13-Dec-2018 (Thu)
 
 
 
 
‍ലോകതപാല്‍ ദിനത്തില്‍ ജില്ലാകലക്ടര്‍ക്ക് അഭിനന്ദനക്കത്തുമായി കുരുന്നുകള്‍
   
vps
10-Oct-2018
 

കോഴിക്കോട്: തിക്കോടി ചിങ്ങപുരം വന്‍മുകം എളമ്പിലാട് എംഎല്‍പി സ്‌കൂള്‍ വിദ്യാര്‍ഥികള്‍ ലോകതപാല്‍ ദിനത്തില്‍ കലക്ടറേറ്റിലെത്തി ജില്ലാകലക്ടര്‍ യു വി ജോസിന് അഭിനന്ദന കത്തു കൈമാറി. കേരളത്തെ പ്രളയം വിഴുങ്ങിയപ്പോള്‍ ദുരിതാശ്വാസപ്രവര്‍ത്തനങ്ങളിലും പ്രളയാനന്തരഘട്ടങ്ങളിലും ശ്രദ്ധേയ ഇടപെടലുകള്‍ നടത്തി കോഴിക്കോടിന്റെ പേരും പെരുമയും വാനോളം ഉയര്‍ത്തിയ ജില്ലാകലക്ടര്‍ക്ക് അഭിനന്ദനങ്ങളറിയിച്ചു കത്തു തയാറാക്കിയാണ് നാലാംക്ലാസുകാരായ പതിനാലു വിദ്യാര്‍ഥികള്‍ സ്‌കൂള്‍ലീഡര്‍ ഹൈഫ ഖദീജയുടെ നേതൃത്വത്തില്‍ കലക്ടറുടെ ചേംബറിലെത്തിയത്. ഒത്തിരി ദൂരം സഞ്ചരിച്ചു തന്നെ കാണാനെത്തിയ കൊച്ചുകൂട്ടുകാരെ അഭിനന്ദിച്ച കലക്ടര്‍ അവരോടൊപ്പം അരമണിക്കൂറോളം സംവദിക്കുകയും അവരൊരുമിച്ച്് പാടിയ പ്രാര്‍ഥനാ ഗീതം ആസ്വദിക്കുകയും ചെയ്തു. ദുരിതാശ്വാസ പ്രവര്‍ത്തനങ്ങളുമായി ബന്ധപ്പെട്ട വീഡിയോ ക്ലിപ്പുകളും ടിവി റിപ്പോര്‍ട്ടുകളും കുട്ടികളെ കാണിക്കാറുണ്ടായിരുന്നുവെന്നും ഒരു ടിവി റിപ്പോര്‍ട്ടില്‍ കോഴിക്കോട്ടുകാരുടെ സ്‌നേഹത്തെക്കുറിച്ചു പറയുന്നതിനിടെ കലക്ടറുടെ കണ്ണു നിറഞ്ഞത് അവരില്‍ അദ്ദേഹത്തോടുള്ള മതിപ്പ് ഇരട്ടിയാക്കിയെന്നും അധ്യാപകന്‍ പി കെ അബ്ദുറഹ്മാന്‍ പറഞ്ഞു. കത്തുകളുടെ പ്രാധാന്യത്തെക്കുറിച്ചുള്ള ഓര്‍മപ്പെടുത്തല്‍ കൂടിയായാണ് ഇതിനായി ലോകതപാല്‍ദിനം തന്നെ തിരഞ്ഞെടുത്തതെന്നും അദ്ദേഹം വ്യക്തമാക്കി. വി ടി ഐശ്വര്യ, പി നൂറുല്‍ ഫിദ, നിഹാല്‍ അഫ്‌സല്‍, ആയിശ മെഹ്ന എന്നിവരുടെ നേതൃത്വത്തിലാണ് കുട്ടികളെത്തിയത്.

 

 
 
 
Share
SocialTwist Tell-a-Friend

 
 
 

All rights reserved | Website developed and maintained by Zyonz Technologies