി നെല്ലിക്കാംപൊയില്‍ ഒറ്റപ്ലാക്കല്‍ കുടുംബാംഗം). മക്കള്‍: ഓസ്റ്റിന്‍ (കൂടരഞ്ഞി സ്റ്റെല്ല മാരീസ് സ്‌കൂള്‍ നാലാം ക്ലാസ് വിദ്യാര്‍ത്ഥി), ജസ്റ്റിന്‍ (കൂടരഞ്ഞി സ്റ്റെല്ല മാരീസ് സ്‌കൂള്‍ രണ്ടാം ക്ലാസ് വിദ്യാര്‍ത്ഥി). സംസ്‌കാരം ബുധനാഴ്ച വൈകിട്ട് 4 മണിക്ക് കൂടരഞ്ഞി സെന്റ് സെബാസ്റ്റ്യന്‍സ് പള്ളി സെമിത്തേരിയില്‍.
 
കെ എസ് ഇ ബിയുടെ ഭൂമി കണ്ടെത്തി കക്കയം ഹൈഡല്‍ ടൂറിസം പദ്ധതിക്ക് തുടക്കമിടാന്‍ തീരുമാനം
കക്കയം: കക്കയം ഡാം സൈറ്റില്‍ കെ എസ് ഇ ബിയുടെ ഉടമസ്ഥതയിലുള്ള ഭൂമി കണ്ടെത്തി ഹൈഡല്‍ ടൂറിസം പദ്ധതിക്ക് തുടക്കമിടാന്‍ തീരുമാനം. വനം വകുപ്പുള്‍പ്പെടെയുള്ള മറ്റു വകുപ്പുകള്‍ അവകാശമുന്നയിക്കാന്‍ സാധ്യതയില്ലാത്ത ഭൂമി മാത്രമാണ് വിനോദ സഞ്ചാര വികസന പ്രവര്‍ത്തനത്തിന് ഉപയോഗിക്കുക എന്ന് വിനോദസഞ്ചാര വകുപ്പ് ജോയിന്റ് ഡയറക്ടര്‍ സി എന്‍ അനിതകുമാരി പറഞ്ഞു. ജില്ലാ കളക്ടര്‍ സാംബശിവ റാവുവിന്റെ നിര്‍ദേശപ്രകാരമാണ് തീരുമാനം. കോഴിക്കോട് ജില്ലയില്‍ വിനോദസഞ്ചാരികളെ ഏറെ ആകര്‍ഷിക്കുന്ന ഒരു പ്രധാന വിനോദസഞ്ചാരകേന്ദ്രമാണ് കക്കയം ഡാം. കക്കയം ഡാമുമായി ബന്ധപ്പെട്ട വിനോദസഞ്ചാര സാധ്യതകള്‍ വിപുലപ്പെടുത്തുന്നതിനായി ഭാഗമായി പുരുഷന്‍ കടലുണ്ടി എം എല്‍ എ, ജില്ലാ കലക്ടര്‍ സാംബശിവ റാവു, വനംവകുപ്പ്, വിനോദസഞ്ചാരവകുപ്പ്, കെ എസ് ഇ ബി എന്നിവരുടെ നേതൃത്വത്തില്‍ ജൂണ്‍ മാസം ആദ്യവാരത്തില്‍ സ്ഥലസന്ദര്‍ശനം നടത്തിയിരുന്നു. അന്നത്തെ സന്ദര്‍ശനവേളയില്‍ ഹൈഡല്‍ ടൂറിസവുമായി ബന്ധപ്പെട്ട പദ്ധതി നടപ്പാക്കുന്ന മേഖലകളില്‍ ലാന്‍ഡ്‌സ്‌കേപ്പിങ് നടത്താന്‍ തീരുമാനിക്കുകയും പദ്ധതിയുടെ ഭാവിസാധ്യതകള്‍ പരിശോധിച്ച് വിശദമായ പദ്ധതി രൂപരേഖ തയ്യാറാക്കാന്‍ ടൂറിസം വകുപ്പിനെ എല്പിക്കുകയും ചെയ്തിരുന്നു. പുതിയ വിനോദസഞ്ചാര പദ്ധതികളുടെ രൂപരേഖ അവലോകനം ചെയ്യാനായാണ് കഴിഞ്ഞ ദിവസം ജില്ലാ കലക്ടറുടെ ചേംബറില്‍ വിനോദസഞ്ചാര വകുപ്പിന്റെ നേതൃത്വത്തില്‍ യോഗം നടന്നത്. ഈ യോഗത്തില്‍ അവലോകനം ചെയ്ത വിവിധ പദ്ധതികളില്‍ ഒന്നാണ് കക്കയം ഹൈഡല്‍ ടൂറിസം പദ്ധതി. കക്കയം ഡാം സൈറ്റില്‍ കെ എസ് ഇ ബിയുടെ ഉടമസ്ഥതയില്‍ മറ്റാര്‍ക്കും അവകാശവാദമുന്നയിക്കാനാവാത്ത 7.24 ഏക്കര്‍ ഭൂമി ഉണ്ടെന്ന് അറിയിച്ചിരുന്നു. ഈ ഭൂമി കെ എസ് ഇ ബിയുടെ ആണോ എന്ന് പരിശോധിക്കുന്നതിന് താലൂക്ക് സര്‍വേയര്‍ മുഖാന്തരം നടപടികള്‍ സ്വീകരിക്കാനും വനംവകുപ്പ,് കെ എസ് ഇ ബി, ഹൈഡല്‍ ടൂറിസം എന്നിവരുടെ സംയുക്ത ആഭിമുഖ്യത്തില്‍ സര്‍വേ നടത്താനും യോഗം തീരുമാനിച്ചു. കെ എസ് ഇ ബിയുടെ നിയന്ത്രണത്തില്‍ ഭൂമിയുണ്ടെങ്കില്‍ അതിനെ അടിസ്ഥാനപ്പെടുത്തി ആദ്യഘട്ടമെന്ന നിലയില്‍ വിനോദസഞ്ചാര വികസന പ്രവര്‍ത്തനങ്ങള്‍ തുടങ്ങാനും അതിനു വേണ്ടി സംയുക്ത സര്‍വേ എത്രയും വേഗം പൂര്‍ത്തീകരിക്കാനും ജില്ലാകളക്ടര്‍ യോഗത്തില്‍ ബന്ധപ്പെട്ട വകുപ്പ് ഉദ്യോഗസ്ഥര്‍ക്ക് നിര്‍ദ്ദേശം നല്‍കിയിട്ടുണ്ടെന്ന് ജോയിന്റ് ഡയറക്ടര്‍ അറിയിച്ചു. കെ എസ് ഇ ബി, വിനോദസഞ്ചാരവകുപ്പ് ഡയറക്ടറുടെ പേരില്‍ സ്ഥലലഭ്യത സംബന്ധിച്ച വിനിയോഗാനുമതി ലഭ്യമാക്കുന്നതനുസരിച്ച് മാത്രമേ വിനോദസഞ്ചാരവകുപ്പ് പദ്ധതി രൂപകല്പന ചെയ്യുകയുള്ളൂ. വളരെ പരിമിതമായ സൗകര്യങ്ങളുള്ള കക്കയം പ്രദേശത്തിന്റെ വിനോദസഞ്ചാര സാധ്യത വര്‍ദ്ധിപ്പിക്കാനായി നടപടികളെടുക്കണമെന്ന് സ്ഥലം എം എല്‍ എയും നിരന്തരമായി ആവശ്യപ്പെടുന്നുണ്ട്. ഇതിന്റെ അടിസ്ഥാനത്തിലാണ് ടൂറിസം വകുപ്പ് തുടര്‍ നടപടികള്‍ സ്വീകരിക്കുന്നതെന്ന് ജോയിന്റ് ഡയറക്ടര്‍ പറഞ്ഞു.
 
