16-Jun-2019 (Sun)
 
 
 
നോട്ട് നിരോധന കാലത്തുപോലും സഹകരണ പ്രസ്ഥാനങ്ങളെ തകര്‍ക്കാനുണ്ടായ ശ്രമങ്ങള്‍ ജനങ്ങള്‍ പരാചയപ്പെടുത്തി; മന്ത്രി കടകംപള്ളി സുരേന്ദ്രന്‍
താമരശ്ശേരി: നോട്ട് നിരോധന കാലത്ത് സഹകരണ പ്രസ്ഥാനങ്ങളെ തകര്‍ക്കാനുണ്ടായ ശ്രമങ്ങള്‍ അതിജീവിക്കാനായത് ജനങ്ങളുടെ വിശ്വാസം കൊണ്ടുമാത്രമാണെന്ന് സഹകരണ-ദേവസ്വം വകുപ്പു മന്ത്രി കടകംപള്ളി സുരേന്ദ്രന്‍. താമരശ്ശേരിയില്‍ ആരംഭിച്ച സഹകരണ സംഘം അസി. രജിസ്ട്രാര്‍ ജനറല്‍ ഓഫീസ് ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. കേരള ജനതയുടെ രക്തത്തോട് അലിഞ്ഞു ചേര്‍ന്ന സഹകരണ മേഖലയെ തകര്‍ക്കാനായി നോട്ട് നിരോധനത്തെ ഉപയോഗപ്പെടുത്തിയെങ്കിലും യാതൊരു പോറലും ഏല്‍ക്കാതെ സംരക്ഷിക്കാന്‍ നമുക്ക് കഴിഞ്ഞു.
 
എല്ലാ പഞ്ചായത്തുകളിലും കേരഗ്രാമം പദ്ധതി നടപ്പിലാക്കുമെന്നും പദ്ധതി മൂന്ന് വര്‍ഷമാക്കുമെന്നും കൃഷി വകുപ്പു മന്ത്രി വി എസ് സുനില്‍കുമാര്‍
കട്ടിപ്പാറ: നാളികേര കൃഷിയുടെ സമഗ്ര വികസനത്തിനായി എല്ലാ ഗ്രാമ പഞ്ചായത്തുകളിലും കേരഗ്രാമം പദ്ധതി നടപ്പിലാക്കുമെന്നും ഒരു വര്‍ഷമായിരുന്ന പദ്ധതി മൂന്ന് വര്‍ഷമാക്കി വര്‍ധിപ്പിക്കുമെന്നും കൃഷി വകുപ്പു മന്ത്രി വി എസ് സുനില്‍കുമാര്‍. കട്ടിപ്പാറ ഗ്രാമപഞ്ചായത്ത് കേരഗ്രാമം പദ്ധതി ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം. 7.81 ലക്ഷം ഹെക്ടര്‍ സ്ഥലത്താണ് സംസ്ഥാനത്ത് നിലവില്‍ നാളികേരം ഉദ്പ്പാദിപ്പിക്കുന്നത്. 2019 ആകുമ്പോഴേക്കും 9.6 ലക്ഷം ഹെക്ടര്‍ ആക്കുകായാണ് ലക്ഷ്യം.
 
