17-Feb-2019 (Sun)
 
 
 
താമരശ്ശേരിയില്‍ വീണ്ടും തീക്കളി; കയ്യേലിക്കല്‍ ഡി വൈ എഫ് ഐ ഓഫീസ് അഗ്നിക്കിരയാക്കി
താമരശ്ശേരി: ചെറിയ ഇടവേളക്ക് ശേഷം താമരശ്ശേരിയില്‍ വീണ്ടും തീക്കളി. താമരശ്ശേരി ടൗണിനോട് ചേര്‍ന്നുള്ള കയ്യേലിക്കല്‍ മുക്കില്‍ ഡി വൈ എഫ് ഐ യുടെ ഓഫീസ് അഗ്‌നിക്കിരയാക്കി. ഡി വൈ എഫ് ഐ സംസ്ഥാന സമ്മേളനത്തിന്റെ ഭാഗമായി സ്ഥാപിച്ച സംഘാടക സമിതി ഓഫീസാണ് ശനിയാഴ്ച പുലര്‍ച്ചെ അഗ്‌നിക്കിരയാക്കിയത്. പുലര്‍ച്ചെ 2.15 നായിരുന്നു സംഭവം.
 
കൊടുവള്ളിയെ വിറപ്പിച്ച തെരുവ് നായക്ക് പേ വിഷബാധയുള്ളതായി സ്ഥിരീകരണം
കൊടുവള്ളി: കൊടുവള്ളിയില്‍ നിരവധി വിദ്യാര്‍ത്ഥികളെ അക്രമിച്ച തെരുവ് നായക്ക് പേ വിഷബാധയുള്ളതായി സ്ഥിരീകരണം. നായയുടെ മൃതദേഹം വയനാട് പൂക്കോട് വെറ്റിനറി മെഡിക്കല്‍ കോളേജിലെത്തിച്ച് പോസ്റ്റ് നടത്തിയതിലാണ് നായക്ക് പേ വിഷബാധ ഉണ്ടായിരുന്നതായി സ്ഥിരീകരിച്ചത്. ബുധനാഴ്ച വൈകിട്ട് ആറുമണിയോടെയാണ് കൊടുവള്ളി ടൗണിനോട് ചേര്‍ന്ന പെരിയാംതോട്, വാരിക്കുഴിതാഴം, കരീറ്റിപറമ്പ് പ്രദേശങ്ങളില്‍ ഇരുപതോളം വിദ്യാര്‍്ത്ഥികളെ തെരുവ്‌നായ അക്രമിച്ചത്. രാത്രിയില്‍ നാട്ടുകാര്‍ നാടുനീളെ തിരച്ചില്‍ നടത്തിയെങ്കിലും പിടികൂടാനായിരുന്നില്ല. വ്യാഴാഴ്ച പുലര്‍ച്ചെ മൂന്നരയോടെ കരുവന്‍പൊയില്‍ വാരിയംവീട് മൂസ മുസ്ലിയാരുടെ വീട്ടുപരിസരത്തുനിന്നും നായക്കൂട്ടത്തിന്റെ ബഹളം കേട്ടിരുന്നു. നാലുമണിയോടെ ഒരു നായയെ കിണറ്റില്‍ വീണ നിലയില്‍ കണ്ടെത്തുകയും രാവിലെ പുറത്തെടുക്കുകയുമായിരുന്നു. അല്‍പ്പ സമയത്തിനകം ചത്ത നായയുടെ മൃതദേഹം പൊതു പ്രവര്‍ത്തകനായ മാതോലത്ത് സിദ്ദീഖിന്റെ നേതൃത്വത്തില്‍ പോസ്റ്റ്‌മോര്‍ട്ടത്തിനായി വയനാട്ടില്‍ എത്തിക്കുകയായിരുന്നു. വെള്ളിയാഴ്ച ലഭിച്ച പോസ്റ്റ്‌മോര്‍ട്ടം റിപ്പോര്‍ട്ടിലാണ് നായക്ക് പേ വിഷബാധയുള്ളതായി സ്ഥിരീകരിച്ചത്. മറ്റു ജീവികളുമായ ഈ നായ കടികൂടിയതിനാല്‍ തെരുവ് നായ്ക്കള്‍, പൂച്ച, വളര്‍ത്തു ജീവികള്‍ എന്നിവയെ സൂക്ഷിക്കണമെന്നും നാട്ടുകാര്‍ ജാഗ്രത പാലിക്കണമെന്നും അധികൃതര്‍ മുന്നറിയിപ്പു നല്‍കി.
