17-Feb-2019 (Sun)
 
 
 
കേരള സംരക്ഷണ ജാഥ; കൊടുവള്ളിയില്‍ സ്വാഗതസംഘം രൂപീകരിച്ചു
കൊടുവള്ളി: മോഡിയെ അധികാര ഭ്രഷ്ഠനാക്കുക, കോണ്‍ഗ്രസ്സിന്റെ അവസരവാദ രാഷ്ട്രീയം തുറന്നു കാട്ടുക എന്നീ മുദ്രാവാക്യങ്ങളുയര്‍ത്തി കാനം രാജേന്ദ്രന്‍ നയിക്കുന്ന എല്‍ ഡി എഫ് കേരള സംരക്ഷണ ജാഥക്ക് വന്‍ വരവേല്പ് നല്‍കാന്‍ പാലക്കുറ്റിയില്‍ നടന്ന സ്വാഗതസംഘ രൂപീകരണ യോഗം തീരുമാനിച്ചു. ഫെബ്രുവരി 21 ന് മൂന്ന് മണിക്കാണ് ജാഥ കൊടുവള്ളിയിലെത്തിച്ചേരുന്നത്. സ്വീകരണ പരിപാടിയില്‍ 15000 പേരെ പങ്കെടുപ്പിക്കാന്‍ യോഗം തീരുമാനിച്ചു. പരിപാടിയുടെ വിജയകരമായ നടത്തിപ്പിന് 1001 അംഗ സ്വാഗതസംഘ കമ്മറ്റിക്ക് യോഗം രൂപം നല്‍കി. കാരാട്ട് റസാഖ് എം എല്‍ എ (ചെയ), കെ ബാബു (ജന. കണ്‍), ഒ പി ഐ കോയ (ട്രഷറര്‍ ) എന്നിവരെ ഭാരവാഹികളായി തിരഞ്ഞെടുത്തു. യോഗം കാരാട്ട് റസാഖ് എം എല്‍ എ ഉദ്ഘാടനം ചെയ്തു. ആര്‍ പി ഭാസ്‌കര കുറുപ്പ് അധ്യക്ഷത വഹിച്ചു. നാസര്‍കോയ തങ്ങള്‍, ഒ പി ഐ കോയ, പി ടി സി ഗഫൂര്‍, ടി പി ഗോപാലന്‍, അഹമ്മദ് വേളാട്ട്, കെ ബാബു എന്നിവര്‍ സംസാരിച്ചു.
 
പതിറ്റാണ്ടുകള്‍ക്ക് മുമ്പുണ്ടായിരുന്ന വിവാഹ വീട് പുനരാവിഷ്‌കരിച്ച് പൂനൂര്‍ സ്വദേശി
പൂനൂര്‍: ന്യൂ ജനറേഷന്‍ വിവാഹങ്ങളുടെ കാലത്ത് പതിറ്റാണ്ടുകള്‍ക്ക് മുമ്പുണ്ടായിരുന്ന വിവാഹ വീടിന്റെ പുനരാവിഷ്‌കാരം പുതു തലമുറക്ക് വിസ്മയ കാഴ്ചയായി മാറി. പൂനൂര്‍ കക്കാട്ടുമ്മല്‍ മൂസയാണ് മകള്‍ ഫാത്തിമ ജഹാന്റെ വിവാഹം ചരിത്രത്തിന്റെ പുനരാവര്‍ത്തനമാക്കിയത്. കുരുത്തോല കൊണ്ടുള്ള കവാടം, തെങ്ങിന്‍പൂക്കുല കൊണ്ട് കവാടത്തില്‍ സ്വാഗതം എഴുതി വെച്ചു. തെങ്ങോലകൊണ്ടുള്ള പന്തല്‍. സീലിംഗായി പനമ്പട്ട അടുക്കി വെച്ചു. ഈന്തിന്‍പട്ടകൊണ്ടുള്ള ചുറ്റുമറ. പന്തലിന്റെ അരികിലൂടെ സാരികൊണ്ടുള്ള ബോര്‍ഡര്‍. കല്യാണ രാവില്‍ കുട്ടികളുടെ ഒപ്പനയും കോല്‍ക്കളിയും. തീര്‍ന്നില്ല, മണ്ണെണ്ണ വിളക്കുകളായ പെട്രോള്‍ മാക്‌സും റാന്തലും മുറുക്കാന്‍ കടയുമെല്ലാം ഇവിടെ പുനരാവിഷ്‌കരിച്ചു. പ്ലാസ്റ്റിക് കയറുകള്‍ക്ക് പകരം പന നാരുകളാണ് ഉപയോഗിച്ചത്. മൂസയുടെ സ്വപ്‌നം സാക്ഷാത്കരിക്കാനായി പ്രദേശവാസികളും ബന്ധുക്കളും ദിവസങ്ങളോളം അധ്വാനിച്ചു. കല്യാണ വീട്ടില്‍ എത്തിയവരുടെയെല്ലാം കണ്ണ് പന്തലിലാണ്. പുതു തലമുറ വിസ്മയ കാഴ്കള്‍ കണ്ട് സെല്‍ഫിയെടുത്തു. പഴയ തലമുറ ഓര്‍മകളില്‍ മറഞ്ഞ സുന്ദരമായ കഴിഞ്ഞ കാലം ഓര്‍ത്തെടുത്തു.
 
