ഓണ്‍ലൈനായി വാച്ച് ഓര്‍ഡര്‍ ചെയ്ത യുവാവിന് ലഭിച്ചത് വെള്ളം നിറച്ച കോണ്ടം
എറണാകുളം: ഓണ്‍ലൈനായി വാച്ച് ഓര്‍ഡര്‍ ചെയ്ത യുവാവിന് ലഭിച്ചത് വെള്ളം നിറച്ച കോണ്ടം. എറണാകുളം കരുമാലൂര്‍ തട്ടാംപടി സ്വദേശി അനില്‍കുമാറാണ് കബളിപ്പിക്കപ്പെട്ടത്. രണ്ട് ദിവസം മുമ്പാണ് അനില്‍കുമാര്‍ ഓണ്‍ലൈനായി 2200 രൂപയുടെ വാച്ച് ഓര്‍ഡര്‍ ചെയ്തത്. ശനിയാഴ്ച ഉച്ചക്ക് കൊറിയറുമായി രണ്ട് യുവാക്കള്‍ വീട്ടിലെത്തി. കൊറിയറുമായി എത്തിയ യുവാക്കള്‍ക്ക് അനില്‍കുമാര്‍ പണം നല്‍കി.
പൊതിക്ക് അസാധാരണമായ ഭാരം തോന്നിയതിനാല്‍ സാധനം കൊണ്ടുവന്നവരുടെ മുന്നില്‍വെച്ച് തന്നെ അനില്‍കുമാര്‍ പേക്കറ്റ് പൊട്ടിച്ച് തുറന്ന് നോക്കി. അപ്പോഴാണ് പേക്കറ്റില്‍ വാച്ചിന് പകരം കോണ്ടത്തില്‍ വെള്ളം നിറച്ചതാണെന്ന് മനസിലായത്. ഉടന്‍ തന്നെ യുവാക്കളെ തടഞ്ഞുവെച്ച് പൊലീസില്‍ വിവരമറിയിക്കുകയായിരുന്നു. ഓണ്‍ലൈന്‍ കമ്പനിയാണോ കൊറിയര്‍ ഏജന്‍സിയാണോ പരാതിക്കാരനെ കബളിപ്പിച്ചതെന്നറിയാന്‍ അന്വേഷേണം നടത്തുകയാണെന്ന് പൊലീസ് അറിയിച്ചു.