 
പന്നൂര്‍ നരിക്കുനി പുന്നശ്ശേരി റോഡ് നവീകരണത്തിന് 7 കോടി രൂപയുടെ ഭരണാനുമതി
കൊടുവള്ളി: കൊടുവള്ളി മണ്ഡലത്തിലെ കിഴക്കോത്ത്, നരിക്കുനി പഞ്ചായത്തുകളിലൂടെ കടന്നു പോകുന്ന പ്രധാന റോഡായ പന്നൂര്‍ നരിക്കുനി പുന്നശ്ശേരി റോഡ് ആധുനിക രീതിയില്‍ നവീകരിക്കുന്നതിനു വേണ്ടി സംസ്ഥാന സര്‍ക്കാര്‍ അനുവദിച്ച ഏഴ് കോടി രൂപയുടെ ഭരണാനുമതി ലഭിച്ചതായി കാരാട്ട് റസാഖ് എം എല്‍ എ അറിയിച്ചു. നവീന രീതിയിലുള്ള ബി എം ബി സി ടാറിംഗും െ്രെഡനേജ് സംവിധാനവും നടപ്പാതകളില്‍ ടൈല്‍ വിരിക്കലും കൈവരിസ്ഥാപിക്കലും നവീകരണത്തിന്റെ ഭാഗമായി ചെയ്യും. പൊതുമരാമത്ത് വകുപ്പ് ഈ റോഡ് ഏറ്റെടുത്തതിനു ശേഷം ആദ്യമായാണ് ഇത്രയും വലിയ തുക അനുവദിച്ച് നവീകരണ പ്രവൃത്തി നടക്കുന്നത്. സാങ്കേതിക അനുമതി ലഭിക്കുന്ന മുറക്ക് എത്രയും പെട്ടെന്ന് ടെണ്ടര്‍ നടപടികള്‍ പൂര്‍ത്തിയാക്കി നവീകരണ പ്രവൃത്തികള്‍ ആരംഭിക്കുന്നതാണെന്നും എം എല്‍ എ അറിയിച്ചു.
 
കോഴിക്കോട്: ജില്ലയിലെ തൊഴിലുറപ്പ് പദ്ധതിയെ സമഗ്രമായ വികസനത്തിന് ഉപകരിക്കത്തക്ക രീതിയിലായിരിക്കണം ആവിഷ്‌ക്കരിക്കേണ്ടതെന്ന് ജില്ലാ പഞ്ചായത്ത് പ്രസിഡണ്ട് ബാബു പറശ്ശേരി പറഞ്ഞു. ജില്ലാപഞ്ചായത്ത് കോണ്‍ഫറന്‍സ് ഹാളില്‍ ബോര്‍ഡ് മീറ്റിംഗില്‍ സംസാരിക്കുകയായിരുന്നു അദ്ദേഹം. ഗ്രാമ പ്രദേശത്തിന്റെ സമഗ്ര വികസനത്തിന് സാധ്യതയുള്ളതാണ് തൊഴിലുറപ്പ് പദ്ധതി. അതിനനുസരിച്ച് പദ്ധതികള്‍ ഉയര്‍ന്ന് വരുന്നതിന് വേണ്ടി ഓരോ പഞ്ചായത്തിലും നടപ്പിലാക്കാനാവശ്യമായ നിര്‍ദേശങ്ങള്‍ തയ്യാറാക്കാന്‍ ജില്ലാ പഞ്ചായത്ത് മെമ്പര്‍മാരോട് പ്രസിഡണ്ട് ആവശ്യപ്പെട്ടു. ജില്ലയിലെ ഭിന്നശേഷിക്കാര്‍ക്കുള്ള സ്‌കോളര്‍ഷിപ്പിനുള്ള ജില്ലാ പഞ്ചായത്ത് വിഹിതം പൂര്‍ണമായി വകയിരുത്താനും ഗ്രാമപഞ്ചായത്ത് അടങ്കല്‍ തുകയ്ക്കനുസരിച്ച് നല്‍കാനും തീരുമാനിച്ചു. ജില്ലയില്‍ നടപ്പിലാക്കുന്ന