ഹരികിരണം ആയുര്‍വേദ ചികിത്സാ പദ്ധതി ദേശീയ തലത്തിലേക്ക്
താമരശ്ശേരി: കട്ടിപ്പാറ ഗ്രാമപഞ്ചായത്ത് ആദിവാസി കോളനികളില്‍ നടപ്പിലാക്കിയ ആയുര്‍വേദ ചികിത്സാ പദ്ധതിയായ ഹരികിരണം ദേശീയ തലത്തിലേക്ക്. കേരളസര്‍ക്കാര്‍ ആരോഗ്യ വകുപ്പ് ദേശീയ ആയുഷ് മിഷന് കീഴില്‍ ഫെബ്രുവരി 15 മുതല്‍ 19 വരെ തിരുവനന്തപുരം കനക്കുന്നില്‍ നടക്കുന്ന ദേശീയ ആയുഷ് കോണ്‍ക്ലേവിലേക്ക് കട്ടിപ്പാറ ഗ്രാമപഞ്ചായത്തിന്റെ ഹരികിരണം തിരഞ്ഞെടുക്കപ്പെട്ടു. കോഴിക്കോട്ട് നടന്ന നോര്‍ത്ത് സോണ്‍ എല്‍ എസ് ജി ഐ ലീഡേഴ്‌സ് മീറ്റില്‍ കാസര്‍ഗോഡ് കണ്ണൂര്‍ വയനാട് കോഴിക്കോട് മലപ്പുറം പാലക്കാട് തൃശൂര്‍ ജില്ലകളില്‍ നിന്നും അവതരിപ്പിച്ച വിവിധ പ്രോജക്ടുകളില്‍ നിന്നും തിരഞ്ഞെടുക്കപ്പെട്ട നാല് പ്രോജക്ടുകളിലാണ് ഹരികിരണം ഇടം പിടിച്ചത്. കട്ടിപ്പാറ സര്‍ക്കാര്‍ ആയുര്‍വേദ ഡിസ്‌പെന്‍സറിയിലെ മെഡിക്കല്‍ ഓഫീസര്‍ ഡോ. കെ പ്രവീണിന്റെ നേതൃത്വത്തില്‍ 2016 മുതലാണ് ഹരികിരണം ആരംഭിച്ചത്. കാക്കണഞ്ചേരി, വള്ളുവര്‍കുന്ന് കോളനികളില്‍ ആഴ്ചയില്‍ ഒരു ദിവസം ഡോക്ടര്‍മാര്‍ അടങ്ങിയ സംഘം സന്ദര്‍ശനം നടത്തുകയും ഓരോരുത്തരുടെയും ആരോഗ്യ സ്ഥിതി വിലയിരുത്തി ഔഷധങ്ങള്‍ നല്‍കുകയുമാണ് ചെയ്യുന്നത്. അരി, വെളിച്ചെണ്ണ, ബിസക്കറ്റ് തുടങ്ങിയവയുമായാണ് ഡോക്ടറും സംഘവും കോളനികളിലെത്തുന്നത്. ചോറില്‍ വെളിച്ചെണ്ണയൊഴിച്ച് ഉപ്പും ചേര്‍ത്ത് കഴിച്ചാല്‍ കുട്ടികളുടെ ദഹനശക്തി വര്‍ദ്ധിപ്പിക്കാനും അതുവഴി പോഷകാഗിരണം മെച്ചപ്പെടാനും കഴിയുമെന്ന കണ്ടെത്തലിനെ തുടര്‍ന്നാണ് മരുന്നിനൊപ്പം ഭക്ഷ്യ വസ്തുക്കളും നല്‍കുന്നത്. വിളര്‍ച്ച, തൂക്കക്കുറവ്, പകര്‍ച്ച വ്യാധികള്‍, ത്വക് രോഗങ്ങള്‍ എന്നിവക്ക് അടിമകളായിരുന്ന കോളനി നിവാസികളുടെ ആരോഗ്യ സ്ഥിതിയില്‍ വലിയ മാറ്റം സൃഷ്്ടിക്കാന്‍ പദ്ധതിക്ക് കഴിഞ്ഞു. വര്‍ഷങ്ങളോളം തളര്‍ന്നു കിടന്ന കാക്കണഞ്ചേരി കോളനിയിലെ മുതിര്‍ന്ന അംഗമായ ചിരുതമ്മ ഇപ്പോള്‍ എഴുനേറ്റ് നടക്കാന്‍ തുടങ്ങി. ആറ് കൊല്ലമായി പുതിയ കുട്ടികള്‍ ജനിക്കാതിരുന്ന കോളനിയില്‍ പുതു തലമുറയുടെ പിറവിയും ഹരികിരണത്തിന്റെ നേട്ടമാണ്. ഗ്രാമപഞ്ചായത്തിന്റെ വാര്‍ഷിക പദ്ധതിയില്‍ ഓരോ വര്‍ഷവും ഹരികരണത്തിന് പണം നീക്കി വെക്കുന്നുണ്ട്. കൂടാതെ സ്‌നേഹധാര ആയുര്‍വേദ പാലിയേറ്റിവ് പരിചരണം, ആയുര്‍വേദ നേത്രചികിത്സാ പദ്ധതി, ജീവിതശൈലി രോഗ ക്ലിനിക്, സ്ത്രീകള്‍ക്ക് യോഗ പരിശീലനം, കേരളത്തിലാദ്യമായി ഭിന്നശേഷിക്കാര്‍ക്കും പഠനത്തില്‍ പിന്നോക്കം നില്‍ക്കുന്ന കുട്ടികള്‍ക്കും വേണ്ടിയുള്ള കൈത്തിരി പദ്ധതി തുടങ്ങിയവ കട്ടിപ്പാറ ഗ്രാമ പഞ്ചായത്ത് ആയുര്‍വേദ ഡിസ്‌പെന്‍സറി വഴി നടപ്പിലാക്കുന്നുണ്ട്. മികച്ച നിര്‍വഹണ ഉദ്യോഗസ്ഥനുള്ള കേരള സര്‍ക്കാരിന്റെ പുരസ്‌കാരം നേടിയ ഡോ. കെ പ്രവീണിനുള്ള അംഗീകാരം കൂടിയാണ് ദേശീയ ആയുഷ് കോണ്‍ക്ലേവിലേക്കുള്ള പ്രവേശനം.
 
