16-Dec-2018 (Sun)
 
 
 
 
‍വൈദികന്റെ വൈരക്കല്ല് തട്ടിപ്പിനിരയായ വ്യവസായി കടക്കെണിയില്‍
   
vps
02-Dec-2018
 

തിരുവമ്പാടി: തിരുവമ്പാടി പുല്ലൂരാംപാറയില്‍ വൈദികന്റെ വൈരക്കല്ല് തട്ടിപ്പിനിരയായ വ്യവസായി കടക്കെണിയിലായി. പുല്ലൂരാംപാറ പ്ലാത്തോട്ടത്തില്‍ അബ്രഹാം ആണ് കോടഞ്ചേരി നെല്ലിപ്പൊയില്‍ സ്വദേശിയും താമരശ്ശേരി രൂപതിയിലെ വികാരിയുമായ ഫാ. ജോസഫ് പാംപ്ലാനിയുടെ തട്ടിപ്പിനിരയായി പെരുവഴിയിലായത്. കണ്ണൂര്‍ ആലക്കോട് ഉദയഗിരി സ്വദേശിയായ ജോയിയുടെ കയ്യില്‍ 200 കോടി വില വരുന്ന വൈരക്കല്ലുണ്ടെന്നും ഒരു കോടി രൂപ നല്‍കിയാല്‍ ബിസിനസില്‍ പങ്കാളിയാക്കാമെന്നും അറിയിച്ചാണ് തിരുവമ്പാടി പുന്നക്കല്‍ സെന്റ് സെബാസ്റ്റ്യന്‍ ചര്‍ച്ച് വികാരിയായിരുന്ന ഫാ. ജോസഫ് പാംപ്ലാനിയും സഹോദരന്‍ സെബാസ്റ്റിയനും അബ്രഹാമിനെ സമീപിച്ചത്. 2014 ജൂണിലായിരുന്നു സംഭവം. കണ്ണൂരിലെ വീട്ടിലെത്തിച്ച് വൈരക്കല്ലെന്ന് തോന്നിപ്പിക്കുന്ന വസ്തു കാണിച്ചു കൊടുക്കുകയും ഒരു കോടി മുടക്കിയാല്‍ 25 കോടി തിരിച്ചു കിട്ടുമെന്ന് വിശ്വസിപ്പിക്കുകയും ചെയ്തു. പിന്നീട് പലപ്പോഴായി വൈദികന്‍ 89.5 ലക്ഷം രൂപ വാങ്ങിയെടുത്തുവെന്നും രണ്ട് വര്‍ഷം കഴിഞ്ഞും മുടക്കുമുതല്‍ പോലും ലഭിക്കാതിരുന്നതോടെ പണം തിരികെ ചോദിച്ചപ്പോഴാണ് കബളിപ്പിക്കപ്പെട്ടതായി മനസ്സിലായതെന്നും അബ്രഹാം പറയുന്നു. വിശ്വാസം മുതലെടുത്താണ് പണം കൈക്കലാക്കിയത്. വീട്ടില്‍ വന്ന് പണം വാങ്ങുമ്പോഴെല്ലാം യേശുവിന്റെ രൂപത്തിന് മുന്നില്‍ നിന്ന് പ്രാര്‍ത്ഥിച്ച് വിശ്വാസം നേടിയെടുക്കുകയായിരുന്നു. പലപ്പോഴായി താമരശ്ശേരി രൂപതാ അധ്യക്ഷന്‍ റെമിജിയോസ് ഇഞ്ചനാനിയലിനെ സമീപിച്ച് പരാതി പറഞ്ഞതിനെ തുടര്‍ന്ന് 18 ലക്ഷം രൂപ തിരിച്ചു നല്‍കി. ബിസിനസിന് ഉപയോഗിച്ചിരുന്ന പണത്തിന് പുറമെ വിവിധ ബേങ്കുകളില്‍നിന്നും ലോണെടുത്തും സ്വര്‍ണാഭരണങ്ങള്‍ പണയപ്പെടുത്തിയുമാണ് പണം നല്‍കിയത്. ഇതോടെ നിലവിലുണ്ടായിരുന്ന ബിസിനസും തകര്‍ന്നു. പോലീസില്‍ പരാതിപ്പെടരുതെന്നും പണം വാങ്ങിത്തരാമെന്നുമുള്ള ബിഷപ്പിന്റെ ഉറപ്പിന്‍മേലാണ് രണ്ട് വര്‍ഷം കാത്തിരുന്നതെന്നും ബേങ്കുകളില്‍ നിന്നും ജപ്തി നോട്ടീസുകളും വരാന്‍ തുടങ്ങിയതോടെമറ്റു മാര്‍ഗ്ഗങ്ങളില്ലാതെയാണ് പരാതി നല്‍കിയതെന്നും അബ്രഹാം പറയുന്നു. സംഭവത്തില്‍ തിരുവമ്പാടി പോലീസ് കേസെടുത്ത് അന്വേഷണം ആരംഭിച്ചതോടെ വൈദികനും സഹോദരനും ഒളിവില്‍ പോയി. കോഴിക്കോട് സെഷന്‍ കോടതിയില്‍ നല്‍കിയ മുന്‍കൂര്‍ ജാമ്യാപേക്ഷ തള്ളിയതോടെ ഹൈക്കോടതിയെ സമീപിച്ചിരിക്കുകയാണ്. അതിനിടെ കൂടുതല്‍ പേര്‍ വൈദികന്റെ തട്ടിപ്പിനിരയായതായും സൂചനയുണ്ട്. വൈദികര്‍ പോലും ഇക്കൂട്ടത്തിലുണ്ടെന്നാണ് സംസാരം. മാനഹാനി ഭയന്നാണ് പലരും പരാതിപ്പെടാത്തതെന്നും രഹസ്യമായി പണം വാങ്ങിയെടുക്കാനുള്ള ശ്രമങ്ങല്‍ നടത്തുന്നുണ്ടെന്നും നാട്ടുകാര്‍ പറയുന്നു.

 

 
 
 
Share
SocialTwist Tell-a-Friend

 
 
 

All rights reserved | Website developed and maintained by Zyonz Technologies