പെരുവണ്ണാമുഴിയില്‍ കഞ്ചാവുമായി വീട്ടില്‍ ഒളിച്ചിരുന്ന പ്രതിയെ പോലീസ് പിടികൂടി
പേരാമ്പ്ര: കഞ്ചാവുമായി വീട്ടില്‍ ഒളിച്ചിരുന്ന പ്രതിയെ പോലീസ് പിടികൂടി. സൂപ്പിക്കട പാറേമ്മല്‍ ലത്തീഫിനെ (47) ആണ് പെരുവണ്ണാമുഴി പോലീസ് അറസ്റ്റ് ചെയ്തത്. നാലുമണിക്കൂര്‍ നീണ്ട കാത്തിരിപ്പിനൊടുവിലാണ് പ്രതിയെ പിടികൂടിയത്. ഇയാള്‍ സൂക്ഷിച്ച 2.760 കിലോഗ്രാം കഞ്ചാവ് പരിശോധനയില്‍ കണ്ടെടുത്തു.
Read also:താനൂരില്‍ അപകടത്തില്‍പ്പെട്ട ബോട്ടിന്റെ ഉടമ നാസര്‍ കോഴിക്കോട്ട് പിടിയില്‍
സൂപ്പിക്കട മദ്രസ സ്റ്റോപ്പിലെ വാടകവീട്ടിലാണ് കഞ്ചാവ് സൂക്ഷിച്ചിരുന്നത്. പെരുവണ്ണാമൂഴി പോലീസിന് ലഭിച്ച രഹസ്യവിവരത്തിന്റെ അടിസ്ഥാനത്തില്‍ ഇന്‍സ്‌പെക്ടര്‍ കെ സുഷീറിന്റെ നേതൃത്വത്തില്‍ ഇവിടെ പോലീസ് ചൊവ്വാഴ്ച ഉച്ചയോടെ പരിശോധനയ്‌ക്കെത്തി. ഈ വിവരമറിഞ്ഞ ലത്തീഫ് വീട്ടില്‍ കതകടച്ചിരിക്കുകയായിരുന്നു. പോലീസ് പല തവണ ആവശ്യപ്പെട്ടിട്ടും വാതില്‍ തുറന്നില്ല. ഒടുവില്‍ കൂടുതല്‍ പോലീസെത്തി രാത്രി 7.30ഓടെ എസ് ഐ. ആര്‍ സി ബിജുവിന്റെ നേതൃത്വത്തില്‍ ബലപ്രയോഗത്തിലൂടെ കീഴ്‌പ്പെടുത്തുകയായിരുന്നു.