വീട് തകര്‍ന്നു വീണ് നിരവധി പേര്‍ക്ക് പരിക്ക്
കിഴക്കോത്ത്: വീട് തകര്‍ന്നു വീണ് നിരവധി പേര്‍ക്ക് പരിക്ക്. കിഴക്കോത്ത് കാവിലുമ്മാരം വേറക്കുന്നുമ്മല്‍ ഷാജി എന്ന രാജന്റെ വീടാണ് വെള്ളിയാഴ്ച രാത്രി തകര്‍ന്നു വീണത്. കുട്ടിയുടെ ജന്മദിനാഘോഷത്തില്‍ പങ്കെടുക്കാനെത്തിയ ഒമ്പതോളം പേര്‍ക്ക് വീടിന്റെ ഓടും മറ്റും വീണ് പരിക്കേറ്റു.
 
കൊടുവള്ളിയില്‍ വീണ്ടും ഉപ തിരഞ്ഞെടുപ്പിന് കളമൊരുങ്ങുന്നു
കൊടുവള്ളി: സര്‍ക്കാര്‍ ജോലി ലഭിച്ചതിനെ തുടര്‍ന്ന് കൊടുവള്ളിയില്‍ നഗരസഭ കൗണ്‍സിലര്‍ രാജിവെച്ചു. പതിനാലാം ഡിവിഷനായ വാരിക്കുഴി താഴത്തുനിന്നും തിരഞ്ഞെടുക്കപ്പെട്ട എല്‍ ഡി എഫ് കൗണ്‍സിലര്‍ പി കെ ഷീബയാണ് കൗണ്‍സിലര്‍ സ്ഥാനം രാജിവെച്ചത്. കൊടുവള്ളി സര്‍വീസ് സഹകരണ ബേങ്ക് ഡയറക്ടറുമാണ്. സി പി ഐ എം കൗണ്‍സിലര്‍ രാജിവെച്ചതോടെ കൊടുവള്ളി നഗരസഭയില്‍ വീണ്ടും ഉപ തിരഞ്ഞെടുപ്പിന് കളമൊരുങ്ങുകയാണ്. കഴിഞ്ഞ തിരഞ്ഞെടുപ്പില്‍ 268 വോട്ടിന്റെ ഭൂരിപക്ഷത്തിലാണ് ഷീബ വിജയിച്ചത്.
 
മന്ന: വിശപ്പ് രഹിത താമരശ്ശേരി പദ്ധതിക്ക് തുടക്കം
താമരശ്ശേരി: ബിഷപ് മാര്‍ സെബാസ്റ്റ്യന്‍ മങ്കുഴിക്കരി ഫൗണ്ടേഷന്‍ ചാരിറ്റബിള്‍ ട്രസ്റ്റ് മന്ന വിശപ്പ് രഹിത താമരശ്ശേരി ഉച്ചഭക്ഷണ പദ്ധതി ആരംഭിച്ചു. ദുര്‍ബല വിഭാഗങ്ങളുടെ ദാരിദ്ര നിര്‍മ്മാര്‍ജ്ജനം ലക്ഷ്യമാക്കിയാണ് മന്ന പദ്ധതി ആരംഭിച്ചത്. ഭക്ഷണത്തിനു പ്രയാസപ്പെടുന്ന ആര്‍ക്കും ഉച്ചഭക്ഷണം ഉറപ്പാക്കുന്നതാണ് പദ്ധതി. കൂപ്പണ്‍ താമരശ്ശേരി മേരിമാതാ കത്തീഡ്രലിലെ അല്‍ഫോന്‍സാ ബുക്ക് സ്റ്റാള്‍, താമരശ്ശേരി ബിഷപ്‌സ് ഹൗസ് എന്നിവിടങ്ങളില്‍ ലഭിക്കും. കൂപ്പണുമായെത്തുന്നവര്‍ക്ക് ചാവറ ഹോസ്പ്പിറ്റല്‍ കാന്റീന്‍, കത്തീഡ്രല്‍ പള്ളിക്കു സമീപമുള്ള ഹോട്ടല്‍ പാരഡൈസ്, താമരശ്ശേരി പിഡബ്ല്യുഡി റസ്റ്റ് ഹൗസ് കാന്റീന്‍ എന്നിവിടങ്ങളില്‍ നിന്ന് സൗജന്യമായി ഭക്ഷണം ലഭിക്കും. താമരശ്ശേരി ഗ്രാമപഞ്ചായത്ത് വൈസ് പ്രസിഡന്റ് നാവാസ് ഈര്‍പ്പോണ ഉദ്ഘാടനം ചെയ്തു. ബിഷപ് മാര്‍ റെമിജിയോസ് ഇഞ്ചനാനിയില്‍ അധ്യക്ഷത വഹിച്ചു. താമരശേരി തഹസില്‍ദാര്‍ സി മുഹമ്മദ് റഫീഖ്, താലൂക്ക് ആശുപത്രി സൂപ്രണ്ട് ഡോ. കേശവനുണ്ണി, ട്രസ്റ്റ് ചെയര്‍മാന്‍ മാര്‍ട്ടിന്‍ തോമസ്, വൈസ് ചെയര്‍മാന്‍മാരായ സി ടി ടോം, വി എല്‍ സെബാസ്റ്റിയന്‍, സെക്രട്ടറി സണ്ണിമാത്യു, ജോയിന്റ് സെക്രട്ടറി വിജോഷ് കെ ജോസ്, ട്രഷറര്‍ എന്‍ കെ ജോസഫ്, ട്രസ്റ്റിമാരായ റെജി ജോസഫ്, ഷൈജു കെ ജോസ്, ജോസ് കൈനടി എന്നിവര്‍ പ്രസംഗിച്ചു.
 
