17-Nov-2019 (Sun)
 
 
 
റഗ്ബി ബോള്‍ സംസ്ഥാന കോച്ചിംഗ് ക്യാമ്പ് ആരംഭിച്ചു
പുതുപ്പാടി: സംസ്ഥാന റഗ്ബിബോള്‍ കോച്ചിംഗ് ക്യാമ്പ് പുതുപ്പാടി ഗവണ്‍മെന്റ് ഹൈസ്‌കൂള്‍ ഗ്രൗണ്ടില്‍ കേരള സ്‌പോര്‍ട്‌സ് കൗണ്‍സില്‍ അംഗം ടി എം അബ്ദുറഹിമാന്‍ മാസ്റ്റര്‍ ഉദ്ഘാടനം ചെയ്തു. ജില്ലാ റഗ്ബി ബോള്‍ അസോസിയേഷന്‍ പ്രസിഡന്റ് പി പോക്കര്‍ അധ്യക്ഷത വഹിച്ചു. ദേശീയ മത്സരത്തില്‍ പങ്കെടുക്കേണ്ട 25 കായിക താരങ്ങള്‍ പങ്കെടുക്കുന്ന ക്യാമ്പിന് റഗ്ബി കോച്ച് പി വിനു, എന്‍ സി റഫീഖ് എന്നിവര്‍ നേതൃത്വം നല്‍കും. പുതുപ്പാടി സ്‌പോര്‍ട്‌സ് അക്കാദമി കണ്‍വീനര്‍ ബിജു വാച്ചാലില്‍ സ്വാഗതവും സെക്രട്ടറി പി ടി ഷാജി നന്ദിയും പറഞ്ഞു.
 
എളേറ്റില്‍ ജി എം യു പി സ്‌കൂളില്‍ ഹൈടെക് ലാബ് ഉദ്ഘാടനം ചെയ്തു
എളേറ്റില്‍: പൊതുവിദ്യാഭ്യാസ വകുപ്പ് നടപ്പിലാക്കുന്ന പ്രൈമറി സ്‌കൂള്‍ ഹൈടെക് ലാബ് പദ്ധതി എളേറ്റില്‍ ജി എം യു പി സ്‌കൂളില്‍ കൊടുവള്ളി എം എല്‍ എ കാരാട്ട് റസാഖ് ഉദ്ഘാടനം ചെയ്തു. സബ് ജില്ലാ ശാസ്‌ത്രോല്‍സവത്തില്‍ മികച്ച വിജയം നേടിയവര്‍ക്ക് അദ്ദേഹം ട്രോഫികളും സര്‍ട്ടിഫിക്കറ്റുകളും വിതരണം ചെയ്തു. കിഴക്കോത്ത് ഗ്രാമപഞ്ചായത്ത് പ്രസിഡണ്ട് എന്‍ സി ഉസ്സയിന്‍ മാസ്റ്റര്‍ അധ്യക്ഷത വഹിച്ചു. വാര്‍ഡ് മെമ്പര്‍ ആഷിഖ് റഹ്മാന്‍, കൊടുവള്ളി ബി പി ഒ. എം മെഹറലി, പി ടി എ പ്രസിഡണ്ട് എം പി ഉസ്സയിന്‍ മാസ്റ്റര്‍, എം പി ടി എ ചെയര്‍പേഴ്‌സണ്‍ റജ്‌ന കുറുക്കാംപൊയില്‍, എസ് എം സി ചെയര്‍മാന്‍ എം പി ഗഫൂര്‍, സബ് ജില്ലാ ഐ ടി കോഡിനേറ്റര്‍ കെ പി നൗഫല്‍, സീനിയര്‍ അസിസ്റ്റന്റ് എന്‍ കെ മുഹമ്മദ്, സ്റ്റാഫ് സെക്രട്ടറി എം വി അനില്‍കുമാര്‍ എന്നിവര്‍ സംസാരിച്ചു. ഹെഡ്മാസ്റ്റര്‍ അബ്ദുല്‍ ഷുക്കൂര്‍ സ്വാഗതവും സ്‌കൂള്‍ ഐ ടി കോഡിനേറ്റര്‍ വി കെ മുഹമ്മദലി നന്ദിയും പറഞ്ഞു.
 
