15-Dec-2018 (Sat)
 
 
 
 
‍മുക്കത്ത് നാലംഗ പോക്കറ്റടി സംഘം പിടിയില്‍
   
vps
22-Sep-2018
 

മുക്കം: സംസ്ഥാന വ്യാപകമായി പോക്കറ്റടി നടത്തി വരുന്ന നാലംഗ സംഘം മുക്കത്ത് പോലീസിന്റെ പിടിയിലായി. കൊച്ചി സ്വദേശിയും മലപ്പുറം കരുവാരക്കുണ്ടില്‍ സ്ഥിരതാമസക്കാരനുമായ വെളളയില്‍ ഭായ് എന്നറിയപ്പെടുന്ന ഹസ്സന്‍ (61), തിരുവമ്പാടി സ്വദേശി മരക്കാട്ടുചാലില്‍ ആഷിഖ്(26), വയനാട് പുല്‍പ്പള്ളി സ്വദേശി വാക്കയില്‍ ബിനോയ്(43), താമരശ്ശേരി അമ്പായത്തോട് സ്വദേശി ഷെമീര്‍ (40) എന്നിവരാണ് പിടിയിലായത്. മലപ്പുറം, വയനാട്, കണ്ണൂര്‍, കോഴിക്കോട്, കാസര്‍ഗോഡ് ജില്ലകളിലായി നിരവധി പോക്കറ്റടി കേസുകളില്‍ പ്രതികളാണ് സംഘമെന്ന് പോലീസ് അറിയിച്ചു. താമരശ്ശേരി ഡി വൈ എസ് പി. പി ബിജുരാജിന് ലഭിച്ച രഹസ്യവിവരത്തെ തുടര്‍ന്ന് മുക്കം എസ് ഐ. കെ പി അഭിലാഷും സംഘവും നടത്തിയ പരിശോധനയിലാണ് പോക്കറ്റടി സംഘം പിടിയിലായത്. ഇവര്‍ താമസിക്കുന്ന സ്വകാര്യ ലോഡ്ജിന് സമീപം പോലീസ് കാവലിരിക്കുകയും പ്രതികളെ പിടികൂടുകയുമായിരുന്നു. സംസ്ഥാനത്തിന്റെ വിവിധ പ്രദേശങ്ങളില്‍ സഞ്ചരിച്ച് രാവിലേയും വൈകുന്നേരങ്ങളിലും തിരക്കുളള ബസ്സുകളില്‍ കയറി പോക്കറ്റടി നടത്തുന്നതാണ് ഇവരുടെ രീതിയെന്ന് മുക്കം എസ് ഐ. കെ പി അഭിലാഷ് പറഞ്ഞു. പണം നഷ്ട്ടപ്പെട്ട ആളുകള്‍ പരാതിപ്പെടാത്തതാണ് ഇവര്‍ പിടിക്കപ്പെടാതിരുന്നതിന് കാരണമെന്നും പോലീസ് പറഞ്ഞു. താമരശ്ശേരി ഡി വൈ എസ് പി യുടെ ക്രൈം സ്‌ക്വാഡ് അംഗങ്ങളായ ഷിബില്‍ ജോസഫ്, ഷെഫീഖ് നീലിയാനിക്കല്‍, മുക്കം പോലീസ് സ്റ്റേഷനിലെ എ എസ് ഐ. ജെയമോദ്, സീനിയര്‍ സി പി ഒ. സലിം മുട്ടത്ത്, ശ്രീജേഷ്, ശ്രീകാന്ത്, ജിതിന്‍ലാല്‍, രജനി എന്നിവരടങ്ങിയ സംഘമാണം പരിശോധന നടത്തിയത്. താമരശ്ശേരി കോടതിയിയില്‍ ഹാജറാക്കിയ പ്രതികളെ 14 ദിവസത്തേക്ക് റിമാന്റ്് ചെയ്തു.

 

 
 
 
Share
SocialTwist Tell-a-Friend

 
 
 

All rights reserved | Website developed and maintained by Zyonz Technologies