റിപ്പബ്ലിക് ദിന റാലിയിലെ താമര: അംഗന്‍വാടി ജീവനകാര്‍ക്ക് സസ്പെന്‍ഷന്‍
താമരശ്ശേരി: താമരശ്ശേരി തെറ്റാമ്പുറം അംഗന്‍വാടിയിലെ റിപ്പബ്ലിക് ദിന റാലിയില്‍ ബി ജെ പിയുടെ തെരഞ്ഞെടുപ്പ് ചിഹ്നമായ താമര പതിച്ച പ്ലേക്കാര്‍ഡുകള്‍ വിദ്യാര്‍ത്ഥികളെകൊണ്ട് പിടിപ്പിച്ച സംഭവത്തില്‍ അംഗന്‍വാടി ജീവനകാര്‍ക്ക് സസ്പെന്‍ഷന്‍. അംഗന്‍വാടി വര്‍ക്കര്‍ കെ വി ജയ, ഹെല്‍പ്പര്‍ കൈരളി എന്നിവരെയാണ് സാമൂഹ്യക്ഷേമവകുപ്പ് അന്വേഷണ വിധേയമായി സസ്പെന്റ് ചെയ്തത്. സംഘര്‍ഷാവസ്ഥ കണക്കിലെടുത്ത് അങ്കണവാടി അടച്ചിടാന്‍ തീരുമാനിച്ചതായും കൊടുവള്ളി ബ്ലോക്ക് ശിശു വികസന പദ്ധതി ഓഫീസര്‍ സുബൈദ ഗ്രാമപഞ്ചായത്തിന് അയച്ച കത്തില്‍ പറയുന്നു. ഇക്കഴിഞ്ഞ ജനുവരി 26ന് നടന്ന റിപ്പബ്ലിക് ദിനാഘോഷ പരിപാടിയാണ് വിവാദത്തിനിടയാക്കിയത്. റാലിയില്‍ കാവി നിറത്തിലുള്ള താമര ചിഹ്നം ഉപയോഗിക്കുകയും ബി ജെ പി മണ്ഡലം ഭാരവാഹി ഇതിന്റെ ഫോട്ടോ സോഷ്യല്‍ മീഡിയയില്‍ പ്രചരിപ്പിക്കുകയും ചെയ്തതോടെയാണ് സംഭവം വിവാദമായത്. സി ഡി പി ഒ സുബൈദ തിങ്കളാഴ്ച അങ്കണവാടിയിലെത്തി തെളിവെടുപ്പ് നടത്തിയിരുന്നു. ഇതിനിടെ പരാതി പറയാന്‍ എത്തിയ ഡി വൈ എഫ് ഐ പ്രവര്‍ത്തകരെ ബി ജെ പി പ്രവര്‍ത്തകര്‍ ചോദ്യം ചെയ്യുകയും ബി ജെ പി മണ്ഡലം ഭാരവാഹിയും സഹോദരനും കൊടുവാളുമായി ആക്രമിക്കാന്‍ ശ്രമിക്കുകയും ചെയ്തിരുന്നു.
 
