11-Dec-2018 (Tue)
 
 
 
കൊടുവള്ളി നഗരസഭയില്‍ സമ്പൂര്‍ണ്ണ ഡിജിറ്റര്‍ വിവര ശേഖരണത്തിന് തുടക്കം
കൊടുവള്ളി: കൊടുവള്ളി നഗരസഭയില്‍ സമ്പൂര്‍ണ്ണ ഡിജിറ്റര്‍ വിവര ശേഖരണം ആരംഭിച്ചു. നഗരസഭയുടെ ഭരണം ഡിജിറ്റലൈസ് ചെയ്യുന്നതിനായുള്ള ഇന്റലിജന്റ് പ്രോപ്പര്‍ട്ടി മാനേജ്‌മെന്റ് പദ്ധതിയാണ് കൊടുവള്ളിയില്‍ നടപ്പിലാക്കുന്നത്. നഗര സഭയിലെ മുഴുവന്‍ കെട്ടിടങ്ങളുടെയും ഫോട്ടോകളും നഗരസഭാ പിരിധിയിലെ താമസക്കാരുടെ പൂര്‍ണ വിവരങ്ങളും ഡിജിറ്റര്‍ സര്‍വെയിലൂടെ ശേഖരിച്ചാണ് പദ്ധതി പ്രാവര്‍ത്തികമാക്കുന്നത്. ഡി ജി പി എസ്, ഡ്രോണ്‍, ലേസര്‍ ടേപ്പ് എന്നീ സംവിധാനങ്ങള്‍ ഉപയോഗിച്ച് ഫോട്ടോകളും മറ്റു വിവരങ്ങളും ശേഖരിക്കുന്നതിനു പുറമെ മുഴുവന്‍ വീടുകളിലും കയറി വിവരങ്ങള്‍ ശേഖരിച്ച് പ്രത്യേക വെബ് പോര്‍ട്ടലില്‍ രേഖപ്പെടുത്തും. ഏതൊരു കെട്ടിടത്തിന്റെയും നമ്പര്‍ ഉപയോഗിച്ച് ഫോട്ടോ ഉള്‍പ്പെടെയുള്ള പൂര്‍ണ വിവരങ്ങള്‍ കണ്ടെത്താന്‍ ഉദ്യോഗസ്ഥര്‍ക്ക് കഴിയുമെന്നതിനാല്‍ കൃത്യ നിര്‍വഹണം കുറ്റമറ്റതാക്കാനാവുമെന്നാണ് പ്രതീക്ഷിക്കുന്നത്. അത്യാധുനിക സംവിധാനങ്ങളോടെയുള്ള ഡ്രോണ്‍ ഉപയോഗിച്ചാണ് കെട്ടിടങ്ങളുടെയും മറ്റും ഫോട്ടോകള്‍ പകര്‍ത്തുന്നത്. റോഡ്, പാലം, കള്‍വര്‍ട്ട്, ഡ്രൈനേജ്, കനാല്‍, റോഡ് ജംഗ്ഷന്‍, റോഡ് സിഗ്നല്‍, ഡിവൈഡര്‍, പാര്‍ക്കിംഗ് എന്നിവയുടെയെല്ലാം ഫോട്ടോകളും പൂര്‍ണ വിവരങ്ങളും ശേഖരിക്കും. ഊരാളുങ്കല്‍ ലേബര്‍ കണ്‍സ്ട്രക്ഷന്‍ സൊസൈറ്റിയാണ് പദ്ധതി ഏറ്റെടുത്ത് നടപ്പിലാക്കുന്നത്. രഹസ്യ വിവരങ്ങള്‍ ഒഴികെയുള്ളവ പൊതുജനങ്ങള്‍ക്കും ലഭ്യമാക്കുന്ന രീതിയിലാണ് വെബ് പോര്‍ട്ടല്‍ ക്രമീകരിക്കുന്നത്. പദ്ധതി പ്രാവര്‍ത്തികമായാല്‍ വ്യാപാര വ്യവസായ മേഖലകള്‍ക്കുള്‍പ്പെടെ പ്രയോജനം ലഭിക്കുമെന്നാണ് വിലയിരുത്തപ്പെടുന്നത്.
 
യൂത്ത് ലീഗ് പ്രവര്‍ത്തകന്റെ കൊലപാതകം; ഒന്നും രണ്ടും പ്രതികള്‍ കുറ്റക്കാര്‍
നാദാപുരം: യൂത്ത് ലീഗ് പ്രവര്‍ത്തകനായിരുന്ന വേളം പുത്തലത്ത് നസിറുദ്ദീന്‍ കൊല്ലപ്പെട്ട കേസില്‍ ഒന്നും രണ്ടും പ്രതികള്‍ കുറ്റക്കാരെന്ന് കോടതി. കോഴിക്കോട് അഡീഷണല്‍ ജില്ലാ ജഡ്ജ് സുരേഷ് കുമാറാണ് എസ് ഡി പി ഐ പ്രവര്‍ത്തകരായ ഒന്നാം പ്രതി കപ്പച്ചേരി ബഷീറും രണ്ടാം പ്രതി കൊല്ലിയില്‍ അന്ത്രുവും കുറ്റക്കാരാണെന്ന് വിധി പ്രസ്താവിച്ചത്. 2016 ജുലൈ 15 നാണ് കേസിനാസ്പദമായ സംഭവം നടന്നത്. വേളം പുത്തലത്ത് അനന്തോട്ട്താഴെ വച്ച് നസിറുദ്ദീനും ബന്ധുവും ബൈക്കില്‍ സഞ്ചരിക്കവെയാണ് ബുള്ളറ്റ് ബൈക്കിലെത്തിയ പ്രതികള്‍ ഇരുവരെയും തടഞ്ഞു നിര്‍ത്തി അക്രമിച്ചത്. പഞ്ചായത്ത് തിരഞ്ഞെടുപ്പുമായി ബന്ധപ്പെട്ട് മുസ്ലീം ലീഗിന്റെ യോഗത്തിലുണ്ടായ വാക്കേറ്റം ഒന്നാം പ്രതി ബഷീര്‍ മൊബൈലില്‍ പകര്‍ത്തിയിരുന്നു. ഇത് നസിറുദ്ദീന്‍ പിടിച്ചെടുത്ത് നശിപ്പിച്ചതിലുള്ള വിരോധമാണ് കൊലപാതകത്തിലേക്ക് നയിച്ചതെന്നാണ് പോലീസിന്റെ നിഗമനം. കേസില്‍ ആകെ ഏഴ് പ്രതികളാണുണ്ടായിരുന്നതെങ്കിലും ബാക്കിയുള്ള 5 പേരെ വെറുതെ വിട്ടു. ഒന്നും രണ്ടും പ്രതികളുടെ ശിക്ഷ നവംബര്‍ 30ന് പ്രസ്താവിക്കും.
 
