07-Dec-2019 (Sat)
 
 
 
അശരണര്‍ക്ക് ആഹാരം നല്‍കി ഭക്ഷ്യ വിപണനമേള
കോഴിക്കോട്: ഭാരത് എഡുക്കേഷന്‍ ഫൗണ്ടേഷന്‍ കോളേജ് യൂണിയന്‍ മലയാള ഭാഷാഘോഷത്തോടനുബന്ധിച്ച് നടത്തിയ ഭക്ഷ്യ വിപണനമേള വേറിട്ട പരിപാടികള്‍കൊണ്ട് ശ്രദ്ധേയമായി. അശരണര്‍ക്ക് ആഹാരം വിളമ്പിക്കൊണ്ട് സംസ്ഥാന ഹോസ്പിറ്റാലിറ്റി മാനേജ്‌മെന്റ് സീനിയര്‍ ഫാക്കല്‍റ്റി അരുണ്‍ രാഘവ് പരിപാടി ഉദ്ഘാടനം ചെയ്തു. പ്രിന്‍സിപ്പാള്‍ ജയ്‌സി വി ടി അധ്യക്ഷത വഹിച്ചു. വൈ എം സിക്ക് സമീപമുള്ള ഭാരത് ന്യൂ ക്യാമ്പസില്‍ 12 ഓളം സ്റ്റാളുകളിലായി കേരളീയ വിഭവങ്ങളുടെ നീണ്ട നിരയാണ് ഒരുക്കിയിരിക്കുന്നത്.
 
കുടിവെള്ള പദ്ധതി പ്രവൃത്തി ഉദ്ഘാടനം ചെയ്തു
കാരശ്ശേരി: കാരശ്ശേരി ഗ്രാമപഞ്ചായത്ത് വലിയപറമ്പ് മുരിങ്ങപ്പറ്റ തടായി ലക്ഷം വീട് കോളനി കുടിവെള്ളപദ്ധതി ടാങ്ക് നിര്‍മാണ പ്രവൃത്തി ഉദ്ഘാടനം ചെയ്തു. ബ്ലോക്ക് പഞ്ചായത്ത് വാര്‍ഷിക പദ്ധതിയില്‍ ഉള്‍പ്പെടുത്തി നിര്‍മിക്കുന്ന ടാങ്കിന്റെ പ്രവൃത്തി ഉദ്ഘാടനം ബ്ലോക് മെമ്പര്‍ വി എന്‍ ശുഹൈബ് നിര്‍വഹിച്ചു.വലിയപറമ്പ് കുയ്യില്‍ മുഹമ്മദിന്റെ കുടുംബം സൗജന്യമായി നല്‍കിയ സ്ഥലത്താണ് കോണ്ക്രീറ്റ് ടാങ്ക് നിര്‍മിക്കുന്നത്. വാര്‍ഡ് മെമ്പര്‍ സവാദ് ഇബ്രാഹിം അദ്ധ്യക്ഷത വഹിച്ച ചടങ്ങില്‍ കുയ്യില്‍ മുഹമ്മദ്, സജീഷ് കറുത്തപറമ്പ്, ഹാബിദ് കൊളംബില്‍, മമ്മദ് കളത്തിങ്ങല്‍, എല്‍ വി ബേബി, വിനോദ് പുത്രശ്ശേരി തുടങ്ങിയവര്‍ സംസാരിച്ചു.
 