പന്നൂര്‍ ഗവ. ഹയര്‍ സെക്കണ്ടറി സ്‌ക്കൂള്‍ കെട്ടിടത്തിന്റെ ശിലാസ്ഥാപനം മന്ത്രി വി. എസ് സുനില്‍കുമാര്‍ നിര്‍വ്വഹിച്ചു
പന്നൂര്‍: കേരള സര്‍ക്കാറിന്റെ പൊതുവിദ്യാഭ്യാസ സംരക്ഷണത്തിന്റെയും കൊടുവള്ളി നിയോജക മണ്ഡലം എം എല്‍ എയുടെ ക്രിസ്റ്റല്‍ പദ്ധതിയുടെയും ഭാഗമായി മികവിന്റെ കേന്ദ്രമായി തെരഞ്ഞെടുക്കപ്പെട്ട പന്നൂര്‍ ഗവ. ഹയര്‍ സെക്കണ്ടറി സ്‌കൂളില്‍ അന്താരാഷ്ട്ര നിലവാരത്തിലുള്ള കെട്ടിട നിര്‍മ്മാണത്തിന്റെ ശിലാസ്ഥാപനവും പ്രവര്‍ത്തി ഉദ്ഘാടനവും കൃഷി വകുപ്പ് മന്ത്രി വി. എസ് സുനില്‍കുമാര്‍ നിര്‍വ്വഹിച്ചു. കേരളത്തിലെ എല്ലാ പൊതുവിദ്യാഭ്യാസ സ്ഥാപനങ്ങളും മികവിന്റെ കേന്ദ്രങ്ങളാക്കി കൊണ്ട് നഗര ഗ്രാമീണ വ്യത്യാസമില്ലാതെ എല്ലാ വിദ്യാര്‍ത്ഥികള്‍ക്കും മികച്ച രീതിയിലുള്ള വിദ്യാഭ്യാസം അവരവരുടെ പ്രദേശത്തു തന്നെ ലഭ്യമാക്കുകയാണ് സര്‍ക്കാറിന്റെ ലക്ഷ്യമെന്ന് മന്ത്രി പറഞ്ഞു. കൊടുവള്ളി നിയോജക മണ്ഡലം എം എല്‍ എ കാരാട്ട് റസാഖ് അദ്ധ്യക്ഷത വഹിച്ചു. മണ്ഡലത്തില്‍ നടപ്പിലാക്കികൊണ്ടിരിക്കുന്ന ക്രിസ്റ്റല്‍ പദ്ധതിയിലൂടെ മണ്ഡലത്തിലെ മുഴുവന്‍ സ്‌ക്കൂളുകളും അന്താരാഷ്ട്ര നിലവാരത്തിലേക്ക് ഉയര്‍ത്തി കൊണ്ടിരിക്കുകയാണെന്ന് എം എല്‍ എ പറഞ്ഞു. ബ്ലോക്ക് പഞ്ചായത്ത് പ്രസിഡണ്ട് എം എം രാധാമണി, കിഴക്കോത്ത് പഞ്ചായത്ത് പ്രസിഡണ്ട് എന്‍ സി ഉസ്സയിന്‍ എന്നിവര്‍ വിശിഷ്ടാതിഥികളായി. ബി പി ഒ വി എം മെഹറലി ക്രിസ്റ്റല്‍ പദ്ധതി വിശദീകരിച്ചു. ജില്ലാ പഞ്ചായത്ത് മെമ്പര്‍ എം എ ഗഫൂര്‍, ബ്ലോക്ക് മെമ്പര്‍ സി ടി വനജ, ഗ്രാമപഞ്ചായത്ത് മെമ്പര്‍മാരായ കെ കെ അബ്ദുള്‍ ജബ്ബാര്‍, വി എം മനോജ്, ഇന്ദു സനിത്ത്, പ്രിന്‍സിപ്പല്‍ എം സന്തോഷ് കുമാര്‍, ഡി ഇ ഒ. എന്‍ മുരളി, യു കെ അബ്ദുള്‍ നാസര്‍, ടി പി അബ്ദുള്‍ മജീദ്, ഇ കെ മുഹമ്മദ്, മൂസ്സ മാസ്റ്റര്‍, എം എന്‍ ശശിധരന്‍, ഷിജി എം ആര്‍, പി കെ പ്രഭാകരന്‍, എം എം വിജയകുമാര്‍, ഇ അബ്ദുല്‍ അസീസ്, എന്‍ കെ സുരേഷ്, ടി എം രാധാകൃഷണന്‍, വി അബ്ദുള്‍ അസീസ്, ഒ ഗണേഷ് ബാബു, ഗിരീഷ് വലിയപറമ്പ്, പി ടി അഹമ്മദ്, സി പുഷപ, പി കെ ഹരിദാസന്‍ എന്നിവര്‍ സംസാരിച്ചു. പി ടി എ പ്രസിഡണ്ട് വി എം ശ്രീധരന്‍ സ്വാഗതവും ഹെഡ്മാസ്റ്റര്‍ കെ ജി മനോഹരന്‍ നനന്ദിയും പറഞ്ഞു. തുടര്‍ന്ന് മികവിന്റെ കേന്ദ്രമായി ജി എച്ച് എസ് എസ് പന്നൂരിനെ തെരഞ്ഞെടുത്ത എം എല്‍ എ കാരാട്ട് റസാഖ്, മികച്ച എന്‍ എസ് എസ് പ്രോഗ്രാം ഓഫീസറായി തെരഞ്ഞെടുക്കപ്പെട്ട ടി രതീഷ്, കായികാദ്ധ്യാപകന്‍ ഷാജി ജോണ്‍, സ്‌കൂളിന്റെ പ്രാഥമിക മാസ്റ്റര്‍ പ്ലാന്‍ രൂപകല്പന ചെയ്ത കെ ഇഖ്ബാല്‍, മികച്ച എന്‍ എസ് എസ് വോളണ്ടിയറായി തെരഞ്ഞെടുക്കപ്പെട്ട സി ആര്‍ ആര്‍ദ്ര, ജില്ലാ സംസ്ഥാന ദേശീയ തലങ്ങളില്‍ മികച്ച പ്രകടനം കാഴ്ചവെച്ച കലാകായിക ശാസ്ത പ്രതിഭകള്‍ എന്നിവര്‍ക്ക് പി ടി എയുടെ സ്‌നേഹോപഹാരം മന്ത്രി വിതരണം ചെയ്തു.
 
