07-Dec-2019 (Sat)
 
 
 
ചുണ്ടിക്കുളം അരിയില്‍ റോഡ് ഉദ്ഘാടനം ചെയതു
കുന്ദമംഗലം: കുന്ദമംഗലം ഗ്രാമപഞ്ചായത്ത് വാര്‍ഡില്‍ പതിനാലാം വാര്‍ഡിലെ പ്രവൃത്തി പൂര്‍ത്തീകരിച്ച ചുണ്ടിക്കുളം അരിയില്‍ റോഡ് പി ടി എ റഹീം എം എല്‍ എ ഉദ്ഘാടനം ചെയതു. ഗ്രാമപഞ്ചായത്ത് പ്രസിഡന്റ് ഷൈജ വളപ്പില്‍ അദ്ധ്യക്ഷത വഹിച്ചു. ഫ്‌ലഡ് പ്രവൃത്തികളില്‍ ഉള്‍പ്പെടുത്തി അനുവദിച്ച 3 ലക്ഷം രൂപ ഉപയോഗപ്പെടുത്തിയാണ് ഈ റോഡിന്റെ പ്രവൃത്തി പൂര്‍ത്തീകരിച്ചത്. ഒ വേലായുധന്‍, പുതുക്കുടി ബാവ, കെ വിജയന്‍ എന്നിവര്‍ സംസാരിച്ചു. എന്‍ എം രാമനാസന്‍ സ്വാഗതവും അരിയില്‍ അജിത നന്ദിയും പറഞ്ഞു.
 
പുറ്റാട്ട് മുത്തോറംകുന്ന് റോഡ് ഉദ്ഘാടനം ചെയതു
കുന്ദമംഗലം: കുന്ദമംഗലം ഗ്രാമപഞ്ചായത്തില്‍ പ്രവൃത്തി പൂര്‍ത്തീകരിച്ച പുറ്റാട്ട് മുത്തോറംകുന്ന് റോഡ് പി ടി എ റഹീം എം എല്‍ എ ഉദ്ഘാടനം ചെയതു. കുന്ദമംഗലം ഗ്രാമപഞ്ചായത്ത് പ്രസിഡന്റ് ഷൈജ വളപ്പില്‍ അദ്ധ്യക്ഷത വഹിച്ചു. എം എല്‍ എയുടെ പ്രാദേശിക വികസന ഫണ്ടില്‍ നിന്നും അനുവദിച്ച 4.5 ലക്ഷം രൂപ ചെലവഴിച്ചാണ് റോഡിന്റെ പ്രവൃത്തി പൂര്‍ത്തീകരിച്ചത്. ഒ വേലായുധന്‍, പുറ്റാട്ട് രമേശന്‍, പുറ്റാട്ട് മജീദ് എന്നിവര്‍ സംസാരിച്ചു. റോഡ് കമ്മറ്റി കണ്‍വീനര്‍ കെ സി പ്രദീപന്‍ സ്വാഗതവും എം സി അതുല്‍ ദാസ് നന്ദിയും പറഞ്ഞു.
 
കുന്ദമംഗലം എന്‍ ഐ ടി അഗസ്ത്യന്‍മൂഴി റോഡ് നവീകരിക്കാന്‍ നടപടിയായി
കുന്ദമംഗലം: കുന്ദമംഗലം എന്‍ ഐ ടി അഗസ്ത്യന്‍മൂഴി റോഡ് റബറൈസ് ചെയ്ത് നവീകരിക്കാന്‍ നടപടിയായി. ഇതിന്നായി തയ്യാറാക്കിയ 14 കോടി രൂപയുടെ എസ്റ്റിമേറ്റിന് ഭരണാനുമതിയായി. പ്രവൃത്തി ആരംഭിക്കുന്നതിന്റെ ഭാഗമായി അഡ്വ. പി ടി എ റഹീം എം എല്‍ എ യുടെ നേതൃത്വത്തില്‍ ജന പ്രതിനിധികളും ഉദ്യോഗസ്ഥരും പ്രാഥമിക പരിശോധന നടത്തി.
 