കുന്ദമംഗലം: കുന്ദമംഗലം നിയോജകമണ്ഡലത്തിലെ വിവിധ ഗ്രാമീണ റോഡുകള്‍ നന്നാക്കാന്‍ 54 ലക്ഷം രൂപയുടെ ഭരണാനുമതി. കുന്ദമംഗലം ഗ്രാമപഞ്ചായത്തിലെ പടാളി കലങ്ങോട്ടുകുന്ന് റോഡ്, ഐ ഐ എം ആക്കോളി റോഡ്, കാരന്തൂര്‍ ഹരഹര ക്ഷേത്രം റോഡ്, പൈങ്ങോട്ടുപുറം എല്‍ പി സ്‌കൂള്‍ റോഡ്, ആനിക്കാട്ടുമ്മല്‍ റോഡ്, പതിമംഗലം മണ്ണാറപുറായില്‍ റോഡ്, ചാത്തമംഗലം ഗ്രാമപഞ്ചായത്തിലെ അരയങ്കോട്ട് സൗത്ത് അരയങ്കോട്ട് റോഡ്, വെണ്ണക്കോട് പുതിയാറമ്പ് കാഞ്ഞിരത്തിങ്ങല്‍ റോഡ്, ചെട്ടിക്കടവ് പാറക്കുന്നത്ത് റോഡ്, ചൂലൂര്‍ മുതിയേരി റോഡ്, ചെമ്പങ്ങോട്ട് റോഡ്, ചാലിയംകണ്ടി അയോദ്ധ്യ റോഡ്, പെരുവയല്‍ ഗ്രാമപഞ്ചായത്തിലെ പുറത്താട്ട്മുക്ക് ചാലിപ്പാടം റോഡ്, പെരുമണ്ണ ഗ്രാമപഞ്ചായത്തിലെ പെരുമണ്‍പുറ ചാലില്‍മേത്തല്‍ റോഡ്, പുത്തൂര്‍മഠം കുന്നംകുളങ്ങര റോഡ്, പാറക്കണ്ടം കീഴ്പാടം റോഡ്, പാലംകുന്നുമ്മല്‍ റോഡ്, വടക്കെപറമ്പില്‍ പാറക്കുളം പള്ളി റോഡ് എന്നിവയ്ക്കായാണ് തുക അനുവദിച്ചിട്ടുള്ളത്.
 
കൂടത്തായ് ബസാര്‍ ക്ഷീരോല്‍പ്പാദക സഹകരണ സംഘം ഇനി പുതിയ കെട്ടിടത്തില്‍
കൂടത്താട്: കൂടത്തായ് ബസാര്‍ ക്ഷീരോല്‍പ്പാദക സഹകരണ സംഘത്തിന്റെ പുതിയ കെട്ടിട ഉദ്ഘാടനം എം കെ രാഘവന്‍ എം പി നിര്‍വ്വഹിച്ചു. ബ്ലോക്ക് പഞ്ചായത്ത് പ്രസിഡന്റ് എം എം രാധാമണി അധ്യക്ഷത വഹിച്ചു. ബള്‍ക്ക് മില്‍ക്ക് കൂളറിന്റെ ഉദ്ഘാടനം മില്‍മ ചെയര്‍മാന്‍ പി ടി ഗോപാലകുറുപ്പ് നിര്‍വ്വഹിച്ചു. ക്വാളിറ്റി കണ്‍ട്രോളിംഗ് ഇന്‍സ്പെക്ടര്‍ ക്ഷീര വികസനവകുപ്പ് രശ്മി മുഖ്യ പ്രഭാഷണം നടത്തി. ഏറ്റവും കൂടുതല്‍ പാല്‍ അളന്ന കര്‍ഷകരെയും മുതിര്‍ന്ന കര്‍ഷകരെയും ഓമശ്ശേരി ഗ്രാമ പഞ്ചായത്ത് പ്രസിഡന്റ് ഗ്രേസി നെല്ലിക്കുന്നേല്‍ ഉപഹാരം നല്‍കി ആദരിച്ചു. മില്‍മ ചാരിറ്റി ഫണ്ട് വിതരണം എം ആര്‍ സി എം പി യു എം ഡി കേശവന്‍ നിര്‍വ്വഹിച്ചു. ഇന്‍ഷൂറന്‍സ് ക്ലെയിം വിതരണം ഡയറി എക്സ്റ്റെന്‍ഷന്‍ ഓഫീസര്‍ റജിമോള്‍ ജോര്‍ജ്ജ് നിര്‍വ്വഹിച്ചു. അഹമ്മദ്കുട്ടി, പി വി അബ്ദുറഹിമാന്‍ മാസ്റ്റര്‍, കെ പി കുഞ്ഞമ്മദ്, അഡ്വ. രാജേഷ്‌കുമാര്‍, സനല്‍ കുമാര്‍, ഇ ജെ മനു, കെ കരുണാകരന്‍ മാസ്റ്റര്‍, കെ പി അയമ്മദ്കുട്ടി മാസ്റ്റര്‍, കെ ബാലന്‍, സി ജെ ജോസഫ് മാസ്റ്റര്‍, സി കെ ആലിക്കുട്ടി, കെ കരുണാകരന്‍, പി കെ രാമന്‍കുട്ടി മാസ്റ്റര്‍, സി കെ കുട്ടിഹസ്സന്‍, ഒ പി അബ്ദുറഹിമാന്‍, എ കെ കാദിരി ഹാജി, വാസു മേനോക്കി, പ്രശോഭ് തുടങ്ങിയവര്‍ സംസാരിച്ചു. സെക്രട്ടറി പി കെ ദിനേഷ് കുമാര്‍ റിപ്പോര്‍ട്ട് അവതരിപ്പിച്ചു. പി പി കുഞ്ഞായിന്‍ സ്വാഗതവും പി പി മാമു നന്ദിയും പറഞ്ഞു.
 