കോഴിക്കോട്: ധീര സേനാനികളുടെ സ്മരണ പുതുക്കി സായുധ സേനാ പതാകദിനം മേയര്‍ തോട്ടത്തില്‍ രവീന്ദ്രന്‍ ഉദ്ഘാടനം ചെയ്തു. വിട്ടുവീഴ്ചയില്ലാത്ത സേവനം ചെയ്യുന്ന സൈനികരെ നന്ദിയോടെ സ്മരിക്കണമെന്ന് അദ്ദേഹം പറഞ്ഞു. കോഴിക്കോട് ബാലന്‍ കെ നായര്‍ റോഡിലെ ജില്ലാ സൈനിക ക്ഷേമ ഓഫീസ് ഓഡിറ്റോറിയത്തില്‍ നടന്ന ചടങ്ങില്‍ ഭാരതത്തിനായി വീരമൃത്യു വരിച്ചവരെയും രാജ്യസുരക്ഷക്കായി പോരാടുന്നവരെയും സ്മരിച്ചു കൊണ്ട് മൗനപ്രാര്‍ത്ഥന നടത്തി. സായുധ സേനാ പതാക വില്‍പനയുടെ ജില്ലാതല ഉദ്ഘാടനവും മേയര്‍ നിര്‍വ്വഹിച്ചു. പതാക വില്‍പനയിലൂടെ സ്വരൂപിക്കുന്ന പണം യുദ്ധത്തില്‍ കൊല്ലപ്പെടുന്ന ജവാന്മാരുടെ ആശ്രിതരുടെയും വിമുക്ത ഭടന്മാരുടെയും പുനരധിവാസത്തിനാണ് ഉപയോഗിക്കുക. ചടങ്ങില്‍ അസിസ്റ്റന്റ് കലക്ടര്‍ കെ എസ് അഞ്ജു അധ്യക്ഷത വഹിച്ചു. എസ് എസ് എല്‍ സി, പ്ലസ്ടു ക്ലാസുകളില്‍ എല്ലാ വിഷയങ്ങള്‍ക്കും എ പ്ലസ് നേടിയ വിദ്യാര്‍ത്ഥികള്‍ക്കുള്ള ക്യാഷ് അവാര്‍ഡ് വിതരണവും ചടങ്ങില്‍ നടന്നു. ജില്ലാ സൈനിക ക്ഷേമ ഓഫീസര്‍ ജോഷി ജോസഫ്, ജില്ലാ സൈനിക ബോര്‍ഡ് വൈസ് പ്രസിഡണ്ട് കേണല്‍ എന്‍ വി മോഹന്‍ദാസ് (റിട്ട.) കെ എസ് ഇ എല്‍ ജില്ലാ പ്രസിഡന്റ് പി പ്രഭാകര കുറുപ്പ്, എക്‌സ് സര്‍വ്വീസ്‌മെന്‍ കോണ്‍ഗ്രസ്സ് ജില്ലാപ്രസിഡണ്ട് സി രാമദാസ്, പൂര്‍വ്വ സൈനിക സേവാ പരിഷത്ത് ജില്ലാ പ്രസിഡണ്ട് മുരളീധര ഗോപാല്‍, അസി ജില്ലാ സൈനിക ക്ഷേമ ഓഫീസര്‍ കെ ഉണ്ണികൃഷ്ണന്‍ തുടങ്ങിയവര്‍ പങ്കെടുത്തു.
 
