15-Dec-2018 (Sat)
 
 
 
 
‍താമരശ്ശേരി പോലീസിന്റെ കാരുണ്യത്തില്‍ ലീലക്കും മക്കള്‍ക്കും സ്വപ്‌ന ഭവനം
   
vps
20-Sep-2018
 

താമരശ്ശേരി: പ്ലാസ്റ്റിക് ഷെഡില്‍ താമസിച്ചിരുന്ന നാലംഗ കുടുംബത്തിന് താമരശ്ശേരി പോലീസിന്റെ കാരുണ്യത്തില്‍ സ്വപ്ന സാഫല്യം. കട്ടിപ്പാറ ചമല്‍ സ്വദേശിനിയായ ലീലക്കും മക്കള്‍ക്കുമാണ് കോണ്‍ക്രീറ്റ് വീട് നിര്‍മിച്ചു നല്‍കി താമരശ്ശേരി പോലീസ് കയ്യടി നേടിയത്. മൂന്ന് വര്‍ഷം മുമ്പാണ് പട്ടികജാതി ഫണ്ടില്‍ നിന്നും ലഭിച്ച 375000 രൂപക്ക് ചമല്‍ നടുക്കുന്നില്‍ 5 സെന്റ് ഭൂമി വാങ്ങിയത്. ഇവിടെ പ്ലാസ്റ്റിക്ക് കൊണ്ട് ഷെഡ് നിര്‍മിച്ച് താമസിക്കുന്നതിനിടെയാണ് ഒരു വര്‍ഷം മുമ്പ് പൊതു പ്രവര്‍ത്തകയായ കെ സരസക്കൊപ്പം ലീല ഒരു പരാതിയുമായി താമരശ്ശേരി പോലീസ് സ്റ്റേഷനിലെത്തിയത്. ലീലയുടെ ജീവിത സാഹചര്യം സരസ താമരശ്ശേരി എസ് ഐ സായൂജ് കുമാറിന്റെ ശ്രദ്ധയില്‍ പെടുത്തിയതിനെ തുടര്‍ന്ന് എസ് ഐ ലീലയുടെ വീട് സന്ദര്‍ശിച്ചു. കൂരിരുട്ടിന് പരിഹാരം കാണാനായിരുന്നു ആദ്യം പോലീസിന്റെ ശ്രമം. പുതുപ്പാടി കെ എസ് ഇ ബി സെക്ഷന്‍ ഓഫീസിലെത്തിയ എസ് ഐ ലീലയുടെ ദുരിത ജീവിതം അറിയിച്ചപ്പോള്‍ പിറ്റേദിവസം തന്നെ കെ എസ് ഇ ബി ജീവനക്കാര്‍ ഇവര്‍ക്ക് വൈദ്യുതി കണക്ഷന്‍ നല്‍കി. വീട് നല്‍കാന്‍ പഞ്ചായത്ത് തയ്യാറായെങ്കിലും റേഷന്‍ കാര്‍ഡ് ഇല്ലാത്തത് വീണ്ടും തടസ്സമായി. തുടര്‍ന്ന് പഞ്ചായത്ത് ഭരണ സമിതി ഇടപെട്ട് ദിവസങ്ങള്‍ക്കകം റേഷന്‍ കാര്‍ഡ് ലഭ്യമാക്കുകയും നാല് ലക്ഷം രൂപ പട്ടികജാതി ഫണ്ടില്‍ നിന്നും വീട് നിര്‍മാണത്തിനായി അനുവധിക്കുകയും ചെയ്തു. നാല് ലക്ഷം രൂപ ചെലവഴിച്ച് സുരക്ഷിതമായൊരു വീട് നിര്‍മിക്കാന്‍ കഴിയില്ലെന്ന് മനസ്സിലാക്കിയ താമരശ്ശേരി പോലീസ് സിമന്റ്, കമ്പി, ടൈല്‍സ്, ജനല്‍ തുടങ്ങിയവ എത്തിച്ചു നല്‍കുകയും പ്രവൃത്തിയുടെ മേല്‍നോട്ടം വഹിക്കുകയും ചെയ്തു. പ്രവൃത്തി പൂര്‍ത്തിയായപ്പോള്‍ ആവശ്യമായ ഫര്‍ണീച്ചറുകളും പോലീസ് എത്തിച്ചു നല്‍കി. വ്യാപാരികള്‍ ഉള്‍പ്പെടെയുള്ളവരുടെ സഹായവും പോലീസിന് ലഭിച്ചു. മുന്‍ ഡി വൈ എസ് പി. പി സി സജീവന്‍, ഇന്‍സ്പെക്ടര്‍ ടി എ അഗസ്റ്റിന്‍ എന്നിവരും കാര്യമായ സംഭാവനകള്‍ നല്‍കി. ലീലയുടെ സ്വപ്ന ഭവനം കട്ടിപ്പാറ ഗ്രാമ പഞ്ചായത്ത് പ്രസിഡന്റ് ബേബി രവീന്ദ്രന്‍ നാട മുറിച്ച് ഉദ്ഘാടനം ചെയ്തു. എസ് ഐ സായൂജ് കുമാര്‍ വീടിന്റെ താക്കോല്‍ ലീലക്ക് കൈമാറി. പഞ്ചായത്ത് വൈസ് പ്രസിഡന്റ് നിധീഷ് കല്ലുള്ളതോട്, അംഗങ്ങളായ പി സി തോമസ്, ബേബി ബാബു, വത്സമ്മ അനില്‍, പൊതു പ്രവര്‍ത്തകരായ ടി സി വാസു, സി പി നിസാര്‍, കെ സരസ, തുടങ്ങിയവര്‍ സംബന്ധിച്ചു.

 

 
 
 
Share
SocialTwist Tell-a-Friend

 
 
 

All rights reserved | Website developed and maintained by Zyonz Technologies