വിധവക്കും മകള്‍ക്കും കിടപ്പാടം ഒരുക്കി യുവജന കൂട്ടായ്മ
അടിവാരം: വിധവക്കും മകള്‍ക്കും കിടപ്പാടം ഒരുക്കി യുവജന കൂട്ടായ്മ. പുതുപ്പാടി അടിവാരം എലിക്കാട് നാലകത്ത് സുഹറക്കും മകള്‍ക്കുമാണ് സുമനസ്സുകളുടെ കൂട്ടായ്മയില്‍ സാന്ത്വന ഭവനം ഒരുങ്ങിയത്. വര്‍ഷങ്ങള്‍ക്ക് മുമ്പ് ഭര്‍ത്താവും 5 മാസങ്ങള്‍ക്കുമുമ്പ് 14 കാരനായ മകനും മരിച്ചതോടെയാണ് സുഹറയും പ്ലസ് ടു വിദ്യാര്‍ത്ഥിനിയായ മകളും തനിച്ചായത്. ഇവര്‍ താമസിച്ചിരുന്ന വീട് വാസ യോഗ്യമല്ലാതായതോടെ സുരക്ഷിത കേന്ദ്രത്തിലേക്ക് മാറ്റാന്‍ പ്രദേശത്തെ യുവാക്കളുടെ കൂട്ടായ്മ രംഗത്തെത്തിയിരുന്നു. ഇതിനിടെയാണ് മകന്‍ കാന്‍സര്‍ പിടിപെട്ട് മരിച്ചത്. ഇവര്‍ താമസിക്കുന്ന വീട് നിന്നിരുന്ന സ്ഥലം വില്‍പ്പന നടത്തിയപ്പോള്‍ ലഭിച്ച പണവും ചേര്‍ത്ത് അഞ്ച് സെന്റ് ഭൂമി വാങ്ങുകയും പ്രവാസികളുടെ സഹായത്തോടെ വീടിന്റെ പ്രവൃത്തി ആരംഭിക്കുകയുമായിരുന്നു. പ്രദേശവാസികളായ പ്രവാസികള്‍ ഉള്‍പ്പെടെയുള്ളവര്‍ കൂടുതല്‍ സഹായവുമായി രംഗത്തെത്തിയത് വീടിന്റെ പ്രവൃത്തി എളുപ്പമാക്കി. 13 ലക്ഷത്തോളം രൂപയാണ് സ്ഥലം വാങ്ങി വീട് നിര്‍മിക്കാന്‍ ചെലവായത്. കഴിഞ്ഞ ദിവസം സുഹറയും മകളും ഈ വീട്ടില്‍ താമസം ആരംഭിക്കുകയും ചെയ്തു. സ്വപ്ന വീട്ടില്‍ താമസം ആരംഭിക്കുമ്പോള്‍ മകന്‍ കൂടെയില്ലെന്ന വേദനയുണ്ടെങ്കിലും സഹജീവികളുടെ സഹായ ഹസ്തം സുഹറക്ക് ആത്മ വിശ്വാസം പകരുകയാണ്.
 