ജപ്പാന്‍ കുടിവെള്ള പദ്ധതി: ജില്ലയില്‍ 70 ശതമാനം പ്രവൃത്തി പൂര്‍ത്തിയായി
കോഴിക്കോട്: ജില്ലയില്‍ അഞ്ച് പാക്കേജുകളിലായി നടപ്പിലാക്കുന്ന ജപ്പാന്‍ കുടിവെള്ള പദ്ധതിയുടെ നാല് പാക്കേജുകളുടെ പ്രവൃത്തി പൂര്‍ത്തീകരിച്ചതായി ജലവിഭവ വകുപ്പ് മന്ത്രി കെ കൃഷ്ണന്‍ കുട്ടി. പദ്ധതിയുടെ 70 ശതമാനം പ്രവൃത്തി പൂര്‍ത്തീകരിച്ചു കഴിഞ്ഞു. പ്രതിദിനം 174 ദശലക്ഷം ശേഷിയുള്ള ജലശുദ്ധീകരണ ശാല പൂര്‍ണ്ണ തോതില്‍ പ്രവര്‍ത്തന സജ്ജമാണ്. പദ്ധതിയുടെ 20 ജലസംഭരണികളുടെയും 150 മീറ്റര്‍ പൈപ്പ്‌ലൈന്‍ ഒഴികെ അതിലേക്കുള്ള പ്രധാന പൈപ്പ് ലൈനുകളുടെയും പണി പൂര്‍ത്തീകരിച്ചു. ബേപ്പൂര്‍, കടലുണ്ടി മേഖലകളിലെ വിതരണ ശൃംഖലയുടെ പ്രവൃത്തികള്‍ പൂര്‍ത്തീകരിച്ച് ജലവിതരണം ആരംഭിച്ചിട്ടുണ്ട്. ചെറുവണ്ണൂര്‍ മേഖലയില്‍ ഈ മാസം അവസാനത്തോടെ പണി പൂര്‍ത്തീകരിക്കാനാണ് ലക്ഷ്യമിടുന്നത്. പൊതുമരാമത്ത് വകുപ്പിന്റെ അനുമതി ലഭിച്ച ശേഷം കോവൂര്‍ മേഖലയില്‍ 13 കിലോമീറ്ററും, പൊറ്റമ്മലില്‍ 14 കിലോമീറ്ററും അവശേഷിക്കുന്ന പ്രവൃത്തി പൂര്‍ത്തീകരിക്കും. ഈസ്റ്റ്ഹില്‍, മലാപ്പറമ്പ്, ബാലമന്ദിരം, ഇരവത്ത്കുന്ന് മേഖലകളില്‍ അടുത്തവര്‍ഷം മെയില്‍ പ്രവൃത്തികള്‍ പൂര്‍ത്തീകരിക്കാനാണ് ഉദ്ദേശിക്കുന്നത്. ബാലുശ്ശേരി മേഖലയില്‍ പൂര്‍ണ്ണമായും നന്മണ്ട, കുന്ദമംഗലം, കക്കോടി, കുരുവട്ടൂര്‍, മേഖലകളില്‍ ഭാഗികമായും ജലവിതരണം ആരംഭിച്ചിട്ടുണ്ട്. ജൈക്ക പദ്ധതിയില്‍ 1854 കിലോമീറ്റര്‍ വിതരണ ശൃംഖലയിലെ 1421 കിലോമീറ്റര്‍ പൈപ്പിടല്‍ പ്രവൃത്തി ഇതിനോടകം സ്ഥാപിച്ചു കഴിഞ്ഞു. പദ്ധതിയുടെ ജില്ലയിലെ നിലവിലുള്ള സ്ഥിതി സംബന്ധിച്ച പി ടി എ റഹീം എം എല്‍ എയുടെ ചോദ്യത്തിന് ജലവിഭവ വകുപ്പ് മന്ത്രി കെ കൃഷ്ണന്‍കുട്ടി നിയമസഭയില്‍ എഴുതി നല്‍കിയ മറുപടിയിലാണ് വിശദീകരണം.
 
