15-Dec-2018 (Sat)
 
 
 
 
‍വെള്ളമുണ്ടയില്‍ ദമ്പതികളെ കൊലപ്പെടുത്തിയ വിശ്വനാഥന്‍ ആറ് ദിവസത്തേക്ക് പോലീസ് കസ്റ്റഡിയില്‍
   
vps
21-Sep-2018
 

മാനന്തവാടി: വെള്ളമുണ്ട ഇരട്ടക്കൊലപാതകക്കേസിലെ പ്രതിയെ ആറു ദിവസത്തേക്ക് പോലീസ് കസ്റ്റഡിയില്‍ വിട്ടു. കുറ്റ്യാടി തൊട്ടില്‍പ്പാലം കാവിലുംപാറ കലിങ്ങോട്ടുമ്മല്‍ വിശ്വനാഥനെയാണ് മാനന്തവാടി ജുഡീഷ്യല്‍ മജിസ്ട്രേറ്റ് തുടരന്വേഷണത്തിനായി പോലീസ് കസ്റ്റഡിയില്‍ വിട്ടത്. ചൊവ്വാഴ്ച്ച രാവിലെയാണ് വിശ്വനാഥനെ പോലീസ് അറസ്റ്റ് ചെയ്തത്. രണ്ടര മാസം കൊണ്ട് അതി സാഹസികമായി നടത്തിയ അന്വേഷണമാണ് പ്രതിയെ കുരുക്കിലാക്കിയത്. ജൂലായ് ആറിനാണ് കണ്ടത്തുവയല്‍ പൂരിഞ്ഞി വാഴയില്‍ ഉമ്മര്‍, ഭാര്യ ഫാത്തിമ എന്നിവരെ മോഷണ ശ്രമത്തിനിടെ വിശ്വനാഥന്‍ തലയ്ക്കടിച്ച് കൊലപ്പെടുത്തിയത്. നിരവധി മോഷണക്കേസുകളില്‍ പ്രതിയായിരുന്ന വിശ്വനാഥന്‍ ഏറെക്കാലം ലോട്ടറി വിറ്റ് നടന്ന് സ്ഥല പരിചയമുണ്ടാക്കിയ ശേഷം മോഷണത്തിനായുള്ള പദ്ധതിയിടുകയായിരുന്നുവെന്ന് പോലീസ് പറഞ്ഞു. മോഷ്ടിച്ചെന്ന് കരുതുന്ന സ്വര്‍ണം ഇയാള്‍ കുറ്റ്യാടിയിലെ ഒരു സേട്ടുവിനായിരുന്നു വിറ്റത്. ഇത് ചൊവ്വാഴ്ച തന്നെ പോലീസ് കണ്ടെടുത്തു. കൊലപാതകം നടന്ന വീട്ടില്‍ നിന്നും കാണാതായ മൊബൈല്‍ ഫോണ്‍ അടക്കമുള്ളവ പ്രതിയുടെ വീട്ടില്‍ നിന്നും കണ്ടെടുത്തു. കൊലപാതകത്തിന് ഉപയോഗിച്ച കമ്പിപ്പാര കൊലപാതകം നടന്ന വീടിന് സമീപത്തെ പ്രദേശത്ത് വലിച്ചെറിയപ്പെട്ട നിലയില്‍ പോലീസ് കണ്ടെത്തി. കോഴിക്കോട്, കാസര്‍ഗോഡ്, കണ്ണൂര്‍, വയനാട്, മലപ്പുറം, പാലക്കാട്, തൃശ്ശൂര്‍ എന്നിവിടങ്ങളിലെ കൊലപാതക മോഷണക്കേസുകളില്‍ പ്രതികളായവരെക്കുറിച്ചുള്ള അന്വേഷണവും ജില്ലാ ജയിലുകള്‍, സെന്‍ട്രല്‍ ജയില്‍ എന്നിവിടങ്ങളില്‍ നിന്ന് മൂന്ന് വര്‍ഷത്തിനുള്ളില്‍ പുറത്തിറങ്ങിയവരെ കുറിച്ചുള്ള അന്വേഷണവുമാണ് പോലീസിനെ വിശ്വനാഥനിലേക്കെത്തിക്കുന്നത്. ഇയാള്‍ മുമ്പും ഇത്തരം കേസുകളില്‍ പെട്ടിരുന്നുവെന്ന് കണ്ടതോടെ അന്വേഷണം ഇയാളിലേക്ക് കേന്ദ്രീകരിക്കുകയായിരുന്നു. പ്രതിയുടെ സാമ്പത്തിക സ്രോതസ്സും ബാധ്യത സംബന്ധിച്ചും നടത്തിയ പഴുതടച്ച അന്വേഷണം അറസ്റ്റ് എളുപ്പമാക്കുകയും ചെയ്തു. ജില്ലാ പോലീസ് മേധാവി ആര്‍ കറുപ്പസ്വാമിയുടെ മേല്‍നോട്ടില്‍ മാനന്തവാടി ഡി.വൈ.എസ്.പി കെ.എം ദേവസ്യയുടെ നേതൃത്വത്തിലുള്ള 28 അംഗ പോലീസ് സംഘമാണ് കേസന്വേഷണത്തിന്റെ ആദ്യം മുതല്‍ ഉണ്ടായിരുന്നത്. പ്രതിയുടെ അറസ്റ്റ് രേഖപ്പെടുത്തി കോടതിയില്‍ ഹാജറാക്കുകയും കോടതി പ്രതിയെ റിമാണ്ട് ചെയ്യുകയുമായിരുന്നു. തുടരന്വേഷണത്തിനായി പ്രതിയെ വിട്ടു കിട്ടണമെന്ന പോലീസിന്റെ അപേക്ഷ പരിഗണിച്ചാണ് ആറ് ദിവസത്തേക്ക് കസ്റ്റഡിയില്‍ വിട്ടുകൊണ്ട് കോടതി ഉത്തരവായത്. വരും ദിവസങ്ങളില്‍ പ്രതിയെ വിവിധ സ്ഥലങ്ങളില്‍ എത്തിച്ച് തെളിവെടുപ്പ് നടത്തും.

 

 
 
 
Share
SocialTwist Tell-a-Friend

 
 
 

All rights reserved | Website developed and maintained by Zyonz Technologies