കട്ടിപ്പാറ ഗ്രാമ പഞ്ചായത്ത് പ്രതിഭാ സംഗമം സംഘടിപ്പിച്ചു
കട്ടിപ്പാറ: കട്ടിപ്പാറ ഗ്രാമ പഞ്ചായത്തിന്റെ ആഭിമുഖ്യത്തില്‍ പ്രതിഭാ സംഗമം നടത്തി. കഴിഞ്ഞ അധ്യയന വര്‍ഷത്തിലെ എല്‍ എസ് എസ്, യു എസ് എസ്, എന്‍ എം എം എസ് വിജയികളെയും എസ് എസ് എല്‍ സി, പ്ലസ് ടു പരീക്ഷകളില്‍ മുഴുവന്‍ എ പ്ലസ് നേടിയവരെയും എസ് എസ് എല്‍ സി നൂറ് ശതമാനം വിജയം നേടിയ ഹോളി ഫാമിലി സ്‌കൂളിനെയും ഉപഹാരം നല്‍കി അനുമോദിച്ചു. കാരാട്ട് റസാഖ് എം എല്‍ എ ഉദ്ഘാടനം ചെയ്തു. ഗ്രാമ പഞ്ചായത്ത് പ്രസിഡന്റ് ബേബി രവീന്ദ്രന്‍ അധ്യക്ഷത വഹിച്ചു.
 
 
 
 

All rights reserved | Website developed and maintained by Zyonz Technologies