ബാറിനു സമീപം യുവാവ് രക്തം വാര്‍ന്ന് മരിച്ച നിലയില്‍
താമരശ്ശേരി: ബാറിനു സമീപം യുവാവിനെ രക്തം വാര്‍ന്ന് മരിച്ച നിലയില്‍ കണ്ടെത്തി. കട്ടിപ്പാറ ചമല്‍ പൂവന്മലയില്‍ വിജയന്റെ മകന്‍ റിബാഷ്(40) ആണ് മരിച്ചത്. താമരശ്ശേരി ചുങ്കത്ത് പ്രവര്‍ത്തിക്കുന്ന ഹസ്തിനപുരി ബാറിന്റെ സമീപത്താണ് രക്തം വാര്‍ന്ന് കിടക്കുന്ന നിലയില്‍ റിബാഷിനെ കണ്ടെത്തിയത്. പോലീസും നാട്ടുകാരും ചേര്‍ന്ന് താമരശ്ശേരി താലൂക് ആശുപത്രിയില്‍ എത്തിച്ചെങ്കിലും മരിച്ചിരുന്നു. വെള്ളിയാഴ്ച രാത്രി ബാറിനു മുന്നില്‍വെച്ച് റിബാഷും മറ്റൊരാളും തമ്മില്‍ വാക്കേറ്റമുണ്ടായതായും ഇതിനിടെ ബാറിലെ സെക്യൂരിറ്റി ജീവനക്കാര്‍ റിബാഷിനെ പിടിച്ച് തള്ളിയതായും പോലീസിന് വിവരം ലഭിച്ചിട്ടുണ്ട്. തലയടിച്ച് വീണതിനെ തുടര്‍ന്നുള്ള പരിക്കാണ് മരണകാരണമെന്നാണ് സൂചന. ബാറിലെ ഏതാനും സെക്യൂരിറ്റി ജീവനക്കാരെ ചോദ്യം ചെയ്യാനായി പോലീസ് കസ്റ്റഡിയിലെടുത്തിട്ടുണ്ട്.
 
പതിനഞ്ചുകാരിയെയുമായി ഒളിച്ചോടിയ കാമുകനും സുഹൃത്തുക്കളും അറസ്റ്റില്‍
താമരശ്ശേരി: ഇന്‍സ്റ്റാഗ്രാമിലൂടെ പരിചയപ്പെട്ട പതിനഞ്ചുകാരിയെയുമായി ഒളിച്ചോടിയ കാമുകനും സുഹൃത്തുക്കളും അറസ്റ്റില്‍. കോഴിക്കോട് നല്ലളം സ്വദേശിയും വിദ്യാര്‍ത്ഥിനിയുടെ കാമുകനുമായ തച്ചമ്പലം വയല്‍ ഹാമിദ്(21), സുഹൃത്തുക്കളും നല്ലളം സ്വദേശികളുമായ കോയാസ് ബസാര്‍ കൈതവളപ്പ് സല്‍മാനുല്‍ ഫാരിസ്(21), അരീക്കാട് ഒതയമംഗലം വിഷ്ണു(22), പള്ളിപ്പറമ്പില്‍ അഫ്താബ് റഹ്മാന്‍(20), ആപ്പാട് അബ്ദുല്‍ ഹഫീഫ്(20) എന്നിവരെയാണ് താമരശ്ശേരി പോലീസ് അറസ്റ്റ് ചെയ്തത്. ഈ മാസം ഒന്നാം തിയ്യതിയാണ് പത്താംക്ലാസ് വിദ്യാര്‍ത്ഥിനിയെ കാണാതായത്. പോലീസ് നടത്തിയ അന്വേഷണത്തില്‍ കഴിഞ്ഞ ദിവസം വിദ്യാര്‍ത്ഥിനിയെ തൊടുപുഴയില്‍ നിന്നും കണ്ടെത്തുകയായിരുന്നു. ഇന്‍സ്റ്റാഗ്രാം വഴി പരിചയപ്പെട്ട ഹാമിദിനൊപ്പമാണ് വിദ്യാര്‍ത്ഥിനി ഒളിച്ചോടിയത്. ബൈക്കില്‍ വിവധ സ്ഥലങ്ങളില്‍ കറങ്ങിയ ശേഷം സുഹൃത്തുക്കളുമായി ഇടുക്കി, പത്തനംതിട്ട, എറണാകുളം, കൊടുങ്ങല്ലൂര്‍ എന്നിവിടങ്ങളിലെത്തി. പോലീസ് പിന്തുടരുന്ന വിവരം അറിഞ്ഞ് പരിഭ്രാന്തരായ ഇവര്‍ തൊടുപുഴയിലെത്തി ലോഡ്ജില്‍ മുറിയെടുത്ത് താമസിക്കുന്നതിനിടയിലാണ് പോലീസ് പിടികൂടിയത്. 17 വയസ്സ് കഴിഞ്ഞെന്നും ഏതാനും ദിവസങ്ങള്‍ കഴിഞ്ഞാല്‍ വിവാഹം കഴിക്കാമെന്നും പെണ്‍കുട്ടി പറഞ്ഞതിനെ തുടര്‍ന്നാണ് നാടുവിട്ടതെന്നാണ് ഹാമിദ് പോലീസിന് മൊഴി നല്‍കിയത്. വിവരം സുഹൃത്തുക്കളെ അറിയിച്ചപ്പോള്‍ അവര്‍ സഹായത്തിന് ഒപ്പം ചേരുകയായിരുന്നുവെന്നും ഹാമിദ് മൊഴി നല്‍കി. ലൈംഗിക അതിക്രമത്തിന് പോക്‌സോ നിയമ പ്രകാരവും തട്ടിക്കൊണ്ടു പോകലിനുമാണ് ഇവര്‍ക്കെതിരെ പോലീസ് കേസെടുത്തത്. താമരശ്ശേരി കോടതിയില്‍ ഹാജറാക്കിയ പ്രതികളെ 14 ദിവസത്തേക്ക് റിമാന്റ് ചെയ്തു.
 
