15-Oct-2019 (Tue)
 
 
 
കുട്ടികളുടെ ഇന്റര്‍നെറ്റ് ഉപയോഗം സുരക്ഷിതമെന്ന് ഉറപ്പ് വരുത്തണം: വൈ എസ് പി. അബ്ദുല്‍ ഖാദര്‍
പുതുപ്പാടി: കുട്ടികളുടെ ഇന്റര്‍നെറ്റ് ഉപയോഗം സുരക്ഷിതമെന്ന് രക്ഷിതാക്കള്‍ ഉറപ്പ് വരുത്തണമെന്നും ഗുണത്തേക്കാളേറെ അതിന്റെ ദൂഷ്യ വശങ്ങളെക്കുറിച്ച് ജാഗരൂകരാവണമെന്നും താമരശ്ശേരി ഡി വൈ എസ് പി. അബ്ദുല്‍ ഖാദര്‍ പറഞ്ഞു. കൈതപ്പൊയില്‍ എം ഇ എസ് ഫാത്തിമ റഹീം സെന്‍ട്രല്‍ സ്‌കൂള്‍ പി ടി എ കമ്മിറ്റി സംഘടിപ്പിച്ച സ്വഭാവരൂപീകരണ സെമിനാര്‍ ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. പത്രം വായിക്കുന്നവരെ പുച്ഛത്തോടെ കാണുന്ന ഒരു തലമുറയാണ് വളര്‍ന്നു വരുന്നത്. മദ്യം, മയക്കുമരുന്ന് എന്നിവയുടെ ഉപയോഗത്തിനും വില്‍പനക്കും കുട്ടികളെ ബലിയാടാക്കുന്ന പ്രവണത വ്യാപകമായി കണ്ടുവരുന്നു എന്നും അദ്ദേഹം പറഞ്ഞു.
 
താമരശ്ശേരി ടൗണിലെ വെള്ളക്കെട്ട് പരിഹരിക്കാനുള്ള നടപടികളുമായി ദേശീയ പാതാ വിഭാഗം
താമരശ്ശേരി: താമരശ്ശേരി ടൗണിലെ വെള്ളക്കെട്ട് പരിഹരിക്കാനുള്ള നടപടികളുമായി ദേശീയ പാതാ വിഭാഗം. ചെറിയ മഴ പെയ്താല്‍ പോലും താമരശ്ശേരി ടൗണില്‍ വലിയ വെള്ളക്കെട്ട് രൂപപ്പെടുന്നത് വ്യാപാരികളെയും യാത്രക്കാരെയും ഏറെ പ്രയാസത്തിലാക്കിയിരുന്നു. വെള്ളക്കെട്ടിലൂടെ വാഹനങ്ങള്‍ പോകുമ്പോള്‍ വ്യാപാര സ്ഥാപനങ്ങളിലേക്ക് മലിന ജലം ഉള്‍പ്പെടെ ഇരച്ച് കയറി വലിയ നാശനഷ്ടമാണ് വരുത്തിയിരുന്നത്. മലിന ജലം പോലീസ് സബ് ഡിവിഷന്‍ ആസ്ഥാനത്തേക്ക് ഒഴുകുന്നത് പോലീസ് ഉദ്യോഗസ്ഥരെയും പ്രയാസത്തിലാക്കിയിരുന്നു. വര്‍ഷങ്ങളായുള്ള മുറവിളിക്കൊടുവിലാണ് ഓവുചാല്‍ ശുദ്ദീകരിക്കാന്‍ ദേശീയ പാതാ വിഭാഗം തീരുമാനിച്ചത്.
 
