18-Feb-2019 (Mon)
 
 
 
വ്യവസ്ഥിതിയുടെ അലംഭാവവും കെടുകാര്യസ്ഥതയുമാണ് തന്നെ ദ്രോഹിച്ചത്: നമ്പി നാരായണന്‍
താമരശ്ശേരി: നിലവിലെ വ്യവസ്ഥിതിയുടെ അലംഭാവവും കെടുകാര്യസ്ഥതയുമാണ് തന്നെ ദ്രോഹിച്ചതെന്നു പ്രശസ്ത ശാസ്ത്രജ്ഞന്‍ നമ്പി നാരായണന്‍. പത്മഭൂഷണ്‍ ലഭിച്ചതിന്റെ ഭാഗമായി മര്‍കസ് നോളജ് സിറ്റിയില്‍ സംഘടിപ്പിച്ച ആദരിക്കല്‍ ചടങ്ങില്‍ സംസാരിക്കുകയായിരുന്നു അദ്ദേഹം. സര്‍ക്കാറിന്റെ പരാതി പ്രകാരം മാത്രമേ ഔദ്യോഗിക സര്‍ക്കാറിന്റെ രഹസ്യനിയമ പ്രകാരം കേസ് രജിസ്റ്റര്‍ ചെയ്യാന്‍ പാടുള്ളൂ എന്ന സാഹചര്യത്തില്‍ തനിക്കെതിരെ അത്തരം പരാതികള്‍ ഇല്ലാതിരുന്നിട്ടും പോലീസ് കേസെടുക്കുകയായിരുന്നു. ഈ നിയമ ലംഘനം പരിഗണിക്കാതെ ജഡ്ജി തന്നെ റിമാന്റ് ചെയ്തു കേസുകള്‍ നീട്ടിക്കൊണ്ടുപോയി ഇരുപത് വര്‍ഷം പീഡിപ്പിക്കുകയായിരുന്നു. തൊഴില്‍കാലത്തെ തന്റെ മികവില്‍ അതൃപ്തിയുള്ള ചിലരാണ് തനിക്കെതിരെ ഗൂഢാലോചന നടത്തിയതെന്നാണ് വിശ്വസിക്കുന്നതെന്നും നമ്പി നാരായണന്‍ പറഞ്ഞു. മര്‍കസ് ലോകോളജ്, യുനാനി മെഡിക്കല്‍ കോളേജ് എന്നീ സ്ഥാപനങ്ങളിലെ വിദ്യാര്‍ത്ഥികളുമായും അദ്ദേഹം സംവദിച്ചു. തുടര്‍ന്ന് മര്‍കസ് ചാന്‍സലര്‍ കാന്തപുരം എ പി അബൂബക്കര്‍ മുസ്ലിയാരുമായി കൂടിക്കാഴ്ച നടത്തി. മര്‍കസ് ലോ കോളേജ് പ്രിന്‍സിപ്പല്‍ ഡോ. പി സി ജോണ്‍ അദ്ദേഹത്തിന് ഉപഹാരം സമ്മാനിച്ചു. മര്‍കസ് നോളജ് സിറ്റി സി ഇ ഒ. ഡോ. അബ്ദുസ്സലാം മുഹമ്മദ് സ്വാഗതവും അഡ്വ. സമദ് പുലിക്കാട് നന്ദിയും പറഞ്ഞു.