പുതുവത്സര സമ്മാനമായി വൈദ്യുതി കണക്ഷന്‍
നരിക്കുനി: പുതുവത്സരാഘോഷത്തിന്റെ ഭാഗമായി പാവപ്പെട്ട കുടുംബത്തിന് സൗജന്യ വൈദ്യുതി നല്‍കി. മൂര്‍ഖന്‍കുണ്ട് പേടങ്ങച്ചാലില്‍ മാധവിയുടെ കുടുംബത്തിനാണ് കെ എസ് ഇ ബി നരിക്കുനി സെക്ഷന്‍ സ്റ്റാഫ് കമ്മിറ്റിയുടെ നേതൃത്വത്തില്‍ സൗജന്യ വൈദ്യുതി കണക്ഷന്‍ നല്‍കിയത്. പ്ലാസ്റ്റിക്ക് ഷീറ്റ് കൊണ്ട് മേല്‍ക്കൂരയുണ്ടാക്കി താമസിക്കുന്ന കുടുംബത്തിന് ജീവനക്കാരാണ് കണക്ഷന് വേണ്ട സാധന സാമഗ്രികള്‍ സമാഹരിച്ചത്. നരിക്കുനി കെ എസ് ഇ ബി അസിസ്റ്റന്റ് എഞ്ചിനീയര്‍ കെ ഹാരിസ് സ്വിച്ച് ഓണ്‍ നിര്‍വ്വഹിച്ചു. സ്റ്റാഫ് സെക്രട്ടറി പി എം ഷംസുദ്ദീന്‍ അധ്യക്ഷത വഹിച്ചു. കെ മുഹമ്മദ് ബഷീര്‍, പി രാമചന്ദ്രന്‍, ബി ജിജു, എം രജീഷ് കുമാര്‍, കെ പി കിഷോര്‍, എ ബിജുലാല്‍, ഇ ടി ജിനീഷ്, കെ ബിജുകുമാര്‍ തുടങ്ങിയവര്‍ സംസാരിച്ചു.
 
മുഖ്യമന്ത്രിയുടെ ദുരിതാശ്വാസ നിധിയിലേക്ക് തുക കൈമാറി
കോഴിക്കോട്: ഫാറൂഖ് കോളേജ് അല്‍ഫാറൂഖ് റസിഡന്‍ഷ്യല്‍ സീനിയര്‍ സെക്കന്ററി സ്‌കൂള്‍ മുഖ്യമന്ത്രിയുടെ ദുരിതാശ്വാസ നിധിയിലേക്ക് സമാഹരിച്ച രണ്ടര ലക്ഷം രൂപ കൈമാറി. കലക്ടറുടെ ചേമ്പറില്‍ നടന്ന ചടങ്ങില്‍ ജില്ലാ കലക്ടര്‍ സാംബശിവ റാവു തുകയുടെ ചെക്ക് ഏറ്റുവാങ്ങി. സ്‌കൂള്‍ പ്രിന്‍സിപ്പാള്‍ കെ എച്ച് ഹാഫിഷ്, മാനജിംഗ് കമ്മറ്റി സെക്രട്ടറി പ്രൊഫസര്‍ എ കുട്ട്യാലിക്കുട്ടി, പി ടി എ ഭാരവാഹികളായ ഡോ. എ കെ അബ്ദുള്‍ റഹീം, പ്രൊഫ. എ ഷാജഹാന്‍, കെ ലിസ, കെ താഷിഫ്, അഡ്മിനിസ്ട്രേറ്റീവ് ഓഫീസര്‍ കുഞ്ഞുമുഹമ്മദ് തുടങ്ങിയവര്‍ ചേര്‍ന്നാണ് ചെക്ക് കൈമാറിയത്.
 
വനിതാ മതില്‍: ബി ജെ പി പ്രതിഷേധ മാര്‍ച്ച് നടത്തി
കട്ടിപ്പാറ: നവോത്ഥാനത്തിന്റെ പേരില്‍ പേരില്‍ കുടുംബശ്രീ, അംഗന്‍വാടി വര്‍കേഴ്സ്, ആശാ വര്‍ക്കേഴ്സ്, മറ്റു സര്‍ക്കാര്‍ ജീവനക്കാര്‍ എന്നിവരെ ഭീഷണിപ്പെടുത്തി വനിതാ മതിലില്‍ നിര്‍ബന്ധിച്ചു പങ്കെടുപ്പിക്കുന്നതിനെതിരെ ബി ജെ പി കട്ടിപ്പാറ പഞ്ചായത്തു കമ്മറ്റി പഞ്ചായത്തു ഓഫീസിലേക്ക് പ്രതിഷേധ മാര്‍ച്ചും ധര്‍ണ്ണയും നടത്തി. ബി ജെ പി കൊടുവള്ളി നിയോജക മണ്ഡലം പ്രസിഡണ്ട് ഷാന്‍ കട്ടിപ്പാറ ഉദ്ഘാടനം ചെയ്തു. പഞ്ചായത്ത് കമ്മറ്റി പ്രസിഡണ്ട് ഷാന്‍ കരിഞ്ചോല അദ്ധ്യക്ഷത വഹിച്ചു. ഒ ബി സി മോര്‍ച്ച മണ്ഡലം പ്രസിഡണ്ട് വത്സന്‍ മേടോത്ത്, വാര്‍ഡ് മെമ്പര്‍ വത്സല കനകദാസ്, മനോജ് വേണാടി, എ കെ ലോഹിദാക്ഷന്‍, രജീഷ് വേണാടി എന്നിവര്‍ സംസാരിച്ചു. വിദ്യാസാഗര്‍, രജിന്‍രാജ്, കെ കെ വിജയന്‍ തുടങ്ങിയവര്‍ മാര്‍ച്ചിന് നേതൃത്വം നല്‍കി.
 
