18-Nov-2018 (Sun)
 
 
 
 
‍പുതുപ്പാടി ബഡ്‌സ് സ്‌കൂള്‍ ആന്റ് റീഹാബിലിറ്റേഷന്‍ സെന്റര്‍ ഉദ്ഘാടനം നവംബര്‍ അഞ്ചിന്
   
vps
01-Nov-2018
 

പുതുപ്പാടി: ഭിന്നശേഷിക്കാരുടെ സംരക്ഷണവും പുനരധിവാസവും ഉറപ്പുവരുത്തി പുതുപ്പാടിയില്‍ ബഡ്‌സ് സ്‌കൂള്‍ ഉദ്ഘാടനത്തിനൊരുങ്ങി. രക്ഷിതാക്കള്‍ക്ക് ആശ്വാസമായി കുടുംബശ്രീയുടെ സഹകരണത്തോടെയാണ് പുതുപ്പാടി ഗ്രാമപഞ്ചായത്ത് കൈതപ്പൊയില്‍ വള്ള്യാട് നിര്‍മ്മിച്ച ബഡ്‌സ് സ്‌കൂള്‍ ആന്റ് റീഹാബിലിറ്റേഷന്‍ സെന്റര്‍ പ്രവര്‍ത്തന സജ്ജമായത്.നവംബര്‍ അഞ്ചിന് രാവിലെ 10 മണിക്ക് നടക്കുന്ന ചടങ്ങില്‍ തദ്ദേശ സ്വയംഭരണ വകുപ്പ് മന്ത്രി എ സി മൊയ്തീന്‍ കെട്ടിടത്തിന്റെ ഉദ്ഘാടനം നിര്‍വഹിക്കും. ജോര്‍ജ് എം തോമസ് എം എല്‍ എ അധ്യക്ഷത വഹിക്കും. ജില്ലാ പഞ്ചായത്ത് പ്രസിഡന്റ് ബാബു പറശ്ശേരി മുഖ്യാതിഥിയാവും. 30 ലക്ഷം രൂപ പുതുപ്പാടി പഞ്ചായത്തും 25 ലക്ഷം രൂപ കുടുംബശ്രീ മിഷനും ചെലവഴിച്ചാണ് പദ്ധതി യാഥാര്‍ഥ്യമാക്കുന്നത്. മൂന്ന് ക്ലാസ് മുറികള്‍, ഓഫീസ്, മികച്ച സൗകര്യങ്ങളോടു കൂടിയ അടുക്കള, ഫിസിയോ തെറാപ്പി യൂണിറ്റ്, രണ്ട് ടോയ്‌ലറ്റുകള്‍ തുടങ്ങി വിപുലമായ സൗകര്യങ്ങളോടു കൂടിയാണ് കെട്ടിടം നിര്‍മ്മിച്ചിരിക്കുന്നത്. ഐസിഡിഎസ് കണക്കെടുപ്പ് പ്രകാരം ഭിന്നശേഷിയുള്ള 163 കുട്ടികളാണ് പുതുപ്പാടി ഗ്രാമപഞ്ചായത്തിലുള്ളത്. ഇതില്‍ 36 പേര്‍ സ്ഥാപനത്തില്‍ പ്രവേശനം നേടിക്കഴിഞ്ഞു. രാവിലെ 10 മുതല്‍ പകല്‍ 3 വരെയാണ് സെന്ററിന്റെ പ്രവര്‍ത്തന സമയം. ടീച്ചര്‍, ആയ, പാചകക്കാരി, ഡ്രൈവര്‍ എന്നിങ്ങനെ നാല് ജീവനക്കാരാണ് സെന്ററിലുള്ളത്. ആയയുടെ നേതൃത്വത്തില്‍ വാഹനത്തില്‍ വീടുകളില്‍ ചെന്ന് വിദ്യാര്‍ഥികളെ സ്ഥാപനത്തിലേക്ക് കൊണ്ടുവരികയും തിരികെ കൊണ്ടാക്കുകയും ചെയ്യും. വൊക്കേഷണല്‍ ട്രെയിനിങിന്റെ ഭാഗമായി തയ്യല്‍, കമ്പ്യൂട്ടര്‍ തുടങ്ങിയവയില്‍ പരിശീലനം നല്‍കും. സ്വകാര്യ സ്ഥാപനങ്ങളില്‍ ഫീസും വാഹനവാടകയും കൊടുത്ത് കുട്ടികളെ അയക്കാന്‍ കഴിയാത്ത രക്ഷിതാക്കള്‍ക്ക് വലിയ ആശ്വാസമാണ് പുതുപ്പാടി പഞ്ചായത്തിന്റെയും കുടുംബശ്രീയുടെയും ഈ സംരംഭം.

 

 
 
 
Share
SocialTwist Tell-a-Friend

 
 
 

All rights reserved | Website developed and maintained by Zyonz Technologies