 
വാഹന പരിശോധനക്കിടെ 51 കുപ്പി വിദേശ മദ്യവുമായി യുവാവ് പിടിയില്‍
പൂനൂര്‍: കാറില്‍ കടത്തുകയായിരുന്ന വിദേശ മദ്യ ശേഖരം താമരശ്ശേരി എക്‌സൈസ് പിടികൂടി. കൂരാച്ചുണ്ട് അത്തിയോടി തൊണ്ടനാല്‍ വീട്ടില്‍ ജിങ്കോ ശരത്തിനെ(37)യാണ് 51 കുപ്പി വിദേശ മദ്യവുമായി എക്‌സൈസ് സംഘം അറസ്റ്റ് ചെയ്തത്. പൂനൂരില്‍ നടന്ന വാഹന പരിശോധനയിലാണ് കോഴിക്കോട്ടെ വിവിധ വിദേശ മദ്യ ശാപ്പുകളില്‍ നിന്നും വാങ്ങിയ വിദേശ മദ്യം കെ എല്‍ 56 ഇ 2262 നമ്പര്‍ നാനോ കാറില്‍ കടത്തുന്നതിനിടെ എക്‌സൈസ് സംഘം പിടിച്ചെടുത്തത്.
 
അംഗന്‍വാടിയിലെ സംഘര്‍ഷം; ചോരക്കളി തടഞ്ഞത് യുവതിയുടെ ഇടപെടല്‍
താമരശ്ശേരി: തേറ്റാമ്പുറം അംഗന്‍വാടിയില്‍ റിപ്പബ്ലിക് ദിന റാലിക്ക് കാവി നിറത്തിലുള്ള താമര പ്ലക് കാര്‍ഡ് ആക്കിയതുമായി ബന്ധപ്പെട്ടുണ്ടായ സംഘര്‍ഷത്തില്‍ ചോരക്കളി ഇല്ലാതാക്കിയത് യുവതിയുടെ അവസരോചിത ഇടപെടല്‍. ഡി വൈ എഫ് ഐ പ്രവര്‍ത്തകര്‍ക്കുനേരെ കൊടുവാളുമായി ഓടിയെത്തിയ ആളുടെ കയ്യില്‍ നിന്നും സാഹസികമായി കൊടുവാള്‍ പിടിച്ചെടുത്താണ് യുവതി താരമായത്.
 
ടാര്‍ മിക്‌സിംങ്ങ് യൂനിറ്റില്‍ തീപിടുത്തം
താമരശ്ശേരി: ചുങ്കം ചെക്ക് പോസ്റ്റിന് സമീപത്ത് പ്രവര്‍ത്തിക്കുന്ന ഊരാളുങ്കല്‍ ലേബര്‍ കോണ്‍ട്രാക്ട് സൊസൈറ്റിയുടെ ടാര്‍ മിക്‌സിങ്ങ് യൂനിറ്റിലാണ് തീപിടുത്തമുണ്ടായത്. ടാര്‍ സംഭരിച്ചു വെച്ച ടാങ്കാണ് കത്തിയത്. മുക്കത്തുനിന്നും അഗ്‌നിശമന സേനയെത്തി തീയണച്ചു.
 
കാക്കുനിയിലെ ബോംബ് സ്‌ഫോടനം; ഇരു കൈപ്പത്തികളും നഷ്ടപ്പെട്ട യൂത്ത്‌ലീഗ് പ്രവര്‍ത്തകന്‍ അറസ്റ്റില്‍