അണ്ടോണയില്‍ എസ് വൈ എസ് നിര്‍മിച്ച ഇരുമ്പുപാലം ഞായറാഴ്ച കാന്തപുരം ഉസ്താദ് നാടിന് സമര്‍പ്പിക്കും
അണ്ടോണ: ഓമശ്ശേരി പഞ്ചായത്തിലെ വെള്ളച്ചാല്‍ പ്രദേശവാസികളുടെ ദുരിത യാത്രക്കുള്ള പരിഹാരമായി ഇരുതുള്ളി പുഴക്ക് കുറുകെ എസ് വൈ എസ് സംസ്ഥാന കമ്മിറ്റി നിര്‍മിച്ച ഇരുമ്പ് പാലം ഞായറാഴ്ച വൈകിട്ട് നാലിന് ഇന്ത്യന്‍ ഗ്രാന്റ് മുഫ്തി കാന്തപുരം എ പി അബൂബക്കര്‍ മുസ്ലിയാര്‍ നാടിന് സമര്‍പ്പിക്കും. പ്രദേശത്തെ നൂറുകണക്കായ കുടുംബങ്ങള്‍ പുഴയുടെ മറുകരയിലുള്ള കൊടുവള്ളി നഗരസഭയിലെ തെക്കേതൊടുക ഭാഗത്തെത്താന്‍ വര്‍ഷങ്ങളായി മരത്തിന്റെ പാലമാണ് ആശ്രയിക്കുന്നത്. കഴിഞ്ഞ വര്‍ഷം രണ്ട് തവണ നാട്ടുകാര്‍ പാലം നിര്‍മിച്ചെങ്കിലും പ്രളയത്തില്‍ ഒലിച്ചു പോയി. ഇതോടെ താമരശ്ശേരി താലൂക്കാശുപത്രിയിലും വിദ്യാഭ്യാസ സ്ഥാപനങ്ങളിലും എത്താന്‍ രണ്ടു കിലോമീറ്ററോളം ചുറ്റി സഞ്ചരിക്കേണ്ട അവസ്ഥയായിരുന്നു. അത്യാവശ്യ യാത്രക്ക് പ്ലാസ്റ്റിക് കന്നാസുകള്‍ അടുക്കി വെച്ച് ചങ്ങാടം നിര്‍മിച്ചു. പ്രദേശവാസികളുടെ ദുരിതം മനസ്സിലാക്കിയ എസ് വൈ എസ് സാന്ത്വനം വിഭാഗം നാല് ലക്ഷത്തോളം രൂപ ചെലവഴിച്ചാണ് ഇരുമ്പ് പാലം നിര്‍മിച്ചു നല്‍കിയത്. ഉദ്ഘാടന ചടങ്ങില്‍ എസ് വൈ എസ് സംസ്ഥാന പ്രസിഡണ്ട് സയ്യിദ് ത്വാഹാ സഖാഫി അധ്യക്ഷത വഹിക്കും. കാരാട്ട് റസാഖ് എം എല്‍ എ, പി ടി എ റഹീം എം എല്‍ എ, കെ കെ അഹമ്മദ് കുട്ടി മുസ്ലിയാര്‍ കട്ടിപ്പാറ, എന്‍ അലി അബ്ദുല്ല, മജീദ് കക്കാട്, വള്ള്യാട് മുഹമ്മദലി സഖാഫി, കെ കെ രാധാകൃഷ്ണന്‍, കെ വി മുഹമ്മദ്, ടി ടി മനോജ് തുടങ്ങിയവര്‍ സംബന്ധിക്കും.
 