കെ സി വൈ എം കണ്ണോത്ത് യൂണിറ്റ് യുവജന സംഗമം സഘടിപ്പിച്ചു
കണ്ണോത്ത്: കെ സി വൈ എം കണ്ണോത്ത് യൂണിറ്റിന്റെ നേതൃത്വത്തില്‍ കാസ്റ്റണ്‍ എന്ന പേരില്‍ യുവജന സംഗമം സഘടിപ്പിച്ചു. കെ സി വൈ എം രൂപത ട്രഷറര്‍ നിഥിന്‍ പുലക്കുടി ഉദ്ഘാടനം ചെയ്തു. വികാരി ഫാ. അബ്രാഹം വള്ളോപ്പിള്ളില്‍ അധ്യക്ഷത വഹിച്ചു. അരുണ്‍ തുരുത്തിയില്‍ ആമുഖ പ്രഭാഷണം നടത്തി. ഫാ. മാത്യു പുള്ളോലിക്കല്‍ മുഖ്യ പ്രഭാഷണം നടത്തി. സിസ്റ്റര്‍ ക്ലരിന, ജാസ്മിന്‍ തുരുത്തിയില്‍, ജോമോന്‍ മതിലകത്ത്, മന്‍ജിമ ഇടംപ്ലാവില്‍, ബ്രദര്‍ ജോയേല്‍ വരിക്കാനിക്കല്‍, ജിതു കിളിവേലിക്കുടി എന്നിവര്‍ പ്രസംഗിച്ചു. ഷൈജു അതിരംപുഴ ക്ലാസ്സെടുത്തു.
 
പേരോട് പാറക്കടവ് ചെറ്റക്കണ്ടിറോഡ് ഉദ്ഘാടനം ചെയ്തു
പേരോട്: നാദാപുരം നിയോജകമണ്ഡലത്തില്‍ ഉള്‍പ്പെട്ട പേരോട് പാറക്കടവ് ചെറ്റക്കണ്ടിറോഡ് പ്രവൃത്തി പൂര്‍ത്തീകരണ ഉദ്ഘാടനം പേരോട് സഹ്‌റ സ്‌കൂള്‍ ഗ്രൗണ്ടില്‍ പൊതുമരാമത്ത് രജിസ്‌ട്രേഷന്‍ വകുപ്പ് മന്ത്രി ജി സുധാകരന്‍ നിര്‍വ്വഹിച്ചു. പേരോട് പാറക്കടവ് ചെറ്റക്കണ്ടി റോഡിന്റെ അഞ്ച് കിലോമീറ്റര്‍ ഏഴരകോടി ചിലവിലാണ് ആധുനിക സൗകര്യങ്ങളോടെ നിര്‍മ്മാണം പൂര്‍ത്തീകരിച്ചത്. സാങ്കേതിക കാരണങ്ങളാല്‍ കാലതാമസം വരുത്തുന്ന പദ്ധതികളുടെ ന്യൂനത മാറ്റാന്‍ പരമാവധി ശ്രമം നടത്തിവരികയാണെന്ന് മന്ത്രി പറഞ്ഞു. രണ്ടര വര്‍ഷംകൊണ്ട് പൊതുമരാമത്ത് വകുപ്പ് മൊത്തം അടങ്കല്‍ 105608 രൂപ ചിലവഴിച്ചു. കേരളത്തിന്റെ ആസ്തി മൂല്യം വര്‍ദ്ധിക്കുകയാണ്. പാലങ്ങള്‍, കനാലുകള്‍, ആശുപത്രികള്‍, വ്യവസായശാലകള്‍, റോഡുകള്‍ തുടങ്ങിയവയെല്ലാം സര്‍ക്കാരിന്റെ ആസ്തികളാണ്. ഏതെങ്കിലും പഞ്ചായത്തില്‍ റോഡ് വികസനത്തില്‍ പിന്നോക്കാവസ്ഥ ഉണ്ടെങ്കില്‍ സാമ്പത്തിക സഹായം നല്കാന്‍ തയ്യാറാണെന്നും അദ്ദേഹം പറഞ്ഞു. ഊരാളുങ്കല്‍ ലേബര്‍ കോണ്‍ട്രാക്ട് സൊസൈറ്റിയാണ് നിര്‍മ്മാണ പ്രവൃത്തി പൂര്‍ത്തീകരിച്ചത്. ഇ കെ വിജയന്‍ എം എല്‍ എ അധ്യക്ഷത വഹിച്ചു. പൊതുമരാമത്ത് വകുപ്പ് എക്‌സിക്യൂട്ടീവ് എഞ്ചിനിയര്‍ സിന്ധു ആര്‍ സ്വാഗതം പറഞ്ഞു. തൂണേരി ബ്ലോക്ക് പഞ്ചായത്ത് പ്രസിഡന്റ് സി എച്ച് ബാലകൃഷ്ണന്‍, ഗ്രാമ പഞ്ചായത്ത് പ്രസിഡന്റുമാരായ വളപ്പില്‍ കുഞ്ഞമ്മദ് മാസ്റ്റര്‍, തൊടുവയില്‍ മഹമൂദ്, ജില്ലാ പഞ്ചായത്ത് അംഗങ്ങളായ ടി കെ ശൈലജ, അഹമ്മദ് പുന്നക്കല്‍ തുടങ്ങിയവര്‍ പങ്കെടുത്തു.
 
