19-Nov-2019 (Tue)
 
 
 
 
‍താമരശ്ശേരി ചുങ്കത്തെ ഗതാഗതക്കുരുക്കിന് പരിഹാരം ആവശ്യപ്പെട്ട് ഓട്ടോ ഡ്രൈവര്‍ രാപ്പകല്‍ നിരാഹാര സമരം നടത്തി
   
vps
26-Sep-2019
 

താമരശ്ശേരി: കോഴിക്കോട് ബാംഗ്ലൂര്‍ ദേശീയ പാതയും കൊയിലാണ്ടി എടവണ്ണ സംസ്ഥാന പാതയും സംഗമിക്കുന്ന താമരശ്ശേരി ചുങ്കത്തെ ഗതാഗതക്കുരുക്കിന് പരിഹാരം ആവശ്യപ്പെട്ട് ഓട്ടോ ഡ്രൈവറുടെ രാപ്പകല്‍ നിരാഹാര സമരം. ചുങ്കത്തെ ഓട്ടോ ഡ്രൈവറായ കെ രത്‌നകുമാറാണ് ചുങ്കം ജംഗ്ഷനില്‍ നിരാഹാര സമരം നടത്തിയത്. നാള്‍ക്കുനാള്‍ കുരുക്ക് വര്‍ധിച്ചു വരുന്നതിനാല്‍ പ്രദേശത്തെ ഓട്ടോ തൊഴിലാളികളും വ്യാപാരികളും ഏറെ പ്രയാസത്തിലാണെന്നും അധികൃതരുടെ കണ്ണ് തുറപ്പിക്കുവാനാണ് ഒറ്റയാന്‍ സമരത്തിനിറങ്ങിയതെന്നും രത്‌നകുമാര്‍ പറഞ്ഞു. ചുങ്കത്തെ കുരുക്കഴിക്കാന്‍ മാറി മാറി വന്ന പഞ്ചായത്ത് ഭരണ സമിതിയോ സര്‍ക്കാറോ തയ്യാറായിട്ടില്ല. വയനാട്ടില്‍ നിന്നും കോഴിക്കോട് മെഡിക്കല്‍ കോളേജിലേക്ക് രോഗികളെയുമായി വരുന്ന ആമ്പുലന്‍സുകള്‍ ഉള്‍പ്പെടെ കുരുക്കില്‍ പെടുന്നത് പതിവ് കാഴ്ചയാണെന്നും ഇതിന്ന് പരിഹാരം ഉണ്ടാവണമെന്നും രത്‌നകുമാര്‍ പറഞ്ഞു.

 

2017 സെപ്റ്റംബറില്‍ ചെണ്ടമേളത്തിന്റെ അകമ്പടിയോടെ വായമൂടിക്കെട്ടി പ്രതിഷേധ നടത്തം സംഘടിപ്പിച്ചിരുന്നു. രണ്ട് വര്‍ഷം പിന്നിടുമ്പോഴും യാതൊരു നടപടിയും ഉണ്ടാവാത്തതിനെ തുടര്‍ന്നാണ് നിരാഹാര സമരം നടത്തിയത്. രാപ്പകല്‍ സമരം ഗ്രാമപഞ്ചായത്ത് പ്രസിഡന്റ് ഹാജറ കൊല്ലരു കണ്ടി ഉദ്ഘാടനം ചെയ്തു. പഞ്ചായത്ത് അംഗം കെ കെ സരസ്വതി അധ്യക്ഷത വഹിച്ചു. പഞ്ചായത്ത് അംഗങ്ങളായ പി എം ജയേഷ്, ജസ്സി ശ്രീനിവാസന്‍, വിവിധ സംഘടനാ പ്രതിനിധികളായ കെ വി സെബാസ്റ്റ്യന്‍, ഗിരീഷ് തേവള്ളി, മുഹമ്മദ് കുട്ടിമോന്‍, പി യു വിനോദ്, കെ കെ മജീദ് തുടങ്ങിയവര്‍ സംസാരിച്ചു. ചൊവ്വാഴ്ച രാവിലെ ചുങ്കം ജംഗ്ഷനില്‍ ആരംഭിച്ച സമരം ബുധനാഴ്ച രാവിലെ അവസാനിപ്പിച്ചു.
 
 
 
Share
SocialTwist Tell-a-Friend

 
 
 

All rights reserved | Website developed and maintained by Zyonz Technologies