പുതുപ്പാടിയില്‍ കര്‍ശന നടപടികളുമായി ആരോഗ്യ വകുപ്പ്
പുതുപ്പാടി: ആരോഗ്യ ജാഗ്രത പരിപാടിയുടെ ഭാഗമായി പുതുപ്പാടിയില്‍ ആരോഗ്യ വകുപ്പ് പരിശോധന ശക്തമാക്കി. പൊതുജനാരോഗ്യ നിയമം പാലിക്കാതെയും പകര്‍ച്ച വ്യാധികള്‍ പടരുന്ന സാഹചര്യത്തിലും പ്രവര്‍ത്തിച്ച സ്ഥാപനങ്ങള്‍ക്കെതിരെ നടപടി സ്വീകരിച്ചു. നെരൂക്കുംചാല്‍, മലപുറം എന്നിവിടങ്ങളില്‍ നടന്ന പരിശോധനയില്‍ ഗ്രാമ പഞ്ചായത്തിന്റെ ലൈസന്‍സ് ഇല്ലാതെയും വൃത്തിഹീനമായ സാഹചര്യത്തിലും പ്രവര്‍ത്തിച്ച വെറൈറ്റി ഹോട്ടല്‍ ആന്റ് കൂള്‍ബാറില്‍ നിന്ന് 2000 രൂപ പിഴ ഇടാക്കി. കൊതുക് വളരുന്ന സാഹചര്യം കണ്ടെത്തിയ വര്‍ക്ക്ഷോപ്പ് ഉടമക്ക് നിര്‍ദ്ദേശം നല്‍കി. പഞ്ചായത്ത് ബസാറിലെ അപ്പൂസ് ഹോട്ടല്‍, ഈങ്ങാപ്പുഴയിലെ ബാക്ക് പോയിന്റ്, ഹാപ്പി കൂള്‍ബാര്‍, കിഴക്കയില്‍ ബില്‍ഡിംഗ് എന്നിവിടങ്ങളില്‍ നിന്നായി കഴിഞ്ഞ ദിവസം 9500 രൂപ പിഴ ഈടാക്കിയിരുന്നു. പ്ലാസ്റ്റിക് മാലിന്യങ്ങള്‍ ഉള്‍പ്പെടെ അലക്ഷ്യമായി വലിച്ചെറിയുകയും കൊതുക്ക് വളരുന്ന സാഹചര്യം സൃഷ്ടിക്കുകയും കെട്ടിടത്തില്‍ നിന്നും കക്കൂസ് ടാങ്ക് പൊട്ടി ഒലിക്കുകയും ചെയ്ത മലങ്കര ഓര്‍ത്തഡോക്ള്‍സ് സിറിയന്‍ ക്രിസ്ത്യന്‍ മലബാര്‍ മിഷന്റെ ഉടമസ്ഥതയിലുള്ള കെട്ടിടത്തിന് നിയമാനുസൃതമായ നോട്ടീസ് നല്‍കി. ഹെല്‍ത്ത് ഇന്‍സ്പെക്ടര്‍ ഒ കെ ജനാര്‍ദ്ദനന്‍, ജൂനിയര്‍ ഹെല്‍ത്ത് ഇന്‍സ്പെക്ടര്‍ എം സി ബഷീര്‍, പി വി വിനോദ്, അനില്‍ കുമാര്‍, ബിനു കുര്യന്‍ എന്നിവരടങ്ങിയ സംഘമാണ് പരിശോധന നടത്തിയത്. പൊതുജനാരോഗ്യ നിയം പാലിക്കാത്തവര്‍ക്കെതിരെ ദിവസങ്ങളിലും നടപടി തുടരുമെന്ന് മെഡിക്കല്‍ ഓഫീസര്‍ ഡോ. സഫിന മുസ്തഫ അറിയിച്ചു.
 
