13-Dec-2018 (Thu)
 
 
 
 
‍ബ്ലൂ ഫ്‌ലാഗ്; കാപ്പാട് ബീച്ച് അന്താരാഷ്ട്ര നിലവാരത്തിലേക്ക്
   
vps
10-Oct-2018
 

കോഴിക്കോട്: കോഴിക്കോട് കാപ്പാട് ബീച്ചിന് അന്താരാഷ്ട്ര നിലവാരത്തിലുള്ള ബ്ലൂ ഫ്‌ലാഗ് സര്‍ട്ടിഫിക്കേഷന്‍ ലഭ്യമാക്കുന്നതുമായി ബന്ധപ്പെട്ട പ്രാഥമിക പ്രവര്‍ത്തനത്തിന്റെ ഭാഗമായി ബോധവല്‍ക്കരണ ക്ലാസ് നടത്തി. ചേമഞ്ചേരി ഗ്രാമപഞ്ചായത്ത് ഫ്രീഡം ഫൈറ്റേഴ്‌സ് ഹാളില്‍ നടന്ന ബോധവല്‍ക്കരണ ക്ലാസ് ജില്ലാ കലക്ടര്‍ യു വി ജോസ് ഉദ്ഘാടനം ചെയ്തു. ലോകം മുഴുവന്‍ അറിയപ്പെടുന്ന തരത്തിലുള്ള പ്രവര്‍ത്തനമാണ് ബ്ലൂ ഫ്‌ലാഗ് സര്‍ട്ടിഫിക്കറ്റിലൂടെ ലഭ്യമാകുക. കാപ്പാട് ബീച്ച് ബ്ലൂ ഫ്‌ലാഗ് സര്‍ട്ടിഫിക്കേഷനു വേണ്ടി പരിഗണിക്കുന്ന കേരളത്തിലെ ആദ്യ ബീച്ചാണ്. ഇന്ത്യയില്‍ നിന്നും ആകെ പതിനാല് ബീച്ചുകളാണ് ബ്ലൂ ഫ്‌ലാഗിനു വേണ്ടി പരിഗണിച്ചിട്ടുള്ളത്. സര്‍ട്ടിഫിക്കേഷന്‍ ലഭ്യമാകുന്നതോടെ കാപ്പാട് ലോക ടൂറിസം ഭൂപടത്തിലിടം പിടിക്കുമെന്നും ബീച്ചിലെത്തുന്ന ടൂറിസ്റ്റുകളുടെ എണ്ണം പതിന്‍മടങ്ങാകുമെന്നും കലക്ടര്‍ പറഞ്ഞു. ബീച്ച് ടൂറിസത്തില്‍ വെള്ളത്തിന്റെ ഗുണനിലവാരം വളരെ പ്രധാനമാണ്. ബീച്ച് നല്ല രീതിയില്‍ പരിപാലിക്കുന്നതില്‍ തദ്ദേശ വാസികളുടെ പങ്ക് വളരെ വലുതാണ്. ധൈര്യമായി വെള്ളത്തിലിറങ്ങി കുളിക്കാന്‍ കഴിയുന്ന തരത്തില്‍ സംരക്ഷിക്കപ്പെടണം. കേന്ദ്ര പരിസ്ഥിതി വകുപ്പിന്റെ കീഴില്‍ പദ്ധതി തദ്ദേശസ്വയംഭരണ സ്ഥാപനവുമായി സഹകരിച്ചാണ് നടപ്പാക്കുന്നത്. എട്ട് കോടി രൂപയാണ് ഇതിനായി ചെലവഴിക്കുന്നത് നാല് കോടി പദ്ധതിക്കും നാല് കോടി പരിപാലനത്തിനുമാണെന്നും കലക്ടര്‍ പറഞ്ഞു. അന്താരാഷ്ടനിലവാരത്തിലേക്ക് കാപ്പാട് ബീച്ചിനെ കൊണ്ടുവരുന്നതിനും കാര്യങ്ങള്‍ മോണിറ്റര്‍ ചെയ്യുന്നതിനും ബീച്ച് എണ്‍വയേണ്‍മെന്റ് ആന്റ് മാനേജ്‌മെന്റ് സര്‍വീസസ് കമ്മിറ്റി രൂപീകരിച്ചിട്ടുണ്ട്. ഈ കമ്മിറ്റിയായിരിക്കും ബീച്ചിന്റെ നിലവാരമുയര്‍ത്തുന്നതിനുള്ള പ്രവര്‍ത്തനങ്ങള്‍ ഏകോപിപ്പിക്കുക. കേന്ദ്ര പരിസ്ഥിതി വകുപ്പിലെ സഞ്ജയ് ജാല വിവിധ വകുപ്പ് തല ഉദ്യോഗസ്ഥര്‍ക്കും തദ്ദേശ വാസികള്‍ക്കും ബോധവല്‍ക്കരണ ക്ലാസെടുത്തു. പഞ്ചായത്ത് പ്രസിഡണ്ട് അശോകന്‍ കോട്ട്, ടൂറിസം ജോയിന്റ് ഡയറക്ടര്‍ സി എന്‍ അനിത കുമാരി, ഡിടിപിസി എക്‌സിക്യുട്ടീവ് മെമ്പര്‍ കെ ടി രാധാകൃഷ്ണന്‍, ഹാര്‍ബര്‍ എഞ്ചിനീയറിംഗ് എക്‌സി. എഞ്ചിനീയര്‍ മുഹമ്മദ് അന്‍സാരി, കുടുംബശ്രീ മിഷന്‍ കോര്‍ഡിനേറ്റര്‍ പി സി കവിത, ചേമഞ്ചേരി പഞ്ചായത്ത് പ്രസിഡണ്ട് സത്യനാഥന്‍, വാര്‍ഡ് മെമ്പര്‍മാരായ അഫ്‌സ, മനാഫ് തുടങ്ങിയവര്‍ പങ്കെടുത്തു.

 

 
 
 
Share
SocialTwist Tell-a-Friend

 
 
 

All rights reserved | Website developed and maintained by Zyonz Technologies