18-Nov-2018 (Sun)
 
 
 
 
‍പ്രളയബാധിതരുടെ പുനരധിവാസം; കുടുംബശ്രീ അംഗങ്ങള്‍ക്ക് സി ഡി എസ് വായ്പാ പദ്ധതി
   
vps
25-Oct-2018
 

പുതുപ്പാടി: പ്രളയബാധിതരുടെ പുനരധിവാസം ഉറപ്പാക്കുന്നതിന് കുടുംബശ്രീ അംഗങ്ങള്‍ക്കായി സംസ്ഥാന സര്‍ക്കാര്‍ പ്രഖ്യാപിച്ച റിസര്‍ജന്റ് കേരള ലോണ്‍ സ്‌കീമില്‍ പങ്കാളികളായി പുതുപ്പാടി പഞ്ചായത്ത് കുടുംബശ്രീ പ്രവര്‍ത്തകര്‍. പ്രളയക്കെടുതിയില്‍ അകപ്പെട്ടവര്‍ക്ക് സര്‍ക്കാര്‍ പ്രഖ്യാപിച്ച ധനസഹായമായ 10000 രൂപ ലഭിച്ച കുടുംബശ്രീ അംഗങ്ങള്‍ക്കായി തിരിച്ചടവ് ഉറപ്പാക്കികൊണ്ട് നടപ്പിലാക്കുന്ന വായ്പ പദ്ധതിയാണ് പുതുപ്പാടിയിലെ അയല്‍ക്കൂട്ടങ്ങളില്‍ നടപ്പാക്കുന്നത്. പ്രളയത്തില്‍ നഷ്ടപ്പെട്ട ഗൃഹോപകരണങ്ങള്‍, വീടിന്റെ ചെറിയ അറ്റകുറ്റപ്പണികള്‍ക്കുള്ള വസ്തുക്കള്‍ എന്നിവ വാങ്ങുന്നതിനോ നഷ്ടമായ ഉപജീവനോപാധികള്‍ നേടുന്നതിനൊ വായ്പാ തുക ഉപയോഗിക്കാം. പരമാവധി ഒരു ലക്ഷം രൂപയാണ് ഒരു അംഗത്തിന് അനുവദിക്കുന്നത്. 4 വര്‍ഷം കൊണ്ട് തിരിച്ചടക്കേണ്ട വായ്പക്ക് 9 ശതമാനമാണ് പലിശ. വീഴ്ച കൂടാതെ വായ്പ തിരിച്ചടക്കുന്നവര്‍ക്ക് മുഖ്യമന്ത്രിയുടെ ദുരിതാശ്വാസ നിധിയില്‍ നിന്നും പലിശ സബ്സിഡിയായിഅനുവദിക്കും. വായ്പ തിരിച്ചടവില്‍ മനപൂര്‍വം വീഴ്ച വരുത്തുന്നവരെ പ്രത്യേക പട്ടികയില്‍ പെടുത്തുകയും തുടര്‍ന്നുള്ള സര്‍ക്കാരിന്റെ എല്ലാ പദ്ധതിയില്‍ നിന്നും ഒഴിവാക്കുകയും ചെയ്യും. നിലവില്‍ കുടുംബശ്രീ അംഗം അല്ലാത്തവര്‍ക്ക് കുടുംബശ്രീയില്‍ അംഗത്വം എടുത്ത് പദ്ധതിയുടെ ഭാഗമാകാവുന്നതാണ്. പുതുപ്പാടി സി ഡി എസിന് കീഴിലെ 9 അയല്‍ക്കൂട്ടങ്ങളില്‍ നിന്നായി 17 പേര്‍ വായ്പക്ക് അപേക്ഷ നല്‍കി. അപേക്ഷ സി ഡി എസ് പരിശോധിച്ചാണ് ബേങ്കില്‍ സമര്‍പ്പിക്കുന്നത്. കനറാ ബേങ്കിന്റെ അടിവാരം ബ്രാഞ്ചില്‍ നിന്നും നാലുപേര്‍ക്കായി നാല് ലക്ഷം രൂപ അനുവദിക്കുകയും ചെയ്തു. അടിവാരം മുപ്പതേക്ര വാര്‍ഡിലെ അനാമിക അയല്‍ക്കൂട്ടത്തിലെ പി സി തങ്കത്തിനും, സതീദേവിക്കും ചെക്ക് നല്‍കി അടിവാരം കനറബാങ്ക് മാനേജര്‍ എ എം ബാലന്‍ പദ്ധതിയുടെ ഉദ്ഘാടനം നിര്‍വഹിച്ചു. സി ഡി എസ് ചെയര്‍പേഴ്സണ്‍ സീന ചന്ദ്രന്‍, വൈസ് ചെയര്‍പേഴ്സണ്‍ ഷീബ സജി, അയല്‍ക്കൂട്ട ഭാരവാഹികളായ സുശീല അജയഘോഷ്, സുഹറാബി സംബന്ധിച്ചു.

 

 
 
 
Share
SocialTwist Tell-a-Friend

 
 
 

All rights reserved | Website developed and maintained by Zyonz Technologies