കേരളോത്സവം ഫുട്ബോള്‍: ചലഞ്ചേഴ്‌സ് ചുങ്കം ജേതാക്കള്‍
താമരശ്ശേരി: താമരശ്ശേരി പഞ്ചായത്ത് കേരളോത്സവത്തില്‍ ഫുട്ബോള്‍ മത്സരത്തില്‍ എഫ് സി ചലഞ്ചേഴ്‌സ് ചുങ്കം പെനാല്‍റ്റി ഷൂട്ടൗട്ടില്‍ രണ്ടിനെതിരെ മൂന്ന് ഗോളുകള്‍ക്ക് ഫൈറ്റേഴ്‌സ് അമ്പലമുക്കിനെ പരാജയപ്പെടുത്തി. അനുവദിച്ച സമയത്ത് ഗോള്‍ രഹിത സമനിലയില്‍ പിരിഞ്ഞപ്പോള്‍ കളി പെനാല്‍റ്റിയിലേക്ക് നീങ്ങുകയായിരുന്നു. ബ്ലോക്ക് പഞ്ചായത്ത് കേരളോത്സവത്തില്‍ താമരശ്ശേരിയെ ഇനി ചലഞ്ചേഴ്‌സ് ചുങ്കം നയിക്കും. വിജയികള്‍ സ്റ്റാന്റിംഗ് കമ്മിറ്റി ചെയര്‍മാന്‍ പി എസ് മുഹമ്മദലിയില്‍ നിന്നും ട്രോഫി ഏറ്റുവാങ്ങി. ചടങ്ങില്‍ പി ഹാഫിസ് റഹ്മാന്‍, വി കെ എ കബീര്‍, ഇസ്ഹാക് ചാല്‍ക്കര, പി കേശവന്‍ എന്നിവര്‍ പങ്കെടുത്തു.
 
ആയുര്‍വ്വേദ ദിനാചരണം; പൂനൂര്‍ ഗാഥ കോളേജ് വിദ്യാര്‍ത്ഥികള്‍ ബാലകൃഷ്ണന്‍ വൈദ്യരെ ആദരിച്ചു
പൂനൂര്‍: ആയുര്‍വ്വേദ ദിനാചരണത്തിന്റെ ഭാഗമായി പൂനൂര്‍ ഗാഥ കോളേജ് വിദ്യാര്‍ത്ഥികള്‍ പൂനൂരിലെ ആയുര്‍വ്വേദ തറിമരുന്ന് തയ്യാറാക്കുന്ന യു കെ ബാലകൃഷ്ണന്‍ വൈദ്യരെ ആദരിച്ചു. വിദ്യാര്‍ത്ഥി പ്രതിനിധി പി മുഹമ്മത് ബാലകൃഷ്ണന്‍ വൈദ്യരെ പൊന്നാട അണിയിച്ചു. പ്രിന്‍സിപ്പാള്‍ കെ നിസാര്‍ അധ്യക്ഷത വഹിച്ചു.
 
കേരള വ്യാപാരി വ്യവസായി ഏകോപന സമിതി കൊടുവള്ളി മണ്ഡലം സ്വാഗത സംഘം ഓഫീസ് ഉദ്ഘാടനം ചെയ്തു
കൊടുവള്ളി: കേരള വ്യാപാരി വ്യവസായി ഏകോപന സമിതി കൊടുവള്ളി നിയോജക മണ്ഡലം സ്വാഗത സംഘം ഓഫീസ് കാരാട്ട് റസാഖ് എം എല്‍ എ ഉദ്ഘാടനം ചെയ്തു. നിയോജക മണ്ഡലം പ്രസിഡണ്ട് കെ നാരായണന്‍ നായര്‍ അധ്യക്ഷത വഹിച്ചു. ജില്ലാ സെക്രട്ടറി മുഹമ്മദ് ഷാജി, പി ടി എ ലത്തീഫ്, മുര്‍ത്താസ എം അബ്ദുല്‍ ഖാദര്‍, ടി പി അര്‍ഷാദ്, വിജയന്‍, സോണ ഉമ്മര്‍, കാതിരി ഹാജി, ടി കെ അത്തിയ്യത്, നാഫി പകലത്തെ, നാസിം പോപ്പുലര്‍, ജംഷീര്‍ താജ് വെഡിങ് എന്നിവര്‍ സംസാരിച്ചു. എ കെ അബ്ദുള്ള സ്വാഗതവും എം കെ മുഹമ്മദലി നന്ദിയും പറഞ്ഞു.
 
