22-Apr-2018 (Sun)
 
 
 
 
‍വിദ്യാര്‍ത്ഥികളുടെ ഉച്ചക്കഞ്ഞിയില്‍ അധ്യാപകര്‍ കയ്യിട്ടുവാരി; പ്രധാനാധ്യാപകന് സസ്‌പെന്‍ഷന്‍
   
vps
12-Jun-2015
 

ഈങ്ങാപ്പുഴ: വിദ്യാര്‍ത്ഥികള്‍ക്ക് ഉച്ചകഞ്ഞിക്കുള്ള അരി ഏതാനും അധ്യാപകരും ജീവനക്കാരും ചേര്‍ന്ന് കടത്തികൊണ്ടുപോയി. ഈങ്ങാപ്പുഴ എം ജി എം ഹൈസ്‌കൂളില്‍നിന്നാണ് 45 ചാക്ക് അരി ലോറിയില്‍ കയറ്റികൊണ്ടുപോയത്. നാട്ടുകാരുടെ പരാതിയെതുടര്‍ന്ന് നടന്ന അന്വേഷണത്തില്‍ പ്രധാനാധ്യാപകന്‍ വി ഇ ജോണിനെ സസ്‌പെന്റ് ചെയ്തു. ലോറിയില്‍ അരികയറ്റുന്നത് ശ്രദ്ദയില്‍പെട്ട നാട്ടുകാര്‍ വിവരം അന്വേഷിച്ചപ്പോള്‍ പുഴുവരിച്ച അരി മാവേലിസ്‌റ്റോറിലേക്ക് കൊണ്ടുപോവുകയാണെന്നായിരുന്നു സ്‌കൂള്‍ അധികൃതരുടെ മറുപടി. സ്‌കൂളില്‍ സൂക്ഷിച്ച് പുഴുവരിച്ച അരി മാവേലി സ്റ്റോറില്‍ സ്വീകരിക്കാനോ പകരം നല്‍കാനോ മാവേലി സ്‌റ്റോറില്‍ സംവിധാനമില്ലെന്നിരിക്കെയാണ് നാട്ടുകാരെ കബളിപ്പിച്ച് അരി കടത്തിയത്. അരി കടത്തിയത് സംബന്ധിച്ച് അറിയില്ലെന്നും കോട്ടയത്തായതിനാല്‍ ഡെപ്യൂട്ടി എച് എമ്മിനാണ് ചുമതലയെന്നുമാണ് പ്രധാനാധ്യാപകന്‍ വി ഇ ജോണ്‍ പ്രതികരിച്ചത്. എന്നാല്‍ സ്റ്റോര്‍ റൂം ശുചീകരിക്കാന്‍ ജീവനക്കാരനോട് ആവശ്യപ്പെട്ടതല്ലാതെ അരി കടത്തികൊണ്ടുപോവാന്‍ ആരെയും ചുമതലപ്പെടുത്തിയിട്ടില്ലെന്നായിരുന്നു ഡെപ്യൂട്ടി എച് എം ആന്‍സിയുടെ പ്രതികരണം. എത്ര ചാക്ക് അകരിയാണ് കേടായതെന്നോ ഇത് എവിടേക്കാണ് മാറ്റിയതെന്നോ അറിയില്ലെന്നും പ്രധാനാധ്യാപകന്റെ ചുമതല തന്നെ ഏല്‍പ്പിച്ചിട്ടില്ലെന്നും അവര്‍ പറഞ്ഞു. വിദ്യാഭ്യാസ ഉപ ഡയറക്ടറുടെ നിര്‍ദ്ദേശപ്രകാരം താമരശ്ശേരി ഡി ഇ ഒ യുടെ ചുമതലയുള്ള ഓഫീസ് പേഴ്‌സണല്‍ അസിസ്റ്റന്റ് അഹമ്മദ്‌കോയ, താമരശ്ശേരി എ ഇ ഒ അബ്ദുല്‍ മജീദ് എന്നിവരുടെ നേതത്വത്തില്‍ സ്‌കൂളിലെത്തി നടത്തിയ പരിശോധനയിലാണ് പ്രധാനാധ്യാപകന്‍ കുറ്റക്കാരനാണെന്ന് കണ്ടെത്തിയത്. സംഭവം സംബന്ധിച്ച് വിശദമായ അന്വേഷണം നടത്തുമെന്നും ഉദ്യോഗസ്ഥര്‍ പറഞ്ഞു. പുതിയ അധ്യയന വര്‍ഷത്തേക്ക് അനുവധിച്ച അരി ഉച്ചയോടെ സ്‌കൂളിലെത്തിച്ചിട്ടുണ്ട്. അരി കടത്തിയത് വിവാദമായതോടെ മറ്റൊരു മുറിയിലേക്ക് മാറ്റിയതാണെന്ന് വരുത്തി തീര്‍ക്കാനും ശ്രമം നടക്കുന്നുണ്ട്. പുതിയ അധ്യയന വര്‍ഷത്തിന്റെ ഭാഗമായി ഡി ഇ ഒ ഓഫീസ് പി എ അഹമ്മദ്‌കോയയുടെ നേതൃത്വത്തില്‍ നടത്തിയ പരിശോധനയില്‍ പാചകപ്പുര വൃത്തിഹീനമാണെന്ന് കണ്ടെത്തിയിരുന്നു. വെള്ളിയാഴ്ച രാത്രി കോട്ടയത്തേക്കുപോയ പ്രധാനാധ്യാപകന്‍ ശനിയാഴ്ച ഉച്ചവരെ സ്‌കൂളില്‍ ഹാജറുള്ളതായി ഹാജര്‍പട്ടിയകയില്‍ രേഖപ്പെടുത്തിയതായും കണ്ടെത്തിയിരുന്നു. ഇക്കാര്യത്തില്‍ റിപ്പോര്‍ട്ട് തയ്യാറാക്കി മടങ്ങിയ ശേഷമാണ് ഡി ഡി യുടെ നിര്‍ദ്ദേശപ്രകാരം വീണ്ടും പരിശോധനക്കെത്തിയത്.

 

 
 
 
Share
SocialTwist Tell-a-Friend

 
 
 

All rights reserved | Website developed and maintained by Zyonz Technologies