കുറ്റിയാടി: വേളം കാക്കുനിയില്‍ ബോംബ് സ്‌ഫോടനത്തില്‍ പരുക്കേറ്റ് ചികിത്സയിലായിരുന്ന യൂത്ത് ലീഗ് പ്രവര്‍ത്തകന്റെ അറസ്റ്റ് രേഖപ്പെടുത്തി. കാക്കുനി പറമ്പത്ത് സാലിമി(20)നെയാണ് കുറ്റിയാടി പോലീസ് അറസ്റ്റ് ചെയ്തത്. യൂത്ത് ലീഗ് പ്രവര്‍ത്തകരായ പറമ്പത്ത് മുനീര്‍(24), കുളങ്ങര ഷംസീര്‍ എന്നിവരെ നേരത്തെ അറസ്റ്റ് ചെയ്തിരുന്നു. കാക്കുനി അരൂര്‍ റോഡില്‍ സാലിമിന്റെ പിതാവിന്റെ ഉമടമസ്ഥതിയുള്ള പറമ്പിലാണ് പുതുവത്സര ദിനം പുലര്‍ച്ചെ വന്‍ ശബ്ദത്തോടെ സ്‌ഫോടനം നടന്നത്. സാലിമിന്റെ ഇരു കൈപ്പത്തികളും തകര്‍ന്നിരുന്നു. പരുക്കേറ്റ മൂന്നുപേരെയും കോഴിക്കോട്ടെ സ്വകാര്യ ആശുപത്രിയില്‍ എത്തിച്ചെങ്കിലും രണ്ട് പേര്‍ ഇവിടെ നിന്നും രക്ഷപ്പെടുകയായിരുന്നു. അയല്‍ സംസ്ഥാനങ്ങളില്‍ ഒളിവില്‍ കഴിഞ്ഞ ഇവരെ യാത്രക്കിടെയാണ് കുറ്റിയാടി പോലീസ് പിടികൂടിയത്. ഇരു കൈപ്പത്തികളും മുറിച്ചുമാറ്റി ആശുപത്രിയില്‍ പോലീസ് കാവലില്‍ ചികിത്സയിലായിരുന്ന സാലിമിനെ ഡിസ്ചാര്‍ജ് ചെയ്ത ശേഷമാണ് അറസ്റ്റ് ചെയ്തത്. പയ്യോളി കോടതിയില്‍ ഹാജറാക്കിയ പ്രതിയെ 14 ദിവസത്തേക്ക് റിമാണ്ട് ചെയ്തു. സ്‌ഫോടനം നടന്ന വിവരം പുറത്തറിയിക്കാതെ ഇവരെ ആശുപത്രിയില്‍ എത്തിക്കുകയായിരുന്നു. പുതുവത്സരാഘോഷത്തിനിടെയായതിനാല്‍ പടക്കം പൊട്ടിയതാണെന്നാണ് പരിസര വാസികള്‍ കരുതിയത്. പിന്നീട് പോലീസിന് ലഭിച്ച രഹസ്യ വിവരത്തെ തുടര്‍ന്ന് നടത്തിയ പരിശോധനയില്‍ തകര്ന്ന കൈപ്പത്തിയുടെ അവശിഷ്ടങ്ങള്‍ കുഴിച്ചിട്ട നിലയില്‍ കണ്ടെത്തിയിരുന്നു. പൊട്ടാത്ത ബോംബും സമീപത്തു നിന്നും പോലീസ് കണ്ടെടുത്തു. ബോംബ് നിര്‍മിക്കുന്നതിനിടെ അബദ്ധത്തില്‍ പൊട്ടുകയായിരുന്നുവെന്ന് പോലീസിന്റെ അന്വേഷണത്തില്‍ വ്യക്തമായിരുന്നു. പുതുവത്സരാഘോഷത്തിനിടെ പടക്കം പൊട്ടിയതാണെന്ന് ആദ്യം പ്രതികരിച്ച യൂത്ത് ലീഗ് നേതാക്കള്‍ പിന്നീട് സ്‌ഫോടനത്തില്‍ പാര്‍ട്ടി പ്രവര്‍ത്തകര്‍ക്ക് പങ്കുണ്ടെങ്കില്‍ നടപടി സ്വീകരിക്കുമെന്നും പ്രതികരിച്ചിരുന്നു.