താമരശ്ശേരി യൂണിറ്റ് കെ എച്ച് ആര്‍ എ ഓഫീസ് ഉദ്ഘാടനം ചെയ്തു
താമരശ്ശേരി: താമരശ്ശേരി യൂണിറ്റ് കേരള ഹോട്ടല്‍ ആന്റ് റെസ്‌റ്റോറന്റ് അസ്സോസിയേഷന്‍ ഓഫീസ് ഉദ്ഘാടനവും മുന്‍കാല ഹോട്ടല്‍ ഉടമകളെ ആദരിക്കലും ആഘോഷമായി. താമരശ്ശേരി പഴയബസ്റ്റാന്റ് പരിസരത്ത് നിന്നും ഘോഷയാത്രയോടുകൂടിയായിരുന്നു തുടക്കം. സംസ്ഥാന ജനറല്‍ സെക്രട്ടറി ജി ജയ്പാല്‍ ഉദ്ഘാടനം ചെയ്തു. ശ്ശരി യൂണിറ്റ് പ്രസിഡന്റ് നവാസ് മേപ്പാട്ട് അദ്ധ്യക്ഷത വഹിച്ചു. കേരള ഹോട്ടല്‍ ആന്റ് റെസ്‌റ്റോറന്റ് അസ്സോസിയേഷന്‍ ജില്ലാ പ്രസിഡണ്ട് മുഹമ്മദ് സുഹൈല്‍ മുഖ്യാതിഥിയായിരുന്നു. പഞ്ചായത്ത് വൈസ് പ്രസിഡന്റ് നവാസ് ഈര്‍പ്പോണ, ഹെല്‍ത്ത് ഇന്‍സ്‌പെക്ടര്‍മാരായ രമേശന്‍, സജീവന്‍ കെ എച്ച് ആര്‍ എ സംസ്ഥാന സെക്രട്ടറി സുഗുണന്‍, കെ എച്ച് ആര്‍ എ ജില്ലാ സെക്രട്ടറി ഷമീര്‍, മേഖല പ്രസിഡന്റ് ഹുമയൂണ്‍ കബീര്‍, സെക്രട്ടറി വിജയന്‍ കൂടരഞ്ഞി, വ്യാപാരി വ്യവസായി ഏകോപന സമിതി താമരശ്ശേരി യൂണിറ്റ് പ്രസിഡന്റ് അമീര്‍ മുഹമ്മദ് ഷാജി എന്നിവര്‍ പങ്കെടുത്തു. യൂണിറ്റ് സെക്രട്ടറി ജംഷിദ് മലബാര്‍ സ്വാഗതവും ട്രഷറര്‍ രതീഷ് കുമാര്‍ നന്ദിയും പറഞ്ഞു.
 