പ്രതിഭാ സംഗമവും അവാര്‍ഡ് ദാനവും
പുതുപ്പാടി: ഒയിസ്‌ക പുതുപ്പാടി ചാപ്റ്ററിന്റെ ആഭിമുഖ്യത്തില്‍ പ്രതിഭാ സംഗമവും അവാര്‍ഡ് ദാനവും സംഘടിപ്പിച്ചു. കൈതപ്പൊയില്‍ എം ഇ എസ് സ്‌കൂളില്‍ നടന്ന ചടങ്ങില്‍ താമരശ്ശേരി ഡെപ്യൂട്ടി റെയ്ഞ്ച് ഓഫീസര്‍ എം കെ രാജീവ്കുമാര്‍ ഉദ്ഘാടനം ചെയ്തു. സ്‌ക്രേറ്റ് കമ്മറ്റി അംഗം സജി തോമസ് അധ്യക്ഷനായി. പഞ്ചായത്തിലെ മികച്ച ലൗവ്ഗ്രീന്‍ ക്ലബ്ബിനുള്ള പുരസ്‌കാരം താമരശ്ശേരി എസ് ഐ സായൂജ്കുമാറില്‍ നിന്നും സ്‌കൂള്‍ മാനേജര്‍ കെ എം എ മുഹമ്മദ് ഏറ്റുവാങ്ങി. ടോപ്്ടീന്‍ പരീക്ഷയില്‍ ടോപ്പറായ സായന്ത് ബി എസ് (എം ജി എം), ഫാത്തിമ ഷബാന(എം ഇ എസ്) എന്നിവര്‍ക്കുള്ള ഉപഹാരങ്ങള്‍ എസ് ഐ ചടങ്ങില്‍ നല്‍കി. പരീക്ഷയില്‍ ഉന്നത വിജയം നേടിയ വിദ്യാര്‍ത്ഥികള്‍ക്കുള്ള സര്‍ട്ടിഫിക്കറ്റുകള്‍ ഒയിസ്‌ക സ്റ്റേറ്റ് കമ്മറ്റി പ്രസിഡന്റ് വി പി സുകുമാരന്‍ വിതരണം ചെയ്തു. സൗത്ത് ഇന്ത്യാ കമ്മിറ്റി അംഗം എ കെ ബഷീര്‍, സ്റ്റേറ്റ് കമ്മിറ്റി പ്രസിഡന്റ് വി പി സുകുമാരന്‍, സ്‌കൂള്‍ മാനേജര്‍ കെ എം എ മുഹമ്മദ്, പ്രിന്‍സിപ്പല്‍ സിസിലി പോള്‍ എന്നിവര്‍ സംസാരിച്ചു. ചാപ്റ്റര്‍ സെക്രട്ടറി എന്‍ ആര്‍ ഷാജി സ്വാഗതവും പി ഡി ബേബി നന്ദിയും പറഞ്ഞു.
 
കൊയിലാണ്ടി: കൊയിലാണ്ടി താലൂക്കിലെ കരുവള്ളൂര്‍ എന്‍ എഫ് എസ് എ ഗോഡൗണിലെ തൊഴിലാളികളുടെ കൂലി വര്‍ധനവുമായി ബന്ധപ്പെട്ട തര്‍ക്കം സര്‍ക്കാര്‍ തലത്തില്‍ പരിഹരിക്കാന്‍ ജില്ലാ കലക്ടര്‍ യു വി ജോസിന്റെ അധ്യക്ഷതയില്‍ ചേര്‍ന്ന യോഗത്തില്‍ തീരുമാനമായി. ഇത് സംബന്ധിച്ച വിശദമായ റിപ്പോര്‍ട്ട് സര്‍ക്കാരിലേക്ക് സമര്‍പ്പിക്കും. തൊഴിലാളി സംഘടന പ്രതിനിധികള്‍ തീരുമാനം അംഗീകരിച്ചു. അടുത്ത പ്രവൃത്തി ദിനം മുതല്‍ തൊഴിലാളികള്‍ ജോലിക്കിറങ്ങും. കലക്ടറുടെ ചേംബറില്‍ നടന്ന യോഗത്തില്‍ ഡെ. കലക്ടര്‍ കെ റംല, ജില്ലാ സപ്ലൈ ഓഫീസര്‍ കെ മനോജ് കുമാര്‍, ജില്ലാ ലേബര്‍ ഓഫീസര്‍ പി പി സന്തോഷ് കുമാര്‍, തൊഴിലാളി സംഘടന പ്രതിനിധികള്‍ തുടങ്ങിയവര്‍ പങ്കെടുത്തു.
 
താമരശ്ശേരി ചുരത്തില്‍ ചരക്കു ലോറികള്‍ കുടുങ്ങി; ഗതാഗത കുരുക്കില്‍ വലഞ്ഞ് യാത്രക്കാര്‍
അടിവാരം: താമരശ്ശേരി ചുരത്തില്‍ ചരക്കു ലോറികള്‍ കുടുങ്ങി മണിക്കൂറുകള്‍ ഗതാഗതം തടസ്സപ്പെട്ടു. ചുരം 6, 7 വളവുകളിലാണ് അര്‍ദ്ധരാത്രി ചരക്കു ലോറികള്‍ കുടുങ്ങിയത്. ഡീസല്‍ തീര്‍ന്ന ടോറസ് ലോറി ഏഴാം വളവില്‍ റോഡിന് കുറുകെ കുടുങ്ങിയതോടെ ഗതാഗതം പൂര്‍ണ്ണമായും തടസ്സപ്പെട്ടു. മറ്റൊരു ലോറി കേടായി ആറാം വളവിനു മുകളില്‍ റോഡില്‍ കുടുങ്ങുകയായിരുന്നു.
 