ഊമയായ വൃദ്ധയേയും മകളെയും കൊട്ടേഷന്‍ സംഘം മര്‍ദ്ദിച്ചതായി പരാതി
താമരശ്ശേരി: കട്ടിപ്പാറ കന്നൂട്ടിപ്പാറയില്‍ ഊമയായ വൃദ്ധയേയും മകളെയും കൊട്ടേഷന്‍ സംഘം മര്‍ദ്ദിച്ചതായി പരാതി. മാവുള്ളകണ്ടി നഫീസ(65), മകള്‍ സുബൈദ(44) എന്നിവരെയാണ് മുഖം മൂടി അണിഞ്ഞെത്തിയ സംഘം വീടുകയറി അക്രമിച്ചത്. വെള്ളിയാഴ്ച ഉച്ചക്ക് ഒരുമണിയോടെയായിരുന്നു സംഭവം. സുബൈദയുടെ പല്ലുകള്‍ ഇളകിപ്പോയി. മുഖത്തും തലക്കും പരുക്കുണ്ട്. സുബൈദയെ രണ്ടാം വിവാഹം കഴിച്ച പറമ്പില്‍ ബസാര്‍ സ്വദേശിയുടെ മകന്റെ കൊട്ടേഷന്‍ പ്രകാരമാണ് അക്രമമെന്ന് ഇവര്‍ ആരോപിക്കുന്നു. സുബൈദയുടെ മകന്‍ അമീര്‍ സുഹൈലിനെ കഴിഞ്ഞ ദിവസം കൊട്ടേഷന്‍ സംഘം വയനാട്ടിലേക്ക് തട്ടിക്കൊണ്ട് പോയി മര്‍ദ്ധിച്ചിരുന്നു. യാത്രയിലും വയനാട്ടിലെ റിസോര്‍ട്ടില്‍ എത്തിച്ചും മര്‍ദ്ദിച്ചുവെന്നും താമരശ്ശേരി പോലീസ് ഇടപെട്ടപ്പോള്‍ പുലര്‍ച്ചെ രണ്ടുമണിയോടെ താമരശ്ശേരി പോലീസ് സ്‌റ്റേഷന് മുന്നില്‍ ഇറക്കി വിട്ട് കൊട്ടേഷന്‍ സംഘം രക്ഷപ്പെടുകയായിരുന്നുവെന്നും ഇവര്‍ പറയുന്നു. അക്രമത്തില്‍ പരുക്കേറ്റ ഇരുവരെയും താമരശ്ശേരി താലൂക്കാശുപത്രിയില്‍ പ്രവേശിപ്പിച്ചു. തുടര്‍ന്ന് വിദഗ്ദ ചികിത്സക്കായി സ്വകാര്യ ആശുപത്രിയിലേക്കുമാറ്റി. സംഭവത്തില്‍ താമരശ്ശേരി പോലീസ് കേസെടുത്ത് അന്വേഷണം ആരംഭിച്ചു.
 
ഭിന്നശേഷിക്കാര്‍ക്ക് ആശ്വാസമായി കൊടുവള്ളി ബ്ലോക്ക് പഞ്ചായത്തിന്റെ മുച്ചക്ര വാഹനം
കൊടുവള്ളി: ഭിന്നശേഷിക്കാര്‍ക്ക് ആശ്വാസമായി കൊടുവള്ളി ബ്ലോക്ക് പഞ്ചായത്തിന്റെ മുച്ചക്ര വാഹനം. ശാരീരിക അവശതകളാല്‍ പ്രയാസപ്പെടുന്ന 28 പേര്‍ക്കാണ് കൊടുവള്ളി ബ്ലോക്ക് പഞ്ചായത്തിന്റെ വാര്‍ഷിക പദ്ധതിയില്‍ ഉള്‍പ്പെടുത്തി മുച്ചക്ര വാഹനങ്ങള്‍ വിതരണം ചെയ്തത്. നാല് ചുമരുകള്‍ക്കുള്ളില്‍ തളച്ചിടപ്പെട്ടവര്‍ക്ക് പുറം ലോകം കാണാനും ചെറിയ ജോലികളില്‍ ഏര്‍പ്പെടാനും സൗകര്യം ഒരുക്കുക എന്ന ലക്ഷ്യത്തോടെയാണ് 22 ലക്ഷം രൂപ ഇതിന്നായി വകയിരുത്തിയത്.
 