പ്രളയ ദുരിതാശ്വാസ വിതരണത്തിലെ അനാസ്ഥ; വില്ലേജ് ഓഫീസ് മാര്‍ച്ച് നടത്തി
പുതുപ്പാടി: പ്രളയ ദുരിതാശ്വാസ വിതരണത്തിലെ സര്‍ക്കാര്‍ അനാസ്ഥക്കെതിരെ പുതുപ്പാടി പഞ്ചായത്ത് മുസ്ലിം ലീഗ് കമ്മിറ്റി പുതുപ്പാടി വില്ലേജ് ഓഫീസിലേക്ക് മാര്‍ച്ചും ധര്‍ണയും സംഘടിപ്പിച്ചു. മുസ്ലിം ലീഗ് ജില്ലാ സെക്രട്ടറി വി കെ ഹുസൈന്‍ കുട്ടി ധര്‍ണ ഉദ്ഘടനം ചെയ്തു. പി എം എ റഷീദ് അധ്യക്ഷത വഹിച്ചു. സി എ മുഹമ്മദ്, ടി കെ ഇമ്പിച്ചമ്മദ് ഹാജി, ഒ കെ ഹംസ മാസ്റ്റര്‍, ഷാഫി വളഞ്ഞപാറ, ഒതയോത്ത് അഷ്റഫ്, മുത്തു അബ്ദുല്‍ സലാം, കെ സി ശിഹാബ്, എ കെ അഹമ്മദ് കുട്ടി ഹാജി, കെ പി സുനീര്‍, ഇ കെ സുലൈമാന്‍ മാസ്റ്റര്‍ എന്നിവര്‍ പ്രസംഗിച്ചു.
 
എസ് വൈ എസ് അടുക്കളത്തോട്ടം പദ്ധതി: ജില്ലാതല ഉദ്ഘാടനം നടത്തി
ഈങ്ങാപ്പുഴ: 2020 ജനുവരി 11 ന് താമരശ്ശേരിയില്‍ നടക്കുന്ന ജില്ലാ യുവജനറാലിയുടെ അനുബന്ധ പദ്ധതികളില്‍ ഒന്നായ അടുക്കളത്തോട്ടം പദ്ധതിയുടെ ജില്ലാതല ഉദ്ഘാടനം പൂലോട് യൂണിറ്റിലെ പ്രവര്‍ത്തകര്‍ക്ക് പച്ചക്കറി വിത്ത്, തൈകള്‍ എന്നിവ നല്‍കികൊണ്ട് എസ് വൈ എസ് ജില്ലാ പ്രസിഡണ്ട് മുഹമ്മദലി സഖാഫി വള്ളിയാട് നിര്‍വ്വഹിച്ചു. പദ്ധതിയുടെ ഭാഗമായി യൂണിറ്റിലെ ഓരോ പ്രവര്‍ത്തകനും അവരവരുടെ വീടുകളില്‍ ഒരു കൃഷിത്തോട്ടം ഒരുക്കും. ആദ്യ ഘട്ടത്തില്‍ ജില്ലയില്‍ 3000 കുടുംബങ്ങളിലാണ് അടുക്കളത്തോട്ടം പദ്ധതി നടപ്പിലാക്കുന്നത്. ചടങ്ങില്‍ ജില്ലാ സെക്രട്ടറിമാരായ അലവി സഖാഫി കായലം, മുനീര്‍ സഅദി പൂലോട് തുടങ്ങിയവര്‍ സംസാരിച്ചു. അബ്ദുള്ള ലതീഫി കയ്യൊടിയന്‍പാറ, ഷംസുദ്ധീന്‍ പെരുമ്പള്ളി, കെ പി മുഹമ്മദ് ഹാജി, നാസര്‍ മുസല്യാര്‍ ചമല്‍, ഷമീര്‍ കാവുംപുറം, ഷാഫി പൂലോട്, ഷംസു കെ എം, സിദ്ധീഖ് പൂലോട് തുടങ്ങിയവര്‍ സംബന്ധിച്ചു.
 