കുടി വെള്ള പദ്ധതികളുടെ നിലവിലുള്ള അവസ്ഥ പരിശോധിച്ച് വരള്‍ച്ചയ്ക്ക് മുമ്പേ പ്രവര്‍ത്തനങ്ങള്‍ പൂര്‍ത്തീകരിക്കാന്‍ നടപടി സ്വീകരിക്കണം. സംസ്ഥാന കേന്ദ്രാവിഷ്‌കൃത പദ്ധതികള്‍ കൂടി തദ്ദേശ സ്വയംഭരണ സ്ഥാപനങ്ങള്‍ മുഖേന നടപ്പിലാക്കുന്ന സാഹചര്യമുണ്ടാകണം. ജനകീയാസൂത്രണ പദ്ധതി പ്രവര്‍ത്തനം 2019 ഫിബ്രവരി 15 നകം നിര്‍വഹണം പൂര്‍ത്തിയാക്കാനും യോഗം തീരുമാനിച്ചു. ചെങ്ങോട്ടുകാവില്‍ സ്ഥാപിച്ച ആശ്രയ വയോജന കേന്ദ്രത്തിന്റെ തുടര്‍ പ്രവര്‍ത്തനത്തിന് ജില്ലാ പഞ്ചായത്ത് പ്രസിഡണ്ട് ചെയര്‍മാനും സെക്രട്ടറി കണ്‍വീനറുമായി കമ്മിറ്റി രൂപീകരിച്ചു. ഇലക്ട്രിക്കല്‍ വര്‍ക്കുകളുടെ നിരവധി പ്രവര്‍ത്തികള്‍ നിലനില്‍ക്കുമ്പോള്‍ പി ഡബ്ല്യു ഡി ഇലക്ട്രിക്കല്‍ വിങ്ങിന് എസ്റ്റിമേറ്റുകള്‍ തയ്യാറാക്കിതരാന്‍ കഴിയുന്നില്ല. വടകര ജില്ലാ ആശുപത്രിയില്‍ ട്രാന്‍സ്ഫോര്‍മര്‍ സ്ഥാപിക്കാനും സ്‌കൂളുകളില്‍ ഐ.ടി സംവിധാനത്തിനുള്ള വയറിംഗ് അടക്കമുള്ള പ്രവര്‍ത്തിയുടെയും എസ്റ്റിമേറ്റുകള്‍ ലഭിക്കാതെ പ്രവര്‍ത്തികള്‍ തുടര്‍ന്ന് നടത്താന്‍ കഴിയാത്ത സാഹചര്യമാണുള്ളത്. റിട്ടയര്‍ ചെയ്ത എഞ്ചിനീയര്‍മാരുടെ പാനല്‍ തയ്യാറാക്കാന്‍ അപേക്ഷ ക്ഷണിച്ചിട്ടും അപേക്ഷകരുടെ ലഭ്യതക്കുറവുണ്ട്്. ഈ സാഹചര്യത്തില്‍ ബി ടെക് കഴിഞ്ഞവരുടെ ഒരു പാനല്‍ തയ്യാറാക്കി പദ്ധതി നിര്‍വഹണം നടത്താന്‍ ആവശ്യമായ നടപടി സ്വീകരിക്കണമെന്ന് യോഗം ആവശ്യപ്പെട്ടു. യോഗത്തില്‍ വൈസ് പ്രസി. റീന മുണ്ടേങ്ങാട്ട്, സെക്രട്ടറി പി ഡി ഫിലിപ്പ്, ആരോഗ്യ വിദ്യഭ്യാസ സ്റ്റാന്‍ഡിംഗ് കമ്മിറ്റി ചെയര്‍മാന്‍ മുക്കം മുഹമ്മദ്, ക്ഷേമകാര്യ സ്റ്റാന്‍ഡിംഗ് കമ്മിറ്റി ചെയര്‍പേഴ്സണ്‍ സുജാത മനക്കല്‍, പൊതുമരാമത്ത് സ്റ്റാന്‍ഡിംഗ് കമ്മിറ്റി ചെയര്‍പേഴ്സണ്‍ പി കെ സജിത, വിവിധ ജനപ്രതിനിധികള്‍, വകുപ്പ്തല ഉദ്യോഗസ്ഥര്‍ എന്നിവര്‍ പങ്കെടുത്തു.