കൊടുവള്ളിയില്‍ സമ്പൂര്‍ണ്ണ മദ്യ നിരോധനം
കൊടുവള്ളി: ജൂണ്‍ 27 ന് ഉപതെരഞ്ഞടുപ്പ് നടക്കുന്ന കൊടുവള്ളി മുനിസിപ്പാലിറ്റി 14-ാം ഡിവിഷനായ വാരിക്കുഴിതാഴത്ത് 25 ന് വൈകീട്ട് 5 മണിക്ക് ശേഷവും 26, 27, 28 തീയതികളിലും സമ്പൂര്‍ണ മദ്യനിരോധനം ഏര്‍പ്പെടുത്തിയതായി ജില്ലാ തെരഞ്ഞെടുപ്പ് ഓഫീസറായ ജില്ലാ കലക്ടര്‍ സാംബശിവ റാവു അറിയിച്ചു.
 
മോട്ടോര്‍ വെഹിക്കിള്‍ ഡിപ്പാര്‍ട്ട്‌മെന്റിന്റെ മിന്നല്‍ പരിശോധന; കുടങ്ങിയത് 160 ഇരുചക്ര വാഹനങ്ങള്‍
കൊടുവള്ളി: വര്‍ധിച്ചുവരുന്ന വാഹനാപകടങ്ങള്‍ക്ക് തടയിടാന്‍ മോട്ടോര്‍ വെഹിക്കിള്‍ ഡിപ്പാര്‍ട്ട്‌മെന്റിന്റെ മിന്നല്‍ പരിശോധന. നാല് കേന്ദ്രങ്ങളിലായി ഇരു ചക്ര വാഹനങ്ങളെ മാത്രം കേന്ദ്രീകരിച്ച് നടത്തിയ പരിശോധനയില്‍ നൂറ്റി അറുപതോളം വാഹനങ്ങളാണ് കുടുങ്ങിയത്. കോഴിക്കോട് എന്‍ഫോഴ്‌സ്‌മെന്റ് ആര്‍ ടി ഒ. പി എം ശബീറിന്റെ നിര്‍ദ്ദേശപ്രകാരം കൊടുവള്ളി സബ് റിജ്യനല്‍ ട്രാന്‍സ്‌പോര്‍ട്ട് ഓഫീസും സേഫ് കേരള സ്‌ക്വാഡും സംയുക്തമായാണ് പരിശോധന നടത്തിയത്.
 