ഉപജില്ലാ ശാസ്‌ത്രോത്സവം: താമരശ്ശേരി ഗവ. യു പി സ്‌കൂളിന് ഓവറോള്‍ കിരീടം
താമരശ്ശേരി: ഒക്ടോബര്‍ 15ന് വേളങ്കോട് സെന്റ് ജോര്‍ജ് ഹയര്‍ സെക്കന്‍ഡറി സ്‌കൂളില്‍ വെച്ച് നടന്ന താമരശ്ശേരി ഉപജില്ലാ ശാസ്‌ത്രോത്സവത്തില്‍ യു പി, എല്‍ പി വിഭാഗം ഗണിതശാസ്ത്രമേളയിലും യു പി വിഭാഗം സയന്‍സ് മേളയിലും താമരശ്ശേരി ഗവണ്‍മെന്റ് യു പി സ്‌കൂള്‍ ഓവറോള്‍ കിരീടം നേടി. സാമൂഹ്യ ശാസ്ത്രമേളയില്‍ രണ്ടാംസ്ഥാനവും, പ്രവൃത്തിപരിചയമേളയിലെ ഏതാനും ഇനങ്ങളില്‍ എ ഗ്രേഡും നേടി. സ്‌കൂള്‍ അസംബ്ലിയില്‍ ഹെഡ്മാസ്റ്റര്‍ കെ വേണു വിജയികള്‍ക്ക് ട്രോഫികള്‍ വിതരണം ചെയ്തു. ബെന്നി മാസ്റ്റര്‍, പി ജെ ദേവസ്യ, ദീപ ജോസ്, സജി സ്‌കറിയ, ഷൈനി തുടങ്ങിയവര്‍ സംസാരിച്ചു.
 
നാടന്‍ വിഭവങ്ങളുമായി കാരുണ്യതീരത്തില്‍ ഭക്ഷ്യമേള
പൂനൂര്‍: ലോക ഭക്ഷ്യദിനത്തില്‍ നാടന്‍ വിഭവങ്ങള്‍ അണിനിരത്തി സ്‌പെഷ്യല്‍ സ്‌കൂള്‍ വിദ്യാര്‍ത്ഥികള്‍ നടത്തിയ ഭക്ഷ്യമേള ശ്രദ്ദേയമായി. ഹെല്‍ത്ത് കെയര്‍ ഫൗണ്ടേഷനു കീഴില്‍ കോളിക്കലില്‍ പ്രവര്‍ത്തിക്കുന്ന കാരുണ്യതീരം സ്‌പെഷ്യല്‍ സ്‌കൂളിലെ വിദ്യാര്‍ത്ഥികളാണ് നാടന്‍ ഭക്ഷണങ്ങളുമായി സ്‌കൂളില്‍ ഭക്ഷ്യമേള നടത്തിയത്. ഉണ്ണിയപ്പവും കലത്തവും കുക്കറപ്പവും തുടങ്ങി അപ്പങ്ങളുടെ നീണ്ടനിര തന്നെ മേളയിലുണ്ടായിരുന്നു. കൂടാതെ കപ്പ, ചേമ്പ്, പുട്ട്, ദോശ, ഇഡ്ഡലി തുടങ്ങിയവയോടൊപ്പം പ്രാതലിനുള്ള വിവിധതരം രുചിക്കൂട്ടുകള്‍. ഹല്‍വ, പഴം നിറച്ചത്, നെയ്പത്തിരി, കൊഴുക്കട്ട, അടകള്‍ തുടങ്ങി നിരവധി പലഹാരങ്ങളും പ്രദര്‍ശനത്തിലുണ്ടായിരുന്നു. കാരുണ്യതീരം ചെയര്‍മാന്‍ ബാബു കുടുക്കില്‍ മേള ഉദ്ഘാടനം ചെയ്തു. പ്രിന്‍സിപ്പാള്‍ സി കെ ലുംതാസ് അധ്യക്ഷത വഹിച്ചു. ഹെല്‍ത്ത് കെയര്‍ ഫൗണ്ടേഷന്‍ ജനല്‍ സെക്രട്ടറി സി കെ എ ഷമീര്‍ ബാവ സ്വാഗതം പറഞ്ഞു. അധ്യാപകരായ മുഹമ്മദ് ഫാസില്‍ പി, ജസീന കെ, ഭവ്യ സി പി, വിപിന സി, ജിഷ്ണു എസ്, മുഹമ്മദ് അജ്‌വദ് കെ, അന്‍ഷിദ കെ, ഫിദ റഹ്മാന്‍, നിസാബി തുടങ്ങിയവര്‍ നേതൃത്വം നല്‍കി.
 
 
 
 

All rights reserved | Website developed and maintained by Zyonz Technologies