 
കോളനികളുടെ വികസന പ്രവര്‍ത്തനങ്ങള്‍ വേഗത്തിലാക്കാന്‍ നടപടി
കുന്ദമംഗലം: കുന്ദമംഗലം നിയോജകമണ്ഡലത്തിലെ കോളനികളുടെ വികസന പ്രവര്‍ത്തനങ്ങള്‍ വേഗത്തിലാക്കാന്‍ പി ടി എ റഹീം എം എല്‍ എ വിളിച്ചു ചേര്‍ത്ത യോഗത്തില്‍ നടപടിയായി. സ്വയംപര്യാപ്ത ഗ്രാമം പദ്ധതിയില്‍ ഒരു കോടി രൂപ വീതം അനുവദിച്ച ചാത്തമംഗലം ഗ്രാമപഞ്ചായത്തിലെ വല്ലക്കണ്ടി, പുളിക്കുഴി, മാവൂര്‍ ഗ്രാമപഞ്ചായത്തിലെ അടുവാട്, കോട്ടക്കുന്ന് കോളനികളുടെ അനുമതി ലഭിച്ച പ്രവൃത്തികള്‍ പൂര്‍ത്തീകരിച്ചതായി നിര്‍വ്വഹണ ഏജന്‍സിയായ സിഡ്കോ റിപ്പോര്‍ട്ട് ചെയ്തു. അംബേദ്കര്‍ ഗ്രാമവികസന പദ്ധതിയില്‍ ഉള്‍പ്പെടുത്തി ഒരു കോടി രൂപ വീതം അനുവദിച്ച ചാത്തമംഗലം ഗ്രാമപഞ്ചായത്തിലെ എ കെ ജി കോളനി, കുന്ദമംഗലം ഗ്രാമപഞ്ചായത്തിലെ ആമ്പ്രമ്മല്‍ എന്നിവയുടെ പ്രവൃത്തികള്‍ പുരോഗമിക്കുന്നു. പുതുതായി അനുമതി ലഭിച്ച പെരുവയല്‍ ഗ്രാമപഞ്ചായത്തിലെ ഭൂദാനം കോളനിയുടെ പ്രവൃത്തികള്‍ സംബന്ധിച്ച് കോളനി പ്രതിനിധികളുടെ സാന്നിദ്ധ്യത്തില്‍ പരിശോധിച്ച് നടപടികള്‍ സ്വീകരിക്കാന്‍ നിര്‍മ്മിതി കേന്ദ്രയെ ചുമതലപ്പെടുത്തി. സമയബന്ധിതമായി പ്രവൃത്തികള്‍ പൂര്‍ത്തീകരിക്കുന്നതിന് മേല്‍നോട്ടം വഹിക്കാന്‍ പട്ടികജാതി വികസന ഓഫീസര്‍ക്ക് എം എല്‍ എ നിര്‍ദ്ദേശം നല്‍കി. ഗ്രാമപഞ്ചായത്ത് മെമ്പര്‍മാരായ എ കെ ഷൗക്കത്ത്, കെ എം സാമി, സിഡ്കോ പ്രതിനിധികളായ എം ജംഷീദ് അലി, പി അന്‍വര്‍, നിര്‍മ്മിതി കേന്ദ്ര പ്രതിനിധികളായ കെ സുബിന്‍, ടി രാജേഷ്, വിവിധ കോളനി കണ്‍വീനര്‍മാര്‍ എന്നിവര്‍ സംസാരിച്ചു. പട്ടികജാതി വികസന ഓഫീസര്‍ ടി എം മുകേഷ് സ്വാഗതവും എസ് സി കോഓര്‍ഡിനേറ്റര്‍ എം രവീന്ദ്രന്‍ നന്ദിയും പറഞ്ഞു.
 
തടിപാലത്തില്‍ കുടുങ്ങി കാല്‍നടയാത്ര: പ്രക്ഷോഭത്തിനൊരുങ്ങി നാട്ടുകാര്‍
ഈങ്ങാപ്പുഴ: പുതുപ്പാടി ഗ്രാമപഞ്ചായത്തിലെ പതിനെട്ടാം വാര്‍ഡില്‍പെട്ട കാര്‍ഷിക വിപണനകേന്ദ്രം നടുക്കുന്ന് റോഡിന്റെ അവസാന ഭാഗത്ത് കലുങ്ക് നിര്‍മിക്കാത്തത് കാരണം കാല്‍നടയാത്ര പോലും ദുസഹമായിരിക്കുകയാണ്. 