കോഴിക്കോട്: ഈ വര്‍ഷത്തെ എയ്ഡ്‌സ് ദിനാചരണം ജില്ലയില്‍ വിപുലമായ ബോധവല്‍ക്കരണ പരിപാടികളോടെ സംഘടിപ്പിക്കാന്‍ ജില്ലാ കലക്ടറുടെ അധ്യക്ഷതയില്‍ കലക്ടറേറ്റ് കോണ്‍ഫറന്‍സ് ഹാളില്‍ ചേര്‍ന്ന യോഗത്തില്‍ തീരുമാനമായി. ഡിസംബര്‍ ഒന്നിന് രാവിലെ 9.30 ന് എയ്ഡ്‌സ് ദിന പൊതുജന റാലി മലബാര്‍ ക്രിസ്ത്യന്‍ കോളേജ് പരിസരത്ത് നിന്ന് ആരംഭിച്ച് ഐ എം എ ഹാള്‍ പരിസരത്ത് അവസാനിപ്പിക്കും. ഉദ്ഘാടന പരിപാടി പത്ത് മണിക്ക് ഐ എം എ ഹാളില്‍ ജസ്റ്റിസ് ബി സുധീന്ദ്രകുമാര്‍ ഉദ്ഘാടനം ചെയ്യും. ചടങ്ങില്‍ ജില്ലാ കലക്ടര്‍ മുഖ്യാതിഥിയാവും. എയ്ഡ്‌സ് വാരാചരണത്തിന്റെ ഭാഗമായി നവംബര്‍ 29 ന് രാവിലെ 10 മണിക്ക് ലിസ്സാ കോളേജ് വിദ്യാര്‍ത്ഥികളുടെ നേതൃത്വത്തില്‍ മൊഫ്യൂസില്‍ ബസ് സ്റ്റാന്റ് പരിസരത്ത് ഫഌഷ് മോബും തെരുവ് നാടകവും സംഘടിപ്പിക്കും. കോളേജ് വിദ്യാര്‍ത്ഥികള്‍ക്കായി സ്‌കിറ്റ് മല്‍സരം മലാപറമ്പ് കുടുംബക്ഷേമ പരിശീലന കേന്ദ്രത്തില്‍ രാവിലെ 10 മണിക്ക് നടക്കും. രണ്ട് മണിക്ക് എച്ച് ഐ വി ബാധിതരായ കുട്ടികളുടെ സംഗമവും സ്‌കോളര്‍ഷിപ്പ് വിതരണവും അളകാപുരി ഓഡിറ്റോറിയത്തില്‍ ജില്ലാ കലക്ടര്‍ സാംബശിവ റാവു ഉദ്ഘാടനം ചെയ്യും. 30 ന് രാവിലെ 10 മണിക്ക് ഹയര്‍സെക്കണ്ടറി വിദ്യാര്‍ത്ഥികള്‍ക്കായി ക്വിസ് മത്സരം നടത്തും. തുടര്‍ന്ന് 11 മണിക്ക് സെമിനാര്‍ നടത്തും. ജില്ലാ മെഡിക്കല്‍ ഓഫീസര്‍ ഡോ. ജയശ്രീ വി, സബ് കലക്ടര്‍ വി വിഘ്‌നേശ്വരി, വിവിധ വകുപ്പ് തല ഉദ്യോഗസ്ഥര്‍, സന്നദ്ധ സംഘടനാ പ്രവര്‍ത്തകര്‍, സ്‌കൂള്‍ കോളേജ് അധികൃതര്‍ തുടങ്ങിയവര്‍ യോഗത്തില്‍ പങ്കെടുത്തു.
 
9 ലിറ്റര്‍ വിദേശ മദ്യവുമായി യുവാവ് പിടിയില്‍
പുതുപ്പാടി: ബൈക്കില്‍ കറങ്ങി വിദേശമദ്യ വില്‍പ്പന നടത്തുന്നയാള്‍ എക്‌സൈസിന്റെ പിടിയിലായി. പുതുപ്പാടി വെസ്റ്റ് കൈതപ്പൊയില്‍ ആനോറമ്മല്‍ സുധീഷിനെ(41)യാണ് താമരശേരി അസി. എക്‌സൈസ് ഇന്‍സ്‌പെക്ടര്‍ ജയിംസ് മാത്യുവും സംഘവും ചേര്‍ന്ന് അറസ്റ്റു ചെയ്തത്. 9 ലിറ്റര്‍ ഇന്ത്യന്‍ നിര്‍മ്മിത വിദേശമദ്യവും മദ്യം കടത്തിയ ബൈക്കും എക്‌സൈസ് പിടിച്ചെടുത്തു. സുധീഷിനെതിരെ എക്‌സൈസ് കമ്മീഷണര്‍ക്ക് നിരവധി പരാതികള്‍ ലഭിച്ചിരുന്നു. ഇതേ തുടര്‍ന്ന് എക്‌സൈസ് ഇന്റലിജന്‍സ് വിഭാഗവും താമരശ്ശേരി എക്‌സൈസ് ഷാഡോ സംഘവും ഇയാളെ നിരീക്ഷിച്ചു വരികയായിരുന്നു. തിരുവമ്പാടിയിലെ വിദേശ മദ്യ ഷാപ്പില്‍നിന്നും മദ്യം വാങ്ങി കൈതപ്പൊയിലിലേക്ക് കടത്തുന്നതിനിടെ കോടഞ്ചേരി-ഈങ്ങാപ്പുഴ റോഡില്‍ വെച്ചാണ് ഇയാള്‍ പിടിയിലായത്. ഇന്റലിജന്‍സ് പ്രിവന്റീവ് ഓഫീസര്‍ കെ ഗിരീഷ്, സിവില്‍ എക്‌സൈസ് ഓഫീസര്‍മാരായ ടി നൗഫല്‍, അശ്വന്ത് വിശ്വന്‍ എന്നിവരടങ്ങിയ സംഘമാണ് മദ്യം പിടികൂടിയത്.പ്രതിയെ താമരശ്ശേരി കോടതിയില്‍ ഹാജരാക്കി.
 
