കൊച്ചിയില് 500 കിലോ പഴകിയ ഇറച്ചി പിടികൂടി
കൊച്ചി: കളമശ്ശേരിയില് നിന്ന് 500 കിലോ പഴകിയ ഇറച്ചി പിടികൂടി. കളമശ്ശേരി കൈപ്പട മുകളിലെ വീട്ടില് നിന്നാണ് ഇറച്ചി പിടികൂടിയത്. കളമശ്ശേരി നഗരസഭ ആരോഗ്യ വിഭാഗത്തിന്റെ നേതൃത്വത്തിലായിരുന്നു പരിശോധന. പാലക്കാട് സ്വദേശി ജുനൈസിന്റേതാണ് സ്ഥാപനം. സ്ഥാപനത്തില് അഞ്ച് ജീവനക്കാരുണ്ടായിരുന്നുവെങ്കിലും നടത്തിപ്പുകാര് ആരും പരിശോധന നടക്കുമ്പോള് സ്ഥലത്തുണ്ടായിരുന്നില്ല.
കൊച്ചിയിലെ വിവിധ ഹോട്ടലുകളില് ഷവര്മ അടക്കമുള്ള വിഭവങ്ങള് ഉണ്ടാക്കി വിതരണം ചെയ്യാന് സൂക്ഷിച്ച ഇറച്ചിയാണ് പിടികൂടിയത്. പിടിച്ചെടുത്ത മാംസവും അഴുകി തുടങ്ങിയിരുന്നുവെന്നാണ് ആരോഗ്യവിഭാഗം ഉദ്യോഗസ്ഥര് പറയഞ്ഞത്. പരിശോധനയില് 150 കിലോഗ്രാം പഴകിയ എണ്ണയും പിടിച്ചെടുത്തു. ഫുഡ് ലൈസന്സ് ഇല്ലാതെയാണ് ഇത്രയേറെ ഇറച്ചി സൂക്ഷിച്ചതെന്ന് ആരോഗ്യവിഭാഗം ഉദ്യോഗസ്ഥര് പറഞ്ഞു. പിടിച്ചെടുത്ത ഇറച്ചി നശിപ്പിക്കുമെന്നും സ്ഥാപനത്തിന്റെ നടത്തിപ്പുകാര്ക്ക് പിഴ ഈടാക്കുമെന്നും ഉദ്യോഗസ്ഥര് കൂട്ടിച്ചേര്ത്തു.
ആറ് മാസമായി ഈ സ്ഥാപനത്തില് നിന്നും നഗരത്തിലെ വിവിധ ഹോട്ടലുകളിലേക്ക് മാംസം വിതരണം ചെയ്യുന്നുണ്ട്. വ്യാഴാഴ്ച്ച രാവിലെയും ഇവിടെ നിന്ന് കൊച്ചിയിലെ വിവിധ ഹോട്ടലുകളിലേക്ക് ഇറച്ചി കൊണ്ടു പോയിരുന്നുവെന്ന് ജീവനക്കാര് ഉദ്യോഗസ്ഥരോട് പറഞ്ഞു. തമിഴ്നാട്ടില് നിന്നാണ് അഴുകിയ കോഴിയിറച്ചി കൊണ്ടുവരുന്നത് എന്നാണ് വിവരം.
Read Also: കൊല്ക്കത്തയില് വന് തീപിടിത്തം; ഒരാള്ക്ക് പരുക്കേറ്റു