250 മീറ്റര്‍ നീളമുള്ള റോഡിന്റെ 100 മീറ്റര്‍ വരുന്ന ഭാഗം കോണ്‍ക്രീറ്റ് ചെയ്ത് പൂര്‍ണ ഗതാഗത യോഗ്യമാക്കിയിട്ടുണ്ട്. കലുങ്ക് പണിയും കൂടി പൂര്‍ത്തികരിച്ച് ഈ ഭാഗം ഗതാഗത യോഗ്യമാക്കിയാല്‍ പറശേരി ഭാഗത്തുള്ള അഞ്ഞൂറോളം കുടുംബങ്ങള്‍ക്ക് എളുപ്പത്തില്‍ ഈങ്ങാപ്പുഴയിലേക്ക് എത്തിചേരാന്‍ സാധിക്കും. കലുങ്കിന്റെ സ്ഥാനത്ത് ഇപ്പോഴുള്ളത് കാലപഴക്കം ചെന്ന തെങ്ങിന്റെ തടി ഉപയോഗിച്ചുള്ള നടപാലമാണ്. രാവിലെയും വൈകുന്നേരവും ഗവ. ഹൈസ്‌കൂളിലേക്കും എം ജി എം ഹൈസ്‌കൂളിലേക്കുമുള്ള നൂറുകണക്കിന് വിദ്യാര്‍ത്ഥികളാണ് ഇതിലൂടെ കടന്നു പോകുന്നത്. കഴിഞ്ഞ മഴക്കാലത്ത് ഒരു സ്‌കൂള്‍ വിദ്യാര്‍ത്ഥിയും, നാട്ടുകാരിലൊരാളും നടപാലത്തില്‍ നിന്നും വീണ് അപകടം സംഭവിച്ചിട്ടുണ്ട്. മഴക്കാലമായാല്‍ മറ്റു റോഡുകളെ ആശ്രയിക്കേണ്ട ഗതികേടിലാണ് നാട്ടുകാര്‍. കാലങ്ങളായി നാട്ടുകാര്‍ ഈ ആവശ്യം നിരവധി തവണ ഗ്രാമസഭയിലും ഗ്രാമപഞ്ചായത്തിലും ഉന്നയിച്ചെങ്കിലും ഇത് വരെ പരിഹാരമായിട്ടില്ല. 2019-20 സാമ്പത്തിക വര്‍ഷത്തിലെ പദ്ധതിയിലും ഗ്രാമപഞ്ചായത്ത് തുക വകയിരുത്തിയിട്ടില്ലെങ്കില്‍ ശക്തമായ ജനകീയ പ്രക്ഷോഭത്തിന് തയ്യാറെടുക്കുകയാണ് നാട്ടുകാര്‍. കലുങ്ക് പണി പൂര്‍ത്തീകരിച്ച് റോഡ് ഗതാഗത യോഗ്യമാക്കണമെന്ന് സി എം പി പഞ്ചായത്ത് കമ്മിറ്റി ആവശ്യപ്പെട്ടു. യോഗത്തില്‍ ഏരിയ സെക്രട്ടറി പി എം രാജന്‍ അദ്ധ്യക്ഷത വഹിച്ചു. ബാബു പീറ്റര്‍, ബിജോഷ്,ശോശാമ്മ വര്‍ഗീസ്, സീത,എന്നിവര്‍ സംസാരിച്ചു.
 
സഹജീവികള്‍ക്ക് സ്‌നേഹം പകരാന്‍ തലമുടി മുറിച്ചു നല്‍കി ഒരുകൂട്ടം വ്യാര്‍ത്ഥിനികളും രക്ഷിതാക്കളും
നെല്ലിപ്പൊയില്‍: സഹജീവികള്‍ക്ക് സ്‌നേഹം പകരാന്‍ തലമുടി മുറിച്ചു നല്‍കിയ വിദ്യാര്‍ത്ഥിനികള്‍ മലയോരത്തിന്റെ അഭിമാനമായി മാറിയിരിക്കുകയാണ്. കോടഞ്ചേരി നെല്ലിപ്പൊയില്‍ സെന്റ് ജോണ്‍സ് ഹൈസ്‌കൂളിലെ 30 വ്യാര്‍ത്ഥിനികളും രക്ഷിതാക്കളുമാണ് പൊന്നുപോലെ സൂക്ഷിച്ച തലമുടി കാന്‍സര്‍ രോഗികള്‍ക്ക് ദാനം ചെയ്തത്. സ്‌കൂളിലെ നൂറുപേര്‍ കേശദാനത്തിന് സന്നദ്ധത അറിയിച്ചെങ്കിലും 12 ഇഞ്ച് മുടി ഉള്ളവരെ മാത്രമേ പരിഗണിക്കാനാവൂ എന്ന നിബന്ധനയുള്ളതിനാല്‍ 30 പേര്‍ക്കു മാത്രമാണ് അവസരം ലഭിച്ചത്. തൃശ്ശൂര്‍ അമല കാന്‍സര്‍ സെന്ററിലെ രോഗികള്‍ക്ക് വിഗ് നിര്‍മിച്ചു നല്‍കാന്‍ മുടി ആവശ്യമാണെന്ന വിവരം അറിഞ്ഞാണ് ഇവര്‍ സഹജീവികളുടെ കണ്ണീരൊപ്പാന്‍ കണ്ണിലെ കൃഷ്ണ മണികളെ പോലെ സൂക്ഷിച്ചിരുന്ന മുടി മുറിച്ചു നല്‍കിയത്. കാന്‍സര്‍ ബാധിച്ച് മുടി നഷ്ടപ്പെട്ട