അജ്മീര്‍ സ്‌ഫോടനം; ബോംബ് എത്തിച്ചു നല്‍കിയ കൊയിലാണ്ടി സ്വദേശി 11 വര്‍ഷത്തിന് ശേഷം പിടിയില്‍
കൊയിലാണ്ടി: അജ്മീര്‍ ദര്‍ഗയിലുണ്ടായ ബോംബ് സ്‌ഫോടനത്തില്‍ മലയാളിയുടെ പങ്ക് നേരത്തെ വ്യക്തമായിരുന്നുവെങ്കിലും ഇത് വിശ്വസിക്കാന്‍ മലയാളികള്‍ക്ക് കഴിഞ്ഞിരുന്നില്ല. എന്നാല്‍ സ്‌ഫോടനത്തിന് ബോംബ് എത്തിച്ച് നല്‍കിയത് കോഴിക്കോട് കൊയിലാണ്ടി സ്വദേശിയായ സുരേഷ് നായര്‍ ആണെന്ന് ഗുജറാത്ത് ഭീകര വിരുദ്ധ സ്‌ക്വാഡ് ഉറപ്പിച്ചിരുന്നു.
 
പെരുമണ്ണ: നവകേരള സൃഷ്ടിയുടെ ഭാഗമായി പെരുമണ്ണ ഗ്രാമപഞ്ചായത്തും കുറ്റിക്കാട്ടൂര്‍ ജി ടെക്ക് എജുക്കേഷന്‍ സെന്ററും സംയുക്തമായി നടപ്പിലാക്കുന്ന സ്മാര്‍ട്ട് വില്ലേജ് 2018 പദ്ധതിയുടെ ഉദ്ഘാടനവും ലോഗോ പ്രകാശനവും പഞ്ചായത്ത് പ്രസിഡന്റ് കെ അജിത നിര്‍വഹിച്ചു. പ്രായഭേദമന്യേ പെരുമണ്ണ പഞ്ചായത്തിലെ മുഴുവന്‍ ആളുകളെയും കമ്പ്യൂട്ടര്‍ സാക്ഷരരാക്കുക എന്ന ലക്ഷ്യത്തോടെ 50% സ്‌കോളര്‍ഷിപ്പോടുകൂടി കമ്പ്യൂട്ടര്‍ പഠിക്കാന്‍ അവസരമൊരുക്കുന്നതാണ് പദ്ധതി. പഞ്ചായത്ത് ഹാളില്‍ നടന്ന ചടങ്ങില്‍ പഞ്ചായത്ത് വൈസ് പ്രസിഡണ്ട് എന്‍ വി ബാലന്‍ നായര്‍ അദ്ധ്യക്ഷത വഹിച്ചു. ജിടെക് ഓപ്പറേഷന്‍ മാനേജര്‍ സച്ചിന്‍ ദാസ് സ്മാര്‍ട്ട് വില്ലേജ് 2018 പദ്ധതി വിശദീകരിച്ചു. വികസന സ്റ്റാന്‍ഡിങ് കമ്മിറ്റി ചെയര്‍പേഴ്‌സണ്‍ എ ശോഭനകുമാരി, ക്ഷേമകാര്യ സ്റ്റാന്‍ഡിങ് കമ്മിറ്റി ചെയര്‍മാന്‍ കുമ്മങ്ങല്‍ അഹമ്മദ്, ആരോഗ്യ വിദ്യാഭ്യാസ സ്റ്റാന്‍ഡിങ് കമ്മിറ്റി ചെയര്‍പേഴ്‌സണ്‍ ഉഷാകുമാരി, ജി ടെക് ഏരിയ മാനേജര്‍ ജസ്റ്റിന്‍ തോമസ്, സി ഡി എസ് ചെയര്‍പേഴ്‌സണ്‍ കെ സബിത, വാര്‍ഡ് മെമ്പര്‍ എം യു പ്രതീഷ്, കുറ്റിക്കാട്ടൂര്‍ ജി ടെക് ഡയറക്ടര്‍ അനീഷ് എന്നിവര്‍ സംസാരിച്ചു.
 