 
ഹരിത നിയമാവലി ക്യാമ്പയിന്‍: രണ്ടാം ഘട്ടത്തിന് തുടക്കമായി
കോഴിക്കോട്: മാലിന്യത്തില്‍ നിന്നും സ്വതന്ത്ര്യം രണ്ടാം ഘട്ട പ്രവര്‍ത്തനതിന്റെ ഭാഗമായി ഹരിത നിയമാവലി ക്യാമ്പയിന്റെ ജില്ലാതല ഉദ്ഘാടനം ജില്ലാ പഞ്ചായത്ത് പ്രസിഡന്റും ഹരിത കേരളം ജില്ലാ മിഷന്‍ ചെയര്‍മാനുമായ ബാബു പറശ്ശേരി നിര്‍വഹിച്ചു. ഹരിത നിയമാവലിക്ക് വിധേയമായി നടപടികള്‍ സ്വീകരിച്ചെന്ന് തദ്ദേശസ്വയം ഭരണ സ്ഥാപനങ്ങള്‍ ഉറപ്പു വരുത്തണമെന്ന് ബാബു പറശ്ശേരി പറഞ്ഞു. ജില്ലയിലെ മുഴുവന്‍ കോഴി കടകളിലെ മാലിന്യവും സംസ്‌കരിക്കാന്‍ ആവശ്യമായ നടപടികള്‍ എടുത്തു കഴിഞ്ഞിട്ടുണ്ട്. ഇതിന്റെ ഭാഗമായി എല്ലാ കോഴി കടകളിലും ഫ്രീസര്‍ സ്ഥാപിക്കാനും ജില്ലാ അടിസ്ഥാനത്തില്‍ നിയോഗിച്ച ഏജന്‍സിക്ക് മാത്രമേ മാലിന്യങ്ങള്‍ കൈമാറാന്‍ പാടുള്ളൂവെന്നും നിര്‍ദേശം നല്‍കിയിട്ടുണ്ട്. ഒരു കിലോ കോഴി മാലിന്യത്തിന് ഏഴ് രൂപ മാത്രമാണ് ഈടാക്കുന്നതെന്നും അദ്ദേഹം പറഞ്ഞു. ഹരിത നിയമാവലി കൈപ്പുസ്തക പ്രകാശനവും മുഖ്യ പ്രഭാഷണവും ഡിസ്ട്രിക്ട് ആന്റ് സെഷന്‍സ് ജഡ്ജും ജില്ലാ ലീഗല്‍ സര്‍വീസ് അതോറിറ്റി ചെയര്‍പേഴ്‌സണുമായ എം ആര്‍ അനിത നിര്‍വഹിച്ചു. ഹരിത കേരളം മിഷന്‍ ജില്ലാ കോര്‍ഡിനേറ്റര്‍ പി പ്രകാശ് കൈപ്പുസ്തം പരിചയപ്പെടുത്തി. ജില്ലയില്‍ ഏറ്റവും കൂടുതല്‍ നിയമ നടപടി സ്വീകരിച്ച വടകര നഗരസഭ സെക്രട്ടറി കെ യു ബിനി അനുഭവം പങ്കുവെച്ചു. രാമനാട്ടുകര നഗരസഭ ഹെല്‍ത്ത് ഇന്‍സ്‌പെക്ടര്‍ പി പി സുരേഷ് ബാബു പ്രതികരണം രേഖപ്പെടുത്തി. തദ്ദേശസ്വയംഭരണ സ്ഥാപനങ്ങള്‍, ലീഗല്‍ സര്‍വ്വീസസ് അതോറിറ്റി, മലിനീകരണ നിയന്ത്രണ ബോര്‍ഡ്, ഭക്ഷ്യ സുരക്ഷാ വകുപ്പ്, ആരോഗ്യ വകുപ്പ്, ജനമൈത്രി പോലീസ്, ശുചിത്വ മിഷന്‍, കുടുംബശ്രീ എന്നിവ ഏകോപിപ്പിച്ചു കൊണ്ടാണ് ക്യാമ്പയിന്‍ നടത്തുന്നത്. ക്യാമ്പയിനിന്റെ ഭാഗമായി എല്ലാ തദ്ദേശസ്വയംഭരണ സ്ഥാപനങ്ങളിലെ ഓരോ വാര്‍ഡിലും രണ്ട് പരിശീലനം എന്ന തോതില്‍ ഒരു വാര്‍ഡില്‍ ചുരുങ്ങിയത് 100 പേര്‍ക്ക് പരിശീലനം നല്‍കാനാണ് ലക്ഷ്യം. രാമനാട്ടുകര വികാസ് ഓഡിറ്റോറിയത്തില്‍ നടന്ന ചടങ്ങില്‍ അഡീഷണല്‍ ജില്ലാ മെഡിക്കല്‍ ഓഫീസര്‍ ഡോ. എസ് എന്‍ രവികുമാര്‍, ഫുഡ് സേഫ്റ്റി അസിസ്റ്റന്റ് കമ്മീഷണര്‍ പി കെ ഏലിയാമ്മ, പഞ്ചായത്ത് അസിസ്റ്റന്റ് ഡയറക്ടര്‍ പി വി അബ്ദുള്‍ ലത്തീഫ്, നഗരകാര്യ വകുപ്പ് റീജണല്‍ ജോയന്റ് ഡയറക്ടര്‍ ഇന്‍ചാര്‍ജ്ജ് കെ പവിത്രന്‍ എന്നിവര്‍ സംസാരിച്ചു. ശുചിത്വമിഷന്‍ ജില്ലാ കോര്‍ഡിനേറ്റര്‍ സി കബനി സ്വാഗതവും രാമനാട്ടുകര നഗരസഭ സെക്രട്ടറി എന്‍ സുരേഷ് കുമാര്‍ നന്ദിയും രേഖപ്പെടുത്തി.
 
റിപ്പബ്ലിക് ദിന റാലിക്ക് കാവി നിറത്തിലുള്ള താമര പ്ലക്കാര്‍ഡ്: തര്‍ക്കം സംഘര്‍ഷത്തില്‍ കലാശിച്ചു
താമരശ്ശേരി: അംഗന്‍വാടിയില്‍ റിപ്പബ്ലിക് ദിന റാലിക്ക് കാവി നിറത്തിലുള്ള താമര പ്ലക്കാര്‍ഡ് ആക്കി വിദ്യാര്‍ത്ഥികള്‍ക്ക് നല്‍കിയതുമായി ബന്ധപ്പെട്ട തര്‍ക്കം സംഘര്‍ഷത്തില്‍ കലാശിച്ചു. തേറ്റാമ്പുറം മലര്‍വാടി അംഗന്‍വാടിയിലാണ് റിപ്പബ്ലിക് ദിന റാലിയില്‍ ബി ജെ പി യുടെ തിരഞ്ഞെടുപ്പ് ചിഹ്നമായ താമര പ്ലക്കാര്‍ഡാക്കി നല്‍കിയത്. ബി ജെ പി യുടെ തിരഞ്ഞെടുപ്പ് പോസ്റ്ററുകളില്‍ ഉപയോഗിക്കുന്ന കാവി നിറത്തിലുള്ള താമരക്ക് മുകളില്‍ ദേശീയ പുഷ്പം എന്ന് എഴുതിയാണ് വിദ്യാര്‍ത്ഥികള്‍ക്ക് നല്‍കിയത്. ബി ജെ പി യുടെ നിയോജക മണ്ഡലം ഭാരവാഹി തന്നെ ഈ ചിത്രം ഫേസ് ബുക്കില്‍ പോസ്റ്റ് ചെയ്യുകയും ചെയ്തിരുന്നു. സംഭവം