വിദ്യാര്‍ത്ഥികള്‍ക്കുവേണ്ടി അധ്യാപകന്‍ പരീക്ഷ എഴുതിയ സംഭവത്തില്‍ ഒരാള്‍ കീഴടങ്ങി
മുക്കം: വിദ്യാര്‍ത്ഥികള്‍ക്കുവേണ്ടി അധ്യാപകന്‍ പ്ലസ് ടു പരീക്ഷ എഴുതിയ സംഭവത്തില്‍ ഒരാള്‍ കീഴടങ്ങി. പരീക്ഷാ ഡെപ്യൂട്ടി ചീഫും ചേന്നമംഗലൂര്‍ ഗവ. ഹയര്‍ സെക്കന്‍ഡറി സ്‌കൂളിലെ അധ്യാപകനുമായ പി കെ ഫൈസലാണ് വെള്ളിയാഴ്ച രാവിലെ പോലീസില്‍ കീഴടങ്ങിയത്. മുക്കം നീലേശ്വരം ഗവണ്‍മെന്റ് ഹയര്‍ സെക്കന്ററി സ്‌കൂളിലാണ് അധ്യാപകന്‍ ആള്‍മാറാട്ടം നടത്തി പ്ലസ് ടു പരീഷ എഴുതിയതിയത്. ഇതേ സ്‌കൂളിലെ അധ്യാപകനും പരീക്ഷാ നടത്തിപ്പില്‍ അഡീഷണല്‍ ഡെപ്യൂട്ടി ചീഫുമായിരുന്ന നിഷാദ് വി മുഹമ്മദാണ് സ്‌കൂളിലെ രണ്ട് വിദ്യാര്‍ഥികള്‍ക്ക് വേണ്ടി ഓഫീസിലിരുന്ന് ഇംഗ്ലീഷ് പരീക്ഷ എഴുതിയതായി അന്വേഷണത്തില്‍ കണ്ടെത്തിയത്. അതീവ ജാഗ്രതയോടെ നടത്തിയ മൂല്യനിര്‍ണയത്തിനിടെയാണ് ആള്‍മാറാട്ടം ശ്രദ്ധയില്‍പെട്ടത്. രണ്ട് വിദ്യാര്‍ത്ഥികളുടെ ഇംഗ്ലീഷ് പരീക്ഷകളുടെ ഉത്തരക്കടലാസിലെ കൈയക്ഷരവും ഉത്തരങ്ങളും കണ്ട് സംശയം തോന്നിയതിനെ തുടര്‍ന്ന് കൂടുതല്‍ പരിശോധനയ്ക്ക് വിധേയമാക്കിയതില്‍ രണ്ടു കുട്ടികളും പരീക്ഷാ ഹാളിലുണ്ടായിരുന്ന സമയത്ത് അധ്യാപകന്‍ ഓഫീസിലിരുന്ന് പരിക്ഷ എഴുതുകയും കുട്ടികള്‍ എഴുതിയ പേപ്പര്‍ മാറ്റി അധ്യാപകന്‍ എഴുതിയ പേപ്പര്‍ മൂല്യനിര്‍ണയത്തിന് അയക്കുകയുമായിരുന്നുവെന്ന് കണ്ടെത്തുകയായിരുന്നു. സംഭവത്തില്‍ സ്‌കൂള്‍ പ്രിന്‍സിപ്പാളും പരീക്ഷാ ചീഫ് സൂപ്രണ്ടുമായ കെ റസിയ, പരീക്ഷ എഴുതിയ നിഷാദ് വി മുഹമ്മദ്, പരീക്ഷാ ഡെപ്യൂട്ടി ചീഫും ചേന്നമംഗലൂര്‍ ഗവ. ഹയര്‍ സെക്കന്‍ഡറി സ്‌കൂളിലെ അധ്യാപകനുമായ പി കെ ഫൈസല്‍ എന്നിവരെ നേരത്തെ സസ്‌പെന്റ് ചെയ്തിരുന്നു. ഇവര്‍ക്കെതിരെ ജാമ്യമില്ലാ വകുപ്പു പ്രകാരം മുക്കം പോലീസ് കേസെടുത്തതോടെ മൂന്നുപേരും ഒളിവില്‍ പോവുകയായിരുന്നു. മുന്‍കൂര്‍ ജാമ്യാപേക്ഷ ജില്ലാ കോടതിയും തുടര്‍ന്ന് ഹൈക്കോടതിയും നിരസിച്ചതോടെയാണ് ഫൈസല്‍ പോലീസില്‍ കീഴടങ്ങിയത്. മറ്റുള്ളവരും ഉടന്‍ കീഴടങ്ങുമെന്നാണ് സൂചന.
 
