ഓട്ടോയിലെ സ്റ്റീരിയോ വില്‍ക്കാന്‍ ശ്രമിക്കുന്നതിനിടെ മോഷ്ടാവ് പിടിയില്‍
ബേപ്പൂര്‍: മോഷ്ടിച്ച ഓട്ടോയിലെ സ്റ്റീരിയോ വില്‍ക്കാന്‍ ശ്രമിക്കുന്നതിനിടെ മോഷ്ടാവ് പിടിയില്‍. ബേപ്പൂര്‍ കുണ്ടായിത്തോട് പറമ്പത്ത് വീട്ടില്‍ പി വി ഷമീറിനെയാണ് പൊലീസ് പിടികൂടിയത്. ചാലിയം കുടുംബാരോഗ്യ കേന്ദ്രത്തിന് സമീപം കെ എല്‍ 55 കെ 3324 നമ്പര്‍ ഓട്ടോയുമായി എത്തിയ പ്രതി മറ്റ് ഓട്ടോക്കാരോട് താക്കോല്‍ ചോദിക്കുകയും സ്റ്റീരിയോ വില്‍പന നടത്താന്‍ ശ്രമിക്കുകയുമുണ്ടായി. സംശയം തോന്നിയ ചാലിയത്തെ ഓട്ടോ ഡ്രൈവര്‍മാര്‍ കടലുണ്ടി പൊലീസ് ഔട്ട് പോസ്റ്റില്‍ വിവരം അറിയിക്കുകയായിരുന്നു.
തുടര്‍ന്ന് എസ് ഐ. പി പ്രദീപ് കുമാറിന്റെ നേതൃത്വത്തില്‍ പൊലീസ് സ്ഥലത്തെത്തി നടത്തിയ അന്വേഷണത്തില്‍ ഓട്ടോ താനൂരില്‍ നിന്ന് മോഷ്ടിച്ചതാണെന്ന് കണ്ടെത്തി. ഓട്ടോ പൊലീസ് കസ്റ്റഡിയിലെടുത്തു. ഓട്ടോയുടെ ഉടമയെ കണ്ടെത്തി വിവരം അറിയിക്കാന്‍ പൊലീസ് ശ്രമം ആരംഭിച്ചു. എ എസ് ഐ. പി അരുണ്‍ കുമാര്‍, സി പി ഒ. കെ വിനീഷ് എന്നിവരാണ് അന്വേഷണ സംഘത്തിലുണ്ടായിരുന്നത്. കോടതിയില്‍ ഹാഹരാക്കിയ പ്രതിയെ റിമാന്‍ഡ് ചെയ്തു.