വിവാദമായതോടെ തെളിവെടുപ്പിനെത്തിയ സാമൂഹ്യ ക്ഷേമ വകുപ്പ് ഉദ്യോഗസ്ഥയോട് പരാതി പറയാനെത്തിയ ഡി വൈ എഫ് ഐ പ്രവര്‍ത്തകരെ ബി ജെ പി പ്രവര്‍ത്തകര്‍ ചോദ്യം ചെയ്തതാണ് സംഘര്‍ഷത്തിന് കാരണമായത്. തിങ്കളാഴ്ച രാവിലെ പത്തുമണിയോടെയായിരുന്നു സംഭവം. സാമൂഹ്യ ക്ഷേമ വകുപ്പ് സി ഡി പി ഒ സുബൈദ അംഗന്‍വാടി ജീവനക്കാരില്‍ നിന്നും വിവരങ്ങള്‍ ശേഖരിക്കുന്നതിനിടെയാണ് രണ്ട് ഡി വൈ എഫ് ഐ പ്രവര്‍ത്തകര്‍ പരാതിയുമായി എത്തിയത്. ഇവരെ ചോദ്യം ചെയ്ത് ബി ജെ പി പ്രവര്‍ത്തകര്‍ രംഗത്തെത്തുകയും വാക്കേറ്റം കയ്യാങ്കളിയില്‍ കലാശിക്കുകയുമായിരുന്നു. സമീപവാസിയും ബി ജെ പി നിയോജക മണ്ഡലം ഭാരവാഹിയുമായ വി പി രാജീവന്‍ വീട്ടിലേക്കോടി കൊടുവാളുമായി തിരിച്ചെത്തിയതോടെ നാട്ടുകാരും ബന്ധുക്കളും ചേര്‍ന്ന് തടഞ്ഞു. അല്‍പ്പ സമയത്തിനകം രാജീവന്റെ സഹോദരനും കൊടുവാളുമായി അംഗന്‍വാടി കോമ്പൗണ്ടിലേക്ക് ചാടി. സ്ത്രീകള്‍ ഉള്‍പ്പെടെയുള്ളവരാണ് കൊടുവാള്‍ പിടിച്ചെടുത്തത്. ഇതോടെ ഭീതിയിലായ രക്ഷിതാക്കള്‍ കുട്ടികളെയുമായി മടങ്ങി. പിന്നീട് താമരശ്ശേരി പോലീസ് സ്ഥലത്തെത്തി സംഘര്‍ഷം നിയന്ത്രിച്ചു. പ്രധാന ചടങ്ങുകള്‍ക്ക് ശേഷം താന്‍ മരണ വീട്ടിലേക്ക് പോയിരുന്നുവെന്നും പിന്നീട് നടന്നത് എന്താണെന്ന്് അറിയില്ലെന്നുമാണ് അംഗന്‍വാടി ജീവനക്കാരി കെ വി ജയയുടെ പ്രതികരണം. പ്ലക്കാര്‍ഡ് തയ്യാറാക്കിയതില്‍ തെറ്റ് സംഭവിച്ചതായാണ് പ്രാധമിക അന്വേഷണത്തില്‍ മനസ്സിലായതെന്നും റിപ്പോര്‍ട്ട് മേലുദ്യോഗസ്ഥര്‍ക്ക് നല്‍കുമെന്നും സി ഡി പി ഒ സുബൈദ പറഞ്ഞു. വൈകിട്ടോടെ താമരശ്ശേരി പോലീസ് സ്‌റ്റേഷനില്‍ നടന്ന ചര്‍ച്ചയില്‍ സോഷ്യല്‍ മീഡിയയിലെ പ്രചാരണങ്ങളും നോട്ടീസുകളും ഒഴിവാക്കാന്‍ ധാരണയായി.