മാതാവ് തന്റെ മകളുടെ കേശം സ്വന്തം കരങ്ങളാല്‍ മുറിച്ചു നല്‍കിയപ്പോള്‍ കണ്ട് നിന്നവരുടെ കണ്ണുകള്‍ ഈറനണിഞ്ഞു. വട്ടച്ചിറ സ്വദേശിനിയായ മേരിയാണ് പത്താം ക്ലാസ് വിദ്യാര്‍്ത്ഥിനിയായ മകള്‍ പ്രിന്‍സിയുടെ മുടി മുറിച്ചു നല്‍കി കാരുണ്യത്തിന്റെ സന്ദേശം നല്‍കിയത്. ഒരു വര്‍ഷമായി കാന്‍സര്‍ പിടിപെട്ട് ചികിത്സ തേടുന്ന മേരി 5 തവണ കീമോതെറാപ്പിയും 30 തവണ റേഡിയേഷനും വിധേയയായതോടെ മുടി ഇല്ലാതായി. അമ്മയുടെ പ്രയാസം മനസ്സിലാക്കിയ പ്രിന്‍സി തന്റെ മുടി അമ്മക്ക് നല്‍കാന്‍ തയ്യാറായെങ്കിലും അത് ഉപയോഗിക്കാന്‍ മേരിക്ക് കഴിയില്ലെന്ന വസ്തുത അവളെ പ്രയാസത്തിലാക്കി. ഇതിന്നിടയിലാണ് കാന്‍സര്‍ രോഗികള്‍ക്ക് കേശദാനം നടത്തേണ്ടതിന്റെ ആവശ്യഗത അധ്യാപകര്‍ വിശദീകരിച്ചത്. തന്റെ കേശം ദാനം ചെയ്യുന്ന വിവരം പ്രിന്‍സി അറിയിച്ചതോടെ മാതാവിന് അളവറ്റ സന്തോഷം. വരും വര്‍ഷങ്ങളിലും കേശദാനം സംഘടിപ്പിക്കുമെന്ന് പ്രധാനാധ്യാപകന്‍ സജി തോമസ് പറഞ്ഞു. ആവശ്യമില്ലാത്ത വസ്തുക്കള്‍ വലിച്ചെറിയാന്‍ സ്ഥലമില്ലാതെ വരുമ്പോള്‍ മറ്റുള്ളവര്‍ക്ക് ദാനം ചെയ്യുന്ന കാലത്താണ് ജീവനോളം സ്‌നേഹിക്കുന്ന കേശം പകുത്തുനല്‍കി ഇവര്‍ സഹജീവികള്‍ക്ക് കാരുണ്യസ്പര്‍ശമേകിയത്.
 
തെരുവ് നായ അക്രമം: കൊടുവള്ളിയില്‍ ഇരുപതോളം വിദ്യാര്‍ത്ഥികള്‍ക്ക് പരുക്ക്
കൊടുവള്ളി: കൊടുവള്ളിയില്‍ തെരുവ് നായയുടെ കടിയേറ്റ് ഇരുപതോളം വിദ്യാര്‍ത്ഥികള്‍ക്ക് പരുക്ക്. ബുധനാഴ്ച വൈകിട്ട് ആറരയോടെയാണ് കൊടുവള്ളി ടൗണിനോട് ചേര്‍ന്ന പെരിയാംതോട്, മുക്കിലങ്ങാടി, കരീറ്റിപ്പറമ്പ് പ്രദേശങ്ങളില്‍ തെരുവ് നായ ഭീതി പരത്തിയത്. പെരിയാംതോട് ചെറ്റയില്‍ അനീസിന്റെ മകന്‍ ഹാദി, മുക്കിലങ്ങാടി പാണോലത്ത് സെയ്ദിന്റെ മകള്‍ ഫാത്തിമ നൂറ, കരീറ്റിപ്പറമ്പ് ഡിവിഷന്‍ കൗണ്‍സിലര്‍ യു വി ഷാഹിദിന്റെ മകന്‍ ശെസിന്‍ ഷാ തുടങ്ങിയ ഇരുപതോളം വിദ്യാര്‍ത്ഥികള്‍ക്ക് തെരുവ് നായയുടെ കടിയേറ്റു. വീട്ടുമുറ്റത്ത് കളിക്കുന്ന കുട്ടികളും റോഡിലൂടെ നടന്നു പോവുന്നവരുമാണ് തെരുവ് നായയുടെ അക്രമത്തിനിരയായത്. പേടിച്ച് ഓടുന്നതിനിടെ നിലത്ത് വീണ വിദ്യാര്‍ത്ഥികളെ നായ വീണ്ടും കടിച്ച് പറിച്ചു. നാട്ടുകാര്‍ ഓടിയെത്തിയതിനാലാണ് പലരും രക്ഷപ്പെട്ടത്. പരുക്കേറ്റ വിദ്യാര്‍ത്ഥികള്‍ കോഴിക്കോട് മെഡിക്കല്‍ കോളേജ് ആശുപത്രിയില്‍ ചികിത്സ തേടി. നായയെ പിടികൂടാന്‍ രാത്രി മുഴുവന്‍ നാട്ടുകാര്‍ തിരച്ചില്‍ നടത്തിയെങ്കിലും കണ്ടെത്താനായില്ല. പുലര്‍ച്ചെ മൂന്നരയോടെ കരുവന്‍പൊയിലിലെ വീട്ടുമുറ്റത്ത് നിന്നും തെരുവ് നായ്ക്കള്‍ കലഹിക്കുന്ന ശബ്ദം കേട്ട് നാട്ടുകാര്‍ ഉണര്‍ന്നപ്പോള്‍ ഒരു നായ കിണറ്റില്‍ വീണ നിലയിലായിരുന്നു. രാവിലെ പുറത്തെടുത്ത് പരിശോധിച്ചപ്പോഴാണ് അക്രമം നടത്തിയ തെരുവ് നായയാണ് കിണറ്റില്‍ അകപ്പെട്ടതെന്ന് മനസ്സിലാക്കിയത്. കരക്കെത്തിച്ച നായയെ വെറ്റിനറി സര്‍ജന്‍ പരിശോധിച്ചെങ്കിലും അള്‍പ്പ സമയത്തിനകം ചത്തു. തുടര്‍ന്ന് വിദഗ്ദ പരിശോധനക്കായി വയനാട് ലക്കിടിയിലെ വൈറ്റിനറി മെഡിക്കല്‍ കോളേജിലേക്കുമാറ്റി.
 
പുതുപ്പാടി ഉപതിരഞ്ഞെടുപ്പ്: എല്‍ ഡി എഫ് സ്ഥാനാര്‍ത്ഥി പി ആര്‍ രാകേഷ്
പുതുപ്പാടി: പുതുപ്പാടിയില്‍ എസ് സി സംവരണമായ പ്രസിഡന്റ് സ്ഥാനം പിടിച്ചെടുക്കാന്‍ എല്‍ ഡി എഫ് രംഗത്തിറക്കിയത് പട്ടികജാതി ക്ഷേമസമിതി നേതാവിനെ. സി പി ഐ എം വെസ്റ്റ് കൈതപ്പൊയില്‍ ബ്രാഞ്ച് സെക്രട്ടറിയും പട്ടികജാതി ക്ഷേമസമിതി പുതുപ്പാടി മേഖല സെക്രട്ടറിയുമായ പി ആര്‍ രാകേഷിനെയാണ് ഒമ്പതാം വാര്‍ഡില്‍ നടക്കുന്ന ഉപതിരഞ്ഞെടുപ്പില്‍ കളത്തിലിറക്കിയത്. പ്രസിഡന്റ് സ്ഥാനം എസ് സി സംവരണമായ പുതുപ്പാടിയില്‍ ഭൂരിപക്ഷം ലഭിച്ചെങ്കിലും പ്രസിഡന്റ് സ്ഥാനം എല്‍ ഡി എഫിന് നഷ്ടപ്പെട്ടിരുന്നു. ഇത് തിരിച്ച് പിടിക്കുന്നതിന്നായാണ് വെസ്റ്റ് കൈതപ്പൊയിലില്‍ നിന്നും തിരഞ്ഞെടുക്കപ്പെട്ട എല്‍ ഡി എഫ് അംഗം കെ പി ഷൈജല്‍ രാജിവെച്ചത്. 183 വോട്ടിന് കഴിഞ്ഞ തിരഞ്ഞെടുപ്പില്‍ വിജയിച്ച വാര്‍ഡില്‍ പ്രസിഡന്റ് സ്ഥാനാര്‍ത്ഥിക്ക് തിളക്കമാര്‍ന്ന വിജയം കൈവരിക്കാനാവുമെന്നാണ് എല്‍ ഡി എഫ് പ്രതീക്ഷിക്കുന്നത്. വെസ്റ്റ് കൈതപ്പൊയിലില്‍ നടന്ന തിരഞ്ഞെടുപ്പ് കണ്‍വന്‍ഷന്‍ സി പി ഐ എം ജില്ലാ സെക്രട്ടറി പി മോഹനന്‍ മാസ്റ്റര്‍ ഉദ്ഘാടനം ചെയ്തു. ടി എം പൗലോസ് അധ്യക്ഷത വഹിച്ചു. തിരഞ്ഞെടുപ്പ് കമ്മിറ്റി ഓഫീസ് ഉദ്ഘാടനവും സ്ഥാനാര്‍ത്ഥി പ്രഖ്യാപനവും ജോര്‍ജ് എം തോമസ് എം എല്‍ എ നിര്‍വ്വഹിച്ചു. ആര്‍ പി ഭാസ്‌കരന്‍, ഗിരീഷ് ജോണ്‍, കുട്ടിയമ്മ മാണി, ടി കെ നാസര്‍, ശിഹാബ് അടിവാരം, ഗഫൂര്‍ അമ്പുടു തുടങ്ങിയവര്‍ സംസാരിച്ചു.