എന്റിച്ച് 2020 സമഗ്ര വികസന പദ്ധതി സര്‍വ്വെ ആരംഭിച്ചു
കൊടുവള്ളി: കൊടുവള്ളി നഗരസഭ 6,7 കളരാന്തിരി നോര്‍ത്ത്, സൗത്ത് ഡിവിഷനുകളില്‍ നടപ്പാക്കുന്ന സമഗ്ര വികസന പദ്ധതിയായ എന്റിച്ച് 2020 സര്‍വ്വെ ആരംഭിച്ചു. ഡിവിഷനുകളുടെ സമഗ്രവികസനം ലക്ഷ്യം വെച്ച് നടപ്പാക്കുന്ന പദ്ധതിയുടെ ഭാഗമായി മുതിര്‍ന്ന പൗരന്മാര്‍, അമ്മമാര്‍, യുവാക്കള്‍, വിദ്യാര്‍ത്ഥികള്‍, കുടുംബശ്രീ അംഗങ്ങള്‍ തുടങ്ങിയവര്‍ക്ക് വിവിധ പരിശീലനങ്ങള്‍, സംരഭകത്വ ശില്‍പശാലകള്‍, മുഴുവന്‍ ആളുകള്‍ക്കും ഹയര്‍സെകന്ററി തുല്യതാപഠനം തുടങ്ങി വിവിധ പരിപാടികള്‍ നടത്തും. പദ്ധതിയുടെ ഭാഗമായുള്ള സര്‍വ്വെയുടെ ഉദ്ഘാടനം കൊടുവള്ളി നഗരസഭ ഡെപ്യൂട്ടി ചെയര്‍മാന്‍ എ പി മജീദ് മാസ്റ്റര്‍ നിര്‍വ്വഹിച്ചു. കൗണ്‍സിലര്‍ പി അനീസ് അദ്ധ്യക്ഷത വഹിച്ചു. നഗരസഭ ആരോഗ്യ സ്ഥിരം സമിതി അദ്ധ്യക്ഷ വി സി നൂര്‍ജഹാന്‍, കത്തര്‍ കെ എം സി സി കോഴിക്കോട് ജില്ലാ പ്രസിഡണ്ട് കെ പി എം ബഷീര്‍ഖാന്‍, കെ പി കുഞ്ഞോദി മാസ്റ്റര്‍, വി സി അബൂബക്കര്‍ മാസ്റ്റര്‍, സി പി മോയിന്‍, വട്ടോത്ത് അബ്ദുറഹിമാന്‍, യു കെ സുബൈര്‍, എന്‍ കെ ആലികുഞ്ഞി മാസ്റ്റര്‍, പുനത്തില്‍ മജീദ്, അബ്ദുല്‍ മജീദ് വി കെ, വദൂദ് കല്‍പള്ളി, സാബിത് കളരാന്തിരി, ഡോ. അനസ് വി കെ, ആരിഫ് സി കെ, കെ ടി മുഹമ്മദ്, ശരീഫ് എം വി, കെ പി മുഹമ്മദ്, ബഷീര്‍ വി പി, റഷീദ് വി പി തുടങ്ങിയവര്‍ സംബന്ധിച്ചു.
 