കോഴിക്കോട്: ജില്ലാ കാര്‍ഷിക വികസന കര്‍ഷക ക്ഷേമ വകുപ്പിന്റെയും ആത്മ കോഴിക്കോടിന്റെയും തിക്കോടി ബ്ലോക്ക് കര്‍ഷക ഉപദേശകസമിതിയുടെയും സംയുക്ത ആഭിമുഖ്യത്തില്‍ നടത്തുന്ന കിസ്സാന്‍ മേള കാര്‍ഷിക വികസന കര്‍ഷക ക്ഷേമ വകുപ്പ് മന്ത്രി വി എസ് സുനില്‍കുമാര്‍ തിക്കൊടി കോക്കനട്ട് നഴ്‌സറിയില്‍ ഉദ്ഘാടനം ചെയ്തു. കെ ദാസന്‍ എം എല്‍ എ അധ്യക്ഷത വഹിച്ചു. കാര്‍ഷിക സെമിനാറും കാര്‍ഷിക പ്രദര്‍ശനവും മേളയുടെ ഭാഗമായി നടത്തുന്നുണ്ട്. കൊയിലാണ്ടി മണ്ഡലത്തിലെ വെളിയന്നൂര്‍ ചെല്ലി തരിശുനിലത്ത് നെല്‍കൃഷി ചെയ്ത് കര്‍ഷകര്‍ക്ക് ലഭ്യമാകേണ്ട ആനുകൂല്യങ്ങള്‍ ഉടനെ ലഭ്യമാക്കുന്നതിനുള്ള നടപടികള്‍ സ്വീകരിക്കുമെന്ന് മന്ത്രി പരിപാടിയില്‍ ഉറപ്പുനല്‍കി. കൈപ്പാട് വികസന ഏജന്‍സിയുടെ ആഭിമുഖ്യത്തില്‍ മണ്ഡലത്തിലെ തരിശിട്ടിരിക്കുന്ന നെല്‍കൃഷി മേഖലകളില്‍ കൃഷിയിറക്കുവാനുള്ള നടപടികള്‍ സ്വീകരിക്കുമെന്ന് മന്ത്രി അറിയിച്ചു. തൊഴിലുറപ്പ് പദ്ധതിയിലൂടെ കാര്‍ഷിക മേഖലയിലെ എല്ലാ പ്രവൃത്തികളും നടപ്പിലാക്കാന്‍ കഴിയുന്ന വിധം പദ്ധതികള്‍ ആവിഷ്‌ക്കരിക്കാന്‍ കഴിയുമെന്നും അറിയിച്ചു. നാളികേര വികസനത്തില്‍ സിലിന്റെ ആഭിമുഖ്യത്തില്‍ കേര കൃഷി മേഖല ശക്തിപ്പെടുത്തുമെന്നും അദ്ദേഹം പറഞ്ഞു. ആത്മ പ്രോജക്ട് ഡയറക്ടര്‍ ലേഖകാര്‍ത്തി പദ്ധതി വിശദീകരിച്ചു. സ്വാഗതസംഘം ചെയര്‍മാന്‍ പി ബാലഗോപാലന്‍, തിക്കോടി ഗ്രാമപഞ്ചായത്ത് പ്രസിഡണ്ട് രമ ചെറുകുറ്റി, ജില്ലാ പഞ്ചായത്ത് മെമ്പര്‍ എം പി അജിത, മെമ്പര്‍ പി കെ മെഹമൂദ്, പ്രിന്‍സിപ്പല്‍ കൃഷി ഓഫീസര്‍ ടി പുഷ്‌കരന്‍, തിക്കോടി ഗ്രാമപഞ്ചായത്ത് സി ഡി എസ് ചെയര്‍പേഴ്‌സണ്‍ പുഷ്പ ബിജു കളത്തില്‍, കൃഷി അസിസ്റ്റന്റ് ഡയറക്ടര്‍ വിനോദ് കുമാര്‍, രാജീവന്‍ കൊടലൂര്‍ തുടങ്ങിയവര്‍ സംസാരിച്ചു.
 