 
നിയമസഭ ലോക്കല്‍ഫണ്ട് അക്കൗണ്ട്സ് കമ്മിറ്റി സിറ്റിംഗ് നടത്തി
കോഴിക്കോട്: നിയമസഭ ലോക്കല്‍ഫണ്ട് അക്കൗണ്ട്സ് കമ്മിറ്റി ചെയര്‍മാന്‍ കെ സുരേഷ് കുറുപ്പ് എം എല്‍ എയുടെ നേതൃത്വത്തില്‍ കലക്ട്രേറ്റ് കോണ്‍ഫറന്‍സ് ഹാളില്‍ രണ്ട് ദിവസമായി നടന്ന സിറ്റിംഗ് സമാപിച്ചു. 2002-03 മുതല്‍ 2014-15 വരെയുള്ള കോഴിക്കോട് ജില്ലയിലെ ഗ്രാമ നഗര ബ്ലോക്ക് ജില്ലാ പഞ്ചായത്തുകളെ സംബന്ധിച്ച് ലോക്കല്‍ഫണ്ട് ഓഡിറ്റ് ഡയറക്ടറുടെ റിപ്പോര്‍ട്ടിന്‍മേലുള്ള ഓഡിറ്റ് പരാമര്‍ശങ്ങള്‍ പരിശോധിക്കുകയും തുടര്‍ നടപടികള്‍ക്കായി പഞ്ചായത്തുകള്‍ക്കും സര്‍ക്കാറിനും നിര്‍ദേശങ്ങള്‍ നല്‍കുകയും ചെയ്തു. ജില്ലയിലെ വ്യവസായ കേന്ദ്രങ്ങളുമായി ബന്ധപ്പെട്ട കാര്യങ്ങള്‍, സെന്‍ട്രല്‍ മാര്‍ക്കറ്റിലെ ബയോഗ്യാസ് പ്രവര്‍ത്തനങ്ങള്‍, നഗര സഭകളിലെ മാലിന്യ പ്രശ്നങ്ങള്‍, ചേരി നിര്‍മാര്‍ജനം, പൊതു ടാപ്പുകളുടെ ഉപയോഗം, ഇന്ദിര വികാസ് പത്രികയുമായി ബന്ധപ്പട്ടവ തുടങ്ങി 300 ഓളം ഖണ്ഡികകളാണ് പരിശോധന നടത്തിയത്. ആദ്യമായിട്ടാണ് തുടര്‍ച്ചയായി രണ്ട് ദിവസം കൂടിശ്ശിക ഓഡിറ്റ് പരിശോധിക്കുന്നത്. ഓഡിറ്റിലെ ന്യൂനതകള്‍ പരിഹരിക്കുന്നതിനാവശ്യമായ നിര്‍ദേശങ്ങള്‍ വകുപ്പ് തല ഉദ്യോഗസ്ഥന്‍മാര്‍ക്ക് സിറ്റിംഗില്‍ നല്‍കി. എം എല്‍ എമാരായ ഡോ. എം കെ മുനീര്‍, വി കെ സി മമ്മദ്കോയ, ടി എ അഹമ്മദ് കബീര്‍, ഓഡിറ്റ് വകുപ്പ് ഡയറക്ടര്‍ ഡി സാങ്കി, നിയമസഭ സെക്രട്ടറിയേറ്റിലെ തോമസ്, തദ്ദേശസ്വയംഭരണ വകുപ്പ് അഡീഷണല്‍ സെക്രട്ടറി വത്സല തുടങ്ങിയവര്‍ പങ്കെടുത്തു.
 
 
 
 

All rights reserved | Website developed and maintained by Zyonz Technologies