റാഗിങ്: കുറ്റക്കാര്‍ക്കെതിരെ കര്‍ശന നടപടി സ്വീകരിക്കണം; എസ് എസ് എഫ്
താമരശ്ശേരി: പൂനൂര്‍, താമരശ്ശേരി ഗവ. ഹയര്‍സെക്കന്‍ഡറി സ്‌കൂളുകളിലെ പ്ലസ് വണ്‍ വിദ്യാര്‍ത്ഥികള്‍ റാഗിങ്ങിനിരയായ സംഭവത്തില്‍ കുറ്റക്കാര്‍ക്കെതിരെ നടപടി സ്വീകരിക്കണമെന്ന് എസ് എസ് എഫ് ഡിവിഷന്‍ കമ്മിറ്റികള്‍ ആവശ്യപ്പെട്ടു. സ്‌കൂളുകളിലെ സമാധാനപരമായ പഠനാന്തരീക്ഷത്തിന് ഭീഷണിയായ ഇത്തരം സംഭവങ്ങള്‍ എല്ലാ വര്‍ഷവും വിവിധ സ്‌കൂളുകളില്‍ അരങ്ങേറുന്നത് അപലപനീയമാണ്. കുറ്റക്കാര്‍ക്കെതിരെ നടപടിയെടുത്തും വിദ്യാര്‍ത്ഥികളെ ക്രിമിനല്‍ ചിന്താഗതിയിലേക്ക് നയിക്കുന്ന ഇത്തരം ഹീനകൃത്യങ്ങള്‍ തുടര്‍ന്നും ഉണ്ടാകാതിരിക്കാന്‍ അവശ്യമായ മുന്‍കരുതല്‍ സ്വീകരിച്ചും റാഗിങ്ങ് പൂര്‍ണമായും അവസാനിക്കും വിധമുള്ള ഇടപെടല്‍ അധികൃതരുടെ ഭാഗത്തു നിന്നുണ്ടാകണമെന്നും എസ് എസ് എഫ് പൂനൂര്‍ ഡിവിഷന്‍ സെക്രട്ടറിയേറ്റ് ആവശ്യപ്പെട്ടു. റാശിദ് സഖാഫി പൂനൂര്‍ അധ്യക്ഷത വഹിച്ചു. ഫാഇസ് എംഎംപറമ്പ്, റാസിഖ് കാന്തപുരം, ആശിഖ് സഖാഫി, സിറാജ് സഖാഫി നെരോത്ത്, മുനീര്‍ഷ പൂനൂര്‍, യാസീന്‍ ഫവാസ്, അമീന്‍ ആവിലോറ, മുനവ്വര്‍ ഫാളിലി, ഖൈസ് എളേറ്റില്‍, റഊഫ് കരുമല തുടങ്ങിയവര്‍ സംബന്ധിച്ചു. റാഗിങ്ങിന്റെ പേരില്‍ താമരശ്ശേരി ഗവ. ഹയര്‍സെക്കന്‍ഡറി സ്‌കൂളില്‍ പ്ലസ് വണ്‍ വിദ്യാര്‍ത്ഥികള്‍ക്കു നേരെ ഉണ്ടായ അക്രമം അപലപനീയമാണെന്ന് എസ് എസ് എഫ് താമരശ്ശേരി ഡിവിഷന്‍ സെക്രട്ടറിയേറ്റ് അഭിപ്രായപ്പെട്ടു. കുറ്റക്കാര്‍ക്കെതിരെ കര്‍ശന നടപടി സ്വീകിക്കണമെന്നും കലാലയങ്ങളിലെ സമാധാനാന്തരീക്ഷം നിലനിര്‍ത്താന്‍ അധികൃതര്‍ ശ്രമിക്കണമെന്നും എസ് എസ് എഫ് ആവശ്യപ്പെട്ടു. ശാഹിദ് സഖാഫി കട്ടിപ്പാറ അധ്യക്ഷത വഹിച്ചു. ഹംസ എലോക്കര, മൂസ നവാസ്, ഫുളൈല്‍ സഖാഫി, ബാസിത്ത് കട്ടിപ്പാറ, ഇബ്രാഹിം പാലക്കല്‍, മന്‍സൂര്‍ സഖാഫി പരപ്പന്‍പൊയില്‍, ആശിഖ് ഈര്‍പ്പോണ, തമീം അണ്ടോണ, മുഹമ്മദ് തയ്യിബ്, ശുഹൈബ് ഈങ്ങാപ്പുഴ എന്നിവര്‍ പ്രസംഗിച്ചു.
 
 
 
 

All rights reserved | Website developed and maintained by Zyonz Technologies