വീട് നിര്‍മാണത്തിനായി വന്‍ തോതില്‍ മണ്ണിടിച്ചു; വൃദ്ധ ദമ്പതികളുടെ വീട്ടിലേക്കുള്ള വഴി അപകടാവസ്ഥയില്‍
കൂടത്തായി: വീട് നിര്‍മാണത്തിനായി വന്‍ തോതില്‍ മണ്ണിടിച്ചതിനാല്‍ വൃദ്ധ ദമ്പതികളുടെ വീട്ടിലേക്കുള്ള വഴി അപകടാവസ്ഥയിലായതായി പരാതി. കൂടത്തായി ചാമോറ കോഴിപ്പാടത്ത് തോമസും ഭാര്യ ചിന്നമ്മയുമാണ് ജില്ലാ കലക്ടര്‍ ഉള്‍പ്പെടെയുള്ളവര്‍ക്ക് പരാതി നല്‍കിയത്. വികലാംഗനും രോഗിയുമായ തോമസിന്റെ വീട്ടിലേക്ക് മുപ്പത്തി ഏഴ് വര്‍ഷമായി ഉപയോഗിച്ചിരുന്ന വഴി അയല്‍വാസി വീട് നിര്‍മിക്കാനായി വന്‍തോതില്‍ മണ്ണ് ഇടിച്ച് കടത്തിക്കൊണ്ടുപോയതോടെ അപകടാവസ്ഥയിലായതായി പരാതിയില്‍ പറയുന്നു. ചുമരിന്റെ അടി ഭാഗത്തുനിന്നും ജെ സി ബി ഉപയോഗിച്ച് മണ്ണ് നീക്കം ചെയ്തതിനാല്‍ വഴി ഏത് നിമിശവും ഇടിഞ്ഞ് വീഴാവുന്ന അവസ്ഥയിലാണ്.
 
