സുഭാഷ് ചന്ദ്രബോസിന്റെ ഹോളോഗ്രാം പ്രതിമ രാജ്യത്തിന് സമര്‍പ്പിച്ച് പ്രധാനമന്ത്രി
ന്യൂഡല്‍ഹി: സുഭാഷ് ചന്ദ്രബോസിന്റെ ഹോളോഗ്രാം പ്രതിമ രാജ്യത്തിന് സമര്‍പ്പിച്ച് പ്രധാനമന്ത്രി. ഇന്ത്യാ ഗേറ്റിലാണ് നേതാജിയുടെ ഹോളോഗ്രാം പ്രതിമ അനാച്ഛാദനം ചെയ്തത്. സുഭാഷ് ചന്ദ്രബോസിന്റെ 125-ാം ജന്മവാര്‍ഷിക ദിനത്തോടനുബന്ധിച്ചാണ് ആദരം. രാജ്യത്തിന് ഇത് ചരിത്ര ദിനമാണെന്ന് പ്രതിമ അനാച്ഛാദനം ചെയ്ത് സംസാരിക്കവെ പ്രധാനമന്ത്രി നരേന്ദ്ര മോദി പറഞ്ഞു.
പ്രശസ്ത ശില്‍പി അദ്വൈത് ഗഡനായകാണ് നേതാജിയുടെ പ്രതിമയും പണിതത്. ഒഡീഷ സ്വദേശിയായ അദ്വൈത് ഡല്‍ഹി രാജ് ഘട്ടിലെ ദണ്ഡിയാത്രയുടെ ശില്‍പവും പണി കഴിപ്പിച്ചിട്ടുണ്ട്. 28 അടി നീളവും ആറ് അടി വീതിയുമുള്ള പ്രതിമ അദ്വൈതിന്റെ നേതൃത്വത്തിലുള്ള 25-30 ശില്‍പികള്‍ ചേര്‍ന്നാണ് പണിതത്. നേതാജി ശക്തനായതുകൊണ്ട് തന്നെ ശക്തമായ കല്ല് തന്നെ നിര്‍മാണത്തിനായി ഉപയോഗിക്കണമെന്ന് ശില്‍പി അദ്വൈത് ഗഡനായക് തീരുമാനിച്ചു. അങ്ങനെ കറുത്ത ഗ്രാനൈറ്റ് ഉപയോഗിച്ചാണ് ശില്‍പം പണിതിരിക്കുന്നത്. എട്ട് മാസമെടുത്താണ് പണി പൂര്‍ത്തീകരിച്ചത്.