താമരശ്ശേരി അസിസ്റ്റന്റ് രജിസ്ട്രാര്‍ ജനറല്‍ ഓഫീസ് ശനിയാഴ്ച നാടിന് സമര്‍പ്പിക്കും
താമരശ്ശേരി: താമരശ്ശേരി താലൂക്കിലേക്ക് പുതുതായി അനുവദിച്ച സഹകരണ സംഘം അസിസ്റ്റന്റ് രജിസ്ട്രാര്‍ ജനറല്‍ ഓഫീസ് ശനിയാഴ്ച വൈകിട്ട് നാലുമണിക്ക് സഹകരണ വകുപ്പുമന്ത്രി കടകംപള്ളി സുരേന്ദ്രന്‍ നാടിന് സമര്‍പ്പിക്കും. കാരാട്ട് റസാഖ് എം എല്‍ എ അധ്യക്ഷത വഹിക്കും. എം എല്‍ എ മാരായ ജോര്‍ജ് എം തോമസ്, പുരുഷന്‍ കടലുണ്ടി തുടങ്ങിയവര്‍ സംബന്ധിക്കും. താമരശ്ശേരി ആസ്ഥാനമായി താലൂക്ക് രൂപീകരിച്ചതിന്റെ ഭാഗമായാണ് സഹകരണസംഘം അസിസ്റ്റന്റ് രജിസ്ട്രാര്‍ ഓഫീസ് അനുവദിച്ചുകൊണ്ട് സര്‍ക്കാര്‍ ഉത്തരവായത്. ഒക്ടോബര്‍ ഒന്നിന് ഓഫീസ് നിലവില്‍ വന്നെങ്കിലും കെട്ടിട സൗകര്യം ഇല്ലാത്തതിനാല്‍ കോഴിക്കോട് ആസ്ഥാനമായാണ് പ്രവര്‍ത്തിച്ചിരുന്നത്. താമരശ്ശേരി പുതിയ ബസ്റ്റാന്റിനോട് ചേര്‍ന്ന് മാനിപുരം റോഡിലെ സ്വകാര്യ കെട്ടിടത്തിലാണ് അസിസ്റ്റന്റ് രജിസ്ട്രാര്‍ ജനറല്‍ ഓഫീസിന് സൗകര്യം ഒരുക്കിയത്. അസിസ്റ്റന്റ് രജിസ്ട്രാര്‍, ഓഫീസ് ഇന്‍സ്‌പെക്ടര്‍, എ ആന്റ് ഇ, ഓഫീസ് അസിസ്റ്റന്റ്, പാര്‍ട് ടൈം സ്വീപര്‍ എന്നിവരുടെ ഓരോ തസ്തികകളാണ് പുതുതായി സൃഷ്ടിച്ചത്. കൂടാതെ കോഴിക്കോട്, കൊയിലാണ്ടി താലൂക്കുകളില്‍ നിന്നായി ആറ് ഇന്‍സ്‌പെക്ടര്‍മാരെ പുനക്രമീകരണത്തിലൂടെയും നിയമിച്ചിട്ടുണ്ട്. താമരശ്ശേരി താലൂക്കിലെ കൊടുവള്ളി നഗരസഭയിലെയും താമരശ്ശേരി, പുതുപ്പാടി, കോടഞ്ചേരി, ഓമശ്ശേരി, കട്ടിപ്പാറ, കിഴക്കോത്ത്, നരിക്കുനി, തിരുവമ്പാടി, കൂടരഞ്ഞി, പനങ്ങാട്, ഉണ്ണികുളം പഞ്ചായത്തുകളിലെയും നൂറ്റിപത്തോളം സഹകരണ സംഘങ്ങളാണ് അസിസ്റ്റന്റ് രജിസ്ട്രാര്‍ ഓഫീസിന് കീഴിലുള്ളത്. താമരശ്ശേരി, തിരുവമ്പാടി എന്നിങ്ങനെ രണ്ട് യൂണിറ്റുകളായാണ് പ്രവര്‍ത്തനം.
 