കൊടുവള്ളിയില്‍ കഞ്ചാവ് വില്‍പ്പനക്കിടെ രണ്ടുപേര്‍ അറസ്റ്റില്‍
കൊടുവള്ളി: കൊടുവള്ളിയില്‍ കഞ്ചാവ് വില്‍പ്പനക്കിടെ രണ്ടുപേര്‍ അറസ്റ്റില്‍. ഉണ്ണികുളം എം എം പറമ്പ് മൊകായില്‍ എം കെ സുബീഷ്(33), പൂനൂര്‍ സ്വദേശി റാസിഖ്(31) എന്നിവരെയാണ് കൊടുവള്ളി പോലീസ് അറസ്റ്റ് ചെയ്തത്. കൊടുവള്ളി വാവാട് ഭാഗത്ത് കഞ്ചാവ് വില്‍പ്പന നടത്താന്‍ ശ്രമിക്കുന്നതായി താമരശ്ശേരി ഡി വൈ എസ് പി. പി ബിജുരാജിന് ലഭിച്ച രഹസ്യ വിവരത്തെ തുടര്‍ന്ന് നടത്തിയ നീക്കത്തിലാണ് കഞ്ചാവ് പിടികൂടിയത്. സ്‌കൂളുകളും കോളേജുകളും കേന്ദ്രീകരിച്ച് വില്‍പ്പന നടത്താനായി എത്തിച്ച ഒരു കിലോ നൂറ് ഗ്രാം കഞ്ചാവ് പോലീസ് പിടിച്ചെടുത്തു. ഇവര്‍ക്ക് കഞ്ചാവ് എത്തിച്ച് നല്‍കുന്നവരെ കുറിച്ചും പോലീസിന് വിവരം ലഭിച്ചിട്ടുണ്ട്. ഡി വൈ എസ് പി യുടെ ക്രൈം സ്‌ക്വാഡ് അംഗങ്ങളായ എ എസ് ഐ രാജീവ് ബാബു, സീനിയര്‍ സി പി ഒ ഷിബില്‍ ജോസഫ്, സി പി ഒ ഷഫീഖ് നീലിയാനിക്കല്‍, കൊടുവള്ളി സ്റ്റേഷനിലെ എ എസ് ഐ വിനോദ്, സി പി ഒ മാരായ അബ്ദുല്‍ റഹീം, അബ്ദുല്‍ റഷീദ്, ഷിനോജ്, അബ്ദുല്‍ കരീം, സജിഷ എന്നിവരടങ്ങിയ സംഘമാണ് കഞ്ചാവ് പിടികൂടിയത്. താമരശ്ശേരി കോടതിയില്‍ ഹാജറാക്കിയ പ്രതികളെ 14 ദിവസത്തേക്ക് റിമാണ്ട് ചെയ്തു.
 
പൂനൂരില്‍ വീണ്ടും വന്‍ മദ്യവേട്ട
പൂനൂര്‍: പൂനൂരില്‍ വീണ്ടും വന്‍ മദ്യവേട്ട. 55 കുപ്പി മാഹി മദ്യവുമായി പൂനൂര്‍ കൈതേരിപ്പൊയില്‍ സജീവന്‍(49) എക്‌സൈസിന്റെ പിടിയിലായി. കോഴിക്കോട് ഡെപ്യൂട്ടി എക്‌സൈസ് കമ്മീഷണര്‍ക്ക് ലഭിച്ച രഹസ്യ വിവരത്തെ തുടര്‍ന്ന് താമരശ്ശേരി എക്‌സൈസ് റെയ്ഞ്ച് ഇന്‍സ്‌പെക്ടര്‍ പി പി വേണുവിന്റെ നേതൃത്വത്തില്‍ സജീവന്‍ താമസിക്കുന്ന പൂനൂര്‍ 19 ലെ വീട്ടില്‍ നടത്തിയ പരിശോധനയിലാണ് മാഹി മദ്യം പിടികൂടിയത്. ഇയാള്‍ക്കെതിരെ മദ്യ വില്‍പ്പനക്ക് ബാലുശ്ശേരി റെയ്ഞ്ചില്‍ രണ്ട് കേസ്സുകള്‍ നിലവിലുണ്ട്. പ്രിവന്റീവ് ഓഫീസര്‍ ചന്ദ്രന്‍ കുഴിച്ചാലില്‍, സിവില്‍ എക്‌സൈസ് ഓഫീസര്‍മാരായ പി ശ്രീരാജ്, ഷാജു സി ജി, എന്‍ പി വിവേക്, അശ്വന്ത് വി ആര്‍, വനിതാ സിവില്‍ എക്‌സൈസ് ഓഫീസര്‍ ഷിംന ടി എം, ഡ്രൈവര്‍ പി കെ കൃഷ്ണന്‍ എന്നിവരടങ്ങിയ സംഘമാണ് മാഹി മദ്യം പിടികൂടിയത്. കഴിഞ്ഞ ദിവസാം പൂനൂരില്‍ നിന്നും 51 കുപ്പി വിദേശമദ്യവുമായി കൂരാച്ചുണ്ടു സ്വദേശി ജിങ്കോ ശരത്തിനെ താമരശ്ശേരി എക്‌സൈസ് അറസ്റ്റു ചെയ്തിരുന്നു.
 
 
 
 

All rights reserved | Website developed and maintained by Zyonz Technologies