മരുമകളുടെ അവിഹിതബന്ധം നേരില്‍ കണ്ട ഭര്‍ത്താവിന്റെ മാതാപിതാക്കളെ കെട്ടിയിട്ട് കത്തിച്ചു; യുവതിയും കാമുകനും അറസ്റ്റില്‍
ന്യൂഡല്‍ഹി: മരുമകളുടെ അവിഹിതബന്ധം നേരില്‍ കണ്ട ഭര്‍ത്താവിന്റെ മാതാപിതാക്കളെ കെട്ടിയിട്ട് കത്തിച്ചു. പഞ്ചാബിലെ ഹോഷിയാര്‍പൂര്‍ ജില്ലയിലാണ് വയോധിക ദമ്പതികളെ ക്രൂരമായി കൊലപ്പെടുത്തിയത്. സംഭവത്തില്‍ യുവതിയെയും കാമുകനെയും അറസ്റ്റ് ചെയ്തു. ജനുവരി ഒന്നിനായിരുന്നു അരുംകൊല നടന്നത്. കത്തിക്കരിഞ്ഞ നിലയിലായിരുന്നു ഇരുവരുടെയും മൃതദേഹം കണ്ടെത്തിയത്. മഞ്ജീത് സിങ്, ഭാര്യ ഗുര്‍മീത് സിങ് എന്നിവരാണ് കൊല്ലപ്പെട്ട ദമ്പതികള്‍.
യുവതിയുടെ വിവാഹേതര ബന്ധം കണ്ടെത്തിയതിനെ തുടര്‍ന്ന് മരുമകളും കാമുകനും ചേര്‍ന്ന് ദമ്പതികളെ ക്രൂരമായി കൊലപ്പെടുത്തുകയായിരുന്നുവെന്ന് പൊലീസ് വ്യക്തമാക്കി. ദമ്പതികളുടെ മകനായ രവീന്ദര്‍ സിങ് രാത്രിയില്‍ ജോലി കഴിഞ്ഞ് വീട്ടിലെത്തിയപ്പോള്‍ ഗേറ്റ് അകത്തുനിന്ന് പൂട്ടിയ നിലയിലായിരുന്നു. തുടര്‍ന്ന് വീടിനുള്ളില്‍ കടന്നപ്പോള്‍ ദമ്പതികളെ കസേരയില്‍ കെട്ടിയിട്ടശേഷം കത്തിച്ച നിലയിലുമാണ് കണ്ടത്. തുടര്‍ന്ന് മകന്‍ പൊലീസിനെ വിവരം അറിയിക്കുകയായിരുന്നു. അന്വേഷണത്തില്‍ മരുമകളും കാമുകനും ചേര്‍ന്നാണ് കൊല നടത്തിയതെന്ന് കണ്ടെത്തി. തുടര്‍ന്ന് കൊലപാതകം, ക്രിമിനല്‍ ഗൂഡാലോചന എന്നീ കുറ്റങ്ങള്‍ ചുമത്തി അറസ്റ്റ് ചെയ്യുകയായിരുന്നു.