കൂട്ടായ്മയിലൂടെ ഏത് വെല്ലുവിളിയും ഏറ്റെടുക്കാന്‍ വനിതകള്‍ക്ക് കഴിയുമെന്നതിന്റെ തെളിവാണ് മഹിളാ മാളെന്ന് മുഖ്യമന്ത്രി പിണറായി വിജയന്‍
കോഴിക്കോട്: കൂട്ടായ്മയിലൂടെ ഏത് വെല്ലുവിളിയും ഏറ്റെടുക്കാന്‍ വനിതകള്‍ക്ക് കഴിയുമെന്നതിന്റെ തെളിവാണ് കോഴിക്കോട്ട് യാഥാര്‍ഥ്യമായ മഹിളാ മാളെന്ന് മുഖ്യമന്ത്രി പിണറായി വിജയന്‍. കോര്‍പറേഷന്‍ കുടുംബശ്രീ യൂണിറ്റി ഗ്രൂപ്പ് നഗരത്തില്‍ ആരംഭിച്ച മഹിളാമാളിന്റെ ഉദ്ഘാടനം നിര്‍വഹിച്ചു സംസാരിക്കുകയായിരുന്നു അദ്ദേഹം. ചെറിയ വരുമാനം ലഭിക്കുന്ന പ്രവര്‍ത്തനങ്ങളില്‍ നിന്ന് വലിയ സംരംഭങ്ങളിലേക്ക് സ്ത്രീകള്‍ മാറിക്കഴിഞ്ഞു. നേരത്തെ കോര്‍പറേറ്റുകള്‍ക്ക് മാത്രം സാധ്യമായിരുന്നത് തങ്ങള്‍ക്കും സാധ്യമാകുമെന്നതാണ് സംസ്ഥാനത്തെ ആദ്യത്തെ കുടുംബശ്രീ മാള്‍ നല്‍കുന്ന സന്ദേശം. കുടുംബശ്രീയുടെ ചരിത്രത്തിലെ പ്രധാന ഏടായ ഈ സംരംഭം ഏറെ അഭിമാനത്തോടെയാണ് നാടിന് സമര്‍പ്പിക്കുന്നതെന്നും മുഖ്യമന്ത്രി പറഞ്ഞു. സ്ത്രീകള്‍ മാത്രമുള്ള ഈ വാണിജ്യകൂട്ടായ്മ സ്ത്രീ ശാക്തീകരണത്തില്‍ കേരളത്തിലെ പുതിയ മാതൃകയാണ്.
 
മെഡിക്കല്‍ കോളെജിലെ ത്രിതല കാന്‍സര്‍ സെന്ററും ലക്ചര്‍ തിയേറ്റര്‍ കോംപ്ലക്സും മുഖ്യമന്ത്രി നാടിന് സമര്‍പ്പിച്ചു
മെഡിക്കല്‍ കോളേജ്: അര്‍ബുദ രോഗികള്‍ക്ക് മികച്ച ചികിത്സാ സൗകര്യം ഒരുക്കുന്നതിനായി കോഴിക്കോട് ഗവ. മെഡിക്കല്‍ കോളേജില്‍ നിര്‍മിച്ച ത്രിതല കാന്‍സര്‍ സെന്ററും മെഡിക്കല്‍ വിദ്യാര്‍ഥികള്‍ക്കായി അത്യാധുനിക പഠന സൗകര്യങ്ങളോടെ പണികഴിപ്പിച്ച ലക്ചര്‍ തിയേറ്റര്‍ കോംപ്ലക്സും മുഖ്യമന്ത്രി പിണറായി വിജയന്‍ നാടിന് സമര്‍പ്പിച്ചു. മെഡിക്കല്‍ ഓങ്കോളജി, സര്‍ജിക്കല്‍ ഓങ്കാളജി, റേഡിയേഷന്‍ ഓങ്കോളജി എന്നീ വിഭാഗങ്ങള്‍ ഒരു സമുച്ചയത്തില്‍ പ്രവര്‍ത്തിക്കുന്ന പുതിയ കാന്‍സര്‍ സെന്റര്‍ കോഴിക്കോട് മെഡിക്കല്‍ കോളെജിനെ ആശ്രയിക്കുന്ന മലബാറിലെ അര്‍ബുദ രോഗികള്‍ക്ക് വലിയ ആശ്വാസമാണെന്ന് കോളെജ് ക്യാപസിലെ അറോറ ഓഡിറ്റോറിയത്തില്‍ നടന്ന ചടങ്ങ് ഉദ്ഘാടനം ചെയ്ത മുഖ്യമന്ത്രി പറഞ്ഞു.
 
 
 
 

All rights reserved | Website developed and maintained by Zyonz Technologies