കാരാടി കുടുക്കിലുമ്മാരം റോഡ് നവീകരണം ആരംഭിച്ചു
താമരശ്ശേരി: കൊയിലാണ്ടി എടവണ്ണ സംസ്ഥാന പാതയേയും താമരശ്ശേരി ടൗണിനെയും ബന്ധിപ്പിക്കുന്ന കാരാടി കുടുക്കിലുമ്മാരം റോഡിന് ശാപ മോക്ഷമാവുന്നു. പൊട്ടിപ്പൊളിഞ്ഞ് യാത്ര ദുശ്കരമായ റോഡ് ആധുനിക രീതിയില്‍ നവീകരിക്കാന്‍ സര്‍ക്കാര്‍ 2 കോടി രൂപ അനുവദിച്ചതാണ് ആശ്വാസമാവുന്നത്. സംസ്ഥാന പാതയിലെ കുടുക്കിലുമ്മാരത്തുനിന്നും ദേശീയ പാതയിലെ താമരശ്ശേരി കാരാടിയിലെത്തുന്ന റോഡിന്റെ ശോചനീയാവസ്ഥ പരിഹരിക്കാനുള്ള കാരാട്ട് റസാഖ് എം എല്‍ എയുടെ ഇടപെടലിനെ തുടര്‍ന്നാണ് പണം അനുവദിച്ചത്.
 
പരപ്പന്‍പൊയിലില്‍ നിന്നും കാണാതായ പതിനഞ്ചുകാരിയെ കണ്ടെത്തി
താമരശ്ശേരി: പരപ്പന്‍പൊയിലില്‍ നിന്നും കാണാതായ പതിനഞ്ചുകാരിയെ കണ്ടെത്തി. താഴെ പരപ്പന്‍പൊയില്‍ മോഹന്‍ദാസിന്റെ മകള്‍ സാന്ദ്രയെയാണ് തൊടുപുഴയില്‍ നിന്നും പോലീസ് കണ്ടെത്തിയത്. ഈ മാസം ഒന്നിന് രാവിലെയാണ് സാന്ദ്രയെ കാണാതായത്. താമരശ്ശേരി ഇന്‍സ്‌പെക്ടര്‍ ടി എ അഗസ്റ്റിന്‍, എസ് ഐ സായൂജ് കുമാര്‍ എന്നിവരുടെ നേതൃത്വത്തിലുള്ള പോലീസ് സംഘം അയല്‍ സംസ്ഥാനങ്ങളില്‍ ഉള്‍പ്പെടെ അന്വേഷണം നടത്തി വരികയായിരുന്നു. ഇതിനിടെയാണ് തൊടുപുഴയില്‍ ഉളളതായ വിവരം ലഭിച്ചത്. വ്യാഴാഴ്ച രാവിലെയാണ് പത്താം ക്ലാസ് വിദ്യാര്‍ത്ഥിനിയായ സാന്ദ്രയെ പോലീസ് കണ്ടെത്തിയത്. എസ് ഐ സായൂജ് കുമാറിന്റെ നേതൃത്വത്തിലുള്ള പോലീസ് സംഘം വിദ്യാര്‍ത്ഥിനിയെയുമായി നാട്ടിലേക്ക് പുറപ്പെട്ടു.
 
 
 
 

All rights reserved | Website developed and maintained by Zyonz Technologies