വലിയകുളങ്ങരയില്‍ ചതുപ്പില്‍ കണ്ടെത്തിയത് കാണാതായ കെട്ടിട നിര്‍മാണ തൊഴിലാളിയുടെ മൃതദേഹം
ആലപ്പുഴ: ആലപ്പുഴ കാര്‍ത്തികപ്പള്ളി വലിയകുളങ്ങരയില്‍ ചതുപ്പിനുള്ളില്‍ കണ്ടെത്തിയത് മാസങ്ങള്‍ക്ക് മുന്‍പ് കാണാതായ കെട്ടിട നിര്‍മാണ തൊഴിലാളിയുടെ മൃതദേഹം. കന്യാകുമാരി സ്വദേശി സേവ്യന്റെ മൃതദേഹമാണ് ചതുപ്പിനുള്ളില്‍ കണ്ടെത്തിയത്. സേവ്യറിനെ കാണാതായതു മുതല്‍ കുടുംബം ദുരൂഹത ആരോപിച്ചിരുന്നു. സംഭവത്തില്‍ തൃക്കുന്നപ്പുഴ പൊലീസ് വിശദമായ അന്വേഷണം തുടങ്ങി. ചതുപ്പു വൃത്തിയാക്കുന്നതിനിടെ കഴിഞ്ഞ ദിവസം ഉച്ചയോടെയാണ് സേവ്യറിന്റെ മൃതദേഹം കണ്ടെത്തുന്നുത്. വസ്ത്രവും മറ്റും പരിശോധിച്ച് മൃതദേഹം കാണാതായ കെട്ടിട നിര്‍മ്മാണ തൊഴിലാളി സേവ്യറിന്റേത് ആണെന്ന് പൊലീസ് തിരിച്ചറിഞ്ഞു.
കഴിഞ്ഞ ഒക്ടോബര്‍ 14, രാത്രി മുതലാണ് സേവ്യറിനെ കാണാതാവുന്നത്. ഇയാള്‍ എവിടെ പോയതെന്ന് ഒപ്പം ജോലി ചെയ്തവരോ, കോണ്‍ട്രാക്ടറോ വ്യക്തമായ മറുപടി നല്‍കാതെ വന്നതോടെ സംഭവത്തില്‍ കുടുംബം ദുരൂഹത ആരോപിച്ചിരുന്നു. തുടര്‍ന്ന് പ്രത്യേക പൊലീസ് സംഘം അന്വേഷണം നടത്തിയെങ്കിലും സേവ്യറിനെ കണ്ടെത്താന്‍ സാധിച്ചില്ല. സേവ്യര്‍നെ കാണാതായ പണി സ്ഥലത്തോട് ചേര്‍ന്ന ചതുപ്പ് പ്രദേശത്തുനിന്നാണ് ഇപ്പോള്‍ മൃതദേഹം കണ്ട് കിട്ടിയത്. പ്രദേശത്തെ സി സി ടി വി ദൃശ്യങ്ങളും മൃതദേഹത്തിന്റെ ശാസ്ത്രീയ പരിശോധനയും പൊലീസ് ആരംഭിച്ചു. കൊലപാതക സാധ്യത ഉള്‍പ്പെടെയാണ് അന്വേഷിക്കുന്നതെന്ന് തൃക്കുന്നപ്പുഴ പൊലീസ് പറഞ്ഞു.
