മാടായിപ്പാറയില്‍ സില്‍വര്‍ ലൈന്‍ സര്‍വേക്കല്ലുകള്‍ പിഴുതു മാറ്റി റീത്ത് വെച്ചു
കണ്ണൂര്‍: മാടായിപ്പാറയില്‍ സില്‍വര്‍ ലൈന്‍ സര്‍വേക്കല്ലുകള്‍ പിഴുതു മാറ്റി റീത്ത് വച്ചു. എട്ട് സര്‍വേ കല്ലുകളാണ് റോഡരുകില്‍ കൂട്ടിയിട്ട് റീത്ത് വെച്ചത്. നേരത്തെ രണ്ട് തവണ മടായിപ്പാറയില്‍ സര്‍വേ കല്ലുകള്‍ പിഴുത് മാറ്റിയിരുന്നു. സംഭവത്തില്‍ പഴയങ്ങാടി പൊലീസ് അന്വേഷണം ആരംഭിച്ചു. ഇത്തരം നടപടികളുമായി മുന്നോട്ട് പോകുന്ന ആളുകള്‍ക്കെതിരെ കൃത്യമായ നടപടി ഉണ്ടാകുമെന്ന് മുഖ്യമന്ത്രി നേരത്തെ വ്യക്തമാക്കിയിരുന്നു. അത്തരത്തില്‍ കര്‍ശനമായ നിയമനടപടികളിലേക്ക് കടക്കുമോയെന്ന് അറിയേണ്ടതുണ്ട്.
കഴിഞ്ഞ ആഴ്ച മാടായിപ്പാറയില്‍ കെ-റെയില്‍ സര്‍വേകല്ല് പിഴുത സംഭവത്തില്‍ ചിത്രം ഫേസ്ബുക്കില്‍ പങ്കുവച്ച വ്യക്തിക്കെതിരെ പൊലീസ് കേസെടുത്തിരുന്നു. പിഴുതുമാറ്റിയ സര്‍വേ കല്ലിന്റെ ഫോട്ടോ ഫേസ്ബുക്കില്‍ പങ്കുവച്ച യൂത്ത് കോണ്‍ഗ്രസ് മണ്ഡലം പ്രസിഡന്റ് പുത്തന്‍പുരയില്‍ രാഹുലിനെതിരെ പഴയങ്ങാടി പൊലീസ് കേസെടുത്തിരുന്നു. ‘പണി തുടങ്ങി’ എന്ന തലക്കെട്ടോടെയാണ് കെ-റെയില്‍ സര്‍വേ കല്ലിന്റെ ഫോട്ടോ രാഹുല്‍ തന്റെ ഫേസ്ബുക്ക് ടൈംലൈനില്‍ പങ്കുവച്ചത്. രാഹുല്‍ കലാപാഹ്വാനം നടത്തിയെന്നാണ് പരാതി.
