18-Nov-2018 (Sun)
 
 
 
 
‍ദുരിതാശ്വാസ ഫണ്ട് തടഞ്ഞുവെച്ചതിനെതിരെ വൃദ്ധയുടെ പ്രതിഷേധം
   
vps
02-Nov-2018
 

കോടഞ്ചേരി: കാലവര്‍ഷ കെടുതിയില്‍ വീട് പൂര്‍ണമായും തകര്‍ന്നുവെന്ന റിപ്പോര്‍ട്ടിനെ തുടര്‍ന്ന് അനുവദിച്ച പണം തടഞ്ഞുവെച്ചതിനെതിരെ വൃദ്ധയുടെ പ്രതിഷേധം. കോടഞ്ചേരി നെല്ലിപ്പൊയില്‍ ചൂരപ്പുഴയില്‍ റോസമ്മയാണ് ബേങ്കില്‍ കുത്തിയിരുന്ന് പ്രതിഷേധിച്ചത്. കഴിഞ്ഞ ജൂണ്‍ മാസത്തില്‍ കോടഞ്ചേരി കരോട്ട് മലയിലുണ്ടായ ഉരുള്‍പൊട്ടലില്‍ റോസമ്മയുടെ വീടിനു മുകളിലേക്ക് കല്ലും മണ്ണും പതിക്കുകയും അപകട ഭീതിയെ തുടര്‍ന്ന് ഇവരെ ദുരിതാശ്വാസ ക്യാമ്പിലേക്ക് മാറ്റുകയും ചെയ്തിരുന്നു. പഞ്ചായത്ത് ഓവര്‍സിയറും വില്ലേജ് ഓഫീസറും വീട് പരിശോധിച്ച് പൂര്‍ണമായും തകര്‍ന്നുവെന്ന റിപ്പോര്‍ട്ട് നല്‍കിയതിനെ തുടര്‍ന്ന് സര്‍ക്കാര്‍ നാല് ലക്ഷം രൂപ വീട് നിര്‍മാണത്തിനായി അനുവദിക്കുകയും ആദ്യ ഘടുവായ ഒരുലക്ഷത്തി ആയിരത്തി തൊള്ളായിരം രൂപ റോസമ്മക്ക് എസ് ബി ഐ യുടെ കോടഞ്ചേരി ബ്രാഞ്ചിലുള്ള അക്കൗണ്ടിലേക്ക് മാറ്റുകയും ചെയ്തു. എന്നാല്‍ പണം പിന്‍വലിക്കാനായി ബേങ്കില്‍ എത്തിയപ്പോഴാണ് ഇത് റവന്യൂ വകുപ്പ് തടഞ്ഞുവെച്ചതായി ബേങ്ക് അധികൃതര്‍ അറിയിച്ചത്. ഇന്നലെ വീണ്ടും ബേങ്കില്‍ എത്തി പണം ആവശ്യപ്പെട്ടെങ്കിലും നല്‍കാന്‍ ആവില്ലെന്ന് ബേങ്ക് അധികൃതര്‍ അറിയിച്ചതോടെയാണ് റോസമ്മ പ്രതിഷേധിച്ചത്. പണം ലഭിക്കാതെ മടങ്ങുന്നതിനിടയില്‍ റോസമ്മക്ക് ദേഹാസ്വാസ്യം അനുഭവപ്പെട്ടു. വിവരം അറിഞ്ഞ് ബേങ്കിലെത്തിയ ഗ്രാമപഞ്ചായത്ത് പ്രസിഡന്റിന്റെ നേതൃത്വത്തിലുള്ള കോണ്‍ഗ്രസ് നേതാക്കള്‍ ബേങ്ക് അധികൃതര്‍ക്കെതിരെ തിരിഞ്ഞതോടെ റോസമ്മ എതിര്‍ത്തു. തഹസില്‍ദാറുടെയും വില്ലേജ് ഓഫീസറുടെയും രേഖാമൂലമുള്ള നിര്‍ദ്ധേശപ്രകാരമാണ് പണം തടഞ്ഞുവെച്ചതെന്ന് ബേങ്ക് മാനേജര്‍ വിശദീകരിച്ചതോടെ പ്രതിഷേധക്കാര്‍ പിന്‍മാറി. വീട് അപകടാവസ്ഥയിലാണെന്നും വാടക വീട്ടിലാണ് താമസിക്കുന്നതെന്നും റോസമ്മ പറഞ്ഞു. ജില്ലയിലെ വിവിധ പ്രദേശങ്ങളില്‍ അനര്‍ഹര്‍ പണം കൈപ്പറ്റിയതായി ജില്ലാ കലക്ടര്‍ക്ക് നിരവധി പരാതികള്‍ ലഭിച്ചിരുന്നുവെന്നും ഇതേ തുടര്‍ന്ന് ഡെപ്യൂട്ടി തഹസില്‍ദാര്‍, പഞ്ചായത്ത് അസിസ്റ്റന്റ് എഞ്ചിനീയര്‍, പൊതുമരാമത്ത് വകുപ്പ് അസിസ്റ്റന്റ് എഞ്ചിനീയര്‍ എന്നിവര്‍ അടങ്ങിയ സംഘം നടത്തിയ പരിശോധയില്‍ റോസമ്മയുടെ വീട് തകര്‍ന്നിട്ടില്ലെന്നാണ് റിപ്പോര്‍ട്ട് ലഭിച്ചതെന്നും താമരശ്ശേരി തഹസില്‍ദാര്‍ സി മുഹമ്മദ് റഫീഖ് പറഞ്ഞു. ഇതേ തുടര്‍ന്നാണ് പണം താല്‍ക്കാലികമായി തടഞ്ഞു വെച്ചത്. എല്‍ എസ് ജി ഡി എക്‌സിക്യൂട്ടീവ് എഞ്ചിനീയര്‍ വീണ്ടും പരിശോധന നടത്തിവരികയാണെന്നും ഈ റിപ്പോര്‍ട്ടിന്റെ അടിസ്ഥാനത്തില്‍ അര്‍ഹമായ പണം അനുവദിക്കുമെന്നും തഹസില്‍ദാര്‍ പറഞ്ഞു.

 

 
 
 
Share
SocialTwist Tell-a-Friend

 
 
 

All rights reserved | Website developed and maintained by Zyonz Technologies