18-Nov-2018 (Sun)
 
 
 
 
‍തിരുവമ്പാടിയില്‍ മലയോര മഹോത്സവം ജനുവരിയില്‍
   
vps
01-Nov-2018
 

തിരുവമ്പാടി: അതിജീവനത്തിന് ഒരു കൈത്താങ്ങ് എന്ന സന്ദേശവുമായി തിരുവമ്പാടിയില്‍ ജനുവരിയില്‍ മലയോര മഹോത്സവം സംഘടിപ്പിക്കും. തൊണ്ടിമ്മല്‍ ജില്ലാപഞ്ചായത്ത് സ്റ്റേഡിയത്തില്‍ നടക്കുന്ന പരിപാടി പ്രളയത്തില്‍ തകര്‍ച്ചയിലായ പ്രദേശത്തെ കാര്‍ഷിക, വ്യാപാര മേഖലയ്ക്ക് പുത്തനുണര്‍വ് നല്‍കുമെന്നാണ് പ്രതീക്ഷ. ചെറുകിട വ്യവസായികളുടെയും കര്‍ഷകരുടെയും വിപണനമേള എന്നതാണ് മഹോത്സവത്തിന്റെ പ്രധാന ലക്ഷ്യം. മലയോര മഹോത്സവത്തോടനുബന്ധിച്ചുള്ള ആലോചനായോഗം ജില്ലാപഞ്ചായത്ത് പ്രസിഡന്റ് ബാബു പറശ്ശേരിയുടെ നേതൃത്വത്തില്‍ പ്രസിഡന്റിന്റെ ചേമ്പറില്‍ നടന്നു. പച്ചക്കറി, പഴവര്‍ഗങ്ങള്‍, സുഗന്ധ വ്യഞ്ജനങ്ങള്‍ എന്നിവയുടെ ഗ്രേഡിംഗ്, വിപണനം എന്നിവ വിലയിരുത്തി ഉത്പാദകര്‍ക്ക് വരുമാനം ഉറപ്പാക്കുന്നതോടൊപ്പം മുഖ്യമന്ത്രിയുടെ ദുരിതാശ്വാസ നിധിയിലേക്ക് സംഭാവന നല്‍കുന്നതിനുമായാണ് മേള ഒരുക്കുന്നത്. കാര്‍ഷിക വിപണന മേളയോടൊപ്പം സാംസ്‌കാരികമേള, അമ്യൂസ്മെന്റ് പാര്‍ക്ക്, ഫോട്ടോഗ്രാഫി എക്സിബിഷന്‍, ഫ്ളവര്‍ ഷോ, പെറ്റ് ഷോ, സയന്‍സ് ആന്റ് ടെക്നോളജി എക്സിബിഷന്‍, ഫുഡ് ഫെസ്റ്റ്, കുടുംബശ്രീ കലാമേള എന്നിവയും മലയോര മഹോത്സവത്തോടനുബന്ധിച്ച് സംഘടിപ്പിക്കും. സി കെ കാസിം, സുന്ദരന്‍ എ പ്രണവം, കെ കെ ദിവാകരന്‍, അജു ഇമ്മാനുവേല്‍, ഷിജി വാവലുകുന്നേല്‍, പി ടി അഗസ്റ്റിന്‍, ഷാജി ഒ കെ തുടങ്ങിയവര്‍ യോഗത്തില്‍ പങ്കെടുത്തു.

 

 
 
 
Share
SocialTwist Tell-a-Friend

 
 
 

All rights reserved | Website developed and maintained by Zyonz Technologies