18-Nov-2018 (Sun)
 
 
 
 
‍നിര്‍മ്മാണ രംഗത്ത് സജീവമായി കുടുംബശ്രീയുടെ പിങ്ക് ലാഡര്‍
   
vps
02-Nov-2018
 

കോഴിക്കോട്: കേരളത്തിന്റെ നൂതന വികസന മാതൃകയായ കുടുംബശ്രീ നിര്‍മ്മാണ രംഗത്തും സജീവമാകുന്നു. സ്ത്രീകള്‍ക്ക് അപരിചിതമായ നിര്‍മ്മാണ മേഖലയില്‍ സാങ്കേതിക പരിജ്ഞാനം നല്‍കി സുസ്ഥിരമായ നിര്‍മ്മാണ സംരംഭങ്ങള്‍ സ്ഥാപിച്ച് കുടുംബശ്രീയുടെ പുത്തന്‍ ചുവടുവെപ്പ്, പിങ്ക് ലാഡര്‍. സര്‍ക്കാറിന്റെ വിവിധ ഭവന പദ്ധതികള്‍ നടപ്പാക്കുമ്പോള്‍ ആശ്രയമില്ലാത്തവരും നിസ്സഹായരുമായ കുടുംബങ്ങളുടെ വീട് ചുരുങ്ങിയ ചെലവില്‍ നിര്‍മ്മിക്കുന്നതിനാവശ്യമായ നിര്‍മ്മാണ രീതി അനുവര്‍ത്തിക്കുന്നതിനാണ് പദ്ധതിയിലൂടെ ലക്ഷ്യമിടുന്നത്. മലബാറില്‍ അര്‍ബന്‍ മേഖലയിലെ ആദ്യ സംരംഭമാണിത്. കൊല്ലം, തിരുവല്ല, എറണാകുളം എന്നിവിടങ്ങളില്‍ കുടുംബശ്രീയുടെ നിര്‍മ്മാണ യൂണിറ്റുകള്‍ സജീവമാണ്. 15 പേരടങ്ങുന്ന രണ്ട് യൂണിറ്റുകള്‍ തറ നിര്‍മ്മാണം മുതല്‍ ഫിനിഷിങ്ങ് ജോലികള്‍ വരെ ചെയ്യും. നിര്‍മ്മാണ പരിശീലനത്തിനുള്ള സാമ്പത്തിക സഹായം ജില്ലാ കുടുംബശ്രീ മിഷനും സാങ്കേതിക സഹായം ഏക് സാത്തും നല്‍കും. 10 ലക്ഷം രൂപയുടെ പണി പൂര്‍ത്തിയാക്കിയാല്‍ സര്‍ക്കാര്‍ അംഗീകൃത ഏജന്‍സി പദവിയും പിങ്ക് ലാഡറിന് ലഭിക്കും. പി എം എ വൈ ലൈഫ് ഗുണഭോക്താക്കളായ 50ാം വാര്‍ഡിലെ ശോഭനയുടെയും 7ാം വാര്‍ഡിലെ നന്ദിനിയുടെയും ഭവന നിര്‍മ്മാണമാണ് ആദ്യഘട്ടത്തില്‍ ഏറ്റെടുത്തത്. ബേപ്പൂര്‍ തമ്പി റോഡ് ഇടക്കിട്ട കോവിലകംപറമ്പില്‍ നടന്ന ചടങ്ങില്‍ മേയര്‍ തോട്ടത്തില്‍ രവീന്ദ്രന്‍ തറക്കല്ലിടിലും ഉദ്ഘാടനവും നിര്‍വഹിച്ചു. ഡെപ്യൂട്ടി മേയര്‍ മീരദര്‍ശക് അധ്യക്ഷത വഹിച്ചു. കുടുംബശ്രീ ജില്ലാ മിഷന്‍ കോഓര്‍ഡിനേറ്റര്‍ പി സി കവിത പദ്ധതി വിശദീകരിച്ചു. കോര്‍പ്പറേഷന്‍ ക്ഷേമകാര്യ സ്ഥിരംസമിതി ചെയര്‍പേഴ്‌സണ്‍ അനിത രാജന്‍ കുടുംബശ്രീ അക്രഡിറ്റേഷന്‍ സര്‍ട്ടിഫിക്കറ്റ് വിതരണം ചെയ്തു. കോര്‍പ്പറേഷന്‍ ആരോഗ്യ കാര്യ സ്ഥിരം സമിതി ചെയര്‍മാന്‍ കെ വി ബാബു രാജ്, പൊതുമരാമത്ത് കാര്യ സ്ഥിരം സമിതി ചെയര്‍പേഴ്‌സണ്‍ ടി വി ലളിത പ്രഭ, നഗരാസൂത്രണ കാര്യ സ്ഥിരംസമിതി ചെയര്‍മാന്‍ എം സി അനില്‍കുമാര്‍, കൗണ്‍സിലര്‍ പ്രകാശ് പേരോത്ത് തുടങ്ങിയവര്‍ സംസാരിച്ചു. കോഴിക്കോട് കോര്‍പ്പറേഷന്‍ അഡീഷണല്‍ സെക്രട്ടറി കെ പി വിനയന്‍ സ്വാഗതവും കുടുംബശ്രീ പ്രൊജക്ട് ഓഫീസര്‍ റംസി ഇസ്മായില്‍ നന്ദിയും പറഞ്ഞു.

 

 
 
 
Share
SocialTwist Tell-a-Friend

 
 
 

All rights reserved | Website developed and maintained by Zyonz Technologies