 
പി ചന്ദ്രമോഹനും ഷിബില്‍ ജോസഫിനും മുഖ്യമന്ത്രിയുടെ പോലീസ് മെഡല്‍
കൊടുവള്ളി: കൊടുവള്ളി ഇന്‍സ്‌പെക്ടര്‍ പി ചന്ദ്രമോഹനും ഡി വൈ എസ് പി യുടെ ക്രൈം സ്‌ക്വാഡ് അംഗവും മുക്കം പോലീസ് സ്‌റ്റേഷനിലെ സീനിയര്‍ സിവില്‍ പോലീസ് ഓഫീസറുമായ ഷിബില്‍ ജോസഫിനും മുഖ്യമന്ത്രിയുടെ പോലീസ് മെഡല്‍. സ്വര്‍ണ നഗരിയായ കൊടുവള്ളിയെ ഞെട്ടിച്ച സില്‍സില ജ്വല്ലറി കവര്‍ച്ച ഉള്‍പ്പെടെയുള്ള നിരവധി കേസുകള്‍ക്ക് ദിവസങ്ങള്‍ക്കകം തുമ്പുണ്ടാക്കി പ്രതികളെ അറസ്റ്റ് ചെയ്തതാണ് ഇരുവരെയും അവാര്‍ഡിന് അര്‍ഹരാക്കിയത്. താമരശ്ശേരി സബ് ഡിവിഷനില്‍ കുറ്റാന്വേഷണങ്ങള്‍ക്ക് നേതൃത്വം നല്‍കുന്ന ക്രൈം സ്‌ക്വാഡിനുള്ള അംഗീകാരം കൂടിയാണിത്. 2006 ല്‍ പി ചന്ദ്രമോഹന്‍ കൊടുവള്ളി എസ് ഐ ആയിരിക്കെ കത്തറമ്മല്‍ സ്വദേശി കുഞ്ഞിക്കോയ ഹാജിയെ മകളുടെ മകന്‍ വിഷംകൊടുത്ത് കൊന്ന സംഭവം കൊലപാതകമാണെന്ന് കണ്ടെത്തുകയും മൈനറായ പ്രതിയെ നിമയത്തിന് മുമ്പിലെത്തിച്ച് ഏഴ് വര്‍ഷത്തെ ശിക്ഷ വാങ്ങിക്കൊടുക്കുകയും ചെയ്തു. 2007 ല്‍ കൊടുവള്ളി പാമ്പങ്ങല്‍ കുഞ്ഞിമൂസ ഹാജിയെ പെരിയാംതോട് ബസ് കാത്തിരിപ്പു കേന്ദ്രത്തില്‍ മരിച്ച നിലയില്‍ കണ്ടെത്തിയ സംഭവം കൊലപാതകമാണെന്ന് കണ്ടെത്തുകയും രണ്ട് പേരെ അറസ്റ്റ് ചെയ്യുകയും ചെയ്തു. 2008 ല്‍ നാദാപുരം എസ് ഐ ആയിരിക്കെ ചിയ്യൂര്‍ വട്ടക്കണ്ടി നാരായണി കുത്തേറ്റ് മരിച്ച സംഭവത്തില്‍ പ്രതിയായ ഭര്‍ത്താവ് കണാരനെ അറസ്റ്റ് ചെയ്യാന്‍ കഴിഞ്ഞതും പി ചന്ദ്രമോഹന്റെ അന്വേഷണ മികവായിരുന്നു. കുടുംബശ്രീ യോഗം കഴിഞ്ഞ് മടങ്ങവെ വഴിയില്‍ കുത്തേറ്റ് മരിക്കുകയായിരുന്നു. സാഹചര്യ തെളിവുകളുടെ അഭാവത്തിലാണ് ഭര്‍ത്താവിനെ അറസ്റ്റ് ചെയ്യാനായത്. കൂടാതെ നാദാപുരത്തെ പ്രമാദമായ ടോര്‍ച്ച് ബോംബ് കേസിലും പ്രതികളെ അറസ്റ്റ് ചെയ്തു. കൊടുവള്ളിയില്‍ സര്‍ക്കിള്‍ ഇന്‍സ്‌പെക്ടര്‍ ആയി എത്തിയ ഉടനെയാണ് സ്വര്‍ണ നഗരിയെ ഞെട്ടിച്ച സില്‍സില ജ്വല്ലറി കവര്‍ച്ച നടന്നത്. ബംഗാളിലേക്കും ജാര്‍ഗണ്ഡിലേക്കും കടന്ന പ്രതികളെ മാവോയിസ്റ്റ് കേന്ദ്രത്തിലെത്തി ദിവസങ്ങള്‍ക്കകം കീഴടക്കിയത് ചന്ദ്രമോഹനും സീനിയര്‍ സി പി ഒ ആയ ഷിബില്‍ ജോസഫും ഉള്‍പ്പെടെയുള്ള സംഘമാണ്. താമരശ്ശേരി, കൊടുവള്ളി, തിരുവമ്പാടി, മുക്കം മേഖലകളില്‍ ഷിബില്‍ ജോസഫ് ഉള്‍പ്പെടെയുള്ള സംഘം നടത്തിയ നീക്കത്തില്‍ എല്‍ എസ് ഡി ഉള്‍പ്പെടെയുള്ള പുതുതലമുറ ലഹരി വസ്തുക്കളും കഞ്ചാവുമായി നിരവധി പേരാണ് പിടിയിലായത്. റൂറല്‍ ജില്ലാ പോലീസ് മേധാവിയുടെ നേതൃത്വത്തിലൂള്ള ആന്റി നാര്‍ക്കോട്ടിക് സ്‌ക്വാഡ് അംഗവുമാണ് കൂടത്തായി മൈക്കാവ് സ്വദേശിയായ ഷിബില്‍ ജോസഫ്.
 
തെയ്യപ്പാറയില്‍ സി പി ഐ എം ഓഫീസ് അഗ്നിക്കിരയാക്കി
തെയ്യപ്പാറ: കോടഞ്ചേരി തെയ്യപ്പാറയില്‍ സി പി ഐ എം-എസ് ഡി പി ഐ സംഘര്‍ഷത്തിന് പിന്നാലെ സി പി ഐ എം ഓഫീസ് അഗ്നിക്കിരയാക്കി. ഞായറാഴ്ച പുലര്‍ച്ചെ നാലുമണിയോടെയാണ് തെയ്യപ്പാറ അങ്ങാടിയിലെ ഓഫീസിന് തീ കൊളുത്തിയത്. ഓടിയെത്തിയ നാട്ടുകാര്‍ തീ അണച്ചെങ്കിലും ഓഫീസ് പൂര്‍ണമായും കത്തിനശിച്ചു. യുവതിയുമായുള്ള ബന്ധത്തിന്റെ പേരില്‍ ബുധനാഴ്ച രാത്രിയില്‍ ഡി വൈ എഫ് ഐ പ്രവര്‍ത്തകര്‍ തമ്മിലുണ്ടായ തര്‍ക്കത്തില്‍ എസ് ഡി പി ഐ പ്രവര്‍ത്തകര്‍ ഇടപെട്ടത് കയ്യാങ്കളിയില്‍ കലാശിച്ചിരുന്നു.
 
കാവി നിറത്തിലുള്ള താമര പ്ലക്കാര്‍ഡാക്കി നല്‍കി അംഗന്‍വാടിയില്‍ റിപ്പബ്ലിക് ദിന റാലി
താമരശ്ശേരി: ബി ജെ പി യുടെ ചിഹ്നമായ താമര പ്ലക്കാര്‍ഡ് ആക്കി അംഗന്‍വാടിയില്‍ റിപ്പബ്ലിക് ദിന റാലി നടത്തിയതിനെതിരെ നാട്ടുകാര്‍ രംഗത്ത്. താമരശ്ശേരി തേറ്റാമ്പുറം മലര്‍വാടി അംഗന്‍വാടിയിലാണ് റിപ്പബ്ലിക് ദിനാഘോഷത്തിന്റെ പേരില്‍ പിഞ്ചു വിദ്യാര്‍ത്ഥികളെ കൊണ്ട് താമര പിടിപ്പിച്ചത്.
 
 
 
 

All rights reserved | Website developed and maintained by Zyonz Technologies