താമരശ്ശേരി ചുരം രണ്ടാം വളവില്‍ പിക്കപ്പ് മറിഞ്ഞു
അടിവാരം: ചുരം രണ്ടാം വളവില്‍ പിക്കപ്പ് നിയന്ത്രണം വിട്ട് മറിഞ്ഞു. അപകടത്തില്‍ പരുക്കേറ്റ ഡ്രൈവറെ മെഡിക്കല്‍ കോളേജ് ആശുപത്രിയില്‍ പ്രവേശിപ്പിച്ചു. പയ്യോളിയില്‍ നിന്നും വയനാട്ടിലേക്ക് ബേക്കറി സാധനങ്ങളുമായി പോകുകയായിരുന്ന വാഹനമാണ് അപകടത്തില്‍ പെട്ടത്. പോലീസും ചുരം സംരക്ഷണ സമിതി പ്രവര്‍ത്തകരും ചേര്‍ന്നാണ് ഗതാഗതം നിയന്ത്രിച്ചത്.
 
താമരശ്ശേരിയില്‍ ഇന്ത്യന്‍ നാഷണല്‍ കോണ്‍ഗ്രസ്സിന്റെ 134-ാം ജന്മദിനാഘോഷം
താമരശ്ശേരി: താമരശ്ശേരി മണ്ഡലം കോണ്‍ഗ്രസ്സ് കമ്മിറ്റിയുടെ ആഭിമുഖ്യത്തില്‍ ഇന്ത്യന്‍ നാഷണല്‍ കോണ്‍ഗ്രസ്സിന്റെ 134-ാം ജന്മദിനാഘോഷം ഗ്രാമ പഞ്ചായത്ത് വൈസ് പ്രസിഡണ്ട് നവാസ് ഈര്‍പ്പോണ കേക്ക് മുറിച്ച് ഉല്‍ഘാടനം ചെയ്തു. ഡി സി സി മെമ്പര്‍ വി പി ഗോപാലന്‍കുട്ടി, യു ഡി എഫ് കണ്‍വീനര്‍ ടി ആര്‍ ഓമനകുട്ടന്‍ മസ്റ്റര്‍, ബ്ലോക്ക് പഞ്ചായത്ത് മെമ്പര്‍ എ പി ഉസ്സയിന്‍, അഡ്വ. ജോസഫ് മാത്യു, കെ സരസ്വതി, സി മുഹ്‌സിന്‍, സി ഹുസ്സയിന്‍, വി കെ എ കബീര്‍, ടി പി ഷരീഫ്, എം പി സി ജംഷിദ്, കെ പി ദാമോദരന്‍, ജസ്സി ശ്രീനിവാസന്‍, വസന്ത ചന്ദ്രന്‍, എം വി സലിം തുടങ്ങിയവര്‍ സംസാരിച്ചു.
 
 
 
 

All rights reserved | Website developed and maintained by Zyonz Technologies