മുന്നൂറിലധികം കപ്പ വിഭവങ്ങളുമായി അല്‍ ഇര്‍ഷാദ് വിദ്യാര്‍ത്ഥിനികള്‍
ഓമശ്ശേരി: കേരളപിറവി ദിനാഘോഷങ്ങളുടെ സമാപനത്തോടനുബന്ധിച്ച് ഓമശ്ശേരി തെച്ചിയാട് അല്‍ ഇര്‍ഷാദ് വുമണ്‍സ് കോളേജില്‍ സംഘടിപ്പിച്ച ഭക്ഷ്യമേള നവീന അനുഭവമായി. കേരളത്തിന്റെ തനത് ഭക്ഷണമായ കപ്പകൊണ്ട് മുന്നൂറിലധികം രുചികരമായ വിഭവങ്ങളാണ് വിദ്യാര്‍ത്ഥിനികള്‍ വിവിധ വിഭാഗങ്ങളിലായി തയ്യാറാക്കിയത്. കപ്പ പായസം, കപ്പ വട, ടപ്യോക ജില്‍ ജില്‍, കപ്പ ജ്യൂസ്, കപ്പ കഞ്ഞി, കപ്പ അലീസ, കപ്പ പുഡിംഗ്, കപ്പ ഹല്‍വ, കപ്പ ജെറീസ് ഉണ്ട, കപ്പ കോഴികാല്‍, കപ്പ ഇറച്ചി പുട്ട്, പാല്‍ കപ്പ, കപ്പ മാക്രോണി, കപ്പ മിച്ചര്‍, ടപ്യോക പേള്‍, ടപ്യോക കോഴിക്കോടന്‍ ലോലിപോപ്പ്, കപ്പ കബാബ്, കപ്പ ബര്‍ഗര്‍, റാസ്ബറി കപ്പ പുഡിംഗ്, കപ്പ ഡിസേര്‍ട്ട്, കപ്പ അച്ചാര്‍, ടപ്യോക ചീസ്, ടപ്യോക മഞ്ചൂരി, ടപ്യോക ഡിലൈറ്റ്, കപ്പ കിളികൂട്, ഹണി ചീസ് ടപ്യോക തുടങ്ങിയ മുന്നൂറോളം വിഭവങ്ങളാണ് വിദ്യാര്‍ത്ഥിനികള്‍ മൂന്ന് മണിക്കൂര്‍ കൊണ്ട് തയ്യാറാക്കിയത്. കോളേജില്‍ ഒരാഴ്ചയായി നടന്നു വന്ന കേരളപിറവി ദിനാഘോഷ സമാപനം കപ്പോത്സവം 2K18 അല്‍ ഇര്‍ഷാദ് ജനറല്‍ സെക്രട്ടറി ഉസൈന്‍ മേപ്പള്ളി ഉദ്ഘാടനം ചെയ്തു. കോളേജ് പ്രിന്‍സിപ്പാള്‍ സലീന വി അധ്യക്ഷത വഹിച്ചു.
 
വയലോരം-പീടികത്തൊടുക റോഡ് ഉദ്ഘാടനം ചെയ്തു
ഓമശ്ശേരി: ഓമശ്ശേരി ഗ്രാമപഞ്ചായത്തിന്റെ 2018-19 വാര്‍ഷിക പദ്ധതിയില്‍ കോണ്‍ഗ്രീറ്റ് പ്രവൃത്തി പൂര്‍ത്തീകരിച്ച ഒന്നാം വാര്‍ഡ് കൂടത്തായ് വയലോരം-പീടികത്തൊടുക റോഡിന്റെ ഉദ്ഘാടനം വാര്‍ഡ് മെമ്പര്‍ കെ പി കുഞ്ഞമ്മദ് നിര്‍വ്വഹിച്ചു. കെ ബാലന്‍, പി പി ജുബൈര്‍, ഒ പി അബ്ദുറഹിമാന്‍, പി കെ ഇബ്രാഹീം, പി ടി സുധീഷ്, വി കെ ശരീഫ്, എ കെ കരീം, ഗിരീഷ് ബാബു, എ കെ അമ്മദ് ഹാജി, എ കെ നാസര്‍, ശരീഫ് പള്ളിക്കണ്ടി, ടി മൊയ്തീന്‍കുട്ടി, സി ടി നാസര്‍, പി പി അബൂബക്കര്‍ എന്നിവര്‍ സംസാരിച്ചു.
 
 
 
 

All rights reserved | Website developed and maintained by Zyonz Technologies